Kultura suku: sírkulu kostura multikulturál Darwin fó kbiit ba feto sira

Iha fulan Agostu tinan ida ne'e, Darwin sai uma-na'in ba programa interkambiu kultural uniku ne'e hare ba abiliddade suku nian. Inisiativu ida ne;e mai husi organizasaun karidade, Empowering Community Growth, hodi halibur feto sira husi Timor, Aborijinu no mos feto refujiadu Afghanistan. Liu husi atividade suku, hamosu amizade, abilidade ba suku no negosiu nian. Maske iha bareira ba lian hodi komunika ba malu, partisipante sira fahe sira nia abilidade iha suku, kria produtu oi-oin no iha esprensa atu bele hasoru malu tan iha futuru hodi aprende liu tan.

Iha fulan Agustu nia laran, iha Darwin grupu kiik multikultural feto sira nian halibur hamutuk hodi aprende suku, unidade ho vizaun ida: atu kria arte suku. Feto sira ne'e nain tolu mai husi organizasaun Kor Timor iha Timor-Leste, nain haat husi ema rai nain ka ema Aborijinu nian no ida husi Afghanistan, ne'ebe hanesan refujiadu ida ne'ebe agora hela iha Darwin.

Organizasaun ne'ebe mak suporta treinamentu ida ne'e maka Empowering Community Growth. Sra. Jill Forsyth, Diretora ba organizasaun ne'e esplika katak:

Jill Forsyth, Diretora ba organizasaun Enpowering Community Group, ne'ebe suporta no fo rekursu ba feto maluk Timor-oan, ema aborijinu no mos Afghanistan hodi tuir treinamentu suku hamutuk iha Darwin.

Ami nia objetivu maka atu lori abilidade ne'ebe feto Timor-oan sira iha atu azuda feto Aborijinu no feto kultura sira seluk iha Darwin, ne'ebe hakarak aprende suku no negosiu husi feto sira husi Kor Timor

Jill Forsyth, Diretora Empowering Community Growth

Tanba fasilidade ka fatin atu hanorin sira disponivel ona, entaun ami fasilita sira deit atu hasoru malu. Ida ne'e atu azuda sira ho skill ba negosiu. Sira bele aprende mos skill ne'ebe feto Kor Timor sira halao ona durante tinan 20 nia laran kona-ba negoisu no mos suku. Tanba Kor Timor uza tais hodi suku sira nia produtu atu faan, atividade ida ne'e bela azuda mos feto rai nain sira atu bele suku mos sira nia hena tradisional ne'ebe mak iha.

Partisipante sira nia Esperiénsia

Durante semana tolu nia laran, treinamentu ne'e nakonu ho atividade tanba partisipante sira aprende atu kria sasan oioin, hosi aprende suku vistidu to'o halo saku no pasta no karteira ki'ik sira.

Patsy Chulgu, feto Aborijinu ne'ebe partisipa iha treinamentu ne'e hatete katak

Ida ne'e premeira vez hau tuir treinamentu no hau kontente tebes. Iha treinamentu ne'e hau aprende buat barak

Patsy Chulugu

Jacquelina hosi, hanesan partisipante husi Kor Timor haktuir katak: Ami kontente tebes bele halo viajen no hasoru feto Aborijinu sira. Ami aprende mos ho sira, bele kolabora ho sira ho diak. Ba vizita mos fatin sira hanesan museum, hodi hare sira nia aprezentasaun produtu iha ne'eba. Iha tempu hanesan, ami mos hatudu produtu Kor Timor nian ba komunidade Timor-oan sira iha Darwin.

Iha Liman karuk: Patsy Chulugu, feto Aborijinu aprende suku pasta; iha foto leten: Hakima, feto refujiadu Afgaun hanorin tesi hena ba suku ropa; Foto okos: Juliana hosi Kor Timor hanorin feto Aborijinu ida suku makina. Credit: Empowering Community Growth

Hakima, refujiandu Afegaun hetan esperensia ne'ebe rekompensativu. Nia hatete : "Hau aprende suku husi kolega sira husi Kor Timor husi Timor, nune'e mos hau hanorin sira atu suku vistidu. Hau kontente tebes hamutuk ho sira. Hau saudades tebes sira hotu. Hau mos suku vistidu ba kolega Timor-oan sira. Depois sira hanorin hau suku pasta, karteira no seluk tan.

Ba Ines no Juliana hosi Kor Timor, sira kontente hanorin sira nia feto maluk aborijinu sira. Juliana, maski ho idade, gosta tebes oportunidade atu fahe nia konhesementu kona-ba suku ba feto maluk sira seluk.

Dezafiu no progresu

Projetu ida ne'e laos laho ninia dezafiu sira. Barreira linguístika sira sai hanesan obstákulu signifikativu ida, ho partisipante sira ne'ebé ko'alia Tetum, Dari, Inglés, no lian Aboríjenu oioin.

Maibe hanesan Senhora Jill observa katak: linguajen universal kriatividade nian taka lakona sira-nee ho furak tebes.

Nia haktur mos katak " Barreira iha pasadu mak buat hotu lao ho neneik tebes. Planu ida ne'e lolos halao kleur ona, maibe tanba COVID buat hotu parado. Ida mos atu kria sentimentu pertensia ka inisiativu rasik husi feto Aborijinu sira; ida tan mak atu hetan passaporte ba Timor-oan nain tolu ne'ebe atu mai Darwin, susar tebes. Depois de sira hasoru malu, obstaklu ida tan mak lian ka linguaze ne'ebe la hanesan.

Maske iha tradutor, maibe sira bele jere sira nia atividade ho diak tebes, tanba ikus mai, sira hotu aprende liu husi pratika ne'ebe hatudu husi ema ida ba ema seluk. Nune'e maske ho sira barak ne'ebe mak la kolaia ingles ho diak, maibe sira jere ho diak tebes. Furak tebes atu haree oinsá linguajen universál kriatividade nian taka lakuna sira.

Impaktu husi programa ne'e

Programa treinamentu ida ne'e, nia impaktu boot liu fali fahe abilidade ba malu.

Senhora Jill nota katak partisipante sira forma amizade liuhosi servisu hamutuk maske foin hasoru malu premeira vez. Nia hare katak sira planeia atu iha kontaktu malu nafatin, hodi kontinua fahe ideia no apoia ida-idak nia projetu komunitáriu iha sira nia komunidade.

Husi liman karuk; Ines, Juliana, Hakima ho Jacquelina, kria amizade durante treinamentu suku nia laran. Credit: Empowering Community Growth organisation

Depois de treinamentu ne'e remata, partisipante sira refeta kona-ba sira nia esperensia no aspirasaun sira. Jacquelina Ximenes hosi Kor Timor hato'o katak hakarak tan atu aprende huzi dezenador profesional sira no inkopera tais iha dezenu ropa modernu nian liu husi produtu tais. Ines no Juliana mos repete sentimentu hanesan.

Nune'e mos Patsy Celugu, feto aborijunu ne'ebe partisipa iha treinamentu ne'e " Hau hakarak hau nia belun Timor-oan sira atu fiila fali mai atu hau bele aprende tan hodi hau bele halo pasta ba hau nia beioan sira".

Foto hamutuk entre feto sira ne'ebe mak mai tuir treinamentu hamutuk iha Darwin iha fulan Augustu tinan ida n'e. Feto sira ne'e balun ema rai nain ka ema Aborijinu, ema Timor-oan no ida husi Afghanistan ne'ebe hanesan hela mos iha Darwin. Diretora Empowering Community Growth, Jill Forsyth ho nia kolega, Jennie Gale hamrik iha liman karuk iha kotuk. Credit: Empowering Community Growth

Ho esperansa ne'ebe mak hato'o husi grupu feto Timor nian no mos husi Aborijinu nian, ami husu ba Sebnhora Jill, saida mak planu ba tempu naruk husi horganizasaun Empowering Community Growth ba atividade ida ne'e.

Senhora Jill haktuir katak " Planu ba oin maka ba feto aborijinu sira atu kontinua nafatin atividade sirkulu suku nian. Balun hakarak atu ba suku ropa fashion nian. Sira mos husu atu sira nia maluk feto sira husi Kor Timor atu fila fali mai Darwin hanorin sira. Iha tempu hanesan sira husi Kor Timor hakarak mos atu aprende tan atu suku ropa ka halo roupa fashion ho Tais ne'ebe mak iha. Grupu rua ne'e iha esperansa ba futuru no ami sei kontinua supporta sira.

Programa treinamentu suku ida-ne'e iha Darwin hatudu mai ita kbiit atu halibur komunidade oioin. Liuhusi aktu simples kostura nian, feto sira-ne'e laos deit hadi'a sira nia arte maibe mos komprende sira nia kultura no kria amizade entre sira.

Send feedback