Iha inisiu fulan Fevereiu 2024, komunidade Timor-oan sira iha Melbourne liu husi organizasaun METAC - Melbourne East Timorese Activity Center, iha oportunidade hare no aprende arte ema rain Aborijine nian, didgeridoo, liu husi artista indiginu husi Darwin, Uncle Les Huddleston Lipwurrunga ne'ebe mai halo apresentasaun iha METAC. Iha tempu hanesan artista Timor-oan sira iha Melbourne mos fahe knanauk Timor nian ho Uncle Les.
Uncle Les hanesan artista rai nain Aborijine ida ne'ebe hela iha nasaun Larakia, Darwin, Australia. Nia familia orijinante mai husi nasaun Roper River ka parte balun iha Western Australia no nia konhesidu ho naran aborijine nian Lipwurrunga. Nia komesa halo arte hanesan pinta no uza didgeridoo kuaje tinan tolu nia laran liu ona. Pinturas ne'ebe nia halo liga ho istoria fiar ema rai nain aborijine sira nian.
Pinturas kona-ba manu, ikan no be hatudu husi Lipwurrunga nia servisu durante ne'e Credit: Empowering Community Growth organisation
Tuir Uncle Les nia uza didgeridoo hanesan metode kura ida "Hau uza didgeridoo hanesan metode kura ida, ida ne'e hanesan sentimentu espirtiual ida"
Didgeridoo ne'e forsa tebes, nia bele hasai enerjia negativu husi ema nia laran
SBS Tetum Producer, Cristina Freitas, halo intervista ho Uncle Les Huddleston Liwurrunga Credit: SBS Tetum
Iha fatin espozisaun, Les Huddleston Lipwurrunga hamutuk ho nia subrinha no Membru Parlamentu nain rua husi Governu Federal no Northern Territory
Komunidade Timor-oan balun iha Melbourne no sira nia rede suporta ne'ebe mak mai tuir sorumutu iha METAC
Uncle Les Huddleston Lipwurrunga kolabora hamutuk ho artista Timor-oan, Paul Almeida ho Grupu Trio Mistik iha Melbourne apresenta knananuk " O le'e le'e mai" iha sorumutu METAC nian Credit: Jorge de Araujo
Nune'e mos Timor-oan, Ana Cristina Steves-Serra hato'o katak idea ida atu troka kultura ba mai ne'e diak no importante tebes. Atividade hanesan ne'e halo ona iha tempu uluk ho maluk sira husi West Papua.
Uncle Les hanoin kona-ba nia apresentasaun ba Timor-oan sira ne'e diak tebes hodi fahe istoria no kultura ba malu. Nia hatete katak nia fo digerdidoo ida ba Timor-oan ida ne;ebe hatudu nia interese. Alende ne'e nia mos fo clappsi ba labarik Timor-oan ida.
Liu husi maneira ne'e, hau hakarak atu forma amizade ho Timor-oan sira, nune'e mos atu fo hatene katak didgeridoo ne'e espesial tebes ba ami nia kultura.
Atividade espozisaun ba Uncle Les no sorumutu ho Timor-oan sira iha Melbourne ne'e hetan suporta husi organizasaun Empowering Community Growth (ECG) ho Kor Timor (KT).
Tuir Diretora ECG ho KT, Sra. Jill Forsyth esplika katak objetiviu husi suporta arte Uncle Les nian atu promove kultura ema aboriginu nian hanesan mos nia halo ona durante ne'e liu husi nia suporta ba Kor Timor iha Timor-Leste.
Intervista hos Sra. Jill Forsyth, Diretora ba organizasaun Empowering Community Growth ne'ebe suporta artista Les ho komunidade Aboriginu balun iha Darwin no mos negosiu kiik balun iha Timor-Leste
Hatan ba ida ne'e, Uncle Les hato'o katak, durante tinan tolu nia laran halo arte, foin premeira vez nia hetan oportunidade diak ba halo espozisaun. Tanba ne'e nia agrdece tebes ba Sra. Jill asistensia. Nia dehan ida ne'e importante tebes ba nia ema sira atu ema rekonhese sira nia arte. Nia hakarak atu kontinua halo arte maibe iha tempu hanesan hanorin mos jerasaun foun atu kontinua apresia no preserva kultura ne'ebe mak iha.
Se jerasaun foun la apresia kultura, ita sei laiha kulura iha futuru
Alende suportra Uncle Les, Sra. Jill liu husi nia organizasaun azuda mos empreza kiik husi komunidade aboriginu balun iha Darwin atu kria no promove sira nia arte hanesan pinturas, . Esperensia ne'e nia aprende husi nia involmentu iha Timor-Leste durante tina rua nulu resin hodi hari'i empreza kiik hanesan Kor Timor. Liu husi nia esperensia durante tinan 20 nia laran servisu iha Timor nia aprende katak halo atividade hasae fundu ba suporta ema ne'ebe mak presiza, nunka mais hotu ka para. Ho rede apoio no individual ne'ebe nia hasoru iha Timor, inkluido Sr. Luke Gosling ho Sra. Kirsty Gusmai nia aprende atu labele fo deit sasan ba ema, diak liu mak liu husi treinamentu ka azuda hari'i ka apoio empreza kiik iha Timor-Leste. Tanba ne'e nia hakarak azuda empreza kiik sira ne'ebe mak hamrik ona no azuda sira seluk hodi hamrik hodi bele iha liu sustenatbilidade. Liu husi modelu ida ne'e depois de COVID, liu husi nia organizsasaun ECG nia mos suporta komunidade aboriginu sira iha Darwin hodi promove no preserva mos sira nia kultura, aumesmo tempu hetan mos rendementu.
Sra. Jill nia suporta ba empreza kiik iha Timor-Leste hahu kedan husi tinan 2000. Nia hakarak azuda empreza kiik sira ne'e tanba nia hare katak
Suporta empreza kiik hanesan mos suporta ekonomia familia ida-idak nian, iha tempu hanesan mos hadia ekonomia nasaun nian. Suporta ida ne'e mos kontribui mos ba setor edukasaun ba ema ne'ebe mak servisu iha ne'eba no ba mos sira nia familia.
Liga ba nia suporta iha parte arte liu-liu Tais nia haktuir katak
Mantein patrimóniu kulturál tais nian iha Timor-Leste hanesan parte importante ida husi planu empreza kiik ne'ebe mak hari iha Timor
Tuir planu iha tempu badak, Sra. Jill sei lori empreza kiik Kor Timor atu mai hasoru malu ho empreza kiik iha Darwin atu sira bele fahe konhesementu ba malu iha arte, kultura no mos esperensia negosiu nian.
