ໂຄງການຂຍາຍອຳນາດຂອງ Trump.
ໂດຍທີ່ບໍ່ເຖິງສອງອາທິດ ກ່ອນທີ່ Donald Trump ຈະກັບຄືນໄປທີ່ທຳນຽບຂາວ (the White House), ປະທານາທິບໍດີ ທີ່ໄດ້ຮັບເລືອກຕັ້ງ ກໍກໍາລັງເຮັດໃຫ້ເປົ້າຫມາຍ ຂອງການຂຍາຍຂອບເຂດ ຊັດແຈ້ງຂຶ້ນ.
ຫລັງຈາກໄດ້ອອກຄວາມຄິດເຫັນ ກ່ຽວກັບການຮວມເອົາ ປະເທດCanada ໃນຫລາຍອາທິດຜ່ານມານີ້, ບັດນີ້ Donald Trump ກໍາລັງອະທິບາຍ ເຖິງເປົ້າຫມາຍ ທີ່ຈະຮວມເອົາທັງ Greenland ແລະຄອງPanama (Panama Canal).
Sydney Lang ລາຍງານ.
"ພວກເຮົາ ຕ້ອງການ Greenland ເພື່ອຈຸດປະສົງ ດ້ານຄວາມປອດພັຍຂອງປະເທດ. ຂ້າພະເຈົ້າ ໄດ້ຖືກບອກເປັນເວລາດົນນານ, ດົນນານ ກ່ອນຂ້າພະເຈົ້າ ຈະລົງແຂ່ງຂັນເລືອກຕັ້ງ. ຂ້າພະເຈົ້າຫມາຍຄວາມວ່າ, ຜູ້ຄົນໄດ້ເວົ້າເຖິງເລື່ອງນີ້ ເປັນເວລາດົນນານແລ້ວ. ທ່ານມີປະຊາກອນປະມານ 45,000 ຄົນຢູ່ທີ່ນັ້ນ. ຜູ້ຄົນບໍ່ຮູ້ເລີຍວ່າ ປະເທດ Denmark ມີສິດຕາມກົດຫມາຍຫລືບໍ່. ແຕ່ຖ້າຫາກເຂົາເຈົ້າຮູ້, ເຂົາເຈົ້າຄວນຈະປ່ອຍມັນ ເພາະເຮົາຕ້ອງການມັນ ເພື່ອຄວາມປອດພັຍຂອງປະເທດ. ນັ້ນແມ່ນສໍາລັບໂລກເສຣີ."
ບໍ່ເຖິງສອງອາທິດ ກ່ອນການເຂົ້າຮັບຕຳແໜ່ງ ປະທານາທິບໍດີ ຂອງDonald Trump, ຜູ້ນໍາຄົນໃຫມ່ ກໍກໍາລັງຕັ້ງເປົ້າຫມາຍ ທີ່ຮວມເອົາດິນແດນໃໝ່ ໃນຕ່າງປະເທດ.
ຫລັງຈາກການຂູ່ ວ່າຈະຮວມເອົາປະເທດ Canada ເມື່ອບໍ່ດົນມານີ້, Trump ກ່າວວ່າ ລາວສົນໃຈ ທີ່ຈະເຂົ້າຄວບຄຸມທັງ Panama Canal ແລະGreenland ນໍາອີກ.
ກ່ອນຫນ້ານັ້ນ, Trump ໄດ້ເວົ້າວ່າ ລາວສາມາດໃຊ້ "ກຳລັງທາງເສດຖະກິດ" ເພື່ອຮວມເອົາ Canada, ໂດຍບໍ່ໃຊ້ການກະທໍາ ທາງທະຫານຕໍ່ປະເທດນັ້ນ.
ນັກຂ່າວໄດ້ຖາມ Trump ວ່າ:
"ທ່ານໄດ້ກ່າວວ່າ ທ່ານກໍາລັງພິຈາຣະນາ ການໃຊ້ກໍາລັງທະຫານເພື່ອຮວມເອົາທັງ Panama ແລະ Greenland. ທ່ານກໍາລັງພິຈາຣະນາ ທີ່ຈະໃຊ້ກໍາລັງທະຫານ ເພື່ອຮວມເອົາ Canada ນໍາອີກບໍ?"
Trump ຕອບວ່າ:
"ບໍ່...ແຕ່ຈະເປັນກຳລັງທາງເສດຖະກິດ. ເພາະວ່າມີບາງຢ່າງທີ່ພິເສດລະຫວ່າງ Canada ແລະສະຫະຣັດອາເມຣິກາ. ທ່ານກໍາຈັດເສັ້ນ ທີ່ຖືກແຕ້ມຂຶ້ນເອງ ນັ້ນອອກໄປ, ແລະທ່ານຈະເຫັນວ່າ ມັນເປັນແນວໃດ. ແລະມັນຈະດີກວ່າຫຼາຍ ສໍາລັບຄວາມໝັ້ນຄົງຂອງປະເທດຊາດ ນໍາອີກ.ຢ່າລືມວ່າ ໂດຍພື້ນຖານແລ້ວ ພວກເຮົາປົກປ້ອງປະເທດ Canada."
ເຖິງແມ່ນວ່າ Trump ໄດ້ປະຕິເສດ ການໃຊ້ກໍາລັງທະຫານ ເພື່ອຮວມເອົາ Canada, ແຕ່ກ່າວວ່າ ລາວບໍ່ໄດ້ປະຕິເສດ ການໃຊ້ກໍາລັງທະຫານເພື່ອຮວມເອົາ Greenland ແລະ Panama Canal.
Greenland ເປັນເຂດປົກຄອງຕົນເອງ ທີ່ເປັນສ່ວນຫນຶ່ງຂອງ Denmark, ແຕ່ Trump ກ່າວວ່າ ເກາະນີ້ຈໍາເປັນ ສໍາລັບຄວາມຫມັ້ນຄົງຂອງຊາດ ແລະເສດຖະກິດ.
Trump ກ່າວວ່າ ຖ້າ Denmark ປະຕິເສດ, ກໍຈະມີຜົນກະທົບທາງເສດຖະກິດ.
"ຂ້ອຍກໍາລັງເວົ້າເຖິງການປົກປ້ອງໂລກເສຣີ. ທ່ານລອງຫລຽວເບິ່ງ-ທ່ານບໍ່ຈໍາເປັນ ຕ້ອງມີກ້ອງສ່ອງທາງໄກ- ທ່ານເບິ່ງຂ້າງນອກ, ທ່ານເຫັນກໍາປັ່ນຂອງຈີນຢູ່ທົ່ວໄປ. ມີກໍາປັ່ນຣັສເຊັຍຢູ່ທົ່ວໄປ. ພວກເຮົາບໍ່ປ່ອຍໃຫ້ສິ່ງນັ້ນເກີດຂຶ້ນ. ພວກເຮົາບໍ່ປ່ອຍໃຫ້ມັນເກີດຂຶ້ນ. ແລະຖ້າຫາກປະເທດ Denmark ຢາກສລຸບເລື້ອງນີ້, ແຕ່ບໍ່ມີໃຜຮູ້ວ່າ ເຂົາເຈົ້າມີສິດເປັນເຈົ້າຂອງ ຫລືຜົນປໂຍດຫລືບໍ່- ຜູ້ຄົນອາດຈະເລືອກເອົາເອກກະຣາດ ຫລືເຂົ້າຮ່ວມກັບ ສະຫະຣັດອາເມຣິກາ. ແຕ່ຖ້າຫາກ ເຂົາເຈົ້າເຮັດ, ຖ້າຫາກເຂົາເຈົ້າເຮັດເຊັ່ນນັ້ນ, ແລ້ວຂ້າພະເຈົ້າ ຈະເກັບພາສີ Denmark ໃນລະດັບສູງ."
Mette Frederiksen ນາຍົກຣັຖມົນຕີ ຂອງ Denmark ກ່າວວ່າ Greenland ບໍ່ໄດ້ມີໄວ້ຂາຍ.
"ແນ່ນອນ ຂ້າພະເຈົ້າຢາກກ່າວເຖິງ ສະພາບການທີ່ກໍາລັງເກີດຂຶ້ນ ໃນGreenland ໃນເວລານີ້. ຂ້າພະເຈົ້າຈະບອກຢ່າງຊັດແຈ້ງວ່າ ໃນສາຍຕາຂອງ Denmark, Greenland ແມ່ນສໍາລັບຊາວ Greenland. ມັນເປັນຜູ້ຄົນທີ່ມີຄວາມພາກພູມໃຈ, ພາສາ ແລະວັດທະນະທັມ ທີ່ເປັນຂອງຕົນເອງ. ແລະດັ່ງທີ່ Mute Egede, ປະທານສະພາ Greenland,ໄດ້ກ່າວໄວ້ກ່ອນຫນ້ານີ້ວ່າ Greenland ບໍ່ໄດ້ມີໄວ້ຂາຍ."
ຄອງ Panama (Panama Canal) ກໍຢູ່ໃນລາຍການ ຄວາມຕ້ອງການ ຂອງ Donald Trump ນໍາອີກ, ໂດຍທີ່ Trump ໄດ້ວິຈານອາດີດປະທານາທິບໍດີ ຂອງສະຫະຣັດອາເມຣິກາ Jimmy Carter ຜູ້ທີ່ຫາກໍເສັຍຊີວິດ ສໍາລັບສິ່ງທີ່ Trump ກ່າວວ່າ ເປັນຂໍ້ຕົກລົງທີ່ບໍ່ດີ.
"ພວກເຮົາ ກໍາລັງໄດ້ຮັບເຄົາຣົບອີກທົ່ວໂລກ. ຄອງ Panama (Panama Canal) ເປັນຄວາມອັບອາຍ. ສິ່ງທີ່ເກີດຂຶ້ນທີ່ Panama Canal. Jimmy Carter ໄດ້ມອບມັນ ໃຫ້ເຂົາເຈົ້າ ໃນລາຄາ 1 ໂດລາ ແລະເຂົາເຈົ້າຄວນປະຕິບັດ ຕໍ່ພວກເຮົາຢ່າງດີ. ຂ້າພະເຈົ້າຄິດວ່າ ມັນເປັນສິ່ງທີ່ບໍ່ດີ ທີ່ຈະເຮັດ. ມັນເປັນໂຄງສ້າງ ທີ່ລາຄາແພງທີ່ສຸດ ທີ່ເຄີຍສ້າງໃນປວັດສາດຂອງປະເທດເຮົາ. ມັນຈະທຽບເທົ່າກັບ ຫລາຍກວ່າ 1 ພັນລ້ານລ້ານໂດລາ ໃນປະຈຸບັນ. ພວກເຮົາ ສູນເສັຍ 38,000 ຄົນ. ໃຫ້ຄິດເບິ່ງ... 38,000ຄົນ. ເຂົາເຈົ້າຕາຍຍ້ອນໄຂ້ປ່າ, ເຂົາເຈົ້າຕາຍຍ້ອນຍຸງ. ເຂົາເຈົ້າບໍ່ສາມາດຢຸດຍຸງໄດ້. ເຂົາເຈົ້າ ໄດ້ຈ່າຍເງິນໃຫ້ຜູ້ຄົນຫລາຍກວ່າ ຫ້າເທົ່າເພື່ອເຮັດວຽກນັ້ນ. ຫລາຍຄົນກໍເສັຍຊີວິດ. ພວກເຮົາ ໃຫ້ມັນໄປໃນລາຄາຫນຶ່ງໂດລາ."
ໃນປີ 1977, Jimmy Carter ຜູ້ລ່ວງລັບ ໄດ້ລົງນາມສົນທິສັນຍາ ສອງຂໍ້ກັບຜູ້ນໍາຂອງ Panama ເພື່ອສົ່ງມອບການຄວບຄຸມ ຄອງ Panama ໃນປີ 1999.
ຄອງທີ່ສ້າງຂຶ້ນໂດຍມະນຸດ ໄດ້ຖືກຄວບຄຸມໂດຍ ສະຫະຣັດອາເມຣິກາ ເປັນເວລາຫລາຍສິບປີ ແລະເຫັນວ່າ ມີຄວາມສໍາຄັນຕໍ່ຄວາມໝັ້ນຄົງ ແລະການຄ້າ ຂອງສະຫະຣັດອາເມຣິກາ.
ບັດນີ້ Donald Trump ກ່າວວ່າ ປະເທດຈີນ ກໍາລັງຄວບຄຸມຄອງນັ້ນ, ແລະຢືນຢັນວ່າ ການກັບຄືນສູ່ການຄວບຄຸມ ຂອງສະຫະຣັດອາເມຣິກາ ເປັນສິ່ງສໍາຄັນ ສໍາລັບຄວາມໝັ້ນຄົງ ຂອງສະຫະຣັດອາເມຣິກາ.
ເຖິງຢ່າງໃດກໍຕາມ, ຣັຖມົນຕີ ການຕ່າງປະເທດຂອງ Panama, ທ່ານ Javier Martinez-Acha ກ່າວວ່າ Panama ບໍ່ສົນໃຈ ທີ່ຈະເຈຣະຈາເລື່ອງນີ້.
"ອະທິປະໄຕຂອງ ຄອງຂອງເຮົາ ບໍ່ສາມາດຕົກລົງກັນໄດ້ ແລະເປັນສ່ວນຫນຶ່ງ ຂອງປວັດສາດ ການຕໍ່ສູ້ ແລະໄຊຊນະ ທີ່ບໍ່ສາມາດປ່ຽນແປງໄດ້. ຄອງຂອງເຮົາ ມີພາລະກິດ ໃນການຮັບໃຊ້ມວນມະນຸດ ແລະການຄ້າ. ນັ້ນຄື ຄຸນຄ່າຢ່າງຫນຶ່ງ ທີ່ຊາວ Panama ສເນີຕໍ່ໂລກ, ໃຫ້ຄວາມຮັບຮອງ ແກ່ປະຊາຄົມນາໆຊາດ ວ່າຈະບໍ່ມີສ່ວນຮ່ວມ, ຫລືເປັນສ່ວນໜຶ່ງຂອງຄວາມຂັດແຍ້ງໃດໆ. ມືດຽວ ທີ່ຄວບຄຸມ ຄອງ Panamaນັ້ນແມ່ນຊາວ Panama, ແລະມັນຈະເປັນເຊັ່ນນັ້ນຕໍ່ໄປ."
ສະນັ້ນ, Donald Trump ຕ້ອງການຫຍັງກັບ Greenland?
Seth Borenstein, ຈາກ Associated Press, ກ່າວວ່າ Greenland, ເຖິງແມ່ນວ່າ ການພັດທະນາຢູ່ທີ່ນັ້ນຊ້າ, ແຕ່ກໍອຸດົມໄປດ້ວຍຊັບພະຍາກອນ.
"Greenland ມີຫຍັງ? ປະຊາກອນບໍ່ຫຼາຍປານໃດ, ມີພຽງ 57,000 ຄົນ.ມັນມີພືດບໍ່ຫລາຍປານໃດ. ຂ້ອຍເຄີຍໄປທີ່ນັ້ນ. ມັນສວຍງາມ ຖ້າຫາກທ່ານມັກນ້ຳແຂງຂາວ. ອິງຕາມ US Geological Survey ແຕ່ສິ່ງທີ່ມັນມີນັ້ນ ແມ່ນຢູ່ໃຕ້ນ້ຳແຂງ, ແມ່ນນ້ຳມັນຈໍານວນຫລວງຫລາຍ-ນ້ຳມັນຫລາຍພັນລ້ານ Barrels ແລະ Gas ທັມມະຊາດ ຫລາຍພັນລ້ານລ້ານແມັດກ້ອນ. ແລະສໍາຄັນກວ່ານັ້ນ, ມັນມີແຮ່ທາດ ທີ່ຫາຍາກທີ່ຈໍາເປັນ ສໍາລັບສິ່ງຕ່າງໆ ໃນການສື່ສານ ເຊັ່ນໂທຣະສັບມືຖືຂອງທ່ານ. ໃນເວລານີ້, ພວກເຮົາໄດ້ຮັບສິ່ງນັ້ນ ຈາກປະເທດຈີນ."
Donald Trump ກ່າວວ່າ ອາເມຣິກາ ສາມາດເຮັດໃຫ້ Greenland ຍິ່ງໃຫຍ່ອີກເທື່ອໜຶ່ງ.
Donald Trump Jr, ຜູ້ເປັນລູກຊາຍ, ກໍາລັງໄປຢ້ຽມຢາມເກາະນັ້ນ ໃນຖານະນັກທ່ອງທ່ຽວ, ໂດຍທາງການ Greenland ລາຍງານວ່າ ລາວຈະບໍ່ພົບກັບເຈົ້າໜ້າທີ່ ຂອງຣັຖບານ.
Aaja Chemnitz ເປັນຊາວ Greenland ແລະສະມາຊິກສະພາ ຂອງDenmark ກ່າວວ່າ ເຖິງແມ່ນວ່າ ນັກທ່ອງທ່ຽວທຸກຄົນ ຈະໄດ້ຮັບການຕ້ອນຮັບ, ແຕ່ໂອກາດຂອງການໄປຢ້ຽມຢາມນັ້ນ ບໍ່ເຫມາະສົມ.
"ປະຕິກິຣິຍາຂອງຂ້າພະເຈົ້າ ຕໍ່ການຢ້ຽມຢາມຂອງ Trump ແມ່ນວ່າ ນັກທ່ອງທ່ຽວ ອາເມຣິກາທຸກຄົນ ໄດ້ຮັບການຕ້ອນຮັບໃນ Greenland.ພວກເຮົາ ຫາກໍມີເດີ່ນບິນໃຫມ່ ແລະພວກເຮົາຢາກເຫັນ ການພັດທະນາ ດ້ານທຸຣະກິດຫລາຍກວ່າເກົ່າ ແລະໂດຍສະເພາະການທ່ອງທ່ຽວ ແລະເຮົາກໍມີຄວາມສົນໃຈ ໃນການຂຸດຄົ້ນບໍ່ແຮ່ ໃນ Greenland ນຳອີກ. ສະນັ້ນ, ຖ້າຫາກທ່ານເບິ່ງພຽງແຕ່ວ່າ ເປັນການຢ້ຽມຢາມ ຂອງນັກທ່ອງທ່ຽວຊາວອາເມຣິກາ, ຂ້າພະເຈົ້າຄິດວ່າ ມັນເປັນສິ່ງດີ ແຕ່ເຮົາທຸກຄົນຮູ້ວ່າ ເວລາໂອກາດ, ແລະພໍ່ຂອງ Trump Jr. ກໍເວົ້າວ່າ ລາວຢາກເປັນເຈົ້າຂອງ ແລະຄວບຄຸມ Greenland, ແລະພວກເຮົາ ບໍ່ມັກເລື້ອງແບບນັ້ນ. ພວກເຮົາ ພົບວ່າ ມັນເປັນການຂາດຄວາມເຄົາຣົບ ຕໍ່ປະເທດ Greenland ຢ່າງແຮງ."
ເນື້ອເລື່ອງໂດຍ Sydney Lang ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
ທ່ານຍັງສາມາດ ຕິດຕາມທາງ facebook ໄດ້ທີ່
