Xov xwm luv tshaj tawm hnub zwj Quag (Tuesday news 14.01.2025):
Txij hnub tim 1 lub 1 hlis ntuj xyoo 2025 mus ces tej tswv lagluam uas tsis them nyiaj hauj lwm raws li qhov tsim nyog rau Australia tej neeg ua hauj lwm yuav raug nplua nyiaj txog li ntawm $8 million los yog yuav raug kaw 10 xyoo.
Tej neeg ua hauj lwm tu tsom kwm tej laus txog li 340,000 tus yuav tau nyiaj hauj lwm ntau tuaj ntxiv xyoo tshiab no txog tshaj 13 feem pua tom qab tsoom fwv teb chaws nqes peev nyiaj yuav laug txog $4 billion los pab tej neeg no txij xyoo tshiab 2025 no mus.
Tej neeg Australia uas mob cancer mis thiab cancer noob qes yuav tau ob co tshuaj tshiab los kho lawv tom qab nom tswv tau coj mus teev zwm nrog cov tshuaj pab cuam PBS, uas yuav pab kom tej neeg txuag tau nyiaj ntau pua dollars ib xyoos twg.
Labor tus nom tswj dej num noj qab haus huv tau cog lus tias nws yuav ua tib zoo los xyuas kom tej neeg tau siv cov Medicare zoo tshaj qub ntxiv rau nws cov kev nrhiav suab xaiv tsa thiab xaiv nom lub 5 hlis ntuj 2025 no, tom qab uas muaj tsoom fwv tau tawm los hais lus tsis pom zoo nrog Cleanbill tsab ntawv cej luam tshiab tias muaj neeg siv cov bulk billing tsawg thiab tej neeg mob yuav tau them tej nqe kho mob kim tuaj ntxiv uas tsoom fwv tau qhia tsaib no tias tau siv cov bulk billing ntau tuaj ntxiv txog 3 npaug.
Meskas tus President Joe Biden kuj muaj kev cia siab tias yuav muaj peev xwm sib khom xaus tsov rog ntawm Israel thiab Hamas rau lub caij nws los qhia txog Meskas tej cai txawv teb chaws ua ntej nws yuav tso tseg tsis ua nom rau hnub tim 20 lub 1 hlis ntuj 2025 tias pab kom Meskas muaj fwj chim tuaj ntxiv, pab nws tej teb chaws phooj ywg thiab kom tej neeg phem tsis txhob muaj zog.
Tej zaum neeg Australia kuj yuav tau them tej nqe insurance tsev kim tuaj ntxiv rau lub caij tseem muaj hav zoov kub hnyiab loj ntawm Meskas txuas ntxiv uas yuav ua rau muaj kev puas tsuaj rau ntiaj teb cov huab cua pauv hloov uas yuav ua rau tej nqe premium kim tuaj ntxiv. Raws li lub koom haum Australia Institute cov kev tshuaj ntsuam ces tej xwm txheej ntuj tsim kev puas tsuaj twb tau ua rau Australia tej nqe insurance kim tshaj tej kab theem nyiaj poob nqe lawm.
Tseem muaj cua hlob txuas ntxiv uas yuav ua rau tsis muaj peev xwm tswj tau ob kob hav zoov kub hnyiab ntawm Los Angeles vim lub koom haum National Weather Services kwv yees tias Santa Ana qhuav heev thiab yuav muaj cua hlob txog 80 txog 112 km/hr ces thiaj muaj cov kev ceeb toom tsam muaj kev phom sij loj rau tej hav zoov kub hnyiab.
Tsoom fwv cov kev pab nyiaj ntau tshaj $40 million dollars yuav tau txiaj ntsim rau tej neeg mob autism thiab lawv tej niam tej txiv kom muaj peev xwm ntsuam tus mob no thiab tsim cov kev kho mob kom siv tau zoo tuaj ntxiv.
Lub chaw kaw neeg Yongah Hill Immigration Detention Centre ntawm Western Australia raug txheeb tau tias tau muab tej neeg kaw ntawm lub yeej no yam tsis muaj chav plob thiab tsis muaj dej siv uas tej koom haum pab tej neeg thoj nam hais tias yog ib cov kev tsis hwm tib neeg tej cai. Lub koom haum Commonwealth National Preventative Mechanism Ombudsman tsab ntawv cej luam qhia tias Australia Border Force yog tus tswj lub chaw no.
Russia lub tuam chav tiv thaiv teb chaws qhia tias nws tua tau Ukraine ib cov drones uas xa mus tua Russia tus kav xa gas TurkStream thiab qhia tias yog ib cov energy terrorism. Txawm li cas los kuj tsis ua rau puas tsuaj los yog muaj neeg tuag li cas.
Muaj tej neeg yam tsawg li 100 leej uas mus khawb kub txhaum cai ntawm ib lub chaw khawb kub tau khuam daig ntawm lub qhov khawg kub nyob sab hnub poob qaum teb tau ntau hli ntawm teb chaws South Africa.
Nom tswv xeev NSW tau qhua hu kom tej neeg caij tsheb mus claim cov toll relief payments uas tseem tshuav nyiaj txog li ntawm $140 million dollars uas tsis tau mus claims yog lawv them cov tolls tshaj $60 txij li nws tau hais kom tej neeg mus claim lub 1 hlis ntuj xyoo 2024.
The Laotian Times tau qhia tias Nplog thiab Cob Tsib ob tug nom tau pom zoo yuav los kho Nplog tej hauv paus txhim kho rau cov kev ya dav hlau, kho lub chaw nres nkog Vung Ang thiab ua kev tsheb ciav hlaub ntawm Vientiane mus rau lub chaw nres nkoj no thiab ua ib txoj kev ntawm Vientiane mus rau Hanoi.
Bangkok Post tau tshaj tawm tias Thaib lub tsev kis xeev siab koj pom zoo khob tsab cai nuv ntses uas yuav tso cai txhom ntses hmo ntuj thiab siv tau tej moo muaj cov qhov moo me dua 2.5 cm.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab mloog tau caum los yog lwm cov podcast platforms (, , thiab ).
