Tais, Kultura no Reziliénsia: Timor-Leste nia viajen liuhosi tradisaun no Tempu.

Espozisaun to tema "Tais, Kultura no Rezilientsia", ne'ebé realiza iha Trinity College, Universidade Melbourne, husi 19 Setembru to'o 10 Dezembru 2024, halao hodi selebra tinan 25 desde Timor-Leste nia votasaun ba independénsia. Espozisaun inovativu ida-ne'e inisiadu husi East Timor Women Australia (ETWA) servisu hamutuk ho organizasaun Australia East Timor Association (AETA) no mos sira seluk, hodi halibur hamutuk tais tradisionál, arte kontemporánea, fotografia istórika, no lori mos hanoin husi akademiku sira. Simpóziu ne'ebe halao iha dia 21 de Setembro, akompaña expozisaun ida ne'e, fo sai mos lian husi komunidade Timor-oan, akademia, artista internasional no setór kulturál sira. Eventu ida ne'e explora importánsia kulturál tais nian no ninia papél iha formasaun identidade nasionál, no aspetu espirituál sira husi kultura Timor nian. Liu husi soru hamutuk pasadu, prezente, no futuru, espozisaun ne'e destaka reziliensia kultura Timor-oan sira nian iha pasadu no nia importánsia iha forma nasaun nia identidade iha sékulu 21.

Tais, Kultura no Reziliensia

Iha Trinity College, Universidade Melbourne, iha espozisaun ida ne'ebé furak tebes hahú husi 19 Setembru to'o 10 Dezembru 2024, ho naran "Tais, Kultura no Rezilientsia". Espozisaun inovativu ida ne'e halibur hamutuk arte, istória, no fotografia hodi selebra tinan 25 desde Timor-Leste nia votasaun istóriku ba independénsia. Iha fatin ne'e hatudu tais - Timor-Leste nia hena tradisionál ne'ebé soru hamutuk istória kona-ba matenek bei-ala sira nian, identidade kulturál, no nasaun nia reziliensia.

Espozisaun ida ne'e hanesan inisiativa ida husi East Timor Women Australia (ETWA), hodi hatudu ba vizitante sira exploraisaun oioin kona-ba Timor-Leste nia viajen husi pasadu to'o agora. Tais ne'ebe mak hatudu iha espozisaun ne'e kuaze mai hotu husi servisu hamutuk ne'ebe mak ETWA halo ho koperativa LO'UD.

Deb Salvagno, koordenadora ETWA nian, explika konseitu kona-ba eventu ida ne'e: "

Inspirasaun atu hahu espozisaun ida nee mai husi ami nia esperensia servisu hamutuk ho feto maluk sira husi koperativa LO'UD, ne'ebe ami servisu hamutuk ona durante tinan 20 nia laran.

Ami sosa ona tais barak husi sira ho folin ne'ebe diak no halo koleksaun iha Australia. Ida ne'e mos inspira husi informasaun ne'ebe ami hetan husi ami nia viajen tinan kotuk kona-ba istoria diak husi soru nain sira husi tempu portuguese to'o agora. Husi ne'e ami hanoin bele halo ona espozisaun".

Grupu LO̕UD ho sira nia produsaun Tais Watahasa Credit: East Timor War Memorial and LO̕UD group

Organizasaun ETWA ne'ebé harii iha 2004, sai ona líder iha troka kulturál no apoiu ba komunidade Timor-oan nian durante besik tinan rua-nulu ona. Sira-nia parseiru xave maka kooperativa LO'UD iha Lospalos. LO"UD iha papél importante tebes hodi halo moris exibisaun ida-ne'e.

Lian sira husi Simpóziu

Eventu ida ne'e halibur hamutuk grupu oioin ho lian oi-oin husi komunidade Timor nian, akademia, no setór kulturál sira. Organizadora sira dedika eventu no fo onra ba ema importante nain rua: Dra. Helen Hill, ativista polítika no edukadora Australiana ida ne'e kuaze dedika nia moris ba luta independensia Timor nian, no Dona Marcelina husi Lospalos, ne'ebe ho nia matenek preserva ona Tais no istoria Timor nian ba nia ema barak.

Deb Salvagno, Koordenadora ETWA (liman karuk) aprezenta kona-ba ETWA nia servisu tinan 20 hamutuk ho koperativa LO'UD; Lara Nicholls, curator husi Australian War Memorial (klaran) no Dra. Kim MacGrath (liamn los) hanesan author ba livru "crossing the line" ne'ebe aprezenta kona-ba Dra. Helen Hill matebian. Credit: East Timor Women Association (ETWA)

Dra. Kim McGrath, ko'alia kona-ba Dra. Helen Hill nia dedikasaun no servisu ba Timor nia independensia: "Dra. Hill nia papel ba Timor-Leste nia independensia sigfikante tebes. Iha 1975 bainhira nia labele hakerek nia teze kona-ba Timor nia dalan ba Independensia tanba invazasaun Indonesia, nia hakerek livru importante ida ho titlu " The Timor Story" ne'ebe publika iha 1976. Livru ida sai hanesan informasun uniku kona-ba saida mak akontese iha Timor. Nia kontribusaun importante ida tan mak nia eforsu hodi haruka estudante atus ba atus hodi mai eskola iha Austrália no mos iha UNTL

Estudante sira ne'ebe nia mentor no azuda barak mak agora sai lideransa iha Timor-Leste.

Deb Salvagno haktuir mos katak sira dedika eventu ne'e ba Senhora rua ne'e tanba " Dra. Helen Hill hanesan ami nia mata dalan no rede ba ami nia organizasaun, no Dona Marcelina Pinto hanesan ema resistensia forte ida no ema Timor-oan matenek boot hanesan ema ne'e'ebe eskola iha PhD".

Tais nia signifikante iha kultura Timor nian

Iha espozisaun no synposium ne'e destaka importánsia kulturál klean husi tais iha sosiedade Timor nian. Ilda Da Cruz hanesan koordenadora Kooperativa LO'UD explika, "

Tais mak hanesan identidade matromoniu kultura ba Timor-oan no tais mak haforsa unidade no domin entre ema Timor-oan sira

Ho servisu hamutuk entre AWM, ETWA ho LOUD sira produs ona Tais haat hodi bele hatudu iha Australian War Memorial nia galeria iha Canberra. Ami servisu ona ho ETWA durante tinan 20 nia laran. Ne'e hanesan mehi ba ami".

Tais haat Nunukala, Watahasa, Pailale ho Naileki ne'ebe entrega ba Australia War Memorial Credit: East Timor Women Australia and LO̕UD group

Kolaborasaun entre kooperativa LO'UD ho Australian War Memorial ne'e, esplika klean liu tan Laura Nicholls husi Australian War Memorial (AWM) "Ami hakarak enkomenda servisu ne'e hodi komemora uniaun entre povu Timor no forsa defeza Austrália nian. Ami koordena ho ETWA atu servisu hamutuk ho LO'UD hodi prodús tais haat hodi ba tau iha Australian War Memorial."

Arte Liu husi Tempu: Tradisionál no Kontemporáneu

Alende de tais tradisional ne'ebe mak hatudu iha espozisaun ne'e, iha mos arte kontemporánea tais ne'ebe hatudu mos. Arte ida ne'e hanesan ponte ida entre pasadu no prezente. Artista Timor-oan, Maria Madeira, fahe ninia hanoin kona-ba nia arte: " hau halo espozisaun ida iha Venice Biennale (Italia) hau uza duni tais, tanba hau fiar katak tais mak deside ita nia kultura, hau uza iha arte kontemporanea.Maske hau uza arte ne'e, maibe nia hun la kotu husi tradisional.

Artista Timor-oan, Maria Madeira, hamrik iha nia produsaun Tais ho arte kontemporariu (iha liman los) no fotografia Tais tradisional ida husi espozisaun 'Tais, kultura no resilensia" iha Trinity College, Universidade Melbourne.

Vizaun arte kontemporánea nian karik la kompriende di'ak husi ema balun, maibé ha'u hanoin kona-ba oinsá atu kombina arte tradisionál ho arte kontemporánea atu la'ós de'it ema Timor bele komprende maibé mós ema estranjeiru sira."

Fotógrafa no film producer, Elaine aumenta perspetiva istórika ida, hodi fahe ninia dokumentu fotográfiku sira husi 1974. Elaine konta tuir bainhira nia ho nia kolega sira ba vizita Timor ne'ebe momentu ne'eba bolu "Timor Portuguese" nia hatete katak " Iha viagen ne'e nia ho nia kolega ba vizita fatin barak inkluido iha Balibo, no iha ne'ebe nia hasai fotografia barak ne'ebe kuaze ho kor mutin ho metan".

Deb Salvagno, koordenara ETWA (iha liman karuk) hamrik hamutuk ho artista Canada, Elaine Briere, ne'ebe ba vizita Timor iha tinan 1974 no hasai fotografia barak iha kor mutin no metan. Fotografia ida mak iha foto ne'e ne'ebe hatudu senhora Timor-oan ida tur hela iha Merkado lokal iha Balibo. Credit: East Timor Women Australia (ETWA)

Dimensaun Espirituál Timor nian

Eventu ida ne'e sei la kompletu sein esplora no rona kona-ba aspetu espirituál husi kultura Timor nian. Josh Trindade, estudante doutoramentu Timor-oan aprezenta ninia peskiza kona-ba "LULIK" ka sagradu iha kultura Timor nian. Nia hakatuir katak, "LULIK i\nia influensia boot tebes iha Timor-oan sira nia moris loro-loron. "

LULIK influénsia forte tebes ba buat hotu ne'ebé ema Timor halo; husi governasaun to'o rituál mate nian.

Josh Trindade, estudante Timor-oan ne'ebe agora dadaun halo hela nia PhD iha Trinity College, Universidade Melbourne, aprezenta nia peskiza kona- ba "LULIK" iha sympozium " Tais, kultura no resilensia". Credit: East Timor Women Australia (ETWA)

Tais no Identidade Nasionál

Matenek nain Australianu nain rua fo mos sira nia hanoin kona-ba papél patrimóniu kulturál nian iha konstrusaun nasaun. Dr. Clinton Fernandes, istoriador no profesor estudu internasionál nian husi Universidade New South Wales, hatete katak "Identidade nasionál Timor-Leste nian evolve ona liu husi períodu istóriku oin-oin, ho tais (tradisionál textil) serve hanesan símbolu kulturál ida-ne'ebé liga esperiénsia Timor-oan oin-oin iha tempu no fatin, hametin prátika antigu sira no hametin ligasaun nasaun nian entre pasadu, agora no futuru".

Professor Clinton Fernandes (liman karuk) ho Prof. Michael Leach koalia aprezenta kona-ba Timor-Leste nia identidade nasional, signfikante Tais ba Timor-oan sira no istoria independensia nian. Credit: East Timor Women Australia (ETWA)

Professor Michael Leach, husi Universidade Swinburne fo mos nia perspetiva kona-ba identidade nasionál Timor-ona sira nian. Nia hatete katak "Identidade nasionál Timor-oan sira nia mosu liuhosi ukun no okupasaun koloniál iha sékulu barak nia laran, ho Igreja Katólika hala’o knaar krusiál hodi unifika grupu lian oioin, habelar Tetum nu’udar lian komún, no hametin nasionalizmu durante movimentu rezisténsia ne’ebé ikusmai lori ba ukun rasik-an".

Soru Hamutuk Pasadu, Prezente, no Futuru

Espozisaun no simpóziu "Tais, Kultura no Rezilientsia" oferese exploraisaun profunda kona-ba kultura, istória, no identidade ema Timor-oan nian. Liu husi kabas tais nian ne'ebé komplikadu, vizitante sira bele haree Timor nia viajen husi durante tempu koloniál to'o independénsia, no haree mos evolusaun ne'ebé kontinua husi identidade Timor.

Deb Salvagno hamutuk ho nia parseira, Ilda da Cruz (hatais tais ho faru mutin) hamutuk ho artista no partisipante sira iha eventu "Tais, kultua, no resilensia" iha Trinity College, Universidade Melbourne./ Credit: East Timor Women Australia (ETWA)

Eventu ida ne'e hatudu oinsa arte, istoria no kultura iha ligasaun ba malu hodi konta istoria kona-ba nasaun ida.

Nune'e hanesan nasaun ida ne'ebe kontinua hari'i no lao nafatin iha sékulu 21, eventu sira hanesan "Tais, Kultura no Rezilientsia" iha papél krusiál hodi preserva no promove ninia patrimóniu kulturál úniku. Ida ne'e mos fó hanoin mai ita hotu katak, bainhira hasoru dezafiu istóriku sira, povu Timor nia reziliensia, ne'ebé mosu iha sira-nia istoria no kultura nia laran, bele kria identidade nasionál ida ne'ebé moris no permanente.