ຄະດີສອງຄະດີຕໍ່ Donald Trump ໄດ້ຖືກຍົກຟ້ອງ.
ໃນສະຫະຣັດອາເມຣິກາ, ຄະດີທີ່ຮ້າຍແຮງທີ່ສຸດ ສອງຄະດີຕໍ່ Donald Trump ໄດ້ຖືກຍົກຟ້ອງ.
ອັຍການກ່າວວ່າ ການຕັດສິນໃຈນັ້ນ ບໍ່ໄດ້ເກີດຂຶ້ນຕາມເຫດຜົນ...ແຕ່ເປັນເພາະ Trump ຈະກັບຄືນໄປ White House ໃນປີໜ້າ.
ເຖິງແມ່ນວ່າ ມີໂອກາດນ້ອຍ ທີ່ຄະດີຈະກັບມາອີກ ຫລັງຈາກ Trump ໄດ້ຮັບຕໍາແຫນ່ງ ເປັນເທື່ອທີສອງ, ແຕ່ຜູ້ຊ່ຽວຊານກ່າວວ່າ ມັນບໍ່ໜ້າເປັນໄປໄດ້.
Liz Maddock ແລະ Tee Mitchell ລາຍງານ.
ຜູ້ພິພາກສາຣັຖບານກາງ ໄດ້ຍົກຟ້ອງຄະດີອາຍາ ສອງຄະດີຕໍ່ Donald Trump ກ່ອນການເຂົ້າຮັບຕຳແໜ່ງ ທີ່ກຳລັງຈະມາເຖິງ.
ມັນເປັນການສິ້ນສຸດ ຂອງການຕໍ່ສູ້ທາງກົດຫມາຍ ເປັນເວລາຫລາຍປີທີ່ໄດ້ເຫັນອັຍການພິເສດ Jack Smith ໄລ່ຕາມ Trump ໃນສອງຂໍ້ກ່າວຫາ.
ຄະດີທໍາອິດ ແມ່ນກ່ຽວກັບຂໍ້ກ່າວຫາວ່າ Trump ພະຍາຍາມໂຄ່ນລົ້ມການເລືອກຕັ້ງ ທີ່ເຂົາໄດ້ສູນເສັຍຕໍ່ Joe Biden ໃນປີ 2020 ຢ່າງຜິດກົດໝາຍ.
ຄະດີທີສອງ ແມ່ນກ່ຽວກັບຂໍ້ກ່າວຫາ ທີ່ວ່າອະດີດປະທານາທິບໍດີ ໄດ້ເກັບເອກກະສານລັບ ໄວ້ຢ່າງຜິດກົດຫມາຍ ຢູ່ທີ່ Mar-a-Lago ຫລັງຈາກ ໄດ້ອອກຈາກຕໍາແຫນ່ງ.
Trump ໄດ້ປະຕິເສດທັງສອງຂໍ້ຫາ.
"ກ່ຽວກັບເລື່ອງຕລົກ ຂອງຂໍ້ກ່າວຫາ ມັນເປັນສິ່ງທີ່ຫນ້າຢ້ານກົວ. ມັນເປັນສິ່ງທີ່ຫນ້າຢ້ານກົວ ສໍາລັບປະເທດນີ້. ຂ້າພະເຈົ້າຫມາຍຄວາມວ່າ, ສິ່ງທີ່ດີຢ່າງດຽວ ກ່ຽວກັບມັນ ຄືມັນໄດ້ເຮັດໃຫ້ຄວາມນິຍົມຂອງຂ້າພະເຈົ້າສູງຂຶ້ນ. ທ່ານເຊື່ອຫຼືບໍ່?"
ຄະດີດັ່ງກ່າວ ໄດ້ຖືກຍົກຟ້ອງ ຕາມຄໍາຮ້ອງຂໍ ຂອງອັຍການພິເສດ Jack Smith - ແຕ່ຍັງຢືນຢັນວ່າ ການຕັດສິນໃຈທີ່ຈະຍົກຟ້ອງຂໍ້ກ່າວຫານັ້ນ ບໍ່ໄດ້ອີງຕາມຄຸນສົມບັດ ຫລືຄວາມເຂັ້ມແຂງຂອງທັງສອງຄະດີ.
ແຕ່ Jack Smith ໄດ້ອ້າງເຖິງນະໂຍບາຍ ຂອງກະຊວງຍຸດຕິທັມ ທີ່ມີມາຢ່າງຍາວນານ ຕໍ່ການດຳເນີນຄະດີກັບປະທານາທິບໍດີ ທີ່ຢູ່ໃນຕຳແໜ່ງ.
ແທ້ຈິງແລ້ວ, ແມ່ນເວລາຂອງອັຍການ ໄດ້ໝົດລົງແລ້ວ.
ຢ່າງໃດກໍຕາມ, ເພາະຄະດີໄດ້ຖືກຍົກຟ້ອງ "ປາດສະຈາກອະຄະຕິ without prejudice " ຈຶ່ງມີໂອກາດເລັກນ້ອຍ ທີ່ຈະກັບຄືນມາອີກ ຫລັງຈາກວາຣະທີສອງຂອງ Trump.
ນັກວິເຄາະກ່າວວ່າ ມັນບໍ່ໜ້າເປັນໄປໄດ້. Steven Hendrix ເປັນອະດີດນັກການທູດ ທີ່ໄດ້ທໍາງານທັງໃນຣັຖບານ Obama ແລະ Trump.
"ນີ້ເປັນການດຳເນີນຄະດີທີ່ຍາກ ແລະບໍ່ໜ້າເປັນໄປໄດ້ຢູ່ແລ້ວ, ຍ້ອນທັງບຸກຄະລິກ ແລະສະພາບການ. ການທີ່ຈະຄິດວ່າ ບາງສິ່ງບາງຢ່າງ ຈະສາມາດກັບຄືນມາໄດ້ ໃນສີ່ປີຂ້າງໜ້າ ເປັນເລື່ອງທີ່ເປັນໄປໄດ້ຍາກ. ຂ້າພະເຈົ້າ ຕ້ອງຍອມຮັບວ່າ ມັນເປັນໄປໄດ້ຕາມກົດຫມາຍ. ມີອີກກໍຣະນີ ທີ່ສາມາດຈົບມັນໄດ້, ແລະນັ້ນຄື ເມື່ອປະທານາທິບໍດີ Trump ໄດ້ສາບານຕົນເຂົ້າຮັບຕໍາແຫນ່ງ, ກໍມີທິດສະດີທາງກົດຫມາຍ ທີ່ຍັງບໍ່ໄດ້ຖືກທົດສອບວ່າ Trump ສາມາດໃຫ້ອະພັຍຕົນເອງໄດ້, ເຖິງແມ່ນວ່າTrump ບໍ່ເຄີຍຖືກຕັດສິນລົງໂທດກໍຕາມ."
ໃນເດືອນພຶດສະພາປີນີ້, Donald Trump ຖືກຕັດສິນວ່າ ມີຄວາມຜິດທາງອາຍາ 34 ຂໍ້ຫາ ໃນຄະດີຕ່າງຫາກ ທີ່ກ່ຽວກັບການຈ່າຍເງິນໃຫ້ນັກສະແດງພາບພະຍົນນລາມົກຊື່ Stormy Daniels ກ່ອນການເລືອກຕັ້ງປີ 2016.
Trump ມີກຳໜົດຖືກຕັດສິນໃນອາທິດນີ້-ແຕ່ເຈົ້າຫນ້າ ທີ່ໄດ້ຂໍຮ້ອງໃຫ້ສານສູງສຸດຂອງ New York ເລື່ອນການພິຈາຣະນາຄະດີ ຈົນກວ່າຫລັງຈາກປະທານາທິບໍດີ Trump ໄດ້ຮັບຕໍາແຫນ່ງເປັນວາຣະທີສອງ.
Dan Goldman ສະມາຊິກພັກ Democrats-ຜູ້ທຳໜ້າທີ່ ເປັນຫົວຫນ້າອັຍການ ໃນການຟ້ອງຮ້ອງ Donald Trump ເທື່ອທໍາອິດ-ໄດ້ເນັ້ນຫນັກເຖິງຄວາມຈິງທີ່ວ່າ ປະທານາທິບໍດີ ບໍ່ໄດ້ພົ້ນຜິດຈາກຄະດີທີ່ຖືກຍົກເລີກໃນມື້ນີ້.
"ບໍ່ມີໃຜທີ່ຄະດີຂອງເຂົາ ຈະຖືກຍົກຟ້ອງ ໂດຍບໍ່ມີຫຍັງກ່ຽວພັນກັບຄວາມຖືກຕ້ອງ. Donald Trump ພຽງແຕ່ຫລີກເວັ້ນ ຈາກຄວາມຮັບຜິດຊອບ ຍ້ອນໄດ້ຮັບໄຊຊະນະໃນການເລືອກຕັ້ງປະທານາທິບໍດີ, ແລະມີນະໂຍບາຍ ຂອງກະຊວງຍຸດຕິທັມ ທີ່ບໍ່ເຄີຍຖືກໂຕ້ແຍ່ງ, ທີ່ບໍ່ເຄີຍໄດ້ຮັບການອະນຸມັດ ຫລືແມ່ນແຕ່ ຕໍ່ສູ້ຢູ່ໃນສານ ທີ່ຫ້າມດຳເນີນຄະດີ ກັບປະທານາທິບໍດີ ທີ່ຢູ່ໃນຕຳແໜ່ງ. ບັດນີ້ ມີເຫດຜົນທີ່ຖືກຕ້ອງສໍາລັບເລື້້ອງນີ້. ຂ້າພະເຈົ້າ ສາມາດມີເຫດຜົນອື່ນອີກ ທີ່ຕໍ່ຕ້ານມັນ, ແຕ່ນັ້ນ ຄືນະໂຍບາຍຂອງກະຊວງຍຸດຕິທັມ."
ນະໂຍບາຍນັ້ນ ມີມາຕັ້ງແຕ່ເລື່ອງ Watergate ທີ່ໄດ້ເຮັດໃຫ້ຣັຖບານຂອງ Richard Nixon ຫຼົ້ມ ແລະໃນທີ່ສຸດ ໄດ້ຍົກເວັ້ນປະທານາທິບໍດີ ທີ່ລາອອກຈາກຕໍາແຫນ່ງ ຈາກການຖືກດຳເນີນຄະດີ.
ແຕ່ນັ້ນມາ, ສານສູງສຸດ ກໍໄດ້ຕັດສິນວ່າ ປະທານາທິບໍດີມີ 'ພູມຄຸ້ມກັນເດັດຂາດ' ສໍາລັບການກະທໍາຢ່າງເປັນທາງການ ໃນຂນະທີ່ຢູ່ໃນຕໍາແຫນ່ງ, ຊຶ່ງໄດ້ຍົກເລີກຂໍ້ກ່າວຫາ Trump ໃນການແຊກແຊງການເລືອກຕັ້ງ.
ມັນແຕກຕ່າງຈາກມື້ທີ່ Jack Smith ອັຍການພິເສດ ໄດ້ເປີດຜະນຶກຄຳຟ້ອງ.
"ການໂຈມຕີເມືອງຫລວງຂອງປະເທດເຮົາ ໃນວັນທີຫົກ ເດືອນມັງກອນ ປີ 2021 ເປັນການໂຈມຕີ ທີ່ບໍ່ເຄີຍເກີດຂຶ້ນມາກ່ອນ ໃນທີ່ຕັ້ງຂອງລະບອບປະຊາທິປະໄຕ ຂອງອາເມຣິກາ. ດັ່ງທີ່ອະທິບາຍໄວ້ ໃນຄຳຟ້ອງ, ມັນຖືກກະຕຸ້ນດ້ວຍການຕົວະ, ຄໍາຕົວະຂອງຈຳເລີຍ ທີ່ແນເປົ້າຫມາຍ ທີ່ຈະກີດກັນຫນ້າທີ່ພື້ນຖານ ຂອງຣັຖບານ ຂອງສະຫະຣັດອາເມຣິກາ: ຂັ້ນຕອນຂອງປະເທດຊາດ ໃນການຮວບຮວມ, ນັບ ແລະຢືນຢັນ ຜົນຂອງການເລືອກຕັ້ງ ປະທານາທິບໍດີ."
Donald Trump ມີກຳໜົດສາບານຕົນ ໃນວັນທີ 20 ເດືອນມັງກອນ.
ເນື້ອເລື່ອງໂດຍ Liz Maddock and Tee Mitchell ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
