ໂຄງການສນັບສນູນໃໝ່ສຳລັບຜູ້ເປັນ Autism.
ຣັຖບານກາງ ໄດ້ເປີດເຜີຍ ຍຸດທະສາດ Autism ແຫ່ງຊາດ (National Autism Strategy) ເປັນເທື່ອທໍາອິດ ຂອງອອສເຕຣເລັຍ-ຊຶ່ງມີມູນຄ່າ 42ລ້ານໂດລາ ເພື່ອປັບປຸງການມີສ່ວນຮ່ວມ, ການເຂົ້າເຖິງ ແລະຜົນຮັບ ສໍາລັບຊາວອອສເຕຣເລັຍ ທີ່ເປັນ Autism.
ຜູ້ສນັບສນູນ ເອີ້ນມັນວ່າ ເປັນໂຕປ່ຽນເກມ, ໃຫ້ຄວາມຫວັງ ແລະການສນັບສນູນ ທີ່ຈໍາເປັນ ແກ່ຄອບຄົວທົ່ວປະເທດ ຜູ້ທີ່ປະເຊີນກັບຄວາມທ້າທາຍພິເສດ ໃນແຕ່ລະມື້.
Sydney Lang ແລະ Christopher Tan ລາຍງານ.
ມັນເປັນມື້ທີ່ Khush Patel ມີຄວາມສຸກຫລາຍ-ແມ່ນມື້ ທີ່ລາວມີອາຍຸຄົບ 12 ປີ.
Khush, ຜູ້ເປັນ Autism ແລະສະມາທິສັ້ນ (ADHD), ບໍ່ເວົ້າ, ມັນເປັນສິ່ງທີ່ພໍ່ແມ່ຂອງລາວ ຢ້ານວ່າ ອາດສົ່ງຜົນກະທົບ ຕໍ່ຄວາມປອດພັຍຂອງລາວ.
Stuti ແມ່ຂອງລາວເວົ້າວ່າ ນາງເປັນຫ່ວງວ່າ ລາວຈະບໍ່ສາມາດເວົ້າໄດ້ ຖ້າຫາກມີສິ່ງລົບກວນລາວ.
"ລາວເປັນເດັກນ້ອຍ ທີ່ມີຄວາມມ່ວນຊື່ນສເມີ. ບໍ່ມີການຄໍາຈົ່ມ, ບໍ່ເຄີຍຮ້ອງໄຫ້. ບັນຫາກໍຄື, ເຮົາຢ້ານຫລາຍກ່ຽວກັບລາວ ແມ່ນຄວາມປອດພັຍຂອງລາວ. ແລະການກ່າວແທນຕົນເອງ. ນັ້ນຄືຄວາມເປັນຫ່ວງທີ່ສຸດ ຂອງພວກເຮົາ."
Khush ໄດ້ຖືກວິນິດສັຍ ຕອນລາວຍັງນ້ອຍ ຫລັງຈາກພໍ່ແມ່ຂອງລາວ ໄດ້ສັງເກດເຫັນວ່າ ລາວເວົ້າຊ້າກວ່າອາຍຸ.
ແລ້ວຄອບຄົວ Patels ໄດ້ຫັນໄປຫາລະບົບເອກກະຊົນ ເພື່ອການວິນິດສັຍ, ໂດຍຫວັງວ່າ ຈະຫລີກຈາກຄວາມລ່າຊ້າ ຂອງລະບົບສາທາຣະນະ ທີ່ຕ້ອງໃຊ້ເວລາດົນນານ.
"ພວກເຮົາ ໄດ້ຮູ້ກ່ຽວກັບຄໍາວ່າ Autism, ແລະຈາກນັ້ນ, ການເລີ່ມຕົ້ນການບຳບັດ ແມ່ນກ່ຽວກັບລາວໃນການຫັດການເວົ້າ, ຊອກຫາຄົນທີ່ດີພໍ, ແລະແລ້ວ ໃຫ້ລາວໄດ້ຮັບການວິນິດສັຍ ໃຫ້ໄວເທົ່າທີ່ຈະເປັນໄປໄດ້. ພວກເຮົາໂຊກດີພໍ ໃນດ້ານແຫລ່ງຊ່ອຍເຫລືອ ແລະດ້ານການເງິນ ແລະອື່ນໆ. ສະນັ້ນ, ພວກເຮົາຈຶ່ງໄດ້ໃຫ້ລາວ ໄດ້ຮັບການວິນິດສັຍ ເປັນການສ່ວນຕົວ, ແລະມັນກໍເກີດຂຶ້ນທັນທີ ພາຍໃນສອງ-ສາມເດືອນ. ຖ້າຫາກພວກເຮົາ ຈະໃຊ້ລະບົບສາທາຣະນະ ມັນຄົງຈະຕ້ອງລໍຖ້າສອງປີ. ສະນັ້ນ, ຂ້າພະເຈົ້າຈຶ່ງບໍ່ສາມາດວາດພາບວ່າຄອບຄົວອື່ນໆ ທີ່ຕ້ອງຮັບມືກັບສິ່ງເຫຼົ່ານັ້ນ ແນວໃດ."
ເລື່ອງລາວຂອງ Khush ໄດ້ເຮັດໃຫ້ ເຫັນເຖິງຄວາມທ້າທາຍ ທີ່ປະເຊີນກັບຊາວອອສເຕຣເລັຍ ຫລາຍກວ່າ 290ພັນຄົນ ທີ່ຖືກພົບວ່າເປັນ Autism.
ບັດນີ້, ແຜນໃຫມ່ ມີຈຸດປະສົງ ທີ່ຈະນໍາການປ່ຽນແປງທີ່ແທ້ຈິງມາໃຫ້.
ຣັຖບານກາງ ໄດ້ເລີ່ມຕົ້ນ ຍຸດທະສາດ Autism ແຫ່ງຊາດ, ຊຶ່ງພັດທະນາໂດຍການປຶກສາຫາລື ກັບຊຸມຊົນ Autistic.
"ນີ້ແມ່ນ ຍຸດທະວິທີທໍາອິດ ຂອງຣັຖບານອອສເຕຣເລັຍ ທີ່ອຸທິດຕົນໂດຍສະເພາະ ເພື່ອປັບປຸງການມີສ່ວນຮ່ວມ, ການສນັບສນູນ ແລະຜົນຮັບ ໃນຊີວິດຂອງຄົນທີ່ເປັນ Autism ທົ່ວ, ພ້ອມດ້ວຍການສ້າງຄວາມເຂົ້າໃຈ ຂອງຊຸມຊົນ ແລະຄວາມຮູ້ ກ່ຽວກັບການປະຕິບັດ ທີ່ເຮົາທຸກຄົນສາມາດເຮັດໄດ້ ເພື່ອໃຫ້ແນ່ໃຈວ່າ ຊຸມຊົນອອສເຕຣເລັຍມີ ສ່ວນຮ່ວມໃນໂລກຂອງເຮົາ."
ໃນການປະກາດ ຢູ່ Western Australia, ຣັຖມົນຕີ ກະຊວງບໍຣິການສັງຄົມ (Social Services), Amanda Rishworth, ກ່າວວ່າ ຍຸດທະວິທີນີ້ ຈະບໍ່ສາມາດພັດທະນາໄດ້ ຖ້າປາດສະຈາກ ຄວາມພະຍາຍາມ ຂອງຜູ້ຄົນ ທີ່ມີປະສົບການຊີວິດກັບ Autism.
ແຜນປະຕິບັດການ 42 ລ້ານໂດລາ ຮວມເຖິງໂຄງການສນັບສນູນ ຈາກຫມູ່ເພື່ອນ (Peer Support Programs), ການຄົ້ນຄວ້າກ່ຽວກັບ Autism ແລະການຣົນນະຣົງຄວາມຮັບຮູ້.
ຊຸມຊົນທີ່ແຕກຕ່າງ ທາງວັດທະນະທັມ ແລະພາສາ ໄດ້ຖືກລະບຸວ່າ ເປັນກຸ່ມທີ່ສໍາຄັນ, ເພື່ອຈັດການກັບອຸບປະສັກສະເພາະ ທີ່ເຂົາເຈົ້າປະເຊີນ.
"ບໍ່ວ່າ ຈະແມ່ນໂດຍການສນັບສນູນຈາກຫມູ່ເພື່ອນ (Peer Support Programs), ບໍ່ວ່າ ຈະໂດຍຄວາມຕ້ອງການ ທີ່ຈະຖາມຜູ້ຄົນວ່າ ເຂົາເຈົ້າຢາກສື່ສານ ໃນລະບົບຣັຖບານຕ່າງໆ ແນວໃດ, ໃຫ້ແນ່ໃຈວ່າ ເຮົາມີແຫລ່ງຊ່ອຍເຫລືອ ໃນພາສາຊຸມຊົນ ເປັນການລິເລີ່ມບາງຢ່າງ ທີ່ເຮົາໄດ້ສັນຍາໄວ້ ເພື່ອໃຫ້ແນ່ໃຈວ່າ ເຮົາໃຫ້ຄວາມສໍາຄັນ ຕໍ່ຜູ້ຄົນທີ່ແຕກຕ່າງ ທາງພາສາ ແລະວັດທະນະທັມ."
ຍຸດທະວິທີ ເຈັດປີ ອະທິບາຍຄໍາຫມັ້ນສັນຍາ 22 ຢ່າງ, ຮວມທັງສະຖານທີ່ ທີ່ເປັນມິດກັບປະສາດສຳຜັດ (Sensory-friendly Spaces), ການວິນິດສັຍ ທີ່ລາຄາບໍ່ແພງ ແລະການສນັບສນູນ ສໍາລັບນາຍຈ້າງ ທີ່ຈ້າງຄົນງານ ທີ່ເປັນ Autism.
Jenny Karavolos ເປັນປະທານຮ່ວມຂອງ Australian Autism Alliance ເວົ້າວ່າ ການເຄື່ອນໄຫວນັ້ນ ເຮັດໃຫ້ອອສເຕຣເລັຍ ສອດຄ່ອງກັບປະເທດຕ່າງໆ ເຊັ່ນ ສະຫະຣັດ ອາເມຣິກາ, ການາດາ ແລະປະເທດອັງກິດ.
ນາງເວົ້າວ່າ ເຖິງແມ່ນວ່າ ຂ່າວນັ້ນເປັນເລື່ອງທີ່ຫນ້າຍິນດີ, ແຕ່ຕ້ອງມີລະບົບ ເພື່ອໃຫ້ແນ່ໃຈວ່າ ຣັດແລະເຂດປົກຄອງຕ່າງໆ ຈະສອດຄ່ອງກັບແຜນລະດັບຊາດ.
"ມັນຈະເປັນສິ່ງທີ່ດີຫຼາຍ ໃນການທີ່ຈະມີລະບົບນິເວດຂອງຣັຖບານ ທີ່ເຊື່ອມຕໍ່ກັນ ຢ່າງສົມບູນ. ເຮົາຕ້ອງມີທຸກລະດັບຂອງຣັຖບານ ເຮັດວຽກຮ່ວມກັນ. ແລະສິ່ງສຳຄັນຢ່າງທີສາມ ທີ່ຕ້ອງເກີດຂຶ້ນ ຄືໂຄງຮ່າງການກຳກັບດູແລນັ້ນ ຕ້ອງລະບຸຢ່າງຊັດແຈ້ງ ເຖິງມາດຕະການ ທີ່ມີຄວາມສຳຄັນ ຕໍ່ຜູ້ທີ່ເປັນ Autism, ແລະວ່າຄວາມຮັບຜິດຊອບ ແລະຜົນສະທ້ອນ ທີ່ເຫມາະສົມ ສໍາລັບການບໍ່ນໍາໃຊ້ ຍຸດທະວິທີທີ່ວາງໄວ້ນັ້ນ."
Josephine Barbaro, ສະມາຊິກຄົນຫນຶ່ງ ໃນສະພາກຳກັບດູແລຍຸດທະວິທີ ກ່າວວ່າ ເມື່ອກ່າວເຖິງການນໍາໃຊ້, ການມີສ່ວນຮ່ວມຂອງຄົນທີ່ເປັນ Autism ນັ້ນເປັນສິ່ງສໍາຄັນ.
"ທຸກສິ່ງ ທີ່ກ່ຽວຂ້ອງກັບການຄົ້ນຄວ້າ, ນະໂຍບາຍ, ການບໍຣິການ, ການສນັບສນູນ, ສິ່ງໃດກໍຕາມ ທີ່ກ່ຽວຂ້ອງກັບຄົນ Autistic, ຄົນ Autistic ຕ້ອງມີສ່ວນກ່ຽວຂ້ອງ. ບໍ່ມີຫຍັງກ່ຽວກັບເຮົາ…..ຖ້າບໍ່ມີເຮົາ, ນັ້ນກໍສໍາຄັນຫລາຍ."
ເນື້ອເລື່ອງໂດຍ Sydney Lang and Chris Tan ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
