ການຫາສຽງໄດ້ເລີ້ມແລ້ວໂດຍທັງສອງພັກ.
ການຄາດເດົາກໍາລັງເພີ່ມຂຶ້ນ ກ່ຽວກັບການເລືອກຕັ້ງຣັຖບານກາງ ອອສເຕຣເລັຍ ວ່າຈະມີຂຶ້ນເມື່ອໃດ-ຊຶ່ງຕ້ອງມີຂຶ້ນ ກ່ອນກາງເດືອນພຶດສະພາ.
ເຖິງແມ່ນວ່າ ຍັງບໍ່ມີວັນຢ່າງເປັນທາງການ, ທັງນາຍົກຣັຖມົນຕີ ແລະຜູ້ນໍາຝ່າຍຄ້ານ ກໍເລີ້ມທຳການຫາສຽງ, ໄປຢ້ຽມຢາມເຂດເລືອກຕັ້ງ ແລະປະກາດເລື່ອງງົບປະມານ.
Tee Mitchell ລາຍງານ.
ວັນເລືອກຕັ້ງ ຈະຕ້ອງຖືກຈັດຂຶ້ນກ່ອນ ວັນທີ 17 ເດືອນພຶດສະພາ-ແລະເຖິງແມ່ນວ່າ ຍັງບໍ່ມີການປະກາດເປັນທາງການເທື່ອ, ແຕ່ທັງສອງພັກການເມືອງໃຫຍ່ ກໍໄດ້ເລັ່ງການຣົນນະຣົງ ທາງການເມືອງ ຂອງເຂົາເຈົ້າ.
ນາຍົກຣັຖມົນຕີ Anthony Albanese ໄດ້ຮຽກຮ້ອງ ໃຫ້ຜູ້ມີສິດເລືອກຕັ້ງທາງພາກຕາເວັນຕົກຂອງ Sydney, ໂດຍຢືນຢູ່ຄຽງຂ້າງ Chris Minnsນາຍົກພັກ Labor ຂອງຣັດ New South Wales ໃນການໃຫ້ສັນຍາ ກ່ອນການເລືອກຕັ້ງ ກ່ຽວກັບໂຄງສ້າງພື້ນຖານ ຫຼ້າສຸດສຳລັບເຂດນີ້.
ລາວໄດ້ປະກາດ ເຖິງການຍົກລະດັບ ເສັ້ນທາງ Bruce Highway ມູນຄ່າ $7.2 ພັນລ້ານໂດລາ ໃນ Queensland; ແລະການລົງທຶນ 3 ພັນລ້ານ ໂດລາ ໃນ NBN.
ບັດນີ້, Mr Albanese ກ່າວວ່າ ຣັຖບານກາງ ໄດ້ວາງແຜນ ທີ່ຈະໃຊ້ງົບປະມານ ລະຫວ່າງ 500 ລ້ານເຖິງ 1 ພັນລ້ານໂດລາ ເພື່ອຍົກລະດັບ ຖນົນຫົນທາງ ທີ່ຕິດຂັດ ຢູ່ພາກຕາເວັນຕົກສຽງໃຕ້ ຂອງ Sydney ແລະເພື່ອເຊື່ອມຕໍ່ ກັບເດີ່ນບິນແຫ່ງໃຫມ່.
ເດີ່ນບິນນາໆຊາດ Western Sydney ຈະເລີ່ມດໍາເນີນການໃນປີ 2026.
ການຍົກລະດັບຖນົນທີສິບຫ້າ (The Fifteenth Avenue) ຈະເຊື່ອມຕໍ່ກັບສູນກາງເມືອງ Bradfield ແລະຣົດໄຟໃຕ້ດິນ (Metro) ໃຫມ່ນໍາອີກ.
Mr Albanese ກ່າວວ່າ ງົບປະມານນີ້ ຈະໃຫ້ແນ່ໃຈວ່າ ຜູ້ອາສັຍຢູ່ໃນເຂດທີ່ເຕີບໂຕໄວທີ່ສຸດໃນ New South Wales ຈະມີທາງເລືອກໃນການຂົນສົ່ງທີ່ດີຂຶ້ນ.
"ນີ້ເປັນໂຄງການທີ່ໜ້າຕື່ນເຕັ້ນຫຼາຍ, 1 ພັນລ້ານໂດລາ ຊຶ່ງຖືກແບ່ງປັນ 50-50 ລະຫວ່າງ Commonwealth ແລະ New South Walesເພື່ອເຮັດໃຫ້ໂຄງການນີ້ສໍາເລັດ. ມັນໄດ້ຖືກວາງແຜນໄວ້ ເປັນເວລາດົນນານແລ້ວ, ແຕ່ສິ່ງທີ່ຣັຖບານ ຂອງຂ້າພະເຈົ້າ ຕັ້ງໃຈທີ່ຈະເຮັດ ບໍ່ແມ່ນພຽງແຕ່ເວົ້າເທົ່ານັ້ນ, ແຕ່ມັນເປັນການລົງມືປະຕິບັດ ແລະໂຄງການນີ້ ຈະປ່ຽນແປງເຂດນີ້. ຂ້າພະເຈົ້າ ຢາກໃຫ້ພາກຕາເວັນຕົກSydney ເປັນປະຕູ ໄປສູ່ສ່ວນອື່ນຂອງໂລກ."
ການປະກາດນັ້ນ ໄດ້ຮັບການຕ້ອນຮັບໂດຍຜູ້ນໍາທ້ອງຖິ່ນ.
Chris Minns ນາຍົກຣັດ New South Wales ກ່າວວ່າ ການຍົກລະດັບນັ້ນ ຈະສ້າງໂອກາດ ໃນການຈ້າງງານ ແລະທີ່ຢູ່ອາສັຍໃໝ່.
"ຫົນທາງຢູ່ທາງຫຼັງຂ້າພະເຈົ້ານີ້ ມີຣົດຜ່ານ 22,000 ຄັນຕໍ່ມື້. ທ່ານກໍາລັງເຫັນຣົດ ແລະຣົດກະບະ ຫລາຍກວ່າ 900 ຄັນ ໃນແຕ່ລະຊົ່ວໂມງ. ແລະຖ້າຫາກ ທ່ານຫລຽວເບິ່ງຫົນທາງນັ້ນ, ທ່ານຈະເຫັນວ່າ ມັນເປັນເສັ້ນທາງທີ່ບໍ່ສະດວກ. ມັນຕ້ອງເປັນລະບົບການຂົນສົ່ງ ລະດັບໂລກ,ແລະນັ້ນຄື ຄວາມຫມາຍຂອງການລົງທຶນນີ້."
Peter Dutton ຜູ້ນໍາຝ່າຍຄ້ານກ່າວວ່າ ການປະກາດ ກ່ຽວກັບເສັ້ນທາງໃນ Queensland ແລະບັດນີ້ໃນ New South Wales ແມ່ນຈໍາເປັນ-ແລະລາວຈະປະກາດຄໍາສັນຍາເຫລົ່ານັ້ນຄືກັນ.
ໃນການກ່າວປາສັຍ ຕໍ່ຜູ້ເລືອກຕັ້ງໃນ Queensland ບ້ານເກີດຂອງລາວ, ລາວໄດ້ຖືກແນະນໍາໂດຍ David Crisafulli ນາຍົກພັກ Liberal ຂອງຣັດ.
ນະໂຍບາຍພະລັງງານນິວເຄລັຍ ຂອງພັກ Coalition ໄດ້ຖືກຍົກເປັນຫົວຂໍ້ສຳຄັນ ໃນການປາສັຍຂອງ Peter Dutton ຕໍ່ຜູ້ມີສິດເລືອກຕັ້ງ, ຊຶ່ງໄດ້ຖືກກ່າວເຖິງ ຫຼັງຈາກ 30 ນາທີຂອງຄໍາປາສັຍ.
ແຕ່ Mr Dutton ໄດ້ໃຫ້ຄວາມສຳຄັນ ກັບມາດຕະການ ທີ່ເຈາະຈົງໃສ່ເຈົ້າຂອງທຸຣະກິດຂນາດນ້ອຍ: ການຫລຸດພາສີປະຈໍາປີ ເຖິງ 20,000 ໂດລາ ສໍາລັບການພາລູກຄ້າ ໄປຮ້ານອາຫານ ແລະ Pubs.
ມາດຕະການນັ້ນ ຈະບໍ່ລວມເຖິງ ເຄື່ອງດື່ມມຶນເມົາ-ແລະຈະມີໃຫ້ແກ່ທຸຣະກິດຂນາດນ້ອຍ ທີ່ມີມູນຄ່າການຊື້ຂາຍ (Turnover) ສູງເຖິງ 10ລ້ານໂດລາ.
Mr Dutton ກ່າວວ່າ ລາວເຫັນປໂຍດຢ່າງຊັດເຈນ ຂອງແຜນນັ້ນ.
"ທຸຣະກິດຂນາດນ້ອຍ ແມ່ນຢູ່ໃນ DNA ຂອງພວກເຮົາ. ແລະພວກເຮົາຢາກຊ່ອຍເຫລືອ ທຸຣະກິດເຫລົ່ານັ້ນໃຫ້ຢູ່ລອດ ໃນຊ່ວງເວລາທີ່ພັກLabor ເປັນຣັຖບານ. ພວກເຮົາ ຢາກໃຫ້ທຸຣະກິດຂນາດນ້ອຍອື່ນໆ ໃຊ້ຈ່າຍເງິນຫລາຍກວ່າເກົ່າ ຢູ່ທີ່ຮ້ານກາເຟ, Clubs ແລະ Pubs ໃນທ້ອງຖິ່ນຂອງເຂົາເຈົ້າ. ແລະຖ້າຫາກເຂົາເຈົ້າ ສາມາດພາລູກຈ້າງ ຫຼືລູກຄ້າຂອງເຂົາເຈົ້າ ໄປສເລີມສລອງ ການຂາຍທີ່ສໍາຄັນ, ຫລືຮັບຮູ້ ສໍາລັບວຽກງານ ທີ່ລູກຈ້າງໄດ້ເຮັດ ຫລືການສ້າງທີມ, ແລ້ວມັນກໍເປັນ Win-Win ສໍາລັບທັງສອງທຸລະກິດ. ມັນຈະຊ່ອຍຮັກສາ ແລະໃຫ້ລາງວັນແກ່ພະນັກງານ."
ເມື່ອຖືກຖາມວ່າ ການເລືອກຂອງຣັຖບານກາງ ຈະມີຂຶ້ນເມື່ອໃດ, Mr Albanese ກ່າວວ່າ ຍັງບໍ່ໄດ້ຕັດສິນໃຈເທື່ອ.
ແຕ່ໄດ້ປະຕິເສດ ຄໍາອະທິບາຍການປະກາດ ກ່ຽວກັບເສັ້ນທາງຫຼ້າສຸດນີ້ ວ່າເປັນການຊື້ສຽງ.
"ພວກເຮົາ ກໍາລັງດໍາເນີນການປົກຄອງຕໍ່ໄປ. ນີ້ເປັນການປະກາດຂອງ, ບໍ່ແມ່ນຄໍາຫມັ້ນສັນຍາ ໃນການເລືອກຕັ້ງ."
ວັນເລືອກຕັ້ງທີ່ໄວທີ່ສຸດ ພາຍໃຕ້ກົດຫມາຍການເລືອກຕັ້ງ ແມ່ນເດືອນມິນາ.
ໃນການປະກາດວັນເລືອກຕັ້ງຢ່າງເປັນທາງການ-ແລະເລີ່ມຕົ້ນການຣົນນະຣົງຫາສຽງ ຢ່າງເປັນທາງການ- Mr Albanese ຕ້ອງໄປຫາSam Mostyn ທີ່ເປັນ Governor-General ເພື່ອຂໍໃຫ້ຍຸບສະພາ ແລະອອກໃບອະນຸຍາດ ໃຫ້ມີການເລືອກຕັ້ງ.
ເນື້ອເລື່ອງໂດຍ Tee Mitchell ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
