ການຣົນນະຣົງ ຢ່າງບໍ່ເປັນທາງການໄດ້ເລີ້ມຂຶ້ນແລ້ວ.
Peter Dutton ຜູ້ນໍາພັກຝ່າຍຄ້ານ ໄດ້ປະກາດວ່າ ພັກ Liberal "ກັບຄືນມາແລ້ວ" ໃນການ ເປີດການຣົນນະຣົງ ຢ່າງບໍ່ເປັນທາງການ ຂອງລາວ ຢູ່ພາກຕາເວັນອອກ ຂອງເມືອງ Melbourne ໃນວັນເສົາ (12 ເດືອນມັງກອນ).
Mr Dutton ກ່າວວ່າ ຄ່າຄອງຊີບ, ພະລັງງານນິວເຄລັຍ ແລະການຍ້າຍຖິ່ນຖານ ຈະເປັນຫົວຂໍ້ສໍາຄັນທີ່ສຸດ ຂອງພັກ ຖ້າຫາກພັກ Liberal ຊນະການເລືອກຕັ້ງ, ຕາມ Wing Kuang ແລະ Tys Occhiuzzi ລາຍງານ.
"ຂ້າພະເຈົ້າ ຢາກກ່າວຊ້ຳ ສິ່ງທີ່ຂ້າພະເຈົ້າໄດ້ກ່າວມາກ່ອນ ໃນຫລາຍໂອກາດ, ພັກ Liberal, ທັງໃນລະດັບຂອງຣັດ ແລະກາງ, ໄດ້ "ກັບຄືນມາແລ້ວ."
ນັ້ນຄື ຜູ້ນໍາຝ່າຍຄ້ານ Peter Dutton ໃນການເປີດການຣົນນະຣົງ ຢ່າງບໍ່ເປັນທາງການ ຂອງລາວໃນ Melbourne ກ່ອນການເລືອກຕັ້ງຂອງຣັຖບານ ທີ່ກຳລັງຈະມາເຖິງ.
Mr Dutton ກ່າວຈາກ Chisholm ຊຶ່ງເປັນເຂດເລືອກຕັ້ງ ທີ່ສະມາຊິກສະພາ ແມ່ນຄົນຂອງພັກLabor. Mr Dutton ໄດ້ສເນີຕົວເອງ ວ່າເປັນນາຍົກຣັຖມົນຕີ ຄົນຕໍ່ໄປຂອງອອສເຕຣເລັຍ ໃນຂນະທີ່ ອະທິບາຍຄໍາໝັ້ນສັນຍາ ຂອງການເລືອກຕັ້ງຂອງພັກ.
ຄໍາໝັ້ນສັນຍານັ້ນ ຮວມເຖິງການຮັບມື ກັບຄວາມກົດດັນເລື່ອງຄ່າຄອງຊີບ, ການສ້າງພະລັງງານນິວເຄລັຍ ແລະການສົ່ງເສີມ ທຸຣະກິດ ຂນາດນ້ອຍ.
"ການປັບຄວາມສົມດຸນ ຂອງໂຄງການຍ້າຍຖິ່ນຖານ ແລະການແກ້ໄຂວິກິດການ ທີ່ຢູ່ອາສັຍ ຂອງເຮົາ ຈະເປັນສິ່ງສໍາຄັນທີ່ສຸດ ສໍາລັບຣັຖບານ Coalition. Labor ໄດ້ເປີດປະຕູການຍ້າຍຖິ່ນຖານ, ຜູ້ຍ້າຍຖິ່ນຖານຫນຶ່ງລ້ານຄົນ ໄດ້ມາເຖິງ ໃນສອງປີທໍາອິດ ຂອງພັກ Labor. ການຍົກຍ້າຍຖິ່ນຖານ ເປັນສິ່ງທີ່ດີສໍາລັບປະເທດເຮົາ, ແຕ່ຈໍາເປັນ ຕ້ອງມີການຈັດການທີ່ດີ."
Mr Dutton ຍັງໃຫ້ສັນຍາ ວ່າຈະເພີ່ມຈຳນວນ ນາຍໝໍຫລາຍຂຶ້ນ, ສ້າງຄວາມສໍາພັນທີ່ໃກ້ຊິດກັບ Israel ແລະຈັດການຢ່າງເຄັ່ງຄັດ ກັບອາດຊະຍາ ກັມ.
"ຫມູ່ເພື່ອນທັງຫຼາຍ, ນີ້ເປັນປີໃຫມ່, ແລະມັນເປັນປີທີ່ສໍາຄັນ ສໍາລັບປະເທດຂອງເຮົາ. ປີນີ້, ຊາວອອສເຕຣເລັຍ ຈະມີໂອກາດ ທີ່ຈະກໍາຈັດຣັຖບານທີ່ອ່ອນແອ ແລະຂາດຄວາມສາມາດ ທີ່ເຮັດໃຫ້ປະເທດຂອງເຮົາຖອຍຫຼັງ. ປີນີ້, ຊາວອອສເຕຣເລັຍ ຈະມີໂອກາດເລືອກຕັ້ງ ຣັຖບານໃຫມ່, ຣັຖບານ Coalition ໃຫມ່ທີ່ເຂັ້ມແຂງ, ເຮັດໃຫ້ປະເທດຂອງເຮົາ ກັບຄືນໄປສູ່ເສັ້ນທາງ."
ແຕ່ບໍ່ແມ່ນທຸກຄົນ ທີ່ເຊື່ອ ໃນຄໍາປາສັຍຂອງ Mr Dutton.
ຢູ່ນອກການຊຸມນຸມ ຂອງພັກ Liberal, ຜູ້ປະທ້ວງກຸ່ມຫນຶ່ງ ໄດ້ຮ້ອງຂຶ້ນວ່າ ເຂົາເຈົ້າຕໍ່ຕ້ານ ນະໂຍບາຍພະລັງງານນິວເຄລັຍ ຂອງ Mr Dutton.
ນັ້ນແມ່ນສຽງຮ້ອງ ຂອງຜູ້ມາປະທ້ວງ ຢູ່ນອກຫ້ອງຊຸມນຸມ.
ພັກ Liberal ຢາກເອົາຊນະຄືນ ບ່ອນນັ່ງຂອງ Chisholm ແລະ Aston, ຊຶ່ງເຂົາເຈົ້າ ໄດ້ສູນເສັຍໃຫ້ພັກ Labor ໃນໄລຍະການເລືອກຂອງຣັຖບານໃນປີ 2022 ແລະການເລືອກຕັ້ງສ້ອມ ໃນປີ 2023.
ທັງ Chisholm ແລະ Aston ມີປະຊາກອນຊາວຈີນ ຈຳນວນຫລາຍ-ເກືອບຫນຶ່ງສ່ວນສາມ ຂອງຜູ້ອາສັຍ ຢູ່ໃນເຂດ Chisholm ມີເຊື້ອສາຍຈີນ, ໃນຂນະທີ່ 14.1 ເປີເຊັນ ຂອງຈໍານວນປະຊາກອນ ໃນເຂດ Astonເປັນຄົນຈີນ.
Dr Zareh Ghazarian ເປັນນັກຣັຖສາດ ຈາກມະຫາວິທະຍາໄລ Monash.
ລາວກ່າວວ່າ ສອງບ່ອນນັ່ງນັ້ນ ເປັນຈຸດສໍາຄັນ ສໍາລັບໄຊຊນະຂອງ Coalition ໃນການເລືອກຕັ້ງທີ່ຈະມາເຖິງ.
"ສໍາລັບ Coalition, ການທົດສອບ ແມ່ນຢູ່ເຂດນອກເມືອງ ທາງຕາເວັນອອກ ຂອງ Victoria. ນັ້ນຄື ບ່ອນນັ່ງທີ່ສຳຄັນ. ບ່ອນນັ່ງ ເຊັ່ນ Chisholm ແລະ Aston ຊຶ່ງຝ່າຍຄ້ານ, ຝ່າຍ Coalition ລະບຸວ່າ ເປັນບ່ອນນັ່ງ ທີ່ມັນຕ້ອງການຊນະແທ້ໆ. ເຂົາເຈົ້າມີສ່ວນແຕກຕ່າງ (Margin) ທີ່ຫນ້ອຍກວ່າສີ່ເປີເຊັນ. ສະນັ້ນ, ໃນຄືນເລືອກຕັ້ງ ພວກເຮົາຈຶ່ງເຫັນວ່າ ນີ້ຄືບ່ອນນັ່ງທີ່Coalition ກໍາລັງມີຄວາມຄືບໜ້າ."
ການເປີດໂຕ ຂອງການຣົນນະຣົງ ແບບເບົາໆ ຂອງ Peter Dutton ໄດ້ມາເຖິງ ຫລັງຈາກນາຍົກຣັຖມົນຕີ Anthony Albanese ໄດ້ເລີ່ມຕົ້ນການຣົນນະຣົງ ຢ່າງບໍ່ເປັນທາງການ ຂອງ Labor ອາທິດຜ່ານມານີ້ ໃນQueensland ແລະ Western Australia.
Mr Albanese ໄດ້ສັນຍາວ່າ ຈະລົງທຶນຢ່າງຫລວງຫລາຍ ໃນໂຄງສ້າງພື້ນຖານ (Infrastructure) ແລະທີ່ຢູ່ອາສັຍ, ຮວມທັງ ການຍົກລະດັບເສັ້ນທາງ Bruce Highway ຂອງ Queensland ແລະເງິນ 200 ລ້ານໂດລາສໍາລັບທີ່ຢູ່ອາສັຍ ໃນພູມີພາກ ຂອງ Western Australia.
Dr Ghazarian ກ່າວວ່າ Labor ບໍ່ສາມາດ ສູນເສັຍບ່ອນນັ່ງ ຖ້າຫາກຍັງຢາກເປັນຣັຖບານຕໍ່ໄປ.
"ພັກ Labor ແລະນາຍົກຣັຖມົນຕີ Anthony Albanese ຈະຢູ່ໃນຕໍາແຫນ່ງທີ່ລຳບາກ, ເມື່ອປຽບທຽບໃສ່ກັບປີ 2022 ເມື່ອທຸກຢ່າງ ເປັນໄປຕາມທີ່ເຂົາເຈົ້າຕ້ອງການ. ຕອນນັ້ນ, ເຂົາເຈົ້າກໍາລັງ ປະເຊີນຫນ້າກັບນາຍົກຣັຖມົນຕີ Scott Morrison ທີ່ບໍ່ເປັນທີ່ນິຍົມ, ຊຶ່ງເປັນຣັຖບານ Coalition ທີ່ຂາດຄວາມນິຍົມຊົມຊອບ. ເທື່ອນີ້ ສິ່ງຕ່າງໆແຕກຕ່າງຫນ້ອຍຫນຶ່ງ. ເທື່ອນີ້ແມ່ນ Albanese ແລະ Labor ທີ່ເບິ່ງຄືວ່າ ບໍ່ເປັນທີ່ນິຍົມ."
ການເລືອກຕັ້ງຣັຖບານ ໃນປີ 2022 ກໍໄດ້ເຫັນການປາກົດໂຕຂຶ້ນ ຂອງກຸ່ມອິດສຣະ, ທີ່ຮູ້ຈັກກັນໃນນາມ Teals, ຊຶ່ງໄດ້ຊິງບ່ອນນັ່ງ ຈາກພັກໃຫຍ່, ໂດຍສະເພາະຈາກພັກ Liberal.
Dr Ghazarian ກ່າວວ່າກຸ່ມ Teals ໄດ້ຮັບປໂຍດ ຈາກຄວາມບໍ່ເປັນທີ່ນິຍົມຊົມຊອບ ຂອງອະດີດນາຍົກຣັຖມົນຕີ Scott Morrison, ຄວາມກັງວົນທີ່ເພີ່ມຂຶ້ນ ກ່ຽວກັບການປ່ຽນແປງ ຂອງສະພາບອາກາດ, ແລະການຂາດຄວາມຊື່ສັດສຸດຈຣິດ ທາງການເມືອງ ຊຶ່ງເຫັນໄດ້ຢ່າງຊັດເຈນ.
ແລະບັດນີ້, Dr Ghazarian ກ່າວວ່າ ກຸ່ມອິດສຣະເຫລົ່ານີ້ ຕ້ອງພິຈາຣະນາວ່າ ບັນຫາເຫລົ່ານີ້ ຍັງເປັນຈຸດສໍາຄັນ ຂອງການຣົນນະຣົງຫາສຽງ ຂອງເຂົາເຈົ້າຫລືບໍ່.
"ແລະຖ້າເປັນເຊັ່ນນັ້ນ, ເຂົາເຈົ້າ ຈະໄດ້ຮັບ ການສນັບສນູນທີ່ເຂົາເຈົ້າໄດ້ຮັບໃນປີ 2022 ອີກຫຼືບໍ່. ສະນັ້ນ, ມັນຈຶ່ງເປັນເລື່ອງຍາກ ສໍາລັບກຸ່ມອິດສຣະ ທີ່ຈະຊນະບ່ອນນັ່ງ. ແຕ່ມັນກໍເປັນເລື່ອງຍາກ ສໍາລັບພັກໃຫຍ່ທີ່ຈະຊນະບ່ອນນັ່ງ ຂອງກຸ່ມອິດສຣະ ໃນການເລືອກຕັ້ງຄັ້ງຕໍ່ໄປ."
ວັນເລືອກຕັ້ງຣັຖບານກາງ ຍັງບໍ່ໄດ້ຖືກເປີດເຜີຍ ແຕ່ຕ້ອງຖືກຈັດຂຶ້ນກ່ອນເດືອນພຶດສະພາ ປີນີ້ (2025).
ເນື້ອເລື່ອງໂດຍ Tys Occhiuzzi ແລະ Wing Kuang ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດ ຕິດຕາມຂ່າວສານຫຼ້າສຸດ ຈາກອອສເຕຣເລັຍ ແລະທົ່ວໂລກ ເປັນພາສາລາວ ຈາກເອສບີເອສ ລາວ ໄດ້ທີ່ເວັບໄຊ້ຕ໌
