Unidade liuhusi desportu - Oinsa exercício halai no la'o hamosu movimentu multikultural.

Grupu ida ho naran RUNFLY Run Club ne'ebe base iha Western Sydney halo mudansa ba sira nia komunidade nia moris, liu-liu ba joven sira ne'ebe hela iha Cabramata West. Grupu ida ne'e involve sira nia komunidade liu husi atividade ka inisiativu desportu halai ka lao, ne'ebe antes hahú husi enkontru entre kolega na'in tolu ba halai semana-semana, no agora sai ona komunidade ida-ne'ebé vibrante tebes ho membru hamutuk 90 pesoas husi kultura no esperensia oi-oin. Grupu ida ne'e hari'i atu kria unidade no amizade diak iha komunidade liuhusi desportu. Iha dia 5 de Maio fulan ida ne'e grupu ne'e partisipa iha HOKA Runaway Sydney Half Marathon.

Saida mak HOKA Runaway Sydney Half Marathon?

HOKA Runaway Sydney Half Marathon ka antes ne'e bolu Sydney Morning Herald half Marathon hanesan eventu desportu half marathon ida ne'ebe komesa halao iha 1992 iha Sydney. Eventu ida halo ho objetivu atu promove saude diak ba komunidade iha Sydney nune'e mos atu promove cidade Sydney ne'ebe vibrante tebes. Depois de eventu ne'e halao durante tinan 31 nia laran ho naran Sydney Morning Herald half marathon, iha tinan 2023 organizadora sira troka naran eventu ne'e ba HOKA Runaway Sydney Half Marathon depois de sira asina kontratu ho sapatu brand HOKA. HOKA hanesan sapatu ne'ebe konhesidu hanesan sapatu mamar no diak tebes ba desportu halai ka lao.

Tinan-tinan ema barak mak partisipa iha eventu ida, tanto husi komunidade iha Sydney no cidade seluk iha Australia nune'e mos husi ema husi rai liur.

Istoria RUNFLY Run Club

Iha tinan ida 2024, Timor-oan balun ne'ebe mos sai hanesan fundador ba grupu RUNFLY Run Club iha Western Sydney partisipa mos iha eventu ida ne'e ne'ebe halao iha dia 5 de Maio liu ba.

Eliston Carceres, hanesan Timor-oan ida ne'ebe mak mai boot iha Australia konta nia istoria ne'ebe nia sente signifikante tebes durante halai metade maraton iha eventu ida ne'e. Nia hatete katak, ida ne'e premeira vez nia partisipa iha metade maratona ne'e hamutuk ho nia grupu RUNFLY Run Club. Nia dehan maratona ida halo nia sente haksolok tebes no mos fo aten-barani ba nia.

Eliston Carceres halai no kompete iha HOKA Runaway Sydney Half Marathon Credit: Daniel Tran, Sydney Photographer

Atu partisipa iha maratona ida ne'e atleta sira halo preparasaun ho diak tebes. Nune'e mos ba Eliston ho nia kolega sira. Nia dehan katak, nia rasik halo preparasaun durante semana sia nia laran no importante atu sadik (challenge) ita nia an no treinu ho diak, tanba ita la hatene saida mak ita sei hasoru. Nia dehan katak nia fiar ba quote ne'ebe dehan;

In your own race at your own pace

Iha kontextu ida ne'e iha lian Tetum ita intreperta ba katak " Ema ida-idak halai tuir sira nia forsa ka kapasidadi"

Eliston hatete katak maski antes ne'e nia laiha esperensia ba halai, maibe nia sente kontente tebes ho oportunidade ida ne'e. Nia dehan mos sira nia grupu la prekupa ho resultadu, importante mak sira esforsu ona. Esperensia ida ne'e sira atu prepara mos sira atu partisipa iha full maratona ne'ebe sei halao iha fin de ano tinan ida ne'e.

Bainhira husu tanba sa mak nia hakarak partisipa iha eventu ida ne'e, Eliston hatete katak inisiativu halai ne'e komesa husi nia ida naran Calvin. Calvin mak konvida Eliston ho nia kolega Timor-oan ida au halai. Calvin ema ida ne'ebe iha ona esperensia halai barak. Husi konvite ne'e, sira nain tolu komesa uluk halai depois sira konvida ema barak atu mai tuir, liu-liu ema sira iha sira nia bairo laran.

Eliston Carceres ho nia kolega Denilson Lay ida hetan medalha husi kompetisaun HOKA Runaway Sydney half marathon Credit: Daniel Tran, Sydney Photographer

Calvin Tran, kolega Eliston nian ne'ebe mak konvida sira ba halai hamutuk no ikus mai hamutuk hari'i grupu RUNFLY Run Club konta tuir oinsa nia hasoru timor-oan nain rua, Eliston ho Denilson. Nia dehan katak nia hasoru malu ho timor-oan nain rua ne'e iha sira nia servisu fatin. Nia dehan Denilson hare nia halai no nia dehan ba Calvin katak nia sempre hakarak atu halai. Calvin hato'o katak fou-foun kuandu Calvin hateten atu halai to'o 5km, Eliston ho Denilson hanoin atu halai deit km2 ka 3 maibe ikus mai sira halai duni tuir km lima ne'ebe sira alvu ba. Sira nain rua rasik hakfodak ho sira nia forsa ne'e. Husi ne'ebe sira deside atu halai semana-semana.

Calvin Tran hanesan mos fundador ba RUNFLY Run Club partisipa iha HOKA Runaway Sydney Half Marathon Credit: Daniel Tran, Sydney Photographer

Husi ne'eba sira komesa konvida ema seluk iha sira nia bairo liu husi Instagram. Calvin loke konta instagram ida ne'ebe iha ne'eba nia tau informasaun no konvida ema hotu atu mai partisipa iha sira nia grupu.

Sira mos loke odamatan ba ema hotu atu partisipa, laos deit atu halai hamutuk maibe mos bele lao se sira lakohi halai. Sira mos loke ba ema hotu ho kultura no esperensia oi-oin.

Calvin mos hatutan tan katak, nia hakarak atu kria desportu ida ne'ebe bele halibur ema hotu husi esperensia no kultura oi-oin.

Nia dehan " atividade ida ne'e komesa husi grupu mane deit maibe depois loke mos ba feto sira. Tanba importante atu troka stigma ne'ebe mak iha katak mane sira mak bele halai hamutuk

Because it is important to change the stigma that men run together.

Nia dehan ida ne'e hanesan platforma diak ida ba sira nia komunidade iha sira nia area. Hanesan ema ne'ebe hela no boot iha South Western Sydney, nia hare laiha iha atividade hanesan ne'e bainhira sira boot mai, nune'e mos area ne'ebe sira hela laos area ne'ebe mak konsidera hanesan area ema riku nian. Nia hatutan tan katak; ema barak ne'ebe mak partisipa iha atividade ida ne'e kuaze sira inan aman ema imigrante ne'ebe hili atu mai hela iha Australia, nune'e bainhira sira mai hamutuk sira sente tebes sira iha valor no esperensia ne'ebe mak hanesan.

Membru feto ida husi grupu RUNFLY RUN CLUB partisipa mos iha eventu half marathon ne'e Credit: Daniel Tran, Sydney Photographer

Nune'e bainhira nia halai ho Eliston ho kolega sira seluk, nia mosu ho inisiativu atu atividade ida ne'e laos deit halai ka lao maibe mos bele kria amizade, kria komunidade ida ne'ebe ami hotu senti autentiku no sente fahe valor no esperensia moris nian ne'ebe hanesan. Tanba ikus mai, ema hotu hetan benefisiu husi atividades ne'ebe sira partisipa, laos deit fisikamentu maibe mos ba sira nia saude mental.

We are trying to promote a safe space and safe culture for everyone, especially for our female runners

Calvin mos emphaze katak, ida ne'e laos deit atividade halai hamutuk maibe importante liu mak kria amizade no koalia ba malu no aprende buat barak entre sira. Buat ida ne'ebe sira hakarak kria no promove mos mak atu iha fatin seguru ba ema hotu partisipa, liu-liu ba sira nia maluk feto sira. Tanba iha sira nia bairo dalaruma sira ladun senti seguru ba halai.