ປະຕິກິຣິຍາຈາກການສັ່ງຫ້າມການໃຊ້ ສື່ສານມວນຊົນ.
ອອສເຕຣເລັຍ ເປັນປະເທດທຳອິດໃນໂລກ ທີ່ສັ່ງຫ້າມຜູ້ທີ່ມີອາຍຸຕ່ຳກວ່າ 16 ປີ ໃຊ້ສື່ສານມວນຊົນ (Social Media).
ພາຍໃຕ້ກົດໃຫມ່, ບໍຣິສັດເທັກໂນໂລຈີ ຕ້ອງເຮັດ 'ຂັ້ນຕອນທີ່ເໝາະສົມ' ເພື່ອປ້ອງກັນຜູ້ໃຊ້ດັ່ງກ່າວ ຈາກການເຂົ້າເຖິງບໍຣິການ ເຊັ່ນSnapchat, TikTok, Facebook ແລະ Instagram.
ໃນຂນະທີ່ ເຂດອຳນາດສານອື່ນໆ ໃນຕ່າງປະເທດ ມີການເຂົ້າເຖິງ ທີ່ຈໍາກັດ ໂດຍບໍ່ຕ້ອງໄດ້ຮັບອະນຸຍາດຈາກພໍ່ແມ່, ຊຶ່ງເປັນຂໍ້ຈໍາກັດ ທີ່ຍາກທີ່ສຸດ.
Sophie Bennett ແລະ Hannah Kwon ລາຍງານ.
ນີ້ແມ່ນຂ່າວ ຈາກຫຼາຍມຸມຂອງໂລກ.
ຂ່າວຈາກ CNN "ເປັນເທື່ອທໍາອິດໃນໂລກ ໃນອອສເຕຣເລັຍ..."
ຂ່າວຈາກ CBC: "ບັດນີ້ ອອສເຕຣເລັຍ ໄດ້ເຮັດບາງສິ່ງ ທີ່ບໍ່ມີປະເທດອື່ນ ສາມາດເຮັດໄດ້."
ຂ່າວຈາກ DW: "ສັ່ງຫ້າມເດັກນ້ອຍອາຍຸຕໍ່າກວ່າ 16 ປີ ບໍ່ໃຫ້ໃຊ້ສື່ສານມວນຊົນ"
ມັນເປັນຂ່າວຂອງອອສເຕຣເລັຍ ທີ່ເປັນຫົວຂໍ້ຂ່າວທົ່ວໂລກ.
ພາຍໃຕ້ກົດຫມາຍ, ຖານຕ່າງໆ (Platforms) ຮວມທັງ Facebook, Instagram, Snapchat, Reddit ແລະ X ຈະຈໍາກັດກາເຂົ້າເຖິງ ສຳລັບຜູ້ໃຊ້ ທີ່ມີອາຍຸຕ່ຳກວ່າ 16 ປີ-ແຕ່ມີການຍົກເວັ້ນ ໃນນໍາໃຊ້ ກັບບໍຣິການ ດ້ານສຸຂະພາບ ແລະການສຶກສາ ຮວມທັງ YouTube, Messenger Kids, WhatsApp, Kids Helpline ແລະ Google Classroom.
ບໍຣິສັດ ທີ່ບໍ່ສາມາດບັງຄັບໃຊ້ຄຳສັ່ງຫ້າມ ອາດຖືກປັບໃໝ ສູງເຖິງ 50ລ້ານໂດລາ.
ການສັ່ງຫ້າມ ຈະມີຜົນບັງຄັບໃຊ້ ພາຍໃນ 12 ເດືອນ-ແລະຊາວຫນຸ່ມ ກໍມີປະຕິກິຣິຍາ ທີ່ແຕກຕ່າງກັນ ກ່ຽວກັບເລື່ອງນີ້.
ຄົນທຳອິດກ່າວວ່າ:
"ສໍາລັບເດັກນ້ອຍອອນລາຍ, ພວກເຂົາຈະເວົ້າວ່າ, ໂອ້ ຂ້ອຍບໍ່ມັກ ເພາະເຂົາເຈົ້າພະຍາຍາມຈໍາກັດເວລາ ທີ່ຂ້ອຍຢາກເວົ້າລົມກັບຫມູ່ເພື່ອນຂອງຂ້ອຍ, ເມື່ອເຂົາເຈົ້າມີອາຍຸສູງຂຶ້ນ ເຂົາເຈົ້າຈະຮູ້ວ່າມັນເປັນສິ່ງທີ່ດີທີ່ສຸດ."
ຄົນທີ່ສອງກ່າວວ່າ:
"ຂ້ອຍຮູ້ສຶກວ່າ ຂ້ອຍຍັງໃຊ້ມັນຢູ່, ພຽງແຕ່ລັກເຮັດ. ພໍ່ແມ່: ເຈົ້າຈະຄິດຮອດມັນແມ່ນບໍ? Kid: ແມ່ນແລ້ວ."
ຄົນທີ່ສາມກ່າວວ່າ:
"ຂ້ອຍເຊື່ອວ່າ ມັນຈະສ້າງຄົນລຸ້ນໃໝ່ ທີ່ມີຄວາມຮູ້ເລື່ອງເທັກໂນໂລຈີຫລາຍຂຶ້ນ ໃນການຫລີກການຈຳກັດນີ້ ດ້ວຍການໃຊ້ອາຍຸປອມ ແລະການລະບຸຕົວຕົນປອມ ແລະຈະບໍ່ບັນລຸຜົນຕາມທີ່ຕ້ອງການ."
ນາຍົກຣັຖມົນຕີ Anthony Albanese ກໍາລັງອ້າງເຖິງ ການສັ່ງຫ້າມສື່ສານມວນຊົນ ຂອງຣັຖບານ ວ່າເປັນການເຄື່ອນໄຫວ ທີ່ຖືກຕ້ອງ, ໂດຍກ່າວວ່າ ຖານ (Platforms) ຈະມີຫນ້າທີ່ຮັບຜິດຊອບ ທີ່ຈະເຮັດໃນ 'ຂັ້ນຕອນທີ່ເໝາະສົມ' ເພື່ອປ້ອງກັນຜູ້ໃຊ້ ທີ່ອາຍຸຍັງບໍ່ຮອດ ຈາກການເຂົ້າເຖິງບໍຣິການ.
"ແມ່ນການກະທໍາ ທີ່ນໍາໜ້າຂອງໂລກ ເພື່ອໃຫ້ແນ່ໃຈວ່າ ບໍຣິສັດສື່ສານມວນຊົນ ປະຕິບັດຕາມຄວາມຮັບຜິດຊອບ ຕໍ່ສັງຄົມຂອງເຂົາເຈົ້າ. ສື່ສານມວນຊົນ ກໍາລັງທໍາຮ້າຍລູກໆຂອງເຮົາ. ແລະມື້ນີ້ ເປັນຜົນໂດຍກົງ ຈາກກົດຫມາຍຂອງພວກເຮົາ ທີ່ຜ່ານຣັຖສະພາ... ພໍ່ແມ່ ສາມາດສົນທະນາຢ່າງແຕກຕ່າງ ກັບລູກໆຂອງຕົນໄດ້."
ແຕ່ຍັງມີຄໍາຖາມທີ່ເຫລືອຢູ່ ວ່າການສັ່ງຫ້າມນັ້ນ ຈະຖືກບັງຄັບໃຊ້ແນວໃດ.
ເອກກະສານ ການລະບຸຕົວຕົນ ແລະການຮັບຮູ້ໃບຫນ້າ ໄດ້ຖືກກ່າວວ່າ ເປັນໄປໄດ້ ສໍາລັບການຢືນຢັນອາຍຸ-ແມ່ນແຕ່ສໍາລັບຜູ້ໃຫຍ່.
Jeannie Patterson ຈາກໂຮງຮຽນກົດຫມາຍ ຂອງມະຫາວິທະຍາໄລ Melbourne ກ່າວວ່າ ຫລາຍແງ່ມຸມ ຂອງການສັ່ງຫ້າມນັ້ນ ໄດ້ເຮັດໃຫ້ນາງສົງໄສ.
"ຄໍາຖາມສໍາລັບຂ້າພະເຈົ້າແມ່ນວ່າ ກົນໄກນັ້ນ ຈະມີປະສິດທິພາບຫລາຍປານໃດ, ມັນຈະມີປະສິດທິພາບ ໃນການບັງຄັບໃຊ້ຫຼາຍປານໃດ? ແລະສິ່ງນີ້ຈະແກ້ໄຂບັນຫາຂອງອົງປະກອບ ທີ່ເປັນພິດຂອງໂລກ Digital ໄດ້ແທ້ບໍ່?"
ບໍຣິສັດສື່ສານມວນຊົນ ໄດ້ວິພາກວິຈານກົດຫມາຍດັ່ງກ່າວ.
Meta ກ່າວວ່າ ເຖິງແມ່ນວ່າ ມັນເຄົາຣົບກົດຫມາຍ ທີ່ສະພາອອສເຕຣເລັຍ ໄດ້ຕັດສິນ, ແຕ່ມັນຍັງຢືນຢັນວ່າ ຍັງຂາດຫລັກຖານ ຂອງຄວາມກ່ຽວຂ້ອງ ລະຫວ່າງສຸຂະພາບຈິດ ແລະສື່ສານມວນຊົນ.
TikTok ກ່າວວ່າ ຣັຖບານຈະຕ້ອງທໍາງານຢ່າງໃກ້ຊິດ ກັບອຸດສະຫະກັມ ເພື່ອແກ້ໄຂບັນຫາ ທີ່ກ່າວວ່າ ເກີດຈາກສິ່ງທີ່ມັນອະທິບາຍວ່າ ເປັນຂະບວນການທີ່ຮີບດ່ວນ.
ໃນຂນະດຽວກັນ, ການສັ່ງຫ້າມນັ້ນ ຍັງກໍ່ໃຫ້ເກີດການໂຕ້ຖຽງກັນວ່າ ການກະທໍາທີ່ຄ້າຍຄືກັນນີ້ ຈະໄດ້ຜົນໃນຕ່າງປະເທດຫລືບໍ່.
ຣັຖມົນຕີ ກະຊວງເທັກໂນໂລຈີຂອງອັງກິດ ໄດ້ແຈ້ງການເຄື່ອນໄຫວທີ່ຄ້າຍຄືກັນນີ້ ໃນອາທິດທີ່ຜ່ານມາ, ແຕ່ຈະລໍຖ້າການຄົ້ນຄວ້າຕື່ມອີກ.
ເຖິງຢ່າງໃດກໍຕາມ, ນັກຮຽນຈາກສະຫະຣັດ ອາເມຣິກາ ແລະອັງກິດເວົ້າວ່າ ມັນກໍາລັງເລີ່ມຕົ້ນການສົນທະນາ.
ນັກຮຽນຄົນທຳອິດກ່າວວ່າ:
"ຂ້ອຍບໍ່ຄິດວ່າ ມັນຈະເປັນສິ່ງດີ ເພາະມັນເປັນສ່ວນຫນຶ່ງຂອງຊີວິດປະຈໍາວັນຂອງເຮົາແລ້ວ. ມັນຈະເປັນສິ່ງຍາກ ທີ່ຈະເຮັດໃຫ້ຜູ້ຄົນເຊົາໃຊ້ມັນ."
ນັກຮຽນຄົນທີສອງກ່າວວ່າ:
"ຂ້ອຍຮູ້ວ່າ ມັນເປັນການຖົກຖຽງກັນຫນ້ອຍຫນຶ່ງ, ແຕ່ຕາມຈິງແລ້ວຂ້ອຍຄິດວ່າ ມັນເປັນສິ່ງດີແທ້ໆ ທີ່ເຂົາເຈົ້າໄດ້ເຮັດແບບນັ້ນ."
ເນື້ອເລື່ອງໂດຍ Hannah Kwon and Sophie Bennett ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
