ອຸດສະຫະກັມໃໝ່ ທີ່ກໍາລັງເຕີບໂຕໃນຈີນ.
ບໍຣິສັດການບິນຂອງຈີນ ຫວັງໃຊ້ປໂຍດຈາກສິ່ງທີ່ເຂົາເຈົ້າ ເຫັນວ່າເປັນອຸດສະຫະກັມໃໝ່ ທີ່ກໍາລັງເຕີບໂຕ : ຊຶ່ງແມ່ນການບິນໃນລະດັບຕ່ຳ (Low-altitude Aviation).
ປີນີ້, ງານສະແດງທາງອາກາດທີ່ສຳຄັນຂອງຈີນ ໄດ້ເຫັນການສະແດງທັງຫມົດ ທີ່ອຸທິດໃຫ້ກັບພາກສ່ວນນີ້ ເປັນເທື່ອທໍາອິດ.
Deborah Groarke, Catriona Stirrat ແລະ Associated Press ລາຍງານ.
ຍົນທີ່ບິນລະດັບຕ່ຳ (Low-flying Aircraft) ໄດ້ທຳການສະແດງການບັງຄັບ ແລະການບິນທີ່ຊັບຊ້ອນ ໃນທ້ອງຟ້າ, ເຮັດໃຫ້ຜູ້ເຂົ້າຊົມຕື່ນຕາຕື່ນໃຈ ໃນງານ Airshow China ໃນເມືອງ Zhu hai.
ແຕ່ປີນີ້, ຜູ້ຈັດງານຫວັງຈະສເນີບາງສິ່ງ ທີ່ແຕກຕ່າງຫນ້ອຍຫນຶ່ງ:ຊຶ່ງແມ່ນການບິນໃນລະດັບຕ່ຳ (Low-altitude Aviation).
ການບິນແບບນີ້ ແມ່ນການບິນໄປໃນອາກາດ ທີ່ຕ່ຳກວ່າ 1,000 ແມັດ.
ຊຶ່ງຮວມເຖິງສິນຄ້າ ທີ່ຂົນສົ່ງໂດຍ Drone, ໃນຖ້ຽວບິນໂດຍສານ, ແລະການໃຊ້ເຄື່ອງບິນໄຟຟ້າ ທີ່ບິນຂຶ້ນ ແລະລົງຈອດໃນທາງຕັ້ງ - ຊຶ່ງເອີ້ນວ່າ Taxi ບິນ (Flying Taxis).
ນອກຈາກນີ້, ໃນກຸ່ມນີ້ ຍັງມີຄວາມເປັນໄປໄດ້ ທີ່ມີຍົນໂດຍບໍ່ມີນັກບິນ(Pilot-free) ເມື່ອເທັກໂນໂລຈີ ພັດທະນາຂຶ້ນ.
ບໍຣິສັດເວົ້າວ່າ ເຂົາເຈົ້າເຫັນສັກກະຍະພາບ (Potential) ຂອງຕລາດທີ່ໃຫຍ່ນີ້-ແລະດ້ວຍເຫດນີ້, ເຂົາເຈົ້າກໍາລັງແຂ່ງຂັນ ທີ່ຈະນໍາຜລິດພັນຂອງເຂົາເຈົ້າ ໄປສູ່ການຄ້າຢ່າງເຕັມຮູບແບບ, ໃນສອງສາມປີຂ້າງໜ້າ.
Zhou Yuqing ຜູ້ອໍານວຍການຂອງ XPHENG AEROHT, ຊຶ່ງເປັນບໍຣິສັດໃນເຄືອ ຂອງຜູ້ຜລິດຣົດໄຟຟ້າຂອງຈີນ XPeng, ອະທິບາຍ.
"ໃນໄລຍະທໍາອິດ, ພວກເຮົາກໍາລັງຄິດກ່ຽວກັບສະພາບການ ເຊັ່ນການຂັບຍົນຢູ່ກາງແຈ້ງ, ຫລືໃນບ່ອນຕັ້ງຄ້າຍ. ຖ້າຫາກໄປຫາບ່ອນໃດນຶ່ງ,ເຮົາສາມາດຂັບຣົດໄປທີ່ນັ້ນ ແລະປ່ອຍຍົນ, ຫລັງຈາກນັ້ນ ເຮົາຈະສາມາດຂັບຍົນໄດ້. ເມື່ອການຍອມຮັບຂອງຕລາດສູງຂຶ້ນ ແລະນະໂຍບາຍ ແລະຂໍ້ບັງຄັບ ກໍກ້າວຫນ້າຫຼາຍຂຶ້ນ, ແລະທຸກຄົນກໍສາມາດຍອມຮັບສິ່ງນີ້ໄດ້ດີກວ່ານັ້ນ, ມັນອາດຈະມີສະຖານະການ ຫລາຍຂຶ້ນສໍາລັບການນໍາໃຊ້."
ຄວາມຄິດສ້າງສັນ ຂອງການສະແດງນັ້ນ ບໍ່ມີຂອບເຂດ-ແມ່ນແຕ່ສະແດງໃຫ້ເຫັນຣົດທັມມະດາ ທີ່ມີຍົນຢູ່ໃນນັ້ນ.
ມັນຖືກເອີ້ນວ່າ ຍານບັນທຸກຍົນທາງບົກ (Land Aircraft Carrier) ຊຶ່ງປະກອບດ້ວຍສອງສ່ວນ-ຣົດຫົກລໍ້ເປັນ 'ຍານແມ່' ທາງບົກ ແລະຍົນໄຟຟ້າ ທີ່ບິນຂຶ້ນແລະລົງເດີ່ນ ທາງຕັ້ງ (Electric Vertical Take-off and Landing Aircraft) ເປັນເຄື່ອງທາງອາກາດ.
ບໍຣິສັດກ່າວວ່າ ສິ່ງທີ່ທ່ານຕ້ອງການ ແມ່ນຫ້ານາທີ ສໍາລັບຍົນນ້ຳໜັກ720 ກິໂລຖືກປ່ອຍອອກ, ຫລືຈັດເກັບໄວ້ໃນກະບະຂອງຣົດ.
ຍົນລໍານີ້ ກໍງ່າຍທີ່ຈະໃຊ້ງານເຊັ່ນກັນ, ມີທັງແບບຄວບຄຸມດ້ວຍມື(Manual) ແລະແບບອັດຕະໂນມັດ (Autopilot), ພ້ອມດ້ວຍລະບົບຄວບຄຸມການບິນສລາດ ທີ່ຄວບຄຸມສະຖານະການບິນ.
Hu Haisong, ຜູ້ອໍານວຍການຝ່າຍການຕລາດ ຂອງ Zerog Aircraft Industry ກ່າວວ່າ ຍັງມີສັກກະຍະພາບ (Potential) ຫລາຍຢ່າງ ທີ່ຍັງບໍ່ທັນໄດ້ນຳໃຊ້ ໃຫ້ເປັນປໂຍດ.
"ໃນຖານະລະບົບນິເວດການຂົນສົ່ງ, ລະດັບບິນຕ່ຳ ເປັນບ່ອນທີ່ບໍ່ຄ່ອຍໄດ້ຖືກນໍາໃຊ້ຢ່າງເຕັມທີ່ ແຕ່ມີສັກກະຍະພາບ (Potential) ຫລາຍ. ການຂົນສົ່ງທາງພື້ນດິນ ກໍມີຄົນໜາແໜ້ນຢູ່ແລ້ວ, ແລະຄວາມສູງກໍແມ່ນການບິນພົນລະເຮືອນ. ແລະນ່ານຟ້າລະດັບຕ່ຳ, ລະຫວ່າງ 100ແມັດ ເຖິງ 1,000 ແມັດ, ບາງເທື່ອເຖິງ 3,000 ແມັດ, ຍັງບໍ່ທັນໄດ້ຖືກພັດທະນາຢ່າງເຕັມທີ່. ຄຸນຄ່າທາງການຄ້າຂອງມັນ ມີຢ່າງມະຫາສານ."
ໃນທຳນອງດຽວກັນ, Aerofugia Technology ນໍາເອົາເຄື່ອງບິນໄຟຟ້າ ທີ່ຂຶ້ນ ແລະລົງເດີ່ນ ໃນທາງຕັ້ງທີ່ເອີ້ນວ່າ AE200, ຊຶ່ງຖືກອອກແບບ ເພື່ອໃຊ້ສໍາລັບການເດີນທາງໃນເມືອງ, ການທ່ອງທ່ຽວ ແລະການກູ້ພັຍສຸກເສີນ.
ມັນສາມາດບັນທຸກນັກບິນຄົນຫນຶ່ງ ແລະຜູ້ໂດຍສານຫ້າຄົນ, ແລະເດີນທາງ 200 ກິໂລແມັດ ເມື່ອແບຕເຕີຣີເຕັມ.
Hou Yi ຜູ້ຈັດການຜລິດຕະພັນອາວຸໂສຂອງເຂົາເຈົ້າອະທິບາຍ.
"ມັນມີຂໍ້ກຳໜົດຕ່ຳ ສໍາລັບການບິນຂຶ້ນ ແລະລົງຈອດ, ເພາະມັນສາມາດບິນຂຶ້ນ ແລະລົງຈອດ ໃນບ່ອນໃດກໍໄດ້ທີ່ເຫມາະສົມ. ຍົກຕົວຢ່າງ, ມັນສາມາດບິນຂຶ້ນ ແລະລົງຈອດຢູ່ເທິງຫລັງຄາ ແລະໃນເດີ່ນຢູ່ເທິງພື້ນດິນ."
ຣັຖບານຈີນ ກໍາລັງໃຫ້ການສນັບສນູນທາງດ້ານການເງິນ ແລະນະໂຍບາຍ ເພື່ອສົ່ງເສີມອຸດສາຫະກັມການບິນ ໃນລະດັບຕ່ຳ ແລະສ້າງຂໍ້ບັງຄັບ ທີ່ຈໍາເປັນ ເພື່ອສນັບສນູນພາກສ່ວນນີ້.
ລາຍງານຂອງຣັຖບານ ໄດ້ຮຽກຮ້ອງໃຫ້ມີການພັດທະນາ ອຸດສະຫະກັມໃຫມ່ ແລະໃນອະນາຄົດ ແລະອຸດສະຫະກັມກໍ່ສ້າງ ຮວມທັງເສດຖະກິດລະດັບບິນຕ່ຳ ໃຫ້ເປັນ "ເຄື່ອງຈັກສໍາລັບການເຕີບໂຕ." ໃໝ່.
ໃນປີ 2023, ຂນາດຂອງເສດຖະກິດ ຂອງການບິນລະດັບຕໍ່າ ຂອງຈີນເກີນກວ່າ 500 ພັນລ້ານຢວນ ແລະທາງການກໍາລັງຊຸກຍູ້ ໃຫ້ຕລາດບັນລຸລະດັບພັນລ້ານຢວນ ໃນປີ 2030, ອີງຕາມການລາຍງານ ຂອງສື່ຂອງຣັດ.
ຢ່າງໃດກໍຕາມ, ຍັງມີຄວາມທ້າທາຍ ກ່ຽວກັບການກຳໜົດມາດຕະຖານອຸດສະຫະກັມ, ຂໍ້ບັງຄັບ ທີ່ກ່ຽວຂ້ອງ ແລະໂຄງສ້າງໃນການສນັບສນູນ.
Zhou Xiaoyue, ຜູ້ອໍານວຍການຝ່າຍປະຊາສໍາພັນ ຂອງ United Aircraft Group, ອະທິບາຍ.
"ໂຄງສ້າງພື້ນຖານ ຈໍາເປັນຕ້ອງປັບປຸງຕື່ມອີກ ເພື່ອສ້າງສະພາບການສໍາລັບຍົນປະເພດຕ່າງໆ. ໃນຂນະດຽວກັນ, ນ່ານຟ້າ ຕ້ອງຖືກເປີດຕື່ມອີກ. ໃນອະນາຄົດ, ຄວນເປີດຂອບເຂດຂອງການນໍາໃຊ້ຕື່ມອີກ."
ຜູ້ເຂົ້າຊົມງານສະແດງທາງອາກາດ ເວົ້າວ່າ ເຂົາເຈົ້າຕື່ນເຕັ້ນ ກ່ຽວກັບອະນາຄົດຂອງຍົນ ທີ່ມີລະດັບບິນຕ່ຳເຫລົ່ານີ້ ຖືກນຳໃຊ້ໃນຊີວິດຈິງ.
ແຕ່ສໍາລັບບາງຄົນ, ເຊັ່ນ Yu Zepeng, ຄໍາຖາມແມ່ນກ່ຽວກັບລາຄາ.
"ແຕ່ໃນດ້ານລາຄາແພງ, ເຮົາຈະເຮັດ ໃຫ້ຄົນທັມມະດາຍອມຮັບໄດ້ແນວໃດ? ເພາະອາດຕ້ອງໃຊ້ເງິນເຖິງ 10,000 ຢວນ ສໍາລັບການຂັບເທື່ອດຽວ. ມັນຈະເປັນທີ່ຍອມຮັບສໍາລັບທຸກຄົນ, ຖ້າຫາກລາຄາຖືກກວ່າ ແລະຮັບປະກັນຄວາມປອດພັຍ ແລະລະດັບຄວາມສະດວກສະບາຍ."
ເນື້ອເລື່ອງໂດຍ Deborah Groarke, Catriona Stirrat and Associated Press ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
