Joven sikilista nain rua lao haleu Australia hodi azuda hari'i eskola Iha Timor-Leste

Joven Australianu nain rua ho idade 18 no 19 anos halo viajen ho sira nia bisikleta haleu Australia durante kuaje tinan ida nia laran. Sira nia sakrifisu no jornada ida ne'e ho deit objetivu ida atu azuda hadia eskola ida iha Balibo. Joven nain rua ne'e mak Cezary Carmichael ho Leo Norman.

Ohin loron nia episódiu sei lori ita ba istória extraordináriu ida kona-ba juventude, dedikasaun, no ligasaun entre kultura rua. Ami sei aprezenta joven Australianu rua ne'ebé lori sira-nia domin ba observasaun manu sai hanesan forsa ida ba mudansa iha Timor-Leste.

Joven rua ne’e mak, Cezary, tinan 19, no Leo, tinan 18 – joven husi Melbourne ne'ebé foin remata viajen furak ida durante fulan 10 nia laran hodi haleu Austrália ho bisikleta ho 15,000 km. Maibé ida ne'e laós viajen bisikleta baibain. Sira-nia misaun mak atu halibur osan ba hadia eskola ida iha Balibo, Timor-Leste, no iha tempu hanesan dokumenta mos manu native/rai nain iha Austrália.

Leo ho Cezary tama iha Western Australia depois de halo viajem husi Northern Territory Credit: twobirderstwobikes

Viajen ne'e nia hun mosu tinan balu liu ba bainhira Cezary, ne’ebe sei iha eskola sekundária momentu ne’eba, rona kona-ba organizasaun Spend It Well, ne'ebé dedika aan ba apoiu konstrusaun eskola iha Timor-Leste. Maski iha atrazu tanba COVID-19 no komprumisu eskola nian, Cezary nunka haluha nia objetivu no nia hatete ba sira "Nia hatete beibeik ba organizasaun ne'e, 'Ha'u seidauk haluha imi." Hanesan Kris Webb, organizasaun ne'e nia jerente haktuir " Ami hasoru Cezary ho Leo ho ami nia kolega ida iha Melbourne. Nia dehan nia hakarak halo buat ruma ho imi. Ikus mai nia ho nia kolega Leo halo duni"

Ideia simples ida ne'ebe sai realidade

Nune’e iha dia 1 de Janeiru 2024, Cezary ho Leo hahú sira-nia viajen boot husi Melbourne hodi lao haleu Australia tomak. Ho deit osan $25 kada loron ba hahán no nesesidade sira, ne’ebe mai rasik husi sira nia poupansa ka saving durante sira iha eskola no servisu iha fatin balun.

Baihira husu oinsa mak sira hatene kona-ba Timor, Cezary hatete katak " Hau iha konhesementu kona-ba Timor no nia luta ba Independensia no nia presiza atu hetan osan ba infrastrutura edukasaun nian".

Cezary ho Leo dokumenta mos fatin ne'ebe sira lao ba inkluido estrada boot ida ne'e Credit: twobirderstwobikes

"Hau nia kolega Leo, iha idea atu lao haleu Australia hodi hare manu nativu Australia no halo dokumentasaun ba ida ne'e. Ami sei halo ida ne'e ho bisikleta. No ami planu hamutuk atu laos deit hare manu no viajem ho bisikleta, maibe halibur mos fundus 100,000 dollar hodi azuda eskola iha Timor ba estudante 130 pesoas iha balibo. Ami rua Leo tau osan mesak hodi halao viajem ida ne'e".

Dezafiu no Vitoria

Viajen ne'e la'ós lahó ninia dezafiu sira. Bainhira sira halao sira nia viajen inisiu iha los tempu manas maka’as iha Australia, ne’ebe koko tebes sira nia rezisténsia, enkuantu izolamentu mos dudu sira nia reziliénsia mentál. Maibé, dezafiu sira-ne'e maka hatudu espíritu estraordináriu hosi siklista rua ne’e s no mós hosi komunidade sira ne'ebé sira hasoru iha sira nia jornada.

Ami halo ida ne'e laos deit tanba atu hetan fundus, maibe ami halo ida ho laran atu azuda Timor

Cezary Charmichael ho Leo Norman

Sira nia esforsu hetan atensaun makas. Saida maka parese hanesan knaar imposivel ida ba foin-sae na'in-rua ne'e mobiliza no iha ona ligasaun ho ema barak.

Cezary ho Leo, haktuir katak " Los katak ami halo esforsu halo viajen hodi hetan osan, maibe se laiha jenerosidade ka laran diak husi ema indivdiual ka kompanya balun, ami labele halo buat ida, tanba ne'e ami agredece tebes ba ema sira ne'ebe fo osan ba kauza ida ne'e.

Juventudu Australianu nain rua, Cezary ho Leo, halo jornada haleu Australia ho sira nia bisikleta hodi halibur osan ba atu hadia eskola ida iha Balibo, Timor-Leste. Credit: twobirderstwobikes

Iha parte seluk, sira rua mos nota katak, viajen ho bisikleta halo sira rona manu lian barak, ne'ebe karik sira sei la rona se sira sae kareta. Sira rua sente kontente tebes ho esperensia ne'e no dokumenta fotografia barak.

Sira mos hasoru ema barak iha dalan ho karakter no laran diak oioin. Husi enkontru sira-ne'e, sira rona istoria oioin, sira rua mos hasoru Australianu sira seluk ne'ebe mak hatene ka antes ne'e hela iha Timor.

Sira-nia determinasaun lori sira ba fatin dook liu husi sira nia hela fatin no mos husi Australia, no durante ne'e sira nia viajen sira dokumenta espésie manu hamutuk 700 iha Australia.

Cezary ho Leo hasoru malu ho Ministra Edukasaun Timor-Leste, Sra. Dulce Soares Credit: twobirderstwobikes

Dedikasaun ne'ebe sira iha la para deit iha Austrália. Bainhira sira vizita Timor-Leste, alende de sira hasoru ho Ministra Edukasaun no vizita eskola iha Balibo ne'ebé sira hakarak ajuda, sira mos hetan tempu atu bá haree manu ho matadalan lokál sira, hodi liga kultura rua liu husi sira-nia domin ba natureza.

 

Impaktu ne’ebé kle’an liu mosu bainhira sira vizita Timor-Leste rasik. "Bainhira ami to'o iha Timor no ami hasoru ema sira ema barak ne'ebe mak diak tebes ba ami," Leo hanoin hikas. Nune'e mos Cezary hatete katak "Ida-ne'e fó kontestu ba saida maka ami halo durante viajen haleu Australia." Vizita ida ne'e transforma númeru abstratu sira ba oin, mehi, no posibilidade sira.

Cezary ho Leo komunika ho estudante sira iha parte Balibo ne'ebe sira suporta Credit: twobirderstwobikes

Saida mak hahú ho objetivu atu halibur osan ba edukasaun liu tiha ona espetativa hotu – sira-nia inisiativa agora konsege halibur osan hamutuk $117,500 ba edukasaun iha Timor-Leste.

Osan ne'e sei hadia eskola, hadia fatin na manorin nain sira no mos halo jardin modo nian hodi kuda modo, nune'e eskola bele fo han labarik sira ho hahan ne'ebe nakonu ho nutrisaun.

 

Impaktu husi sira nia viajen ne'e, boot liu fali osan ne'ebe sira hetan. Ba Leo, ida-ne'e destaka priviléjiu edukasaun nian iha Austrália no responsabilidade ne'ebé mai ho privilejiu ne'e. Cezary nia perspetiva kona-ba konservasaun sai klean liután: "Mundu la'ós rohan-laek... se ita estraga nafatin ambiente, ida-ne'e sei la sai di'ak ba ita."

Foto hatudu Cezary ho Leo uza minoklu atu hare manu nativu Australia nian Credit: twobirderstwobikers

Osan ne’ebé hetan sei fó benefísiu diretamente ba eskola ida iha Balibo iha Timor-Leste, ne’ebé sei jere liuhosi organizasaun Spend It Well. Sira sei servisu ho Ministeriu Edukasaun iha Timor-Leste, maibe organziasaun ne'e mak sei servisu ho konstrutor lokal sira hodi konstrui eskola ne'e.

Ami hakarak tebes atu fila fali ba Timor kuandu eskola hari'i ona

"Ami rua kontente tebes ba futuru labarik sira nian no ami hakarak nafatin involve ho kauza ne'e".

Bainhira husu konselhu saida mak sira bele fo ba joven sira ne'ebe mak hakarak foti ka halo inisiativu hanesan, ho hamnasa Leo hatete katak " ne'e perguntas susar tebes, parte ida husi sai boot ka klosan, maka ita lahatene saida maka ita halo, maibé laiha ema ida maka hatene buat hotu. Hakmatek no goza viajen. No Cezary hatete ho simples katak " se imi iha idea, lao deit maski la hatene atu halo sa. Imi mak tenki halao duni. Aprende husi buat ne'ebe imi halo.