ຜົນສະທ້ອນຈາກການຕັດສິນຂອງສານສູງ.
ສານສູງ ໄດ້ຕັດສິນວ່າ ການບັງຄັບອະດີດຜູ້ຕ້ອງຂັງ ກວດຄົນເຂົ້າເມືອງ (Immigration detainees) ໃຫ້ໃສ່ປອກຂໍ່ຂາ (Ankle bracelets) ນັ້ນ ຂັດຕໍ່ຣັຖທັມມະນູນ.
ມັນເປັນການກະທົບກະເທືອນອັນໃຫຍ່ຫລວງ ຕໍ່ຣັຖບານ Albanese ແລະການຕອບຮັບ ຕໍ່ການຕັດສິນຂອງສານສູງ ປີກາຍນີ້ ທີ່ໄດ້ເຮັດໃຫ້ຫລາຍຮ້ອຍຄົນ ໄດ້ຮັບການປົດປ່ອຍ ຈາກການກັກຂັງຢ່າງບໍ່ມີກໍານົດ.
Rania Yallop ລາຍງານ.
ຫນຶ່ງປີກ່ອນ, ສານສູງໄດ້ຕັດສິນວ່າ ການກັກຂັງທີ່ບໍ່ມີກໍານົດ ເປັນສິ່ງຜິດກົດຫມາຍ.
ຫລາຍຮ້ອຍຄົນ ທີ່ບໍ່ມີໂອກາດທີ່ຈະຖືກເນຣະເທດ ໄດ້ຖືກປ່ອຍອອກຈາກການກັກຂັງ ຫລັງຈາກກໍຣະນີຂອງ NZYQ, ຊຶ່ງຫລາຍຄົນ ມີປວັດອາດຊະຍາກັມ.
ຣັຖບານ ໄດ້ຜ່ານກົດຫມາຍສຸກເສີນປີກາຍນີ້ ໃນການຕອບຮັບ ຕໍ່ການຕັດສິນ, ການກຳໜົດ ແລະການຄວບຄຸມ ດ້ວຍເຄື່ອງອີເລັກໂທຣນິກ ຕໍ່ສ່ວນໃຫຍ່ຂອງກຸ່ມ.
ຫນຶ່ງໃນຈໍານວນຄົນເຫລົ່ານັ້ນ - ແມ່ນຜູ້ລີ້ພັຍຊາວ Eritrean, ທີ່ຮູ້ຈັກກັນໃນນາມ YBFZ.
ທະນາຍຄວາມຂອງລາວ ໄດ້ໂຕ້ຖຽງວ່າ ເງື່ອນໄຂທີ່ຣັຖບານ ໄດ້ບັງຄັບໃຫ້ໃສ່ປອກຂໍ່ຂາ (Ankle bracelets) ນັ້ນ ເປັນສິ່ງທີ່ບໍ່ຖືກຕ້ອງ ຕາມຣັຖທັມມະນູນ.
ແລະສານສູງກໍເຫັນດີນຳ.
"ການຕັດສິນຂອງສານສູງ ວ່າເງື່ອນໄຂຂອງ ການກຳໜົດ Curfews ແລະເງື່ອນໄຂ ຂອງການຄວບຄຸມດ້ວຍການໃສ່ປອກຂໍ່ຂາ (Ankle bracelets) ນັ້ນຜິດກົດຫມາຍ, ເປັນໄຊຊນະອັນໃຫຍ່ຫລວງ ສໍາລັບອິດສຣະພາບຂັ້ນພື້ນຖານ ແລະຫຼັກກົດຫມາຍ ໃນອອສເຕຣເລັຍ. ມັນເປັນການຕັດສິນ ທີ່ສໍາຄັນແທ້ໆ ເພາະມັນເນັ້ນຫນັກ ເຖິງຫລັກການພື້ນຖານທີ່ວ່າ ສໍາລັບທຸກຄົນ, ບໍ່ວ່າຈະເປັນພົນລະເມືອງ ຫລືບໍ່ເປັນພົນລະເມືອງ, ຣັຖບານບໍ່ມີອໍານາດ ທີ່ຈະລົງໂທດຜູ້ຄົນ ໂດຍການກໍາຈັດສິດທິຂັ້ນພື້ນຖານຂອງເຂົາເຈົ້າ ເລື່ອງອິດສຣະພາບ ແລະສັກສີ."
ນັ້ນແມ່ນ David Manne, ຜູ້ອໍານວຍການບໍຣິຫານ ຂອງ Refugee Legal, ທີ່ເປັນຕົວແທນຂອງ YBFZ.
ລາວກ່າວວ່າ ຣັຖບານບໍ່ມີອໍານາດ ໃນການກຳໜົດມາດຕະການລົງໂທດ.
"ສານໄດ້ຕັດສິນວ່າ ເງື່ອນໄຂຂອງການໃສ່ປອກຂໍ່ຂາ (Ankle bracelets)ແລະການກຳໜົດ Curfews ເປັນການລົງໂທດ, ຊຶ່ງຈໍາກັດເສຣີພາບຂອງລູກຄວາມຂອງພວກເຮົາຢ່າງຮ້າຍແຮງ ແລະຣັຖບານບໍ່ສາມາດກຳໜົດໄດ້ ເພາະຣັຖບານບໍ່ມີອໍານາດ ທີ່ຈະເຮັດເຊັ່ນນັ້ນ. ພາຍໃຕ້ຣັຖທັມມະນູນຂອງເຮົາ, ມີພຽງແຕ່ສານເທົ່ານັ້ນ, ແລະບໍ່ແມ່ນຣັຖບານ, ທີ່ ສາມາດລົງໂທດໄດ້."
James Paterson ໂຄສົກກະຊວງພາຍໃນ ຂອງຝ່າຍຄ້ານກ່າວວ່າ ມັນເປັນຜົນກະທົບທີ່ຮ້າຍແຮງ ຕໍ່ຣັຖບານ.
"ນີ້ເປັນການເສັຍໄຊທີ່ຫນ້າອັບອາຍ ສໍາລັບຣັຖບານ Albanese. ເຂົາເຈົ້າໄດ້ໃຫ້ຄວາມຫມັ້ນໃຈແກ່ພວກເຮົາຫຼາຍຄັ້ງ ຕລອດຂະບວນການທາງກົດຫມາຍ ກ່ຽວກັບຮ່າງກົດຫມາຍນີ້ ວ່າມັນຖືກຕ້ອງຕາມຣັຖທັມມະນູນ, ເຂົາເຈົ້າວ່າ ມີຄໍາແນະນໍາທາງກົດຫມາຍ, ເຂົາເຈົ້າຫມັ້ນໃຈວ່າມັນຈະສາມາດຕ້ານທານ ກັບການທ້າທາຍ ທາງກົດຫມາຍໃດໆ. ແລະມັນເປັນເລື້ອງທີ່ຫນ້າຢ້ານກົວ ສໍາລັບປະຊາຊົນອອສເຕຣເລັຍ, ເພາະຕອນນີ້ມີ 215 ຄົນ ທີ່ບໍ່ແມ່ນພົນລະເມືອງ, ຊຶ່ງກໍ່ອາດຊະຍາກັມຮຸນແຮງ, ຜູ້ທີ່ຖືກປ່ອຍຕົວໃນຊຸມຊົນ ໂດຍບໍ່ມີຂໍ້ຈໍາກັດໃດໆ, ບໍ່ມີກຳໜົດCurfews, ບໍ່ມີການຄວບຄຸມທາງອີເລັກໂທຣນິກ, ບໍ່ມີຂໍ້ຈໍາກັດ."
ເກືອບ 150 ຄົນທີ່ຖືກປົດປ່ອຍ ເປັນສ່ວນຫນຶ່ງຂອງກຸ່ມ NZYQ ໄດ້ຖືກໃສ່ປອກຂໍ່ຂາ (Ankle bracelets) ອີເລັກໂທຣນິກ, ແລະອີກ 126 ຄົນຖືກກຳໜົດ Curfews.
ໃນຕົ້ນອາທິດນີ້ ກະຊວງພາຍໃນ ໄດ້ຢືນຢັນລາຍລະອຽດ ຂອງປະເພດຄວາມຜິດຂອງກຸ່ມ.
"ລາຍລະອຽດຫຼ້າສຸດຂອງກຸ່ມ215ຄົນນັ້ນຕາມປະເພດຂອງຄວາມຜິດແມ່ນຫຍັງ?
ລາຍລະອຽດ ຄະດີຂອງ 125 ຄົນທີ່ຖືກປ່ອຍໂຕ:
ຄາດຕະກັມ ແລະການພະຍາຍາມຂ້າ = 12
ການກະທຳຜິດທາງເພດ,ຮວມທັງການເຮັດຜິດທາງເພດຕໍ່ເດັກ = 66
ການທຳຮ້າຮ່າງກາຍແລະອື່ນໆ = 97
ຄວາມຮຸນແຮງໃນຄອບຄົວ =15
ການກະທຳຜິດເລື່ອງຢາເສບຕິດທີ່ຮ້າຍແຮງ = 15
ການລັກລອບຂົນຄົນຢ່າງຜິດກົດໝາຍ (People smuggling) = 5
ໂທດລະດັບຕ່ຳຫຼືບໍ່ມີໂທດ = 5
ເຈົ້າຫນ້າທີ່ຂອງກະຊວງ ກໍໄດ້ເວົ້າອີກວ່າ ເຂົາເຈົ້າໄດ້ຕຽມພ້ອມ ສໍາລັບການຕັດສິນຂອງສານ.
"ຣັຖມົນຕີໄດ້ຮັບການແຈ້ງບອກກ່ຽວກັບຜົນສະທ້ອນຖ້າຫາກເສັຍຄະດີນີ້ບໍ?"
"ແມ່ນທ່ານໄດ້ຮັບແຈ້ງແລ້ວ."
"ແລະຣັຖບານມີແຜນສຳຮອງແນວໃດແດ່ທີ່ຈະຈັດການກັບເລື່ອງນີ້?ຖ້າເປັນເຊັ່ນນັ້ນ."
"ພວກເຮົາໄດ້ວາງແຜນຢ່າງກວ້າງຂວາງສໍາລັບຜົນສະທ້ອນທີ່ເປັນໄປໄດ້ທັງຫມົດ.
"ຮວມທັງດ້ານກົດຫມາຍດ້ວຍບໍ່?"
"ຂຶ້ນກັບເຫດຜົນທີ່ເປັນຜົນສະທ້ອນທີ່ເປັນໄປໄດ້."
ເຈົ້າຫນ້າທີ່ຂອງກະຊວງພາຍໃນ ໄດ້ຖືກຖາມ ກ່ຽວກັບການຕອບໂຕ້ຈາກຣັຖບານ ຫຼັງຈາກການຕັດສິນຂອງສານ ວ່າຣັຖມົນຕີໄດ້ຮັບການແຈ້ງບອກ ກ່ຽວກັບຜົນສະທ້ອນ ຖ້າຫາກຣັຖບານເສັຍຄະດີນີ້ບໍ່. ເຈົ້າຫນ້າທີ່ຂອງກະຊວງຕອບວ່າ ທ່ານໄດ້ຮັບແຈ້ງແລ້ວ.
ເມື່ອຖືກຖາມວ່າ ຣັຖບານມີແຜນສຳຮອງແນວໃດແດ່ ທີ່ຈະຈັດການກັບເລື່ອງນີ້ ຖ້າເປັນເຊັ່ນນັ້ນ. ຄຳຕອບກໍແມ່ນວ່າ ມີການວາງແຜນຢ່າງກວ້າງຂວາງ ສໍາລັບຜົນສະທ້ອນ ທີ່ເປັນໄປໄດ້ທັງຫມົດ.
ເມື່ອຖືກຖາມວ່າ ແຜນຕ່າງໆນັ້ນ ໄດ້ຮວມເຖິງດ້ານກົດໝາຍຫຼືບໍ່?
ຄຳຕອບຈາກເຈົ້າຫນ້າທີ່ກໍແມ່ນວ່າ ຂຶ້ນກັບເຫດຜົນ ທີ່ເປັນຜົນສະທ້ອນທີ່ເປັນໄປໄດ້.
Dan Tehan ໂຄສົກກວດຄົນເຂົ້າເມືອງ ຝ່າຍຄ້ານກ່າວວ່າ ຣັຖບານຕ້ອງອະທິບາຍວ່າ ເຂົາເຈົ້າຈະຕອບຕໍ່ການຕັດສິນນັ້ນແນວໃດ.
"ຣັຖບານ ຕ້ອງສາມາດຕອບຄໍາຖາມງ່າຍໆ ທີ່ຊາວອອສເຕຣເລັຍຢາກຮູ້, ແລະນັ້ນຄື ຣັຖບານຈະຮັກສາຊຸມຊົນອອສເຕຣເລັຍໃຫ້ປອດພັຍ ຈາກອາດຊະຍາກອນທີ່ຮຸນແຮງ 215 ຄົນນີ້ ໄດ້ແນວໃດ?ເຂົາເຈົ້າມີແຜນແນວໃດ? ເຂົາເຈົ້າແຜນການສຸກເສີນແນວໃດ?ເຂົາເຈົ້າຈະຮັກສາຊຸມຊົນອອສເຕຣເລັຍ ໃຫ້ປອດພັຍໄດ້ແນວໃດ?"
Mr Manne ກ່າວວ່າ ລໍາດັບຄວາມສໍາຄັນ ຂອງຣັຖບານ ຄວນຍົກເລີກຂໍ້ຈໍາກັດຂອງຄົນອື່ນໆໃນກຸ່ມ.
"ເຂົາເຈົ້າ ຈໍາເປັນຕ້ອງລົງມືຈັດການທັນທີ ເພາະສານສູງໄດ້ຕັດສິນວ່າ ເງື່ອນໄຂທີ່ກໍາລັງຖືກກໍານົດໄວ້ ກັບລູກຄວາມຂອງພວກເຮົາ ໃນເວລານີ້ ແລະໂດຍຫມາຍເຖິງ ຄົນອື່ນໆຈໍານວນຫນຶ່ງ ບໍ່ຖືກຕ້ອງຕາມຣັຖທັມມະນູນ. ມັນຜິດກົດຫມາຍ ແລະນັ້ນຫມາຍຄວາມວ່າ ຕ້ອງຖືກລົບລ້າງທັນທີ ເພາະພວກເຂົາ ບໍ່ຄວນຖືກບັງຄັບ, ມັນຜິດກົດຫມາຍ ແລະຕ້ອງຖືກຍົກເລີກ."
ຣັຖບານ ບໍ່ໄດ້ຕອບຕໍ່ ຄໍາຂໍໃຫ້ສະແດງຄວາມຄິດເຫັນ ໃນຕອນທີ່ເຜີຍແພ່.
ເນື້ອເລື່ອງໂດຍ Rania Yallop ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກພາສາລາວ.
ທ່ານສາມາດຕິດຕາມ ຂ່າວສານຫຼ້າສຸດ ຈາກອອສເຕຣເລັຍ ແລະທົ່ວໂລກ ເປັນພາສາລາວ ຈາກເອສບີເອສລາວ ໄດ້ທີ່ເວັບໄຊ້ຕ໌
