TikTok ກຳລັງຈະຖືກສັ່ງໃຫ້ຂາຍກິດຈະການຫຼືປິດລົງ.
TikTok, ໜຶ່ງໃນຖານສື່ສານມວນຊົນ (Social Media Platforms) ທີ່ໃຫຍ່ທີ່ສຸດໃນໂລກ, ຈະຖືກປິດ ໃນສະຫະຣັດອາເມຣິກາ ໃນທ້າຍສັບປະດານີ້.
ສະນັ້ນ, ຈະມີຫຍັງແດ່ ໃນການສັ່ງຫ້າມ ແລະເປັນຫຍັງ ມັນຈຶ່ງເກີດຂຶ້ນ?
Sophie Bennett ອະທິບາຍ.
ການສັ່ງຫ້າມ TikTok ອາດຜ່ານສະພາ ໃນສະຫະຣັດອາເມຣິກາ ໃນອາທິດນີ້.
ByteDance ເຈົ້າຂອງຖານ (Platform) ຊາວຈີນ ກໍາລັງຖືກບັງຄັບ ໃຫ້ຂາຍການດໍາເນີນງານ ໃນສະຫະຣັດອາເມຣິກາ ຫຼືປິດໂຕລົງ ໃນວັນອາທິດ (19 ມັງກອນ).
'ສິ່ງທີ່ເຮົາ ກໍາລັງປະສົບຢູ່ໃນເວລານີ້ ແມ່ນໄລຍະທີ່ TikTok ກໍາລັງຖືກບັງຄັບ ໂດຍສະພານິຕິບັນຍັດ ຂອງສະຫະຣັດອາເມຣິກາ ໃຫ້ຂາຍແທ້.ສະນັ້ນ, ສິ່ງທີ່ເຂົາເຈົ້າຢາກໃຫ້ເກີດຂຶ້ນແມ່ນ TikTok ເປັນອິດສຣະຢ່າງເຕັມທີ່, ເພື່ອຈະບໍ່ເປັນເຄື່ອງມື ຂອງຣັຖບານຈີນ."
ນັ້ນແມ່ນ Drew Benvie, ນັກວິຈານສື່ສານມວນຊົນ ແລະຫົວຫນ້າຜູ້ອໍານວຍການໃຫຍ່ ຂອງບໍຣິສັດ ທີ່ປຶກສາ ທາງສື່ສານມວນຊົນ Battenhall.
ລາວເວົ້າວ່າ TikTok ມີຜູ້ໃຊ້ຊາວອາເມຣິກັນ ປະມານ 170 ລ້ານຄົນ, ຊຶ່ງຫມາຍຄວາມວ່າ ມັນມີຂໍ້ມູນ ຂອງເກືອບເຄິ່ງຫນຶ່ງ ຂອງຈໍານວນປະຊາກອນ ຂອງສະຫະຣັດອາເມຣິກາ.
"ທັງຜູ້ໃຊ້ ແລະຣັຖບານ, ໂດຍສະເພາະໃນເສດຖະກິດຕາເວັນຕົກ ເລີ່ມເປັນຫ່ວງວ່າ ຣັຖບານຈີນ ກໍາລັງເກັບຂໍ້ມູນ ຈາກໂທຣະສັບຂອງຜູ້ໃຊ້, ເບິ່ງກິດຈະກັມຂອງຜູ້ໃຊ້ ແລະບາງທີອາດຈະສັງເກດເບິ່ງ ສິ່ງທີ່ຜູ້ໃຊ້ເຫັນໃນ TikTok. ສະນັ້ນ, ມັນຈຶ່ງເປັນເລື້ອງ ຂອງຄວາມເປັນຫ່ວງວ່າ ເຈົ້າຂອງຊາວຈີນ ກໍາລັງໃຊ້ Apps ທີ່ເຮົາໃຊ້ໃນຕາເວັນຕົກ ໃນແຕ່ລະວັນ ຫຼືບໍ່, ແລະຄວບຄຸມມັນ ໃນບາງວິທີຫລືບໍ່.''
ປີກາຍນີ້, ສະພາຂອງສະຫະຣັດອາເມຣິກາ ໄດ້ອະນຸມັດກົດຫມາຍ ທີ່ຈະສັ່ງຫ້າມ App ນີ້, ເຖິງແມ່ນວ່າ ໄດ້ຮັບການຮັບຮອງຊ້ຳແລ້ວຊ້້ຳອີກ ຈາກ Shou Zi Chew ຫົວຫນ້າຜູ້ອໍານວຍການ ຂອງ TikTok ວ່າບໍ່ສົ່ງເສີມ ຫລືລຶບເນື້ອຫາ ຕາມຄໍາຂໍຮ້ອງຂອງຣັຖບານຈີນ.
ສານສູງສຸດ ຂອງສະຫະຣັດອາເມຣິກາ ໄດ້ຟັງການໂຕ້ຖຽງກັນ ກ່ຽວກັບຜົນສະທ້ອນ ຂອງການສັ່ງຫ້າມ ຕໍ່ເສຣີພາບ ໃນການປາກເວົ້າ.
ມັນຍັງສາມາດທົບທວນ ຫລືໂຈະ ການສັ່ງຫ້າມ ເຖິງແມ່ນວ່າ ເບິ່ງຄືວ່າຈະເປັນໄປບໍ່ໄດ້.
Mr Benvie ກ່າວວ່າ TikTok ຍັງບໍ່ໄດ້ປະກາດການຕອບກັບ.
"TikTok ເວົ້າວ່າ ໄດ້ວາງແຜນໄວ້ແລ້ວ, ແຕ່ມັນບໍ່ໄດ້ບອກວ່າ ແຜນນັ້ນແມ່ນຫຍັງ, ອາດເປັນເພາະ ມັນບໍ່ມີຄວາມຮີບດ່ວນ."
ສະນັ້ນ, ການສັ່ງຫ້າມ ຈະເປັນແບບໃດ?
ກົດຫມາຍ ສ້າງພາລະໃຫ້ກັບຮ້ານຂາຍ App ແລະຜູ້ໃຫ້ບໍຣິການ“ເມກ”(Cloud Service Providers), ຜູ້ທີ່ຈະບໍ່ສາມາດ "ແຈກຈ່າຍ, ຮັກສາ ຫລືປັບປຸງ" Application.
ນັ້ນຫມາຍຄວາມວ່າ Google ແລະ Apple ອາດຈະລຶບ TikTok ອອກຈາກ App Stores ຂອງເຂົາເຈົ້າ, ແລະຊາວອາເມຣິກັນ ທີ່ຍັງບໍ່ມີ TikTok ກໍຈະບໍ່ສາມາດດາວໂຫລດມັນໄດ້.
ຜູ້ໃຊ້ທີ່ມີແອັບນີ້ຢູ່ແລ້ວ ຈະສາມາດເກັບມັນໄວ້ໄດ້, ແຕ່ເຂົາເຈົ້າຈະບໍ່ສາມາດປັບປຸງ (Update) ໄດ້, ໃນທີ່ສຸດ ກໍເຮັດໃຫ້ມັນໃຊ້ການບໍ່ໄດ້.
ໃນຂນະດຽວກັນ, ຜູ້ບໍຣິການ “ເມກ” (Cloud Service Providers) Oracle-ບໍຣິສັດເທັກໂນໂລຈີ ຂອງສະຫະຣັດອາເມຣິກາ ທີ່ມີຂໍ້ມູນສ່ວນຫລາຍ ຂອງ TikTok ໃນສະຫະຣັດອາເມຣິກາ-ອາດຢຸດການເກັບກຳຂໍ້ມູນ (Hosting) ໃນ Server ຂອງເຂົາເຈົ້າ, ຊຶ່ງອາດນໍາໄປສູ່ ການປິດຂໍ້ມູນຂອງສະຫະຣັດອາເມຣິກາ ທັງໝົດ.
ສະນັ້ນ, ເຖິງແມ່ນວ່າ TikTok ຈະບໍ່ຫາຍໄປໃນພຽງຄືນດຽວ, ແຕ່ຜູ້ໃຊ້ຂອງອາເມຣິກາ ກ່າວວ່າ ຜົນກະທົບຂອງການສູນເສັຍມັນ ໄປໃນທີ່ສຸດ ຈະໃຫຍ່ຫລວງ.
"TikTok ໄດ້ກາຍເປັນບາງສິ່ງທີ່ເກີນກວ່າ App ຄວາມບັນເທີງເທົ່ານັ້ນ.ມັນເປັນບ່ອນ ທີ່ທ່ານເຊື່ອມຕໍ່ກັນ, ມັນເປັນບ່ອນ ທີ່ທ່ານພົບປະຜູ້ຄົນຂອງທ່ານ. ມັນແມ່ນວິທີ ທີ່ຈະມີສ່ວນຮ່ວມ ກັບຊຸມຊົນຂອງທ່ານ, ບໍ່ວ່າຈະເປັນສິ່ງທີ່ທ່ານສົນໃຈ, ຫລືເພື່ອນບ້ານຂອງທ່ານ. ການສື່ສານ ທີ່ພົບຢູ່ໃນ TikTok ນັ້ນ ແມ່ນບໍ່ມີໃຜທຽບໄດ້. ແລະມັນກໍເປັນລາຍໄດ້ນໍາອີກ. ຫລາຍຄົນ ກໍາລັງຫາເງິນຈາກ TikTok. ຫລາຍຄົນກໍລ້ຽງດູຄອບຄົວຂອງເຂົາເຈົ້າຜ່ານມັນ."
ຜູ້ໃຊ້ບາງຄົນ ກໍໃຊ້ແອັບນີ້ ໃນຂນະທີ່ເຂົາເຈົ້າຍັງມີມັນຢູ່, ເພື່ອເຍາະເຍີ້ຍ ການສັ່ງຫ້າມທີ່ອາດເກີດຂຶ້ນ...
"ແຕ່ພວກເຮົາຕ້ອງໃຊ້ TikTok ເພາະປະເທດຈີນ ກໍາລັງໃຊ້ຂໍ້ມູນຂອງພວກເຮົາ. ທ່ານເຄີຍຄິດບໍວ່າ ຂ້ອຍຢາກມອບຂໍ້ມູນຂອງຂ້ອຍ ໃຫ້ເຂົາເຈົ້າຫຼືບໍ່?"
...ໂດຍກ່າວວ່າອິນເຕີເນັດ ຂອງສະຫະຣັດອາເມຣິກາ ເຊັ່ນ Instagram ຂອງ Meta ແລະ Facebook ກໍບໍ່ໄດ້ດີກວ່າ ເມື່ອກ່າວເຖິງ ການເອົາຂໍ້ມູນສ່ວນຕົວ ໄປຂາຍໃຫ້ກັບບໍຣິສັດອື່ນ.
ຜູ້ໃຊ້ ຍັງປະທ້ວງໃນທາງອື່ນ ໂດຍເລືອກເຂົ້າຮ່ວມກັບ ແອັບທີ່ເປັນເຈົ້າຂອງ ໂດຍຄົນຈີນ ອີກອັນຫນຶ່ງທີ່ເອີ້ນວ່າ RedNote, ບ່ອນທີ່ເຂົາເຈົ້າເອີ້ນຕົວເອງວ່າ "ອົບພະຍົບ TikTok".
Milovan Savic ເປັນນັກຄົ້ນຄວ້າ ທີ່ມະຫາວິທະຍາໄລເທັກໂນໂລຈີ Swinburne, ທີ່ຊ່ຽວຊານເລື່ອງສື່ສານມວນຊົນ.
ລາວເວົ້າວ່າ ຜູ້ໃຊ້ TikTok ເລືອກທີ່ຈະໃຊ້ RedNote ເປັນບ້ານໃຫມ່ຂອງເຂົາເຈົ້າ ເພາະມັນມີຕົ້ນກໍາເນີດ ຈາກປະເທດຈີນ, ປ່ຽນຈາກຄວາມຢ້ານກົວຂອງ App ໜຶ່ງຂອງຊາວຈີນ ມາເປັນອີກ App ຫນຶ່ງ.
"ຂ້ອຍຄິດວ່າ ໃນເວລານີ້, ມີຄື້ນຂອງການປະທ້ວງ ແລະຄວາມກະຕືລືລົ້ນ. ແຕ່ເຮົາຍັງເຫັນໄດ້ວ່າ ຜູ້ໃຊ້ຫຼາຍຄົນ ດີ້ນລົນທີ່ຈະຄົ້ນຫາແອັບນີ້ ເພາະມັນຖືກອອກແບບມາ ສໍາລັບຕລາດຈີນ. ແລະທັງຫມົດ ເປັນພາສາຈີນ ດັ່ງນັ້ນ ຈຶ່ງບໍ່ມີການແປເລີຍ."
ລາວເວົ້າວ່າ RedNote ມີໂອກາດທີ່ຈະຖືກນໍາໃຊ້ ໃນໄລຍະຍາວ ຫລືບໍ່ ນັ້ນ ຈະຂຶ້ນຢູ່ກັບຄວາມສາມາດຂອງມັນ ທີ່ຈະຈັດການ ກັບການແປໃນຕອນຕົ້ນ.
ສະມາຊິກສະພາສູງພັກ Democrat ກໍາລັງຊຸກຍູ້ ປະທານາທິບໍດີ Joe Biden ໃຫ້ຂຍາຍເວລາຂອງ TikTok ເປັນ 90 ມື້ ກ່ອນທີ່ຈະອອກຈາກຕໍາແຫນ່ງ, ຊຶ່ງຫມາຍຄວາມວ່າ ຈະເລື່ອນບັນຫານີ້ ໃຫ້ແກ່ Donald Trump.
ແລະເຖິງແມ່ນວ່າ ໄດ້ພະຍາຍາມ ແລະລົ້ມເຫລວ ທີ່ຈະນໍາໃຊ້ການສັ່ງຫ້າມ ໃນວາຣະທໍາອິດຂອງເພິ່ນ, ແຕ່ Trump ໄດ້ສັນຍາວ່າ ຈະພະຍາຍາມຊ່ວຍ TikTok ຫລັງຈາກການເຂົ້າຮັບຕຳແໜ່ງ.
ສໍາລັບ, ການສັ່ງຫ້າມ ຈະບໍ່ມີຜົນກະທົບຕໍ່ຜູ້ໃຊ້ຄົນໃດ.
ແຕ່ Dr Savic ກ່າວວ່າ ການສັ່ງຫ້າມນັ້ນ ອາດມີຜົນກະທົບໃນທາງອ້ອມ.
"ຖ້າມັນຖືກສັ່ງຫ້າມ ໃນສະຫະຣັດອາເມຣິກາ ນັ້ນກໍຫມາຍຄວາມວ່າ ການສ້າງເນື້ອຫາ (Content) ຫນ້ອຍລົງ. ສະນັ້ນ, ເຖິງແມ່ນວ່າ ຜູ້ໃຊ້ໃນອອສເຕຣເລັຍ ອາດຈະຍັງສາມາດເຂົ້າເຖິງແອັບນີ້ໄດ້, ແຕ່ເຂົາເຈົ້າອາດຈະບໍ່ມັກມັນຫຼາຍ ເພາະເຫັນໄດ້ແຈ້ງວ່າເນື້ອຫາ (Content) ຈະຫລຸດລົງຫຼາຍ. ບາງທີຜູ້ ສ້າງທີ່ເຂົາເຈົ້າມັກ, ຫລືຫນ້າ (Pages) ທີ່ເຂົາເຈົ້າຕິດຕາມ ອາດຈະຫາຍໄປ."
ເນື້ອເລື່ອງໂດຍ Sophie Bennett ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
