Lideransa foun kria abut metin: Planu Asosiasaun Timor-oan Sydney mantein kultura no suporta traballador sira

Timorese United Association (TUA) iha Sydney foin hili lideransa foun sira atu dirije grupu ne'e. Membru foun simu tomada de pose hahú iha loron 26 Outubru. Asosiasaun ne'e importante tebes ba ema Timor-oan sira ne'ebé hela iha Sydney. Lideransa foun sira iha objetivu balun ne'ebe sira hakarak atinji ne'ebe liga ho preservasaun kultura Timor nian. Sira mos loke odamatan ba traballadór timor-oan sira ne'ebe dala ruma sente mesamesak no hanoin uma, atu partisipa iha atividade no grupu ho fo apoiu ba malu. Sira hakarak asosiasaun sai hanesan uma segundu ba traballadór sira ne'e.

Asosiasaun Timor Unidu ka Timorese United Association (TUA) iha Sydney tama ona ba kapítulu foun ida iha eleisaun ne'ebe halao iha fulan hirak liu ba. Senhora Ana Maria Ferreira, nudar Prezidente foun, marka momentu importante dezde organizasaun ne'e estabelese iha 2016.

Ekipa lideransa foun hahú sira-nia knaar ofisiáliamente iha loron 26 Outubru depois de tomada de pose. Membru foun nia lista mak hanesan hatudu iha foto kraik ne'e.

Foto husi liman karuk: Prezidente foun TUA, Sra. Anna Maria Ferreira asina hela dokumentu depois de tomada de pose. Foto iha liman los, naran membru foun TUA ba tinan 2024-2026 no foto iha kraik; Membru foun sira hasai foto hamutuk depois de simu pose.

Membru foun ida ne'e sei lori enerjia foun no ideia inovadora atu serve komunidade Timor ne'ebé boot ba beibeik iha Sydney.

Iha entrevista ho SBS Tetum, Senhora Ferreira fó sai planu

asosiasaun nian ne'ebe sei konsentra ba preservasaun kultural no apoiu ba komunidade.

Ami-nia prioridade mak ba labarik jerasaun foun labele haluha tradisaun no valor Timor nian.

Sra. Anna Maria Ferreira, Prezidente Timorese United Association

Prezidente Ferreira aumenta tan katak sira iha inisiativa importante rua: programa úniku ida ba lian Tetun ne'ebé integra kantiga no dansa tradisionál sira, no série ida ba katuas-ferik sira atu fahe istória ne'ebé seidauk dokumenta.

"Liu husi kantiga no dansa kulturál, ami sei hanorin Tetun ba ami-nia jerasaun foun enkuantu esplika signifikadu profundu iha ami-nia tradisaun nia

kotuk".

SBS Tetum halo entervista ho Presedente foun TUA, Sra. Ana Maria Ferreira

Kompromisu asosiasaun nian la'ós de'it ba programa kultural sira. Ho rekoñesimentu ba dezafiu ne'ebé traballadór temporáriu Timor-oan sira hasoru iha Austrália, TUA halo membership asesivel liu liuhusi hamenus kustu.

"Ami loke ami-nia odamatan luan ba sira," Senhora Perreira subliña. "Ami hakarak sai uma segundu ba traballadór sira ne'ebé sente mesamesak. Ami-nia kustu membership ki'ik ne'ebe oferese ba sira, sei kiik liu komunidade seluk atu asegura katak ema hotu bele partisipa."

Sentimentu ida-ne'e iha signifikadu ba Palmira Freitas de Carvalho, reprezentante traballadór temporáriu, ne'ebé fahe ninia esperiénsia ho SBS Tetum. Nia hatete, maski nia servisu ona iha Austrália dala tolu, nia foin kontaktu ho komunidade Timor iha Sydney. " Ami hakarak duni atu sai membru maibe ami sei koalia ba malu ba oportunidade ida ne'e".

Nia aumenta katak maski traballadór sira dala ruma sente

mesamesak, sira mantén atitude pozitivu no konsentra ba aprende kapasidade foun atu benefisia sira no mos bainhira sira fila ba Timor.

Bainhira ami sente saudades ka mesamesaky, ami presiza buka belun hodi azuda ami nia sentimentu no fahe hanoin ba malu"

Palmira Freitas de Carvalho , Traballador Timor-oan iha Sydney

Vizaun foun asosiasaun nian dada atensaun iha nivel federál Australia nian. Durante serimónia tomada dé pose, reprezentante governu federál, Sra. Anne Stanley MP, hatete nia sente onra boot tebes bele mai partisipa ida seremonia ida ne'e, tanba TUA nia servisu ne'e laos deit atu apoiu komunidade Timor-oan sira iha Sydney maibe mos siura ne'ebe mak mai husi Timor.

Bainhira husu saida mak governu federal bele azuda TUA no mos problema ne'ebe timor-oan balun hasoru kona-ba sira nia passaporte, nia hatete.

"Ami iha ne'e prontu atu ajuda fasilita prosesu ida-ne'e," nia hateten. Nia subliña katak traballadór sira ne'ebé hasoru problema ho pasaporte kaduka labele

duvida atu husu tulun".

Sra. Anne Stanley MP, membru governu federal Australia; Sr.Pedro Correia, Presidente sesante TUA, no Sr. Eusebio Henrique Sam, fundador ida husi TUA

Aleinde ne'e, nia mós destaka katak iha bolsa disponivel ba ekipamentu kultural no entretenimentu husi governu federal, hatudu kompromisu boot governu nian atu apoia inisiativa komunidade sira.

Ami iha multikultural grants ne'ebe bele suporta asosiasaun ida ne'e

Anne Stanley, MP

Señor Expedito, senior ida ne'ebe mos hanesan fundadór ba organizasaun TUA, hanoin fila-fali ba organizasaun nia viajen dezde 2016, fahe hanoin kona-ba oinsá asosiasaun ne'e forma no ninia objetivu inisiál sira.

Entretantu, prezidente anterior, Señor Pedro Correia, espresa ninia apoiu kontínuu ba diresaun foun no sira-nia programa futuru, hatudu espíritu forte kona-ba kontinuidade no kolaborasaun.

Ba oin, ekipa lideransa foun sei hasoru malu atu dezenvolve programa sira. Ho apoiu forte husi komunidade, apoiu governu nian, no vizaun klaru atu preserva kultura Timor nian no apoia traballadór sira, TUA prontu atu haforte nia papél hanesan áirin ida kultural ba komunidade Timor-oan sira iha Sydney.

Foto iha leten liman karuk: grupu dansa kultura anima seremonia tomada dé pose ba membru foun TUA; foto segundu iha liman los: han hamutuk depois de seremonia ofisial; foto ikus iha okos: Prezidente TUA foun, Sra. Ana hamutuk ho nia membru sira hasai foto hamutuk ho traballador Timor-oan sira ne'ebe servisu iha area NSW.

Asosiasaun simu membru hotu husi komunidade Timor, husi rezidente permanente to'o traballadór temporáriu sira, hodi nele kontribu ka partisipa iha kapítulu foun ida-ne'e kona-ba selebrasaun kultural no konstrusaun komunidade.

Nu'udar família ida de'it, sira hakarak kria espasu moris ida ne'ebé kultura Timor bele moris di'ak no membru ida-idak sente pretensia iha organizasaun ida ne'e.