Vim li cas thiaj ua lub koom txoos sport car show?
Nyob rau hnub 3 uas noj peb lub caij noj tsiab peb caug xyoo tshiab 2024-25, ces Andrew Yang koj tau npaj ua lub koom txoos Hmong Melbourne sport car show. Thiab kuj muaj ob peb yam kev sib tw li, lub tsheb sawv daws nyiam feem coob, lub qes tshaj plaws, lub uas muaj lub tshuab huv tshaj plaws.
Andrew hais tias xav ua tej yam dab tsi tshiab thiab txawv tej ib txwm ua txhua xyoo, kom tej phooj ywg ho tau tuaj sib ntsib.
''Zoo li sawv daws muaj kev lom zoo heev. Thiab zoo li nyias yeej muaj nyias ib co laj thawj qhia tias vim li cas thiaj nyiam sport cars.
''Cov hluas lawv yeej nyiam thiab lawv yeej lom zem thiab, vim yog tej yam txawv, thiab peb yeej tsis tshua tau sib ntsib ua ke thiab. Peb yeej sib ntsib thiab tab sis yog peb cov sib paub xwb tsis yog sawv daws. Ces thiaj ua lub koom txoos no kom sawv daws tau koom thiab,'' raws li Andrew hais.
Andrew hais tias ''Sawv daws yeej lom zem heev, ces tej zaum xyoo tom ntej no peb rov qab ua dua, cov hluas lawv thiaj muaj siab kho lawv cov tsheb, kom xyoo tom ntej no rov qab coj lawv tej tsheb tuaj show ntxiv.''
Hmong New Year sport car show 2024-25 Credit: SBS Hmong
Insurance puas kim?
Andrew hais tias yog tham txog kev yuav insurance pov puag tsheb lawm ces nrhiav lub twg pheej yig ces cia li siv xwb.
Tub Muas Yaj hais tias ''Tej zaum kim txog li $4,000 ib xyoos twg, thiab tsuas pub tsav yus lub tsheb li ntawm 1,000 km ib xyoos twg xwb. Vim yog ib co tsheb tsis tshua muaj parts kho thiab yog cov risky category cars.''
Nyiaj Lauj hais tias ''Kuv join club permit ces ib xyoos lawv pub kuv tsav 9 hnub (3 hlis) xwb.
Crowd winer prize - GTR Nissan Skyline Credit: SBS Hmong
Vim li cas thiaj nyiam sport cars?
Tub Muas Yaj hais tias ''Ntawm kuv tus kheej ces thaum tseem yau ces yus pom lwm tus tsav ces yus nyiam. Thaum yus loj tuaj ces yus xav ib lub tsheb sport car twg caij. Yus tsav cov tsheb no lom zem, muaj zog thiab ceev heev. Ces cov hluas feem coob nyiam rau qhov no. Lawv nyiam tsheb cev thiab tsheb zoo nkauj xwb.''
Nyiaj Lauj hais tias ''Thaum kuv me ces kuv yeej nyiam sport cars. Kuv yeej yuav tau Nissan Skyline, Nissan F15, WRX STI.'' Tam sim no ces nws tseem muaj lub Honda VTEC uas yeej cov khoom plig lub tshuab huv tshaj plaws.
Nyiaj hais ntxiv tias ''Kuv zoo siab uas tej hluas nyiam sport cars tab sis yog yus yuav sport cars ces yuav tsum txuag nyiaj thiab tsis txhob pheej siv nyiaj mus yuav tas mus li xwb. Yus txuag nyiaj kom lom zem thiab tau ua si thiab tab sis yuav tsum txuag mus yuav tsev thiab pab yus niam yus txiv thiab siv ua lwm yam thiab. Yog yus yuav tsheb tas mus li ces siv nyiaj ntau heev ces tsis muaj nyiaj siv ua dab tsi lawm thiab.''
Cleaniest engine Credit: SBS Hmong
Yuav kho thiab tu saib xyuas yus tej sport car li cas?
Andrew hais tias ''Xav kom coj mus ntsib tej kws sport car specialist pab yus kho'', tab sis Tub Muas hais tias ''Yog yus tus kheej txawj kho qhov yus txawj, thiab mam coj yam yus tsis txawj rau tej specialist kho xwb ces yuav pab yus txuag tau nyiaj me ntsis. Yog txhua yam yus tsis txawj kho thiab pheej coj mus thawj lawv xwb ces tau them nqe kho kim heev.''
Andrew Yang hais tias ''Kuv xav tias tag nrho tej tub hluas yeej paub kho lawv lub tsheb uas yog tej yam zoo heev.''
Tub Muas Yaj hais tias ''Kuv kho kuv lub tsheb ces kuv tsis txawj dab tsi li tsuas saib YouTube xwb, yog yus tsis paub kho tiag ces mam coj mus rau lwm tus pab.''
''Yeej muaj ntau yam tsheb tsis hais pheej yig los kim li, ntsuas kom yuav lub yus them tau xwb, vim yog yus luag lub kim thiab them tsis taus ces yuav muaj teeb meem tsis zoo rau yus cov loan credit rating.''
Nyiaj Lauj los kuj yog ib tug coj nws lub sport car mus show thiab.
Nyiaj hais tias ''Yus yuav tsum paub kho me me thiab yog thaum puas qhov twg thiaj paub kho tau yus, thiab thiaj pab tau tej phooj ywg thiab. Saib thiab kawm hauv YouTube pab yus, yog tsis ua ces yeej tsis txawj kho.''
Lowest prize winer Credit: SBS Hmong
