ອະນາຄົດຂອງການໃຊ້ເງິນສົດໃນການຊື້ຂາຍ.
ທຸຣະກິດທົ່ວອອສເຕຣເລັຍ ຈະຖືກສັ່ງໃຫ້ຮັບເອົາເງິນສົດ ຈາກລູກຄ້າສໍາລັບສິ່ງຂອງທີ່ຈໍາເປັນ ເພື່ອສົ່ງເສີມ ຜູ້ທີ່ມັກໃຊ້ວິທີ ທີ່ນັບມື້ບໍ່ໃຊ້ຫລາຍຂຶ້ນ.
ເຊື່ອກັນວ່າ ປະມານ 1.5ລ້ານຄົນ ໃນອອສເຕຣເລັຍ ໃຊ້ເງິນສົດ ໃນການຊຳລະເງິນ ຫລາຍກວ່າ 80 ເປີເຊັນ.
Ciara Hain ລາຍງານ.
ມັນກາຍເປັນເລື່ອງປົກກະຕິຫລາຍຂຶ້ນ ສໍາລັບທຸຣະກິດ ທີ່ຈະຮັບເອົາການຊຳລະ ເງິນແບບ Digital ເທົ່ານັ້ນ-ບໍ່ວ່າຈະເປັນການຈ່າຍເງິນດ້ວຍໂທຣະສັບມືຖື ຫລືບັດ Credit ຂອງທ່ານ.
ແຕ່ໃນສ່ວນພູມີພາກ ຂອງປະເທດ ຮວມທັງຊາວອອສເຕຣເລັຍ ທີ່ສູງອາຍຸ ຍັງຕ້ອງອາສັຍ ການໃຊ້ເງິນສົດຢ່າງຫຼາຍ.
Chris Grice ຫົວຫນ້າຜູ້ອໍານວຍການ ຂອງ National Seniors Australiaກ່າວວ່າ ສໍາລັບຜູ້ສູງອາຍຸ ຂອງອອສເຕຣເລັຍ, ມັນສຳຄັນຫຼາຍ.
"ເງິນສົດ ເປັນສິ່ງທີ່ສໍາຄັນ ສໍາລັບຜູ້ສູງອາຍຸຈໍານວນຫລາຍ ໃນຊຸມຊົນ. ແລະໃນຂນະທີ່ ຈໍານວນຄົນໃນພາບລວມ, ຂ້າພະເຈົ້າຄິດວ່າ ມັນເປັນສິ່ງທີ່ ຣັຖມົນຕີກະຊວງການຄັງ ກ່າວວ່າ 1.5 ລ້ານຄົນ ຍັງໃຊ້ເງິນສົດຢູ່. ປະມານ 80 ເປີເຊັນ ຂອງຈໍານວນຄົນເຫຼົ່ານີ້ ແມ່ນຜູ້ທີ່ມີອາຍຸສູງກວ່າ 65 ປີ. ສະນັ້ນ, ມັນຈຶ່ງຍັງສໍາຄັນຫລາຍ ສໍາລັບກຸ່ມ ທີ່ມີອາຍຸສູງເຫຼົ່ານີ້. ແລະມັນກໍຂຶ້ນຢູ່ກັບ ສິ່ງທີ່ເຂົາເຈົ້າສະບາຍໃຈ. ເຂົາເຈົ້າຮູ້ສຶກປອດພັຍກວ່າ ກັບມັນ. ແລະເຂົາເຈົ້າ ກໍຖືກທ້າທາຍ ດ້ານຄວາມປອດພັຍທາງອິນເຕີເນັດ ໃນທຸກວັນນີ້."
ທະນາຄານກາງ (The Reserve Bank) ກ່າວວ່າ ທຸຣະກິດປະມານ 94ເປີເຊັນ ຍັງຮັບເອົາເງິນສົດ, ຫລຸດຈໍານວນລົງຈາກ 99 ເປີເຊັນ ກ່ອນໂຣກລະບາດ.
ແຕ່ໃນປະຈຸບັນນີ້ ຍັງບໍ່ມີຂໍ້ກຳໜົດທາງກົດຫມາຍ ສໍາລັບທຸຣະກິດຂອງອອສເຕຣເລັຍ ທີ່ຈະຕ້ອງໃຊ້ເງິນສົດ ແລະເງິນຫຼຽນ.
Anne Nalder ຫົວຫນ້າຜູ້ອໍານວຍການ ຂອງສະມາຄົມທຸຣະກິດຂນາດນ້ອຍ ຂອງອອສເຕຣເລັຍ (Small Business Association of Australia)ກ່າວວ່າ ສ່ວນຫລາຍແລ້ວ ມັນງ່າຍກວ່າ ສໍາລັບທຸຣະກິດ ທີ່ຈະບໍ່ມີເງິນສົດ ຢູ່ໃນບ່ອນຄ້າຂາຍ.
"ການໃຊ້ບັດ ແມ່ນສະດວກສໍາລັບທັງທຸຣະກິດ ແລະລູກຄ້າໃນຂນະນີ້.ການໃຊ້ເງິນສົດ ໃນການຄ້າຂາຍນັ້ນ, ໃຫ້ຄຶດເບິ່ງວ່າ ເມື່ອຫຼາຍປີກ່ອນຕອນທີ່ຕ້ອງໃຊ້ເງິນສົດໃນການຄ້າຂາຍ, ເຈົ້າຂອງທຸຣະກິດ ຈະຕ້ອງສົ່ງພະນັກງານຂອງເຂົາເຈົ້າ ໄປທີ່ສາຂາຂອງທະນາຄານ. ເຂົາເຈົ້າ ຕ້ອງໄດ້ເງິນສົດ ແລະເງິນຫລຽນ ຈໍານວນຫນຶ່ງ, ແລະອື່ນໆ ສໍາລັບການທອນເງິນ ແລະທຸຣະກິດຕ່າງໆ. ສະນັ້ນ, ມັນຈຶ່ງຕ້ອງໃຊ້ເວລາ ແລະຄວາມພະຍາຍາມ. ແລະໃຫ້ຄຶດວ່າ ສາຂາທະນາຄານຫລາຍບ່ອນ ກໍາລັງຖືກປິດລົງໃນຕອນນີ້. ສະນັ້ນ, ທ່ານຈຶ່ງບໍ່ສາມາດໄປຫາທະນາຄານ ໃນທ້ອງຖິ່ນຂອງທ່ານ. ດັ່ງນັ້ນ, ເຂົາເຈົ້າຈະເບິ່ງຫາຄວາມສະດວກສະບາຍ."
ບັດນີ້, ຣັຖບານກາງ ໄດ້ປະກາດຄໍາສັ່ງໃຫມ່ ຊຶ່ງຈະບັງຄັບໃຫ້ທຸຣະກິດຮັບເງິນສົດ ເມື່ອຂາຍສິນຄ້າທີ່ຈໍາເປັນ ຊຶ່ງຄາດວ່າ ຈະເປັນສິ່ງຂອງ ເຊັ່ນອາຫານ, ການດູແລສຸຂະພາບ, ຢາ ແລະນ້ຳມັນເຊື້ອໄຟ.
ແລະຣັຖບານກາງ ໄດ້ນຳໃຊ້ Cheques Transition Plan ຊຶ່ງຈະມີຈຸດປະສົງ ທີ່ຈະໃຫ້ລູກຄ້າ ມີເວລາດົນພໍ ທີ່ຈະປ່ຽນຈາກການໃຊ້ Cheques - ເຖິງແມ່ນວ່າການໃຊ້ Cheques ໄດ້ຫລຸດລົງ 90 ເປີເຊັນໃນຊ່ວງສິບປີ ທີ່ຜ່ານມາ.
ພາຍໃຕ້ສ່ວນນຶ່ງຂອງແຜນນັ້ນ, ທະນາຄານ ຈະຢຸດການອອກ Cheques ທັງໝົດ ພາຍໃນ ວັນທີ 30 ເດືອນມິຖຸນາ ປີ 2028 - ແລະຢຸດຮັບ Cheques ໃນວັນທີ 30 ເດືອນກັນຍາ ປີຕໍ່ໄປ.
ແຕ່ຍັງເນັ້ນໃສ່ເງິນສົດຢູ່.
Jim Chalmersຣັຖມົນຕີ ກະຊວງການຄັງ ກ່າວວ່າ ຊາວອອສເຕຣເລັຍຫລາຍລ້ານຄົນ ຍັງເພິ່ງອາສັຍເງິນສົດຢູ່, ເຖິງແມ່ນວ່າ ເສດຖະກິດຈະກາຍເປັນ Digital ຫລາຍຂຶ້ນກໍຕາມ.
"ຈຸດປະສົງຂອງເຮົາ ໃນເລື່ອງການຊຳລະເງິນ ຄືການປັບປຸງ ລະບົບການເງິນຂອງເຮົາ ໃຫ້ທັນສມັຍ. ແຕ່ເພື່ອເຮັດສິ່ງນັ້ນ ແຕ່ບໍ່ປະຖິ້ມຜູ້ຄົນຢູ່ຂ້າງຫລັງ, ເພື່ອໃຫ້ແນ່ໃຈວ່າ ມີບົດບາດຢ່າງຕໍ່ເນື່ອງ ສໍາລັບເງິນສົດ,ແລະເພື່ອໃຫ້ແນ່ໃຈວ່າ ເມື່ອເຮົາຈະເລີກໃຊ້ Cheques ເຮົາຈະເຮັດສິ່ງນັ້ນ ໃນໄລຍະເວລາ ທີ່ສົມເຫດຜົນ ແລະດົນນານພໍ. ບັດນີ້, ພວກເຮົາຮູ້ວ່າ ຄົນສ່ວນຫລາຍ ມັກຈ່າຍເງິນແບບດິຈິຕອລ, ແລະພວກເຮົາຮູ້ວ່າ ເຮົາກຳລັງມຸ່ງໜ້າ ໄປສູ່ການຈ່າຍເງິນ ແບບດິຈິຕອລ, ແຕ່ຊາວອອສເຕຣເລັຍ ຫນຶ່ງຈຸດຫ້າລ້ານຄົນ ຍັງຄົງຈ່າຍດ້ວຍເງິນສົດ ເປັນສ່ວນໃຫຍ່."
ຄໍາສັ່ງເລື່ອງເງິນສົດ ມີຢູ່ແລ້ວໃນບາງສ່ວນ ຂອງສະຫະຣັດອາເມຣິກາ-ເຊັ່ນດຽວກັບ Spain, France, Norway ແລະ Denmark.
ຣັຖບານອອສເຕຣເລັຍ ຈະເລີ່ມຕົ້ນຂັ້ນຕອນການປຶກສາຫາລື ກ່ອນທ້າຍປີນີ້.
ການປຶກສາ ຈະພິຈາຣະນາຄວາມຕ້ອງການ ຂອງຜູ້ຄົນ ທີ່ຕ້ອງອາສັຍເງິນສົດ, ຮວມທັງຜູ້ຄົນໃນເຂດພູມີພາກ ແລະຜູ້ທີ່ບໍ່ສາມາດໃຊ້ການຈ່າຍເງິນ ແບບດິຈິຕອລ, ພ້ອມທັງຜົນກະທົບ ຕໍ່ທຸຣະກິດຂນາດນ້ອຍ-ແລະທຸຣະກິດປະເພດໃດ ທີ່ຈະຢູ່ພາຍໃຕ້ຄໍາສັ່ງ.
ຣັຖມົນຕີກະຊວງການຄັງ ກ່າວວ່າ ເຂົາເຈົ້າຕ້ອງພິຈາຣະນາວ່າ ຈະມີຫຍັງເກີດຂຶ້ນ ກັບທຸຣະກິດ ທີ່ປະຕິເສດບໍ່ຮັບເງິນສົດ.
"ເມື່ອກ່າວເຖິງການລົງໂທດ, ຄວາມແຕກຕ່າງທີ່ສໍາຄັນ ລະຫວ່າງສິ່ງທີ່ເຮົາກໍາລັງສເນີໃນມື້ນີ້ ແລະການລົງໂທດບາງຢ່າງ ທີ່ໄດ້ຖືກສເນີ ໃນສະພາ. Andrew Gee, ຜູ້ທີ່ເຮັດວຽກດ້ວຍເຈດຕະນາດີຢ່າງຫລາຍ ກ່ຽວກັບເລື້ອງນີ້. ຈຸດປະສົງຂອງພວກເຮົາ ແມ່ນພະຍາຍາມ ເຮັດໃຫ້ທຸຣະກິດ ທີ່ຂາຍສິນຄ້າທີ່ຈຳເປັນ ຮັບເອົາເງິນສົດ ໃຫ້ຫລາຍທີ່ສຸດ ເທົ່າທີ່ພວກເຮົາສາມາດເຮັດໄດ້. ແຕ່ເຮົາບໍ່ຢາກລົງໂທດ ທຸຣະກິດຂນາດນ້ອຍ. ພວກເຮົາຢາກຊອກຫາວິທີ ທີ່ເຫມາະສົມ ທີ່ຈະແຍກທຸຣະກິດ ຂນາດນ້ອຍ ເພື່ອໃຫ້ຮັບຮູ້ ເຖິງຄວາມກົດດັນ ໃນພູມີພາກ ແລະຄວາມກົດດັນອື່ນໆ, ເພື່ອໃຫ້ແນ່ໃຈວ່າ ບໍ່ໄດ້ແນໃສ່ກັບການລົງໂທດ. ຈຸດສໍາຄັນ ແມ່ນເພື່ອໃຫ້ແນ່ໃຈວ່າ ທຸຣະກິດຂນາດກາງ ແລະຂນາດໃຫຍ່ ທີ່ຂາຍສິ່ງຂອງທີ່ຈໍາເປັນ ຈະຮັບເງິນສົດ."
ຜູ້ອົບພະຍົບ ເປັນເຈົ້າຂອງ 18 ເປີເຊັນ ຂອງທຸຣະກິດຂນາດນ້ອຍ.
Ms Nalder ກ່າວວ່າ ມັນສໍາຄັນທີ່ຣັຖບານ ຈະສື່ສານຢ່າງເໝາະສົມ ກ່ຽວກັບການປ່ຽນແປງຕ່າງໆ ທີ່ອາດເກີດຂຶ້ນ ກັບເຈົ້າຂອງທຸຣະກິດ ຂນາດນ້ອຍ, ໂດຍສະເພາະ ຜູ້ທີ່ບໍ່ເວົ້າພາສາອັງກິດເປັນພາສາທໍາອິດ.
"ເຈົ້າຂອງທຸຣະກິດ ຈະຕ້ອງຮຽນຮູ້ທີ່ຈະປັບຕົວ. ຈະມີທຸຣະກິດບາງຢ່າງ ທີ່ຍັງຕ້ອງມີເງິນສົດ ໃນການຄ້າຂາຍຂອງເຂົາເຈົ້າ, ແຕ່ບໍ່ແມ່ນທຸກທຸຣະກິດ. ສະນັ້ນ, ຂ້າພະເຈົ້າເຊື່ອວ່າ ເຮົາຕ້ອງມີການຣົນນະຣົງ ດ້ານໂຄສະນາ, ການຣົນນະຣົງດ້ານການສຶກສາ. ເມື່ອກົດຫມາຍຖືກນໍາໃຊ້, ເຈົ້າຂອງທຸຣະກິດ ຈະຕ້ອງໄດ້ຮັບການສຶກສາ ກ່ຽວກັບສິ່ງທີ່ເຂົາເຈົ້າຕ້ອງເຮັດ."
Mr Grice ກ່າວວ່າ ລູກຄ້າຈະຕ້ອງການ ການສນັບສນູນ ຈາກພາກທະນາຄານນໍາອີກ ເມື່ອກ່າວເຖິງການຍົກເລີກການໃຊ້ Cheque ແລະການໃຊ້ເງິນສົດ.
"ການສຶກສາ ແລະການສນັບສນູນ ບໍ່ໄດ້ໃຫ້ຢ່າງເຕັມທີ່ ໂດຍພາກ ທະນາຄານທັງໝົດ. ມີທະນາຄານບາງແຫ່ງ ທີ່ເລີ້ມເຮັດ ແລະໃຫ້ການສົ່ງເສີມ, ແຕ່ພວກເຮົາ ຍັງບໍ່ເຫັນການປ່ຽນແປງ ອັນກວ້າງຂວາງເທື່ອ,ແລະສະນັ້ນ ການໝຸນວຽນເງິນສົດຕໍ່ໄປ ຈຶ່ງມີຄວາມສໍາຄັນຢ່າງຍິ່ງ."
Peter Dutton ຜູ້ນໍາຝ່າຍຄ້ານ ໄດ້ວິຈານຂໍ້ສເນີຂອງຣັຖບານ, ໂດຍເອີ້ນມັນວ່າ "ບໍ່ມີຫຍັງຫລາຍໄປກວ່າ ຄວາມຄິດເທົ່ານັ້ນ".
ການວິຈານນັ້ນ ໄດ້ຖືກກ່າວຊ້ຳໂດຍ Jane Hume ໂຄສົກກະຊວງການເງິນ ຂອງຝ່າຍຄ້ານ ທີ່ກ່າວວ່າ ການປະກາດນັ້ນ ບໍ່ໄດ້ເປັນປໂຍດ ຕໍ່ຜູ້ທີ່ກຳລັງດີ້ນລົນ ກັບປັນຫາຄ່າຄອງຊີບ.
"ນີ້ເປັນພຽງແຜນຂອງໂຄງການ. ມັນແມ່ນການປຶກສາອີກຢ່າງຫນຶ່ງ ສໍາລັບບາງສິ່ງ ທີ່ຈະບໍ່ມີຜົນບັງຄັບໃຊ້ ຈົນກວ່າຈະເຖິງປີ 2026. ນີ້ເບິ່ງຄືວ່າ ຣັຖບານກໍາລັງພະຍາຍາມ ຫາແຜນການທາງເສດຖະກິດ ເພາະມັນໄດ້ສູນເສັຍ ການຕໍ່ສູ້ກັບເງິນເຟີ້ ຊຶ່ງເປັນບັນຫາທີ່ສໍາຄັນອັນດັບນຶ່ງ ສໍາລັບຊາວອອສເຕຣເລັຍ."
ແຕ່ Sarah Hanson-Young, ສະມາຊິກສະພາສູ’ຂອງພັກ Greens ໄດ້ແນະນໍາວ່າ ແຜນນັ້ນ ມີຂໍ້ດີບາງຢ່າງ-ຖ້າຫາກວ່າ ກຸ່ມທີ່ມີຄວາມສ່ຽງ ບໍ່ໄດ້ຖືກປະຖິ້ມ ໃຫ້ມີຜົນກະທົບທີ່ຮ້າຍແຮງກວ່າເກົ່າ ເນື່ອງຈາກຄໍາສັ່ງນັ້ນ.
"ພັກ Greens ເປັນຫ່ວງວ່າບາງຄົນ, ໂດຍສະເພາະ ຜູ້ທີ່ຢູ່ໃນກຸ່ມ ຂອງອອສເຕຣເລັຍ ທີ່ຕ້ອງການ ການເຂົ້າເຖິງເງິນສົດ ແລະຄວນຈະມີ. ພວກເຮົາ ຈະທໍາງານກັບຣັຖບານ ເພື່ອໃຫ້ແນ່ໃຈວ່າ ຜູ້ສູງອາຍຸອອສເຕຣເລັຍ ແລະຜູ້ທີ່ມີຄວາມສ່ຽງ ທີ່ຕ້ອງການເງິນສົດນັ້ນ ສາມາດເຂົ້າເຖິງມັນໄດ້."
ເນື້ອເລື່ອງໂດຍ Ciara Hain ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
