ຈຸດສຳຄັນ
- ທ່ານສາມາດເປີດບັນຊີດ້ວຍຕົວເອງ ຫລືທາງອິນເຕີເນັດ.
- ບັນຊີທາງອິນເຕີເນັດ ອາດມີການບໍຣິການລູກຄ້າຫນ້ອຍກວ່າ ແຕ່ມີອັດຕາດອກເບັ້ຍສູງ.
- ຫຼີກລ່ຽງຄ່າໃຊ້ຄ່າທັມນຽມປະຈໍາເດືອນ ໂດຍການເລືອກຫາບັນຊີທີ່ເໝາະສົມ ຫຼືປະຕິບັດຕາມເງື່ອນໄຂຂອງບັນຊີ.
- ຣັຖບານ ອອສເຕຣເລັຍຮັບປະກັນບັນຊີຂອງທ່ານ ສູງເຖິງ 250,000 ໂດລາ.
ຊາວອອສເຕຣເລັຍ ມີທາງທີ່ຈະເລືອກສະຖາບັນການເງິນຫລາຍກວ່າ 100 ແຫ່ງ, ແລະເພາະມັນເປັນເງິນຂອງທ່ານ, ທ່ານຈຶ່ງຕ້ອງຕັດສິນໃຈຢ່າງຮອບຄອບ ວ່າສະຖາບັນໃດທີ່ເໝາະສໍາລັບທ່ານ.
ເມື່ອເວົ້າເຖິງບັນຊີ 'ທະນາຄານ', ແຕ່ເຮົາຫມາຍເຖິງ ທະນາຄານ, Credit Union ແລະ Building Societies. ລູກຄ້າເປັນເຈົ້າຂອງ ຂອງ Credit Unions ແລະ Building Societies.
ມີສີ່ທະນາຄານ ທີ່ຄວບຄຸມຕລາດ: ANZ, Commonwealth Bank, National Australia Bank ແລະ Westpac, ຊຶ່ງຖືກມັກເອີ້ນ ວ່າ ' the Big Four'.
ຍັງມີທາງເລືອກ ອີກຫຼວງຫລາຍເຊັ່ນກັນ, ສະນັ້ນ ໃຫ້ເລືອກເບິ່ງວ່າ ສິ່ງໃດເຫມາະສົມກັບທ່ານ.
ໃຜຕ້ອງການບັນຊີທະນາຄານ?
ຖ້າທ່ານ ໄດ້ຮັບຄ່າແຮງຈາກນາຍຈ້າງ, ຮັບສວັດດີການຈາກຣັຖບານ, ຢາກຊຳລະຄ່າໃຊ້ຈ່າຍ ທາງອິນເຕີເນັດ ຫຼືຢາກເກັບເງິນຂອງທ່ານໃຫ້ປອດພັຍ, ທ່ານຈະຕ້ອງມີບັນຊີທະນາຄານ. ທ່ານອາດຕ້ອງການຫຼາຍກວ່າຫນຶ່ງບັນຊີ.
ໂຄງການ Financial Claims ຂອງຣັຖບານ ອອສເຕຣເລັຍ ຮັບປະກັນເຈົ້າຂອງບັນຊີທຸກຄົນສູງ ເຖິງ 250,000 ໂດລາ. ຫມາຍຄວາມວ່າ ໃນກໍຣະນີທີ່ສະຖາບັນການເງິນຂອງທ່ານລົ້ມລະລາຍ, ເງິນຂອງທ່ານ ຈະໄດ້ຮັບການປົກປ້ອງ.
ທ່ານມີສິດທີ່ຈະເປີດບັນຊີຫຼືບໍ່?
Sarah Megginson ເປັນຜູ້ຊ່ຽວຊານ ເລື່ອງການເງິນສ່ວນຕົວ ກັບເວບໄຊ້ຕ໌ ປຽບທຽບການເງິນ Finder.
ທ່ານຕ້ອງເປັນພົນລະເມືອງ ຫລືຜູ້ອາສັຍໃນອອສເຕຣເລັຍ, ແຕ່ທ່ານບໍ່ຈໍາເປັນຕ້ອງເປັນຜູ້ອາສັຍຢູ່ຢ່າງຖາວອນ, ນາງອະທິບາຍ.
"ຖ້າຫາກທ່ານ ມີວີຊາຜູ້ອາສັຍຊົ່ວຄາວ (Temporary Resident Visa) ແລ້ວທ່ານກໍຍັງມີສິດ ທີ່ຈະເປີດບັນຊີ ເພາະທະນາຄານຮັບຮູ້ວ່າທ່ານອາດຕ້ອງມີບັນຊີ ເພື່ອຈະສາມາດຢູ່ທີ່ນີ້, ເພື່ອເຮັດທຸຣະກັມຕ່າງໆ ແລະເກັບກໍາລາຍໄດ້ຂອງທ່ານ. ແຕ່ທ່ານ ບໍ່ສາມາດເປີດບັນຊີທະນາຄານໄດ້ ຖ້າທ່ານບໍ່ໄດ້ມີວີຊາອາສັຍຢູ່. ສະນັ້ນ ຖ້າຫາກທ່ານພຽງແຕ່ໄປຢ້ຽມຢາມ ແລະທ່ານບໍ່ໄດ້ຮັບອະນຸຍາດໃຫ້ສຶກສາ ຫລືເຮັດວຽກຢູ່ອອສເຕຣເລັຍ, ມັນອາດເປັນເລື່ອງຫຍຸ້ງຍາກຫລາຍ ທີ່ຈະເປີດບັນຊີທະນາຄານ."
ທ່ານສາມາດເປີດບັນຊີໄດ້ທຸກວັຍ, ແຕ່ຖ້າຫາກທ່ານມີອາຍຸຕ່ຳກວ່າ 18 ປີ ທ່ານພຽງແຕ່ຕ້ອງການພໍ່ແມ່ ຫລືຜູ້ປົກຄອງ ທີ່ຈະເປັນຜູ້ເຊັນຮ່ວມ.
ປະເພດຂອງບັນຊີ
ມີບັນຊີຫຼັກສອງປະເພດ ທີ່ຕ້ອງພິຈາຣະນາ.
ທໍາອິດ ແມ່ນບັນຊີທຸຣະກັມ (Transaction Account) ທັມມະດາ. Ms Megginson ກ່າວວ່າ ມັນມີຄຳອະທິບາຍໃນຊື່ນັ້ນ.
"ນັ້ນເປັນບັນຊີ ທີ່ທ່ານຈະເຮັດທຸຣະກັມປະຈໍາວັນຂອງທ່ານ. ມັນອາດເປັນບ່ອນທີ່ທ່ານໄດ້ຮັບຄ່າຈ້າງຂອງທ່ານ. ມັນເປັນບັນຊີປະຈໍາວັນຂອງທ່ານ ທີ່ທ່ານໃຊ້ຈ່າຍ. ສະນັ້ນ, ມັນຈຶ່ງຖືກອອກແບບເພື່ອໃຫ້ມີເງິນເຂົ້າ-ອອກຜ່ານມັນ. "
ທ່ານຈະບໍ່ໄດ້ຮັບດອກເບັ້ຍ ໃນບັນຊີທຸຣະກັມ (Transaction Account), ແຕ່ທ່ານສາມາດເຊື່ອມໂຍງມັນກັບບັດເຄຣດິດຫຼືບັດເດບິດ (Debit Card) ໄດ້.
ບັນຊີທະນາຄານຂອງທ່ານສາມາດ ເຊື່ອມຕໍ່ກັບ ບັດເຄຣດິດຫຼືບັດເດບິດ (Debit Card) ໄດ້. Credit: davidf/Getty Images
"ແລະໃນເວລານີ້ ອັດຕາດອກເບັ້ຍແມ່ນສູງຫລາຍ ຈົນທ່ານສາມາດຫາຜົນຕອບແທນທີ່ດີ ຈາກບັນຊີທ້ອນເງິນ (Savings Account)"
ເປັນຄວາມຄິດທີ່ດີ ທີ່ຈະມີເງິນຈໍານວນຫນຶ່ງໃນບັນຊີທຸຣະກັມ (Transaction Account) ຂອງທ່ານ ແລະສ່ວນທີ່ເຫຼືອຢູ່ໃນບັນຊີທ້ອນເງິນ (Savings Account)" ທີ່ມີດອກເບັ້ຍສູງ.
ດອກເບັ້ຍທະນາຄານ
ບັນຊີທ້ອນເງິນ (Savings Account) ສເນີອັດຕາດອກເບັ້ຍຫຼາຍຢ່າງ ທີ່ສາມາດປ່ຽນແປງໄດ້ ເມື່ອເວລາຜ່ານໄປ.
Andrew Dadswell ຈາກ ເວບ ໄຊ້ຕ໌ Moneysmart ຂອງ Australian Securities and Investments Commission, ທີ່ຊ່ອຍ ຊາວອອສເຕຣເລັຍ ໃນການຄວບຄຸມການເງິນ ຂອງເຂົາເຈົ້າ.
ຖ້າທ່ານມີບັນຊີທ້ອນເງິນ (Savings Account) ທ່ານຈະໄດ້ຮັບດອກເບັ້ຍຈາກການເກັບທ້ອນເງິນ ໃນຕອນທໍາອິດ ແລະ ດອກເບັ້ຍທີ່ທ່ານໄດ້ຮັບແລ້ວ. ດັ່ງນັ້ນ, ທ່ານຈະໄດ້ຮັບດອກເບັ້ຍ ຈາກດອກເບັ້ຍຂອງທ່ານ.Andrew Dadswell, ASIC's Moneysmart
"ຍົກຕົວຢ່າງ, ຖ້າທ່ານມີເງິນຈໍານວນ 100 ໂດລາ, ພ້ອມດ້ວຍອັດຕາດອກເບັ້ຍສີ່ສ່ວນຮ້ອຍ, ທ່ານຈະມີເງິນຈໍານວນ 104 ໂດລາ ໃນທ້າຍປີ ແລະຈໍານວນເງິນນັ້ນ ຈະເພີ່ມຂຶ້ນແຕ່ລະປີ ເພື່ອເພີ່ມການເກັບທ້ອນຂອງທ່ານ."
ດອກເບັ້ຍໃດໆກໍຕາມ ທີ່ທ່ານໄດ້ຮັບ ມັນເປັນສ່ວນຫນຶ່ງຂອງລາຍໄດ້ທາງດ້ານພາສີ ທີ່ປະເມີນໄດ້ (Assessable Tax Income) ແລະທ່ານຕ້ອງແຈ້ງໃນໃບລາຍງານການເສັຍພາສີຂອງທ່ານ.
ໃຫ້ພິຈາຣະນາວ່າ ທະນາຄານປະເພດໃດ ທີ່ເຫມາະສົມກັບທ່ານ
ທ່ານຢາກມີທະນາຄານ ທີ່ມີຕົວຕົນຫຼືບໍ່? ແລ້ວທະນາຄານ ‘Big Four’ຫລືທະນາຄານ ທີ່ມີຊື່ສຽງ ອາດເປັນທະນາຄານ ທີ່ເຫມາະສົມສໍາລັບທ່ານ, ຊຶ່ງທ່ານສາມາດໄປຢ້ຽມຢາມ ເພື່ອເຮັດທຸຣະກັມທະນາຄານຂອງທ່ານ.
ຢ່າງໃດກໍຕາມ, ທ່ານອາດຢາກເຮັດທຸຣະກິດ ທາງອິນເຕີເນັດ.
ທະນາຄານປະເພດໃຫມ່ ໄດ້ເກີດຂຶ້ນໃນບໍ່ເທົ່າໃດປີມານີ້. ‘Neo Banks’ ຫຼືທະນາຄານ Digital ບໍ່ມີສະຖານທີ່ຈິງ ໃຫ້ທ່ານໄປຫາ. ເຂົາເຈົ້າ ຢູ່ໃນອິນເຕີເນັດ ຫຼືອອນລາຍເທົ່ານັ້ນ.
ແຕ່ລະແຫ່ງ ມີລະດັບການບໍຣິການລູກຄ້າທີ່ແຕກຕ່າງກັນ, ແຕ່ເຂົາເຈົ້າສາມາດ ສເນີອັດຕາດອກເບັ້ຍສູງ.
ບາງທີ ການໃຊ້ໂທຣະສັບມືຖື ເຮັດທຸຣະກັມ ມີຄວາມສໍາຄັນສໍາລັບທ່ານ.ທ່ານຄວນກວດເບິ່ງວ່າທະນາຄານໃດ ທີ່ອະນຸຍາດໃຫ້ທ່ານ ເພີ່ມບັດເຄຣດິດໃສ່ Smart Wallet, Google Pay ຫຼື Apple Pay. ບໍ່ແມ່ນ ທຸກທະນາຄານ ທີ່ອະນຸຍາດໃຫ້ທ່ານເຮັດໄດ້.
ການສມັກເປີດບັນຊີ
ມັນງ່າຍ ຄືກັນກັບການໄປທີ່ສາຂາ ຂອງທະນາຄານ ທີ່ທ່ານຕ້ອງການຫລືເຂົ້າໄປໃນເວັບໄຊ້ຕ໌ຂອງເຂົາເຈົ້າ ແລະເຮັດຕາມຄໍາແນະນໍາ.
ອຸບປະສັກຢ່າງຫນຶ່ງ ຄືການຢືນຢັນຕົວຕົນຂອງທ່ານ, Ms Megginson ກ່າວ.
"ມັນອາດເປັນຂັ້ນຕອນຂອງສມຽນ ຫນ້ອຍຫນຶ່ງ, ແຕ່ມັນຍັງເປັນການປ້ອງກັນ ສໍາລັບທ່ານເຊັ່ນກັນ."
ທ່ານຕ້ອງສະແດງຫຼັກຖານ ຢືນຢັນຕົວຕົນ ເຊິ່ງອາດເປັນຫນັງສືຜ່ານແດນ (Passport),ໃບລາຍເກີດ ຫຼືໃບຢັ້ງຢືນການເກີດ (Birth Certificate), ຫລືບັດ Medicare.
ຕາມປົກກະຕິແລ້ວ ທ່ານຈະໄປທີ່ທະນາຄານ ພ້ອມດ້ວຍເອກະສານຂອງທ່ານ ຍົກເວັ້ນແຕ່ມັນເປັນທະນາຄານທາງອິນເຕີເນັດ ບ່ອນທີ່ທ່ານຈະຖືກ ຂໍໃຫ້ຢືນຢັນຕົວຕົນ ແບບດີຈິຕອລ (Digital Verification of Identity)."
ເມື່ອທ່ານຢູ່ໃນລະບົບ ແລະທ່ານໄດ້ຕັ້ງຄ່າທະນາຄານອອນລາຍ ຫຼືແອັບທະນາຄານທາງໂທຣະສັບແລ້ວ ທ່ານກໍສາມາດເປີດບັນຊີເພີ່ມເຕີມໄດ້ພາຍໃນບໍ່ເທົ່າໃດນາທີ.
ການໃຊ້ໂທຣະສັບມືຖື ເຮັດທຸຣະກັມ ສໍາຄັນພຽງໃດສໍາລັບທ່ານຫຼືບໍ່? Credit: andresr/Getty Images
ທ່ານຫາກໍມາຮອດໃໝ່ ແລະຕ້ອງການບັນຊີຫຼືບໍ່?
ເອກະສານລະບຸຕົວຂອງທ່ານ ຈະແຕກຕ່າງກັນຫນ້ອຍຫນຶ່ງ.
"ຖ້າທ່ານເປັນຜູ້ມາຮອດໃຫມ່, ທ່ານມີຫນັງສືຜ່ານແດນຕ່າງປະເທດ, ທ່ານມີວັນ ທີ່ມາຮອດໃນວີຊາ. ດັ່ງນັ້ນ, ທ່ານຕ້ອງມີສໍາເນົາວີຊາຂອງທ່ານ ເພື່ອໃຫ້ແນ່ໃຈວ່າ ທ່ານຢູ່ທີ່ນີ້ຢ່າງຖືກຕ້ອງຕາມກົດຫມາຍ," Mariangela Stagnitti ກ່າວ. ນາງ ໄດ້ຊ່ອຍເຫລືອຜູ້ອົບພະຍົບ ທີ່ມີຄວາມຕ້ອງການດ້ານທະນາຄານ ເປັນເວລາຫລາຍສິບປີ.
ຜູ້ທີ່ມາໃຫມ່ ຕ້ອງຈົດທະບຽນເລກແຟ້ມພາສີ (Tax File Number) ກັບສຳນັກງານ ພາສີອາກອນ ອອສເຕຣເລັຍ (Australian Taxation Office) ແລະມອບໃຫ້ທະນາຄານພາຍໃນ 30 ມື້ ເພື່ອຫຼີກລ່ຽງການເກັບພາສີ ຂອງຜູ້ທີ່ບໍ່ແມ່ນຜູ້ອາສັຍຢູ່ຖາວອນ.
ຖ້າຫາກທ່ານມາທີ່ນີ້ ພຽງແຕ່ເພື່ອການທ່ອງທ່ຽວເທົ່ານັ້ນ ທ່ານກໍຈະບໍ່ສາມາດເປີດບັນຊີທະນາຄານໄດ້.
ທ່ານອາດຈໍາເປັນ ຕ້ອງໂອນເງິນເຂົ້າບັນຊີທະນາຄານອອສເຕຣເລັຍຂອງທ່ານ ຈາກຕ່າງປະເທດ, Ms Stagnitti ກ່າວ.
"ແລ້ວຈະມີອັດຕາແລກປ່ຽນ ຊຶ່ງເປັນການຂາດທຶນຂນາດໃຫຍ່ ສໍາລັບເຂົາເຈົ້າ."
ໃຫ້ແນ່ໃຈວ່າ ທ່ານຫາລືກ່ຽວກັບທາງເລືອກຂອງທ່ານ ກັບທະນາຄານ.
ທະນາຄານບາງບ່ອນ ອາດອະນຸຍາດໃຫ້ທ່ານ ເປີດບັນຊີກ່ອນຈະມາອອສເຕຣເລັຍ ແລະຂໍໃຫ້ທ່ານຢືນຢັນຕົວຕົນຂອງທ່ານ ທີ່ສາຂາເມື່ອທ່ານໄປເຖິງ. ຖ້າເຂົາເຈົ້າເປັນທະນາຄານອອນລາຍ, ເຂົາເຈົ້າອາດອະນຸຍາດໃຫ້ສມັກເປີດບັນຊີທາງອອນລາຍ, ສະນັ້ນ ໃຫ້ສອບຖາມກັບສະຖາບັນການເງິນທີ່ທ່ານຕ້ອງການ.
ທ່ານບໍ່ຕ້ອງຈ່າຍຄ່າທັມນຽມ.
ຖ້າຫາກທ່ານຈ່າຍຄ່າທັມນຽມ ໃນບັນຊີທຸຣະກັມ (Transaction Account), ທ່ານຄວນຊອກຫາບັນຊີທີ່ດີກວ່າ, Sarah Megginson ກ່າວ.
ບໍ່ຈໍາເປັນ ຕ້ອງຈ່າຍຄ່າທັມນຽມເຫລົ່ານັ້ນ. ທ່ານກໍາລັງບໍຣິຈາກຜົນກຳໄລ ໃຫ້ທະນາຄານ.Sarah Megginson, Personal Finance Expert, Finder
ທ່ານຍັງສາມາດຫຼີກລ່ຽງຄ່າທັມນຽມ ໃນບັນຊີທ້ອນເງິນ (Savings Account) ທີ່ມີດອກເບັ້ຍສູງໄດ້ ໂດຍການປະຕິບັດຕາມເງື່ອນໄຂບາງຢ່າງ.
"ອາດເປັນວ່າ ທ່ານຕ້ອງເພີ່ມເງິນທ້ອນຈໍານວນຫນຶ່ງ, ຫລືທ່ານບໍ່ສາມາດຖອນເງິນໄດ້. ສະນັ້ນ, ບໍ່ວ່າທ່ານຈະເລືອກບັນຊີທະນາຄານໃດກໍຕາມ, ໃຫ້ແນ່ໃຈວ່າ ເງື່ອນໄຂເຫມາະສົມກັບທ່ານ."
ສມັກເປັນສະມາຊິກ (Subscribe) ຫຼືຕິດຕາມ Podcast Australia Explained ສໍາລັບຂໍ້ມູນທີ່ມີຄຸນຄ່າ ແລະຄໍາແນະນໍາ ກ່ຽວກັບການຕັ້ງຖິ່ນຖານ ໃນຊີວິດໃຫມ່ຂອງທ່ານ ໃນອອສເຕຣເລັຍ.
ເນື້ອເລື່ອງໂດຍ Melissa Compagnoni ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌ sbs.com.au/lao
ທ່ານຍັງສາມາດ ຕິດຕາມທາງ facebook ໄດ້ທີ່ facebook.com/sbslao
