ການຕາຍຜູ້ທີສອງຂອງຊາວອອສເຕຣເລັຍໃນລາວ.
ພໍ່ຂອງໄວລຸ້ນຊາວ Melbourne ທີ່ເສັຍຊີວິດໃນລາວ ດ້ວຍຄວາມສົງສັຍວ່າເປັນພິດຈາກ Methanol ກໍາລັງຮຽກຮ້ອງ ໃຫ້ມີການສອບສວນ ຢ່າງກວ້າງຂວາງ ກ່ຽວກັບເຫດການນັ້ນ.
ຊາວອອສເຕຣເລັຍອີກຄົນຫນຶ່ງ ຢູ່ໃນບັນດານັກທ່ອງທ່ຽວຫົກຄົນ ທີ່ເສັຍຊີວິດ ຫຼັງຈາກດື່ມເຫຼົ້າທີ່ ມີສານປົນເປື້ອນ.
ຫລັງຈາກມິດງຽບໄປຫລາຍມື້, ເຈົ້າຫນ້າທີ່ລາວ ໄດ້ສັນຍາວ່າ ຈະນໍາຜູ້ກະທຳຜິດ ມາສູ່ກະບວນການຍຸດຕິທັມ.
Adriana Wainstok ແລະ Mahnaz Angury ລາຍງານ.
"ຂ້າພະເຈົ້າ ຂໍໃຊ້ໂອກາດນີ້ ເພື່ອຊຸກຍູ້ລາວ ໃຫ້ສອບສວນເລື່ອງນີ້ຢ່າງເຕັມທີ່ ເພື່ອໃຫ້ແນ່ໃຈວ່າ ເຫດການນີ້ ຈະບໍ່ເກີດຂຶ້ນອີກ. ເຮົາບໍ່ສາມາດ ສູນເສັຍລູກສາວຂອງເຮົາໄປ ແລະບໍ່ມີການປ່ຽນແປງ ໃນພາຍຫຼັງ ເພື່ອປົກປ້ອງຜູ້ອື່ນ. ຊາວຫນຸ່ມທັງຊາຍແລະຍິງ ຄວນສາມາດເດີນທາງ, ສ້າງປະສົບການຊີວິດຂອງຕົນເອງ ແລະປອດພັຍ.ພວກເຮົາ ຈະຄິດຮອດລູກສາວທີ່ສວຍງາມຂອງພວກເຮົາຕລອດໄປແລະຫວັງວ່າ ຊີວິດຂອງນາງ ຈະບໍ່ສູນເສັຍຢ່າງໄຮ້ປໂຍດ."
ນັ້ນແມ່ນ Mark Jones , ພໍ່ທີ່ກຳລັງໂສກເສົ້າ, ອ້ອນວອນຢ່າງສະເທືອນໃຈ.
Bianca ລູກສາວອາຍຸ 19 ປີຂອງລາວ ໄດ້ເສັຍຊີວິດ ໃນຂນະທີ່ໄປທ່ອງທ່ຽວ ໃນເອເຊັຍຕາເວັນອອກສຽງໃຕ້ ກັບ Holly Bowles ເພື່ອນທີ່ດີທີ່ສຸດຂອງນາງ, ຜູ້ໄດ້ເສັຍຊີວິດ ຈາກພິດ Methanol ຄືກັນ.
ຊາວ Melburnians ທັງສອງຄົນ ໄດ້ດື່ມເຄື່ອງດື່ມ ທີ່ປົນເປື້ອນດ້ວຍ Methanol ຢູ່ໂຮງແຮມຍອດນິຍົມ ໃນເມືອງວັງວຽງຂອງລາວ.
Bianca ໄດ້ເສັຍຊີວິດໄປ ພຽງແຕ່ສອງສາມມື້ຕໍ່ມາ ໃນວັນອັງຄານ, (21 ພິຈິກ) ຢູ່ໂຮງຫມໍໃນປະເທດໄທ.
ການເສັຍຊີວິດຂອງ Holly ໄດ້ຖືກຢືນຢັນ ມື້ຫນຶ່ງຫລັງຈາກນັ້ນ (22 ພິຈິກ) ໂດຍຄອບຄົວຂອງນາງ.
Mr Jones ກ່າວວ່າຊີວິດຂອງເຂົາເຈົ້າຖືກຕັດສັ້ນລົງ.
"ລູກສາວຂອງພວກເຮົາ ໄດ້ເດີນທາງຄັ້ງນຶ່ງໃນຊີວິດ ກັບໝູ່ທີ່ດີທີ່ສຸດຂອງນາງ. ນີ້ຫມາຍຄວາມວ່າ ຈະເປັນການເດີນທາງ ທີ່ເຕັມໄປດ້ວຍຄວາມຊົງຈໍາຕລອດຊີວິດ ແລະເປັນການເດີນທາງ ເທື່ອທໍາອິດໃນຫລາຍໆບ່ອນ. ຊີວິດຂອງນາງ ຫາກໍເລີ່ມຕົ້ນ. ນາງເປັນຍິງສາວ ທີ່ຢາກມີຊີວິດຕໍ່ໄປ."
ທາງການໄທ ໄດ້ຢືນຢັນວ່າ Bianca ມີອາການສມອງບວມ ເນື່ອງຈາກລະດັບ Methanol ມີສູງໃນລະບົບຂອງນາງ.
ສານປະສົມ (Compound) ທີ່ເຮັດໃຫ້ເຄື່ອງດື່ມມີທາດເຫຼົ້າ ທີ່ແທ້ຈິງແລ້ວ ແມ່ນ Ethanol, ແຕ່ເນື່ອງຈາກ Methanol ມີຣົດຊາດທີ່ແຍກບໍ່ອອກ, ຈຶ່ງມັກຖືກໃຊ້ ເປັນທາງເລືອກທີ່ລາຄາຖືກກວ່າ ຢ່າງຜິດກົດຫມາຍ.
Methanol ສ່ວນໃຫຍ່ ຖືກໃຊ້ເພື່ອຜລິດເຊື້ອໄຟ, ຢາຂ້າແມງໄມ້ (Insecticides), ນ້ຳຢາລອກສີ (Paint strippers) ແລະສານລະລາຍ (Solvents) ແລະເປັນພິດຕໍ່ມະນຸດ.
ໃນການຈະມີສານຢູ່ໃນເຄື່ອງດື່ມນັ້ນ, ມັນຕ້ອງຖືກຕື່ມໃສ່ໂດຍຈົງໃຈ.
ບັນຫານີ້ ໄດ້ກາຍເປັນເລື່ອງທັມມະດາຫລາຍຂຶ້ນ ໃນປະເທດທີ່ມີກົດຫມາຍເລື່ອງເຫລົ້າ ທີ່ອ່ອນແອ.
ຜູ້ຍິງຊາວອັງກິດ, ຊາຍຊາວອາເມຣິກັນຄົນຫນຶ່ງ ແລະນັກທ່ອງທ່ຽວຊາວເດັນມາກສອງຄົນ ກໍໄດ້ຕົກເປັນຜູ້ເຄາະຮ້າຍຄືກັນ, ໃນຂນະທີ່ຫລາຍຄົນກໍເຈັບປ່ວຍ.
ສາດສະດາຈານ Alistair Hay ເປັນຜູ້ຊ່ຽວຊານດ້ານສານພິດວິທະຍາ(Toxicology Expert) ອະທິບາຍວ່າ ເປັນຫຍັງແຕ່ລະຄົນ ຈຶ່ງມີປະຕິກິຣິຍາທີ່ແຕກຕ່າງກັນ ຕໍ່ການບໍຣິໂພກ Methanol.
"ແຕ່ລະບຸກຄົນ ມີປະຕິກິຣິຍາແຕກຕ່າງກັນຕໍ່ Methanol. ບາງຄົນ ຈະສາມາດທົນໄດ້ຫຼາຍກວ່າຄົນອື່ນ ເພາະເຮົາທຸກຄົນມີຄວາມແຕກຕ່າງກັນ ໃນຄວາມສາມາດຂອງ Enzymes ໃນການກໍາຈັດສານພິດ...ແຕ່ໃນປະຣິມານເລັກນ້ອຍ. ຖ້າທ່ານກໍາລັງເວົ້າເຖິງຫລາຍສິບມິລລິລິດ, ນັ້ນອາດເປັນອັນຕະຣາຍຕໍ່ບຸກຄົນ, ບາງຄົນ ອາດຢູ່ລອດໄດ້ຫລາຍກວ່ານັ້ນເລັກນ້ອຍ."
ລາວເວົ້າວ່າ ການເອົາສານອອກຈາກຮ່າງກາຍ ກ່ອນທີ່ມັນຈະຍ່ອຍ ສລາຍ ເປັນສິ່ງສໍາຄັນຫລາຍ.
"ຖ້າມີການຖືກພິດໃດໆກໍຕາມ, ການແກ້ໄຂທັນທີ ຈະໃຫ້ຄວາມສໍາເລັດທີ່ດີທີ່ສຸດ. ຖ້າຫາກທ່ານສາມາດແກ້ໄຂ ດ້ວຍການເຮັດໃຫ້ການຍ່ອຍ ສລາຍຂອງ Methanol ຊ້າລົງ, ແລະມີຢາແກ້, Fomepizoleo, ຫລື Ethanol ເອງ, ແລະຖ້າຫາກທ່ານ ສາມາດປິ່ນປົວໄວພໍ, ແລ້ວຜົນຮັບກໍຈະດີ."
ຣັຖບານລາວ ໄດ້ກ່າວເຖິງເຫດການທີ່ເກີດຂຶ້ນໃນວັນເສົາ, ໂດຍທີ່ຕໍາຫລວດທ້ອງຖິ່ນກ່າວວ່າ ຫລາຍຄົນໄດ້ຖືກຄຸມໂຕ, ແຕ່ຍັງບໍ່ມີການຕັ້ງຂໍ້ກ່າວຫາ.
Jacinta Allen ຣັຖມົນຕີ Victoria ກໍໄດ້ກ່າວກ່ຽວກັບເຫດການທີ່ໂສກເສົ້າຄືກັນ.
"ມັນເປັນເລື່ອງສະເທືອນໃຈຫລາຍ ທີ່ໄດ້ເຫັນການຕາຍທີ່ຫນ້າໂສກເສົ້າຂອງຍິງສາວທີ່ສວຍງາມສອງຄົນນີ້ ຜູ້ທີ່ເດີນທາງຜະຈົນພັຍຄັ້ງນຶ່ງໃນຊີວິດ ແລະຈົບລົງຢ່າງໂສກເສົ້າ ທີ່ຫນ້າຢ້ານກົວນີ້ ເປັນເລື້ອງທີ່ຫນ້າເສົ້າໃຈຢ່າງຍິ່ງ."
ໃນຂນະທີ່ການທ່ອງທ່ຽວ ຍັງດໍາເນີນຕໍ່ໄປໃນເມືອງວັງວຽງ, ເຫດການດັ່ງກ່າວ ໄດ້ເຮັດໃຫ້ຫລາຍຄົນ ລະມັດລະວັງຫລາຍຂຶ້ນ.
ນີ້ແມ່ນນັກທ່ອງທ່ຽວ ທີ່ກໍາລັງເດີນທາງຢູ່ໃນປະເທດລາວ.
"ຂ້ອຍຄິດວ່າ ມັນທໍາລາຍຄຸນຄ່າຂອງ Backpacking ຫນ້ອຍຫນຶ່ງ.ເພາະວ່າ ທຸກຄົນພຽງແຕ່ມ່ວນຊື່ນ ກັບເວລາຂອງເຂົາເຈົ້າ, ບາງທີໄດ້ພົບກັບຄົນອື່ນໆ ຢູ່ທີ່ໂຮງແຮມ, ດື່ມກັບຜູ້ຄົນຈາກທົ່ວໂລກ...ແລະບັດນີ້ ຂ້ອຍຈະບໍ່ເຮັດອີກຍ້ອນຢາພິດ."
ສະມາຊິກໃນຄອບຄົວ ຍັງກຳລັງພະຍາຍາມພາ Bianca ແລະ Holly ກັບບ້ານ.
ເພື່ອກ່າວອໍາລາຄັ້ງສຸດທ້າຍ ສໍາລັບຊີວິດທີ່ສັ້ນລົງຢ່າງໂສກເສົ້າ.
ລາຍງານໂດຍ Adriana Wainstok ແລະ Mahnaz Angury ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌ sbs.com.au/lao
ທ່ານຍັງສາມາດ ຕິດຕາມທາງ facebook ໄດ້ທີ່ facebook.com/sbslao
