Ntsiab lus tseem ceeb:
- Muaj tej poj niam uas tsiv tawm ntawm tej teeb meem kub ntxhov hauv lub cuab yig ntau tuaj ntxiv ras los ua tej neeg tsis muaj vaj tse nyob.
- Cov kev pab cuam rau tej neeg tsis muaj vaj tse nyob yeej muaj peev xwm pab ntau tshaj qhov nrhiav tau ib qho chaw kiag tam sim rau tej neeg ntsib cov teeb meem no nyob nkaus xwb.
- Thaum tau txais kev nyab xeeb lawm, ces yus yeej muaj peev xwm mus thov cov kev pab cuam hauv online los yog ntau cov kev pab cuam ntawm yus tej nom tswv xeev tau.
- Hu rau lub koom haum 1800RESPECT kom pab nrhiav tsev rau yus nyob yog tias yus tsiv tawm ntawm tej teeb meem kub ntxhov hauv lub cuab yig.
Tsab ntawv cej luam txheeb pej xeem (2021) yeej qhia tias ib hmo twg ntawm teb chaws Australia yeej muaj tej neeg tsis tau vaj tse nyob coob tshaj 122,000 tus neeg.
Lub ntsab lus ntawm cov kev tsis muaj vaj tse nyob tseem nthuav dav tshaj qhov tsis tau ib lub tsev rau yus nyob lawm thiab, uas yeej kuav tej xwm txheej uas tej neeg sib koom nyob coob heev hauv ib lub tsev twg, cov kev mus qev ib tug twg chaw pw, cov kev pw hauv yus lub tseb, los yog cov kev nyob ntawm tej chaw nyob ib ntus rau lub caij yus raug teeb meem kub ntxhov.
Feem ntau ces tej koom haum tsis nce rau tsoom fwv (Non-government organisations - NGOs) uas tau nyiaj pab ntawm nom tswv xeev thiab nom tswv teb chaws yeej yog tej uas npaj tej chaw pw rau tej neeg ntsib teeb meem kub ntxhov uas tsis muaj vaj tse nyob xwb.
Tej crisis accommodation yog npaj rau leej twg siv?
Jed Donoghue uas yog tus Homelessness National General Manager nrog lub koom haum Salvation Army, uas yog Australia ib lub koom haum pab tej neeg tsis muaj vaj tse nyob loj tshaj plaws uas pab tej chaw pw no yog cov uas tau txais kev nyab xeeb, yog ib cov chaw uas tau nyob ruaj ib ntus rau tej neeg uas xav tau chaw nyob kiag tam sim no vim lawv poob rau ntau yam xwm txheej.
Nws hais tias “Muaj ntau txoj xub ke ua rau ib tug twg ras los ua neeg tsis muaj vaj tse nyob li ib tug twg poob hauj lwm, tsis muaj tej tsev pheej yig ntiav tau nyob, txom nyem, muaj mob ntau yam los yog muaj kev nyuaj siab ntxhov plawv.”
Tau muaj tej poj niam coob tuaj ntxiv uas tsiv tawm ntawm tej teeb meem kub ntxhov hauv lub cuab yig ras los ua tej neeg tsis muaj vaj tse nyob lawm. Source: Getty / ArtistGNDphotography
Tej poj niam uas tsiv tawm ntawm tej teeb meem kub ntxhov hauv lub cuab yig
Lub koom haum Australian Bureau of Statistics (ABS) tsab ntawv cej luam qhia tias tau muaj tej poj niam uas yuav ras los ua cov neeg sis muaj vaj tse nyob ntau tuaj ntxiv txog 10.1 feem pua txij xyoo 2016 lawm.
Thiab raws li Annabelle Daniel uas yog tus coj lub koom haum pab nrhiav chaw nyob rau tej poj niam (Women’s Community Shelters - WCS) hais ces yeej paub tseeb tias muaj tej poj niam uas tsiv tawm ntawm tej teeb meem kub ntxhov hauv lub cuab yig yog cov yuav ras los ua cov neeg tsis muaj vaj tse nyob coob tuaj ntxiv.
Nws hais tias ''Tej zaum lawv kuj raug cais ntawm ntau cov kev pab cuam, tej zaum lawv kuj raug lwm tus tsim teeb meem nyiaj txiaj rau lawv. Tej zaum lawv kuj tsis tau nyiaj siv kom muaj peev xwm nthiav tau tsev nyob vim rau qhov muaj neeg sib tw ntiav tsev coob heev. Tag nrho tej hais no kuj yog tej laj thawj qhia tias vim li cas tej poj niam thiaj yog cov neeg ras los ua tej neeg tsis muaj vaj tse nyob.''
Ms Daniel hais tias “Lub koom haum Women's Community Shelters yeej ua hauj lwm nrog tej zejzog thoob NSW thiab nthuav dav tshaj ntawd, kom muaj peev xwm npaj tau cov crisis accommodation shelters tshiab rau tej poj niam, me nyuam tsiv tawm ntawm tej teeb meem kub ntxhov hauv lub cuab yig tau nyob.''
“Tej chaw nyob no yog ib co chaw yuav pab kom tau ib qho chaw nyob nyab xeeb, muaj cov case workers pab, los sis tau kev pab cuam ntawm tej zejzog rau tej neeg ntiag tug los yog lawv tsev neeg rau lub caij li ntawm 3 lub hlis.''
Tsis tas li ntawd los lub koom haum no kuj pab tej poj niam nrhiav tej xub ke kom muaj peev xwm nrhiav tau tej vaj tse uas muaj peev xwm ntiav tau nyob, nrhiav tau tsev nyob ruaj thiab tau nyob rau qhov chaw uas tsis muaj neeg ua phem rau lawv.
Tsis tas li ntawd los lub koom haum WCS yeej koom tes nrog tsoom fwv xeev ib cov kev pab cuam hauv xov tooj thiab tej kev pab cuam hauv tej zejzog.
Thiab yog tau txais kev nyab xeev siv koj lub computer los yog koj lub xov tooj lawm, ces koj muaj peev xwm mus txheeb tau lub koom haum Women's Community Shelters los sis mus txheeb tau ntawm lub vas sab womenscommunityshelters.org.au.
Ms Daniel hais tias tej neeg uas paub ua tej hauj lwm no mam li qhia thiab pab yus daws ntau yam teeb meem kub ntxhov hauv lub cuab yig thiab tej kev tsis muaj vaj tse nyob.
Tsis xav kom koj mloog tau tias zoo li koj yog tib tug raug tej xwm txheej no xwb. Vim yeej muaj tej kws paub zoo txog tej hauj lwm no coob heev thiab tej zejzog yuav pab koj.Annabelle Daniel, CEO, Women's Community Shelters
Ib tug txiv neeg hluas puas cev tsis muaj vaj tse nyob zaum hauv laub ntawm kev. Credit: LaraBelova/Getty Images
Hos hais txog lwm cov neeg uas tsiv tawm ntawm tej teeb meem kub ntxhov hauv lub cuab yig ne?
Safe Steps ces yog xeev Victoria ib cov kev pab cuam hauv xov tooj 24 teev 7 hnub pab rau tej neeg ntsib teeb meem kub ntxhov hauv lub cuab yig. Yog ib cov kev pab cuam rau tej neeg muaj hnoob nyoog ntau yam sib txawv, tsis hais poj niam los yog txiv neej, los yog tej neeg LGBTQI+ los sis yog tej neeg puas cev, tej neeg uas muaj ntau yam visa sib txawv siv kom tau txais cov kev pab cuam tsi ntsees coj los pab lawv tsiv tawm ntawm tej teeb meem kub ntxhov hauv lub cuab yig.
Nicole Abdilla ces yog tus tswj cov hauj lwm Residential Services ntawm cov kev pab cuam Safe Steps. Nws hais tias cov kev pab cua li Safe Steps no muaj peev xwm xa tej neeg mus thov kev pab cuam nrog tej kws paub daws tej teeb meem kub ntxhov hauv lub cuab yig tsi ntsees thiab thov lwm cov kev pab cuam uas pab rau tej neeg tsiv teb tsaws chaw thiab pab cuam cai lij choj.
Nws hais tias “Peb yuav txheeb seb ho puas muaj kev phom sij dab tsi rau tej neeg ntawd thiab npaj ib cov tswv yim pab kom lawv tau txais kev nyab xeeb, thiab nrhiav tej xub ke ntau yam pab kom lawv tau txais kev pab cuam thiab tau tej chaw nyob thoob plaws ntawm xeev Victoria, li xyuas kom tau tej chaw nyob uas pub yug tej pets, koom tes nrog lwm cov tuam chav los pab nyiaj txiaj thiab tej khoom siv, thiab nrhiav kev pab cuam los yog cov kev taw qhia txog tej plaub ntug cuam tshuam txog lub cuab yig thiab nrhiav kev pab rau tej neeg puas cev.''
“Yog tias thaum txheeb tau tias ib tug twg yuav raug kev phom sij loj, ces peb yuav pab nrhiav chaw nyob rau lub caij lawv tseem raug teeb meem. Tsis hais tej chaw nyob ntawd yuav yog ib lub tsev tos qhua, Victorian refuge los yog ib hom chaw nyob ntawm 3 hom no rau tus neeg ntawd nyob.''
Yog tias ib tug twg ho txhawj txog nws tus kheej, los yog ib tug neeg twg cov kev nyab xeeb, ces muaj peev xwm hu tau rau cov kev pab cuam Safe Steps tus xov tooj 1800 015 188 lub caij twg los tau, los sis xa email rau safesteps.org.au los yog siv lawv cov Web Chat.
Yog thaum txheeb tau tias tej neeg yuav raug teeb meem loj ces yuav xa mus nrhiav tsev rau lawv nyob rau lub caij lawv tseem ntsib teeb meem. Source: Getty / David Freund
Koj puas tau txais kev nyab xeeb tam sim no?
Thaum koj hu xov tooj thov cov kev pab cuam li Safe Steps rau lub caij koj tseem ntsib teeb meem ces lawv yeej yuav nug ib co lus nug rau koj txog tej xwm txheej uas koj tab tom ntsib tam sim no.
Ms Abdilla hais tias ''Ces thaum nrog lawv tham ces lawv yuav nug tias: 'tam sim no koj puas tau txais kev nyab xeeb?' Thiab yog tias ib tug twg hais tias tau txais kev nyab xeeb yuav sib tham tau, ces mam li nrhiav xov xwm ntxiv kom thiaj muaj peev xwm txheeb tau tias seb tus neeg ntawd puas yuav raug kev phom sij dab tsi.''
Thiab yog tias koj tsis hais lus Askiv ua thawj hom lus, ces koj muaj peev xwm thov ib tug twg pab txhais lus sawv cev rau koj tau — tej zaum tus neeg ntawd kuj yog koj ib tug phooj ywg, yog ib tug ntawm tej koom haum pab cuam zejzog, yog ib tug kws kho mob los sis yog ib tug neeg ntawm koj chav kawm ntawv Askiv los tau.
Muaj neeg coob tuaj ntxiv xav tau cov kev pab cuam no
Yog tej yam tsis muaj hmoo uas ntawm teb chaws Australia no ces yeej muaj neeg xav tau tej chaw nyob ntau tshaj qhov muaj peev xwm nrhiav tau pab rau tej neeg rau lub caij lawv ntsib teeb meem lawm thiab.
Lub koom haum Salvation Army yeej kub siab nrog xyuas kom nrhiav tau tej kev pab cuam no, thiab yeej tau pab tej neeg tsis muaj vaj tse nyob ze txog li 40,000 tus, thiab pab nrhiav tej txaj 850,000 lub rau tej neeg pw ib xyoos twg. Thiab lub koom haum no yeej pab tej neeg sawv daws tsis hais lawv yuav poob rau tej xwm txheej li cas li.
Koj muaj peev xwm mus txheeb lub koom haum no tej kev pab cuam hauv online seb ho muaj tej koom haum ze tshaj plaws ntawm koj li cas thiab teem caij mus ntsib lawv. Tsis tas li ntawd los lawv kuj muaj peev xwm xa kom mus thov lwm cov kev pab cuam pub rau tej neeg tsis muaj vaj tse nyob thoob plaws teb chaws Australia no thiab.
Tej xeev feem coob los yeej muaj tib qho chaw uas tej neeg yeej muaj peev xwm siv tau cov kev pab cuam rau tej neeg tsis muaj vaj tse nyob thiab. Koj muaj peev xwm mus google los lus 'Crisis accommodation' ces yuav tau tej xov xwm ntau yam thiab tau lawv tej xov tooj.
Muaj tej neeg xav tau tej kev pab cuam no ntau tshaj qhov peb muaj peev xwm pab tau lawv lawm. Source: Getty / imamember
Qee cov kev pab cuam chaw nyob rau tej neeg ntsib teeb meem kub ntxhov:
Call 1800RESPECT for housing support for people escaping domestic and family violence
Tej nyiaj pab cuam rau tej neeg txom nyem heev uas ntsib teeb meem kub ntxhov
Justin Bott uas yog tus kis ntawm lub koom haum Services Australia hais tias tej zaum koj kuj yuav yog ib tug neeg muaj cai tau tsoom fwv cov nyiaj pab cuam crisis payment thiab.
Tej nyiaj no ces muaj pab rau tej neeg uas raug yuam kom tsiv tawm ntawm lawv tej vaj tse thiab txom nyem nyiaj txiaj siv.
Mr Bott hais tias "Yog cov nyiaj uas tsuas pab tib zaug xwb, thiab tsis tas them se yog tias koj twg yog ib tug neeg uas tab tom tau nyiaj pab cuam ib yam dab tsis li, los yog tau cov JobSeeker thiab koj poob rau tej xwm txheej nyuaj heev.''
Yog tias koj yog tus neeg zoo li hais no, kuv xav kom kub siab sib txuas lus nrog peb kiag tam sim no, vim koj yuav tsum tau thov cov crisis payment rau lub caij 7 hnub uas koj ntsib tej teeb meem no.Justin Bott, Services Australia
Lub koom haum Services Australia los yeej muaj tus xov tooj 131 202 uas tham ua ntau yam lus thiab nws lub vas sab los yeej raug muab txhais ua ntau yam ntawv thiab.
Ces lub koom haum no mam li txheeb tej nyiaj uas yuav them ua ntuv zus rau koj txawm tias koj tsis nyob ruaj rau ib qho chaw twg. Tab sis xav kom koj qhia rau lawv paub yog tias muaj ib yam dab tsi txawv txav lawm. Ces lawv yuav nrog koj npaj kom thiaj sib cuag tau — tsis hais yog xyuas kom koj tau ib lub post office box siv, paub koj ib tug phooj ywg, los yog ib tug neeg ntawm koj tsev neeg los yog xyuas kom koj paub mus nrhiav lwm cov kev pab cuam ntawm koj zos.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab mloog tau caum los yog lwm cov podcast platforms (, , thiab ).
