Tinan Inisiu no Influensia Familia nian
Iha luta ba independénsia Timor-Leste nian, funu rezisténsia ida ne'ebé forte liu la mai deit husi kilat ida, maibé mai mos husi ema nia korajen ne'ebé mak brani atu konta sira-nia lia-loos, lia fuan ida ne'e hato'o husi Ezequiel Oliveira ka konhesido ho Zequito Oliveira ho naran resistensia " Refa Kambarage". Nia dehan nia viajen iha resistensia hahu bainhira nia iha tinan walu, bainhira nia inan lori nia ba hela iha Fatumaka " Momentu ne'eba ninia inan, lori nia ba iha ne'eba antes ba sai dadur iha Ataúro. Nia Inan lia-menon ba nia depois forma ninia destinu: "Estuda maka'as, labele baruk-teen no halo buat hotu atu kontribui ba luta ida-ne'e."
Maski iha oan nain ualu, Zequito sublinha nia inan nunka hatudu frakeza, sempre fó énfaze ba edukasaun nu'udar sira-nia dalan ba oin. Liafuan sira-ne'e sai motivasaun ba Zequito, lori nia atu domina lian Inglés ho objetivu ida:
Ha'u hakarak aprende Inglés atu ha'u bele konta ha'u-nia istória rasik sem presiza ema seluk atu tradús ba ha'u.Zequito Oliveira
Entre tinan 1982-1983, durante Xanana halo kontaktu ho indonesia nia militar "cease fire" nia konta tuir nia inan halao papel krusial nu'udar ponte ba komunikasaun entre militar Indonezia ho sira ne'ebe hela iha illa Atauro. Zequito hatete katak nia inan nia pozisaun kompleksu no forsa ne'ebe la nakdoko, fo tebes influensia makas ba nia aprosimasaun iha rezistensia.
Edukasaun no Rezistensia sedu
Iha Fatumaka, Zequito hasoru malu ho ninia maluk rezisténsia dahuluk, sira ne'e mak hanesan Lino Saldanha, Aires Guterres, Helio Horta no Eduardo Belo (Gattot).
Iha tinan 1989, nia muda mai Dili atu komesa halao nia servisu iha rezistensia. Nia haktuir katak, Iha momentu ne'eba nia hetan orden ida atu buka ema ida ho uma ida hodi komesa halao atividades ne'ebe mak bele hatan ba propaganda Indonezia nian, no momentu ne'eba governu Indonesia komesa loke ona Timor ba Mundu ne'ebe sira bolu "Timor-Timur terbuka".
"Governu Indonezia halo politika ida ne'e tanba sira nia imajen ne'ebe at los ona iha mundu internasional" Ho oportunidade ida ne'e, hau ba buka nia kolega, Lino Saldanha (matebian) atu azuda nia. Nune'e Lino lori hau ba hasoru Sr. Pedro Lebre ho ninia kaben Sra. Joana Lebre (matebian) iha sira-nia uma, Villa Harmonia. Familia ida ne'e hare hau hanesan sira nia oan laos hanesan ema fuik ida".
Villa Harmonia: Fuan Rezistensia nian
Zequito informa katak, Villa Harmonia, ne'ebe iha tempu ne'ebá koñesidu ho naran Monalisa 2, hanesan akomodasaun ida (Losmen) ba vizitante sira husi rai laran no rai liur. Maibé iha prátika fatin ne’e la’ós deit alojamentu ida, maibé mós sentru informasaun ba ativista rezisténsia sira no mós pontu enkontru krusiál ida ba sira hotu ne'ebé envolve iha luta, inklui ativista lokal no internasional sira no mos ho jornalista sira husi rai liur. Ho tulun no laran diak husi familia Lebre no Sra. Joana Lebre nebe la kolen atu tein no fo ospitalidade nebe diak tebes ba ema hotu, inklui militár Indonézia balun ne’ebé hela iha ne’ebá hodi tau-matan ba ativista sira nia atividades, fatin nia sai sentru importante ba ema hotu.
Nia hatutan tan mos katak "Saida mak halo fatin ida ne’e extraordinário la’ós de’it ninia kna’ar nu’udar informasaun ida no sentru enkontru, maibe oinsa familia Lebre nia ospitalidade, korajen no umanidade sai boot tebes iha tempu ne'ebá".
"Até ajente intelijénsia Indonézia ida, ne'ebé hetan knaar atu tau matan ba sira, sente emosionadu tebes ho sira nia laran-di'ak ne'ebé jenuínu to'o nia hahú fó avizu ba sira kona-ba perigu sira ne'ebé besik".
Foto Premeiru iha liman los: Zequito hasai ho jornalsita Japaun, Yokota Yukinori" Vani iha Lospalos tinan 1990. Foto segundu: hamutuk ho Senhor Pedro Lebre, uma nain ba Villa Harmonia ka Monalisa 2 ho Senhora Erminia Oliveira. Foto Ikus: Foto Zequito Oliveira iha tempu agora. Credit: Zequito Oliveira " Rego Kambarage"
Papél Estratéjiku hanesan Konektór Rezisténsia nian
Zequito hatete nudar nia papél evolui, nia sai hanesan ligadór ida ne'ebé folin-laek entre frente krusiál tolu rezisténsia nian: forsa armada sira iha foho, kanál diplomátiku sira iha rai-li'ur, no operasaun klandestina nian iha sidade sira. Ninia pozisaun úniku tebes ho abilidade iha lian Ingles hodi halo ligasaun ho jornalista sira, koordena ho kombatente rezisténsia sira, no asegura katak informasaun la'o entre parte hotu-hotu".
Ha'u-nia papel mak atu koneksaun entre frente armada, frente klandestina no frente diplomátika. Hau mos halo ligasaun ho ativista no jornalista sira husi liur no relata ba grupu rezisténsia nian.Zequito Oliveira "Refa Kambarage"
Eskalasaun Rezisténsia nian no 12 Novembru
To'o 28 Outubru 1991, tensaun iha Dili to'o ona iha pontu ida ne'ebe makas tebes. Zequito deskreve atmosfera: "Díli nakonu ho tensaun... "dalaruma laiha liafuan atu esplika buat barak ho klaru maibé ita-nia konviksaun ba liberdade mak ida ne'ebé dudu ó ba fatin ne'ebé loos."
Zequito rasik mos hetan kapturasaun husi militar Indonezia bainhira lao ho jornalista fotografu ida naran, Steve. Husi insidente ne'e, Steve, hetan trauma maka'as no to'o agora Zequito koko atu buka tuir nia, maibe la hetan nia direasaun.
Akontesimentu 12 Novembru 1991, sai momentu pivotal ida iha Timor-Leste nia luta, ho narrativa kompetisaun mosu. Tuir Zequito haktuir katak; depois de misa ba matebian Sebastiao Gomes, ema ne'ebe mak partisipa iha misa komesa lao ba Santa Cruz. Bainhira to'o iha ne'eba la kleur militar Indonesia tiru sira. Husi atuasaun militar nian ne'e ema hamutuk 91 pesoas hanesan ne'e makte, kanek husi kilat musan, sona to'o mate no balun lakon to'o ohin loron.
Entre sira ne'ebe mak kanek, iha mos nia alin Elvis Fernandes de Oliveira "Keris". Zequito deskreve "Iha momentu ne'eba Brimob/Polisia espesial Indonezia nian, baku, tebe no sona kanek hau nia alin ho baioneta husi kilat. Husi sira nia atuasaun ba nia alin, nia hetan kanek rua nulu resin iha nia kabun, no iha nia ulun fatuk".
Foto Premeiru: Zequito "Refa Kambarage" tau sapeo hamutuk ho nia kolega matebian Dionisio "Izo" (Matebian) antes militar Indonezia tiru; Foto segundu: Zequito hamutuk ho guerrila/falintil sira iha regiao Ponte Leste. Zequito hato'o mensajen komandante em cheve de falintil, Kay Rala Xanana nian husi cipinang ba sira. Foto Treseiro: Zequito vizita fatin historika, Villa Harmonia ho Sr.Pedre Lebre tur iha kadeira kinur no maluk sira seluk. Foto ikus iha liman: Zequito nia alin, Elvis Oliveira "Keris" hatudu fitar kanek ne'ebe nia hetan husi Masacre Santa Cruz. Credit: Zequito Oliveira " Refa Kambarage"
Narrativa ofisiál ida-ne'e kontrasta tebes ho esperiénsia hosi timor-oan sira ne'ebé mak iha terenu momentu ne'eba. Zequito dehan katak " ida ne'e laloos, kuandu tiru malu iha kualker norma konfrontasaun rua tenki armada hotu. Ami laiha kilat, momentu ne'eba ami halo demonstrasaun ho dame. Ida ne'e hanesan propaganda ida atu taka sira nia atua violensia".
Nia hatete mos "Ba membru rezisténsia no ema sivíl sira, loron ne’e reprezenta kapítulu seluk ida iha sira-nia luta ba independénsia. Depois de 12 de Novembru, tensaun iha Dili aumenta daudaun, ho prezensa espiaun sira (mauhu) konstante iha sikun hotu-hotu".
Maibe tuir Zequito servisu resistensia kontinua nafatin no koko atu halo amigu mos ho militar Indonezia sira hodi hetan informasaun no labele hetan diskonfia ba atividade ne'ebe sira halo hela. Iha ne'e Zequito hanoin hetan saida mak nia aman hatete ba nia " Imi-nia isin ho ain bele ajuda ema Indonézia bainhira sira presiza, maibé imi-nia fuan no hanoin no domin labele lakon atu luta ba ukun rasik-an",
Impaktu husi Kobertura Internasionál no kustu ba ema timor-oan sira
Prezensa hosi jornalista internasionál sira ajuda tebes "amplifika situasaun iha rai liur", maibé istória hotu-hotu mai ho kustu boot ba ema lokál sira", sublinha husi Zequito.
"Korajen ema Timoroan sira-nian ne'ebé ko'alia ho jornalista sira, ninia importansia dala ruma haluha atu temi"
Ita-nia joven sira,feto ho mane, no mos inan-aman sira tau sira-nia moris iha risku atu tama iha notísia...parte ida-ne'e ema haluha tiha.Zequito Oliveira "Refa Kambarage"
Profundidade kompromisu nian ba kauza ida-ne'e haktuir husi Zequito hanesan mos ho liafuan ida hosi jornalista/ativista Kamal Bhamadaj.
Zequito, hau nia vida laos iha nivel ida ne'ebe iha o nia leten, no o nia laos iha hau nia okos. Ida ne'e injustisa ida ne'ebe ita hotu tenke kontraKamal Bhamadaj nia lia fuan ba Zequito Oliveira "Refa Kambarage"
Legadu no Serbisu Atuál
Ohin loron, Zequito kontinua nia servisu ba Timor-Leste liu husi meius oi-oin: Nia hatete nia ko-estabelese Kooperativa BRAMA no ninia sistema nu'udar esperimentu sosiál, lidera kooperativa BRAMA iha Hom'e, Lospalos. Nia mos hanorin Inglés, Portugés, no Español ba joven sira. Iha kooperativa BRAMA, nia servisu ho hamutuk ho nia kolega balun ne'ebe mak doutór kona-ba hari'i servisu saúde komunitária, no dezenvolve mákina resiklajen tijolu eko atu prodús tijolu eko ba konstrusaun komunitária sustentável ho materiál lokál.
Foto Premeiro iha leten liman los: Grupu kooperativa BRAMA ne'ebe forma husi Zequito Oliveira. Foto segundu iha liman karuk leten: Dr. Nelson, Vice Koordinador kooperativa BRAMA uza makina ida ne'ebe halo resiklajen ba tijolu iha sentro BRAMA iha Home, Lospalos. Foto Treseiro liman los iha kraik: Senhor nain rua monta hela makina ba halo tijolu. Foto Quatru: Zequito Oliveira hanorin labarik sira iha Home, Lospalos. Credit: Zequito Oliveira "Rafe Kambarage"
Hateke ba Futuru
Hare ba futuru, Zequito hatete "Edukasaun importante tebes hanesan mós harii karakter" Nia hatutan tan" ita ukun-an ona maibe ita seidauk hari'i karakter ho diak ba jerasaun foun sira, 250 mill ema ne'ebe fo nia-isin lolon ho klamar tomak ba ukun rasik-an.. halo hau triste tebes bainhira ita selebra loron 12 Novembru, joven sira selebra fali hanesan sira selebra manan football..tanba ne'e mak hau mak hanoin importante tebes atu eduka sira..No hau mos triste hare museum resiztensia ne'ebe ita iha, ladun iha interese hosi ita nia joven atu ba vizita kompara ho ema mai husi rai liur, enkuantu ita mak halo istoria ida ne''.
___________________________________________________________________
Knananuk akompaña istoria ne'e: Kolele Mai husi kasette La'o Rai. Kredit no agradesementu ba Grupu Timorese Association of NT Lafaek ho Senhora Maria Alice Casimiro Branco, hanesan Diretora Kultural no mos ba individu no grupu sira ne'ebe mak kanta iha musika ne'e.
