ປ້າຍເຕືອນໂຣກມະເຮັງຢູ່ໃນເຫລົ້າ.
ທ່ານຫມໍຊັ້ນແນວໜ້າ ຂອງສະຫະຣັດອາເມຣິກາ ກໍາລັງຮຽກຮ້ອງ ໃຫ້ມີການເຕືອນ ເລື່ອງໂຣກມະເຮັງ ຢູ່ໃນເຄື່ອງດື່ມເຫລົ້າ ຂອງປະເທດ.
ຄໍາແນະນໍາໃຫມ່ຂອງ Vivek Murthy ທີ່ເປັນທ່ານຫມໍຜ່າຕັດທົ່ວໄປ ກ່ຽວກັບສາເຫດລະຫວ່າງ ໂຣກມະເຮັງ ແລະເຫລົ້າ ກ່າວວ່າ ເຫລົ້າເປັນສາເຫດອັນດັບສາມ ຂອງໂຣກມະເຮັງ ທີ່ສາມາດປ້ອງກັນໄດ້, ຮອງຈາກຢາສູບ ແລະໂຣກຄວາມອ້ວນ.
ຕອນນີ້ ມັນກໍ່ໃຫ້ເກີດຄໍາຖາມ ກ່ຽວກັບວ່າ ອອສເຕຣເລັຍ ຄວນພິຈາຣະນາ ທີ່ຄ້າຍຄືກັນນີ້ ຫລືບໍ່.
Essam Al-Ghalib ແລະ Hannah Kwonລາຍງານ.
ໂດຍທີ່ເທດສະການມ່ວນຊື່ນ ກຳລັງເປັນໄປຢ່າງເຕັມທີ່, ຊາວອອສເຕຣເລັຍ ຫລາຍຄົນ ກໍາລັງສວຍໂອກາດ ຈາກວັນພັກລະດູຮ້ອນ.
"ຂ້ອຍຮູ້ວ່າ ຂ້ອຍມັກດື່ມວາຍແດງ ແລະບາງເທື່ອ ກໍຈະດື່ມຫລາຍກວ່າຫນຶ່ງຈອກ."
"ມັນເປັນຢາພິດ. ເຫລົ້າເປັນພິດ. ແຕ່ເຮົາຍັງດື່ມຢາພິດນັ້ນ ແລະຍັງມ່ວນຊື່ນກັບມັນ ຕໍ່ໄປ."
ຈາກຂໍ້ມູນຂອງ South Australia Health, ປະມານຫນຶ່ງໃນສາມ ຂອງຊາວອອສເຕຣເລັຍ ຄາດວ່າຈະດື່ມເຄື່ອງມຶນເມົາ ທຸກອາທິດ.
Julia Stafford ເປັນສະມາຊິກ ຂອງຄນະກັມມະການ Cancer Council Nutrition, Alcohol and Physical Activity Committee.
ນາງເວົ້າວ່າ ປະມານ 80 ເປີເຊັນ ຂອງຊາວອອສເຕຣເລັຍ ພາຍໃນຫນຶ່ງປີ ຈະດື່ມເຄື່ອງມຶນເມົາ ໃນລະດັບໃດລະດັບຫນຶ່ງ, ໂດຍສເລັ່ຍ.
"ຊາວອອສເຕຣເລັຍຫລາຍຄົນ ກໍາລັງໃຊ້ເຫລົ້າ. ມັນອາດຢູ່ໃນລະດັບຕ່ຳຫລາຍ, ບາງຄົນ ກໍຈະຢູ່ໃນລະດັບສູງກວ່າ ແລະຕາມຈິງແລ້ວ, ການໃຊ້ເຫລົ້າທັງຫມົດ ສາມາດເຮັດໃຫ້ທ່ານ ມີຄວາມສ່ຽງ ຕໍ່ການເປັນໂຣກມະເຮັງໄດ້. ເມື່ອທ່ານດື່ມຫລາຍເທົ່າໃດ, ຄວາມສ່ຽງຂອງທ່ານ ກໍຍິ່ງຈະສູງຂຶ້ນເທົ່ານັ້ນ. ແຕ່ແທ້ຈິງແລ້ວ, ເມື່ອກ່າວເຖິງເຫລົ້າ ແລະໂຣກມະເຮັງ, ບໍ່ມີລະດັບທີ່ປອດພັຍ ຂອງການໃຊ້ເຫລົ້າ. ສະນັ້ນ ຂ້າພະເຈົ້າຄິດວ່າ ນັ້ນເປັນຂໍ້ຄວາມທີ່ສໍາຄັນແທ້ໆ ສໍາລັບອອສເຕຣເລັຍ ໃນການອອກຄຳເຕືອນ ເລື່ອງສຸຂະພາບ ແລະໂຄງການສຶກສາ ໃນວົງກວ້າງ."
Ms Stafford ກ່າວວ່າ ປ້າຍຄຳເຕືອນ ຈະເຮັດໜ້າທີ່ ໃນການບອກຜູ້ຄົນທີ່ດື່ມເຫຼົ້າ ເຖິງຄວາມສ່ຽງ ທີ່ມາຈາກການບໍຣິໂພກ ເຄື່ອງມຶນເມົາ.
"ຫຼັກການພື້ນຖານ ຂອງປ້າຍເຕືອນສຸຂະພາບ ໃນຜລິດຕະພັນ ຄືຜູ້ຄົນມີສິດ ທີ່ຈະຮູ້, ມີສິດ ທີ່ຈະຮັບຮູ້ກ່ຽວກັບຄວາມສ່ຽງ ຂອງຜລິດຕະພັນເພື່ອເຂົາເຈົ້າ ຈະສາມາດພິຈາຣະນາ ໃນການຕັດສິນໃຈຂອງເຂົາເຈົ້າ ທີ່ຈະໃຊ້ຜລິດຕະພັນນັ້ນຫຼືບໍ່, ຫຼືວ່າເຂົາເຈົ້າ ໃຊ້ຜລິດຕະພັນນັ້ນຫຼາຍປານໃດ. ແທ້ຈິງແລ້ວ, ມັນກ່ຽວກັບ ການສົ່ງເສີມຊຸມຊົນ ໃນການຮັບຮູ້ ເພາະໃນປະຈຸບັນນີ້ ເຮົາຮູ້ວ່າ ປະມານຫນຶ່ງໃນສອງຄົນ ຂອງຊາວອອສເຕຣເລັຍ ຮູ້ວ່າເຫລົ້າ ເປັນສາເຫດຂອງໂຣກມະເຮັງ ບໍ່ທາງໃດກໍທາງຫນຶ່ງ."
ທ່ານຫມໍຜ່າຕັດທົ່ວໄປ ຂອງສະຫະຣັດອາເມຣິກາ ໄດ້ອອກຄໍາແນະນໍາໃຫມ່ ກ່ຽວກັບຄວາມກ່ຽວຂ້ອງ ລະຫວ່າງການດື່ມເຄື່ອງມຶນເມົາ ແລະການສ່ຽງ ຂອງໂຣກມະເຮັງ ທີ່ເພີ່ມຂຶ້ນ, ໂດຍຮຽກຮ້ອງ ໃຫ້ສະພາ Congress ຂອງອາເມຣິກາ ອະນຸມັດການປັບປຸງ ປ້າຍຄໍາເຕືອນ ຂອງທ່ານຫມໍ ກ່ຽວກັບເຄື່ອງດື່ມທີ່ມີເຫລົ້າ ເພື່ອຮວມເອົາທັງຄໍາເຕືອນ ເລື່ອງຄວາມສ່ຽງ ຂອງໂຣກມະເຮັງ.
ອີງຕາມຄໍາແນະນໍາ, ການດື່ມເຫຼົ້າທຸກຊະນິດ ເຊັ່ນເບັຍ, ເຫຼົ້າວາຍ ຫຼືເຫລົ້າອື່ນໆ ຈະເພີ່ມຄວາມສ່ຽງ ຕໍ່ການເປັນມະເຮັງ ຢ່າງຫນ້ອຍເຈັດຊະນິດ ລວມທັງມະເຮັງໃນປາກ, ຄໍ, ຫີບສຽງ, ທໍ່ອາຫານ, ເຕົ້ານົມ, ຕັບ,ລຳໄສ້ ແລະທະວານໜັກ.
Ms Stafford ກ່າວວ່າ ຄວນມີຄໍາແນະນໍາ ທີ່ຄ້າຍຄືກັນນີ້ ໃນ.
"ຄໍາແນະນໍາ ຂອງທ່ານຫມໍຂອງສະຫະຣັດອາເມຣິກາ ໄດ້ກະຕຸ້ນໃຫ້ເກີດຄວາມກະຕືລືລົ້ນທົ່ວໂລກ ແລະ Ireland ຈະເລີ້ມມີປ້າຍຄຳເຕືອນ ເລື່ອງໂຣກມະເຮັງ ໃນຜລິດພັນເຫລົ້າ ຕັ້ງແຕ່ປີ 2026, ໂດຍກ່າວກ່ຽວກັບເຫລົ້າວ່າ ເປັນສາເຫດຂອງໂຣກມະເຮັງທີ່ຮ້າຍແຮງ. ຂ້າພະເຈົ້າຄິດວ່າ ຫລາຍປະເທດທົ່ວໂລກ ກໍາລັງພິຈາຣະນາເລື້ອງນັ້ນ, ຕາມຄໍາແນະນໍາທີ່ຊັດແຈ້ງ ກ່ຽວກັບຄວາມກ່ຽວຂ້ອງ ລະຫວ່າງເຫລົ້າ ແລະໂຣກມະເຮັງ,ແລະເຂົ້າໃຈ ເຖິງຄວາມຈໍາເປັນ ທີ່ຈະບອກຕໍ່ຊຸມຊົນ ເພາະຊາວອອສເຕຣເລັຍ ມີສິດທີ່ຈະຮູ້ ວ່າຜລິດຕະພັນທີ່ເຂົາເຈົ້າໃຊ້ ສາມາດກໍ່ໃຫ້ເກີດອັນຕະຣາຍ ຕໍ່ເຂົາເຈົ້າໄດ້ຫລືບໍ່."
ອີງຕາມ Cancer Australia, 5.6 ເປີເຊັນຂອງຜູ້ປ່ວຍໂຣກມະເຮັງ ແມ່ນກ່ຽວຂ້ອງ ກັບການດື່ມເຄື່ອງມຶນເມົາ ໃນໄລຍະຍາວ.
ໃນຖານະເປັນສານ ທີ່ກໍ່ໃຫ້ເກີດໂຣກມະເຮັງກຸ່ມທີ 1, ເຫຼົ້າ ສາມາດທໍາລາຍສານເຄມີໃນຮ່າງກາຍ ແລະທໍາລາຍ DNA, ໂປຣຕີນ ແລະຈຸລັງ(Cell) ພ້ອມທັງປ່ຽນແປງ ລະດັບ Hormone ແລະນໍາໄປສູ່ ການດູດຊຶມສານກໍ່ມະເຮັງອື່ນໆ ໄດ້ຫຼາຍຂຶ້ນ.
ໃນຂນະທີ່ຜູ້ຊ່ຽວຊານກ່າວວ່າ ມີກໍຣະນີທີ່ຊັດເຈນ ສໍາລັບຄຳເຕືອນ, ມັນຂຶ້ນກັບຜູ້ບໍຣິໂພກທີ່ ຈະເອົາໃຈໃສ່.
"ຂ້ອຍບໍ່ຢາກເປັນໂຣກມະເຮັງ ຈາກການດື່ມເຄື່ອງມຶນເມົາ ແລະຄວາມມ່ວນຊື່ນ. ຄືກັນກັບເຂົາເຈົ້າ ເຮັດໃນອອສເຕຣເລັຍ."
"ຂ້ອຍບໍ່ຄິດວ່າ ປ້າຍເຕືອນຈະສ້າງຄວາມແຕກຕ່າງຫຍັງຫລາຍ. ຂ້ອຍຄິດວ່າ ທຸກມື້ນີ້ ຜູ້ຄົນຮູ້ດີກ່ຽວກັບຄວາມສ່ຽງເຫຼົ່ານັ້ນ.
"ມັນບໍ່ແຕກຕ່າງຫຍັງສໍາລັບຂ້ອຍ, ຖ້າຫາກວ່າ ມັນຢູ່ໃນຢາສູບ. ເປັນຫຍັງ ມັນຈຶ່ງຈະບໍ່ສາມາດມີໄດ້ໃນເຫຼົ້າໄດ້?
ການມີປ້າຍເຕືອນ ໃນສະຫະຣັດອາເມຣິກາ ຈະຕ້ອງໄດ້ຮັບການອະນຸມັດ ຈາກສະພາ Congress ເສັຍກ່ອນ.
ປະເທດ Ireland ກໍາລັງດໍາເນີນການແລ້ວ ທີ່ຈະໃຫ້ມີ ປ້າຍຄໍາເຕືອນກ່ຽວກັບຜລິດຕະພັນເຫລົ້າ ແລະຈະເປັນປະເທດທໍາອິດ ທີ່ຈະເຮັດເຊັ່ນນັ້ນຕັ້ງແຕ່ປີ 2026.
ເນື້ອເລື່ອງໂດຍ Hannah Kwon ແລະ Essam Al-Ghalib ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌ sbs.com.au/lao
ທ່ານຍັງສາມາດ ຕິດຕາມທາງ facebook ໄດ້ທີ່ facebook.com/sbslao
