Australia tej kiab khw lagluam vaj tse ces nyob rau lub caij uas yuav tau ua tib zoo txiav txim siab lawm, vim rau qhov tej kev muaj peev xwm yuav thiab cov kev pauv hloov rau cov kev xav yuav tsev tau ua rau tej nqe tsev muaj kev pauv hloov thoob haiv neeg no lawm.
Ntxiv ntawd los lub limtiam no lub tuam txhab Domain tsab ntawv cej luam txog tej nqe tsev kuj qhia tias tej tsev poob nqe tshaj plaws rau lub caij 3 hli txog lub 12 hlis ntuj tsaib no thiab kuj pom tias tau ua tau tsev ntau tuaj ntxiv xyoo 2024 ces thiaj muaj tej tsev muag ntau tshaj plaws ntawm tej nroog rau lub caij 3 xyoos no.
Raws li Nicola Powell uas yog tus Domain tus coj tswj cov hauj lwm teeb txheeb thiab economics hais ces kuj muaj xov xwm qhia txog tej neeg yuav tsev cov kev hloov lawv tej cwj pwm yuav tsev tsis yog cuam tshuam txog cov kev xav yuav tsawg dab tsi.
Powell tau hais tias "Ces peb thiaj pom tias tej neeg yuav tsev tau cheem lawv cov kev yuav tsev me ntsis lawm. Tab sis txhais tsis tau tias lawv tsis xav yuav tsev — tsuas txhais tau tias tej neeg ncua lawv cov kev txiav txim siab yuav tsev xwb. Thiab tos lawv ho tau ncua los twb vim yog tej nqe tsev kim tuaj ntxiv, ces thiaj yog tej yam nyuaj rau tej neeg yuav tsev coob heev tsis muaj peev xwm yuav tsev.''
Watch the image below change to see where home prices have fallen across different states and territories.
Tej nqe tsev uas poob nqe kuj yuav ua rau tej neeg yuav tsev muaj ib co cib fim yuav tsev ntawm tej zos thiab tej zos cheeb tsam los yog zos toj siab ntawm Australia. Source: SBS
Tej nqe tsev ntawm Sydney ib nyuag nqes me ntsis lawm.
Sydney yeej tseem yog Australia lub nroog uas tej kiab khw muag tsev muag kim tshaj plaws.
Tab sis tej nqe tsev kuj tau nqe txog li 0.1 feem pua rau lub sij hawm 3 hlis no los nyob rau ntawm $1,645,444, ces thiaj yog cov xwm txheej nqe tsev poob sib law liag ua zaum ob, thiab thiaj tsuas yog tib lub nroog uas nqe tsev poob ntau heev xwb.
Ces thiaj li yog thawj zaug ntawm lub sij hawm 2 xyoos uas Sydney tej nqe tsev tau poob nqe rau lub caij 3 lub hlis sib law liag.
Raws li tej xov xwm tau los ntwm lub tuam txhab Domain tsab ntawv cej luam qhia ces tej nqe tsev units ntawm plawv zos sab qaum teb ntawm Crowss Nest ib nyuag yuav tau zog lawm, vim tus nqe tej nqes txog li 22.1 feem pua los ua $818,000 lawm.
Tej nqe tsev ntawm Gold Coast cov zos li Biggera Waters thiab Clear Island Waters kuj tau poob nqe lawm. Source: AAP / Destination Gold Coast/GCPR
Tej nqe tsev ntawm Gold Coast poob nqe lawm.
Muaj Queensland qee cov zos tej nqe tsev los kuj tau hloov loj kawg lawm thiab.
Lub zos Biggera Waters, uas yog ib lub zos tej neeg nyiam nyob ntawm Gold Coast kos kuj pheej yig zog thiab muaj peev xwm yuav tau lawm, vim tus nqe kuj tau poob 21.1 feem pua ntawm ib xyoos rau ib xyoos los ua $660,000 lawm xwb.
Lub zos Clear Island Waters los yeej muaj ntsis zoo tib yam li no thiab vim tus nqe tsev tau poob 21.1 feem pua los ua $1,400,000.
Tej neeg yuav tsev thawj zaug ntawm Melbourne
Melbourne tej nqe tsev unit prices yog cov tau nqe zoo tshaj plaws tuaj ntxiv txog li 2.1 feem pua rau 3 lub hli txog rau lub 12 hlis ntuj dhau los no, hos tej nqe tsev ces kuj tau nce kim tuaj ntxiv txog li 1.6 feem pua rau ib lub caij no thiab.
Powell tau hais tias tej neeg yuav tsev thawj zaug tej zaum yuav yog cov ua rau tej nqe tsev unit kim tuaj ntxiv.
Nws tau hais tias "Melbourne kuj yog ib lub nroog ua rau sawv daws ceeb. Vim xyoo 2020 ces tej tsev yeej tsis tau nqe zoo, tab sis lub caij 3 hlis xaus xyoo 2024, peb kuj tau pom tias tej nqe tsev kim tuaj ntxiv lawm,''
"Tej no qhia tias tej vaj tse muaj nqes tuaj ntxiv rau lub caij ntev tuaj ntxiv lawm, vim rau qhov tej neeg yuav tsev thawj zaug tau rov qab yuav tsev lawm,''
"Thiab peb yeej ib txwm pom tej nqe tsev ntawm Sydney thiab Melbourne yeej muaj cov kev sib hloov raws ib lub nroog twg. Thiab yeej muaj cov kev sib cuam tshuam ntawm ob co xwm txheej hloov tej nqe tsev no, tab sis kuj txawv txij xyoo 2020 los no thiab vim peb yeej tau pom tias zoo li Melbourne tej nqe tsev yeej tsis tshua kim li ib txwm kim.''
Yog tham txog tej tsev uas muaj peev xwm yuav tau nyob, ces lub zos Chadstone kuj yog lub uas tej nqe tsev units tau poob txog 33.3 feem puas ntawm ib lub xyoo rau ib lub xyoo los ua $505,000 lawm.
Sunshine ces yog lub tej nqe tsev tau poob txog 18.9 feem pua rau tib lub caij no thiab ces thiaj ua rau tej nqe tsev theem nrab nyob rau ntawm $450,000 lawm.
Ua ke no los lub zos Barwon Heads nyob raws ntug hiav txwv ntawm xeev Victoria los tus nqe tsev kuj tau nqe txog li 20.5 feem pua lawm thiab.
Tej zos cheeb tsam thiab tej zos toj siab thiab tej kiab khw vaj tse me los kuj dhia tsis dhau ntawm tej nqe tsev ua tau poob nqe no thiab.
Nyob rau sab hnub poob qaum teb ntawm xeev Victoria lub zos Warracknabeal ces tus nqe tsev theem nrab tam sim no yog $198,000 lawm xwb tom qab nqe tsev tau poob nqe txog 19.6 feem pua.
Tej nqe tsev ntawm West Hobart tau poob nqe txog 7.4 feem pua. Credit: Piero Damiani/Getty Images
Hobart thiab Canberra: Ces kuj tsis muaj peev xwm qhia tau qhov tseeb txog tej nqe tsev
Hobart tej nqe tsev units tau poob nqe ntau tshaj plaws txog 1.5 feem pua los ua $528,000 piv rau tag nrho tej nroog loj. Tab sis tej nqe tsev kuj tau nce kim tuaj ntxiv txog 4.6 feem pua rau lub caij 3 hlis dhau los thiab.
Hos Canberra tej kiab khw lagluam vaj tse ces kuj nyob li qub rau tib lub caij ntawd, thiab yeej tsis muaj kev pauv hloov dab tsi rau tej nqe tsev los yog tej nqe tsev unit ntawm lub nroog no li.
Tab sis ACT lub nroog Denman Porspect tej nqe tsev kuj tau poob nqe ntau tshaj plaws txog 22.2 feem pua, ces thiaj ua rau tus nqe tsev nrab nyob rau ntawm $1,015,000 lawm.
Xyoo 2025 no puas yog ib xyoo uas tej neeg yuav tsev ntau?
Txawm tias txij li lub 9 hlis ntuj xyoo 2023 los no yeej pom tias cov kev loj hlob ntawm tej kiab khw vaj tse tau loj hlob qeeb mus txog rau theem qeeb tshaj plaws, los cov kev muaj peev xwm yuav tsev thiab kuj yuav yog tej yam tau txais txiaj ntsim zoo rau tej neeg yuav tsev xyoo no (2025).
Vim tau ua tej tsev ntau tuaj ntxiv, hais tsi ntsees rau ntawm tej nroog loj, ces thiaj ua rau tej neeg muaj cib fim sib khom nqe tsev dua.
Tab sis puas yuav zoo li no txuas ntxiv? Raws li Powell xav ces kuj yog ntawm seb ho muaj kev pauv hloov li cas ntxiv xwb.
Nws hais tias "Xyoo 2025 no ces yuav yog ib xyoos uas sawv daws xav paub tias yuav zoo li cas heev. Vim zoo li xyoo 2024 ces tej lagluam vaj tse yeej tsis tshua zoo, thiab yeej yuav zoo li no rau thaum ntxov xyoo 2025. Tab sis tej zaum kuj yuav muaj kev pauv hloov thiab thaum pib pom muaj Reserve Bank of Australia (RBA) tej kab theem paj hloov."
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab mloog tau caum los yog lwm cov podcast platforms (, , thiab ).
