ສູນຊ່ອຍເຫລືອຜູ້ຍິງອົບພະຍົບ ຈາກຄວາມຮຸນແຮງໃນຄອບຄົວ.
ສູນກາງ ຄວາມກ້າວຫນ້າຂອງສຕຣີ (The Centre of Advancing Women) ໃນ Victoria ໃຫ້ການສນັບສນູນ ຢ່າງຮອບດ້ານ ສໍາລັບຜູ້ຍິງຈາກພື້ນຖານຜູ້ອົບພະຍົບ ທີ່ກໍາລັງປະສົບກັບຄວາມຮຸນແຮງ ໃນຄອບຄົວ.
ຜູ້ຍິງສ່ວນຫລາຍໃນສູນນັ້ນ ມາ ໃນຖານະອົບພະຍົບ ແລະປະເຊີນກັບການທ້າທາຍ ໃນການເຂົ້າເຖິງການບໍຣິການສ່ວນໃຫຍ່ ເພາະອຸປະສັກທາງວັດທະນະທັມ ແລະພາສາ, ແລະຄວາມຢ້ານ ຕໍ່ການຖືກເນຣະເທດ.
ສູນນີ້ ກໍາລັງຊ່ອຍເຫລືອຜູ້ຍິງ ໃຫ້ຮັບຜິດຊອບຊີວິດຂອງຕົນເອງ, ດັ່ງທີ່ Sofia Jayne ລາຍງານ.
ຄອບຄົວຂອງ Sanaa Hamid ມາຈາກປະເທດ Eritrea ໃນອາຟຣິກາຕາເວັນອອກ, ແຕ່ນາງເກີດໃນ Sudan.
ໃນປີ 1998 ຕອນນາງມີອາຍຸ 15 ປີ, ນາງໄດ້ມາອອສເຕຣເລັຍ ໃນຖານະຜູ້ລີ້ພັຍກັບ ເອື້ອຍຂອງນາງ.
ສອງສາມປີຕໍ່ມາ, ພໍ່ຂອງນາງໄດ້ຈັດຕຽມການແຕ່ງງານໃຫ້ນາງ.
ນາງບໍ່ເຄີຍເຫັນຮູບຂອງຊາຍຄົນນີ້ ແລະບໍ່ຮູ້ຫຍັງ ກ່ຽວກັບລາວເລີຍ, ແຕ່ຖືກບອກວ່າ ນາງຕ້ອງຢູ່ກັບລາວ.
ເຂົາເຈົ້າໄດ້ແຕ່ງງານກັນ 19 ປີ ແລະມີລູກຫົກຄົນ, ແຕ່ລາວໄດ້ກາຍເປັນ ຄົນໃຊ້ຄວາມຮຸນແຮງຕໍ່ນາງ.
ໃນທີ່ສຸດ, ດ້ວຍການສນັບສນູນ ຈາກສູນກາງຄວາມກ້າວຫນ້າຂອງສຕຣີ (The Centre of Advancing Women), Sanaa ໄດ້ຢ່າຮ້າງກັບສາມີຂອງນາງ ແລະໄດ້ພົບຄວາມປອດພັຍ.
"ຫມູ່ຂອງຂ້ອຍຄົນຫນຶ່ງ ໄດ້ບອກຂ້ອຍໃຫ້ມາທີ່ Sunshine. ພວກເຮົາມີສູນກາງທີ່ສວຍງາມ. ເຂົາເຈົ້າສາມາດຊ່ອຍເຫລືອເຈົ້າໄດ້ ແລະພວກເຮົາສາມາດດື່ມກາເຟ ແລະເຂົາເຈົ້າມີຫລັກສູດໃຫ້ຮຽນ. ຢ່ານັ່ງຢູ່ເຮືອນຄົນດຽວ. ຂ້ອຍໄດ້ເວົ້າວ່າ, ຂ້ອຍບໍ່ຢາກລົມກັບໃຜ. ຂ້ອຍບໍ່ຢາກອອກໄປໃນຊຸມຊົນ, ແຕ່ຂ້ອຍຈະພະຍາຍາມມາ. ຂ້ອຍມັກບ່ອນນັ້ນ ແລະຂ້ອຍມັກຄວາມຊ່ວຍເຫລືອ, ພວກຜູ້ຍິງແບ່ງປັນ ເລື່ອງຂອງເຂົາເຈົ້ານໍາກັນ."
ສູນກາງນັ້ນ ຖືກສ້າງຂຶ້ນໂດຍ Samia Baho, ຜູ້ຍິງຊາວ Eritrean ທີ່ມາອອສເຕຣເລັຍ ໃນຖານະຜູ້ລີ້ພັຍໃນປີ 1970.
ນາງໄດ້ເລີ່ມຕົ້ນເຮັດວຽກ ທໍາຄວາມສະອາດ ແຕ່ໄດ້ສຶກສາຕໍ່ ໃນດ້ານສັງຄົມສົງເຄາະ, ສຸຂະພາບຂອງຜູ້ຍິງ ແລະກົດຫມາຍ, ແລະນັບແຕ່ນັ້ນມາ ໄດ້ເປັນນັກຄົ້ນຄວ້າ ກ່ຽວກັບຄວາມຕ້ອງການ ຂອງຜູ້ຍິງອົບພະຍົບ.
ໃນຊ່ວງການລະບາດຂອງ Covid-19, Ms Baho ໄດ້ສັງເກດເຫັນຄວາມຮຸນແຮງໃນຄອບຄົວເພີ່ມຂຶ້ນ, ຊຶ່ງເຮັດໃຫ້ນາງ ເລີ່ມກໍ່ຕັ້ງສູນກາງຄວາມກ້າວຫນ້າຂອງຜູ້ຍິງ ໃນປີ 2020.
ນາງເວົ້າວ່າ ອົບພະຍົບມັກຈະປະເຊີນກັບ ອຸບປະສັກດ້ານພາສາ ແລະວັດທະນະທັມ ເມື່ອພະຍາຍາມຂໍຄວາມຊ່ອຍເຫລືອ ກ່ຽວກັບຄວາມຮຸນແຮງໃນຄອບຄົວ.
ອາສາສມັກ 19 ຄົນ ສ່ວນຫລາຍ ມາອອສເຕຣເລັຍ ໃນຖານະອົບພະຍົບ ຈາກພື້ນຖານທີ່ແຕກຕ່າງກັນ, ມີການສຶກສາສູງກວ່າລະດັບປະຣິນຍາຕີ ໃນດ້ານສັງຄົມສົງເຄາະ ແລະສຸຂະພາບ, ແລະເວົ້າໄດ້ 11ພາສາ.
Ms Baho ກ່າວວ່າ ປະສົບການຂອງອາສາສມັກຂອງນາງ ເປັນສິ່ງທີ່ເຮັດໃຫ້ສູນນັ້ນ ແຕກຕ່າງຈາກບ່ອນອື່ນ.
"ພວກເຮົາມີວັດທະນະທັມ, ພວກເຮົາມີຄວາມຄ້າຍຄືກັນ, ສະນັ້ນເຂົາເຈົ້າຈຶ່ງຮູ້ສຶກຜູກພັນໂດຍອັດຕະໂນມັດ, ບໍ່ພຽງແຕ່ ເຮົາຟັງແລະເຊື່ອເຂົາເຈົ້າເທົ່ານັ້ນ, ຊຶ່ງໜ່ວຍງານ ຫລືບໍຣິການສ່ວນຫລາຍເຮັດ, ແຕ່ເຮົາເຂົ້າໃຈພວກເຂົາ ເພາະວ່າພວກເຮົາ ມາຈາກພວກເຂົາ."
Ms Baho ກ່າວວ່າ ອົງການທີ່ມີເຈດຕະນາດີຫລາຍບ່ອນ ພະຍາຍາມຊ່ອຍເຫລືອຜູ້ຍິງອົບພະຍົບ ແລະສ່ວນຫລາຍແລ້ວ ຜູ້ຍິງສາມາດເພິ່ງພາ ການບໍຣິການເຫລົ່ານີ້ໄດ້.
ນາງເວົ້າວ່າ ແບບຢ່າງຂອງສູນກາງຂອງນາງ ມີຈຸດປະສົງ ທີ່ຈະໃຫ້ຜູ້ຍິງມີການຝຶກອົບຮົມທີ່ຈຳເປັນ ໃນການທຳຄວາມເຂົ້າໃຈ ລະບົບຂອງອອສເຕຣເລັຍ ແລະຊ່ອຍເຫຼືອຕົນເອງ.
"ແຕ່ພວກຜູ້ຍິງ ຕ້ອງຮູ້ວິທີເປັນເຈົ້າຂອງບັນຫາຂອງຕົນເອງ ແລະຮຽນຮູ້ ວິທີແກ້ໄຂບັນຫາເຫຼົ່ານັ້ນ... ພວກເຮົາ ກໍາລັງເວົ້າເຖິງ ຜູ້ຍິງຈາກຊຸມຊົນນ້ອຍໆ ເຊັ່ນຈາກພື້ນຖານຂອງອົບພະຍົບ ຊາວອາຟຣິກາ. ພວກເຮົາ ກໍາລັງເວົ້າເຖິງ ເຂດຕາເວັນອອກກາງ, ປະເທດ Iraq ແລະອື່ນໆ. ແລະແລ້ວ ພວກເຮົາກໍມີຊາວອິນເດັຍ, ເຂົາເຈົ້າເຂົ້າມາ ດັ່ງທີ່ທ່ານຮູ້, ພາຍໃຕ້ວີຊາຄູ່ຄອງ ຫຼືວີຊາຕ່າງໆ. ສະນັ້ນ, ມັນຈຶ່ງສໍາຄັນຫລາຍທີ່ຈະຮູ້ ກ່ຽວກັບຄວາມຫຍຸ້ງຍາກ ຈາກວັດທະນະທັມຂອງເຂົາເຈົ້າເອງ."
ສໍາລັບຜູ້ຍິງຫລາຍຄົນ ທີ່ມາທີ່ສູນກາງ, ການຂົ່ມຂູ່ ຂອງການເນຣະເທດ ຖືກໃຊ້ເປັນການຄວບຄຸມ ແບບບີບບັງຄັບ.
ໃນຕົ້ນປີນີ້,ຣັຖບານ Albanese ໄດ້ປະກາດວ່າ ຄວາມຮຸນແຮງໃນຄອບຄົວ ເປັນວິກິດແຫ່ງຊາດ ໃນອອສເຕຣເລັຍ ແລະໄດ້ແຕ່ງຕັ້ງ ຄນະຜູ້ຊ່ຽວຊານ ເພື່ອທົບທວນແຜນແຫ່ງຊາດ ເພື່ອຢຸດຕິຄວາມຮຸນແຮງຕໍ່ຜູ້ຍິງ, ຊຶ່ງໄດ້ດໍາເນີນໄປຕັ້ງແຕ່ປີ 2022.
ທັງແຜນເດີມ ແລະການທົບທວນ ເມື່ອບໍ່ດົນມານີ້ ໄດ້ກ່າວເຖິງ ການໃຊ້ກົດຫມາຍ ກວດຄົນເຂົ້າເມືອງ ໃນຄະດີຄວາມຮຸນແຮງໃນຄອບຄົວ ທີ່ກ່ຽວຂ້ອງ ກັບຜູ້ຍິງອົບພະຍົບ.
ແຕ່ສາດສະດາຈານ Marie Segrave ຈາກມະຫາວິທະຍາໄລ Monash ກ່າວວ່າ ຍັງເຮັດໄດ້ບໍ່ພຽງພໍ.
"ສິ່ງທີ່ເຮົາເຫັນ ແມ່ນການປ່ຽນແປງເລັກນ້ອຍ ທີ່ປະກາດວ່າເປັນຄວາມກ້າວຫນ້າ, ແຕ່ຂ້າພະເຈົ້າຈະໂຕ້ຖຽງວ່າ ມັນບໍ່ໄດ້ປ່ຽນຫຍັງ. ຄວາມຈິງແມ່ນວ່າ ລະບົບການຍ້າຍຖິ່ນຖານ, ຍົກຕົວຢ່າງ, ກໍາລັງຮັກສາສະພາບ ທີ່ຄວາມຮຸນແຮງໃນຄອບຄົວ ໃຫ້ເພີ່ມຂຶ້ນ. ແລະມັນເຮັດໃຫ້ຜູ້ສນັບສນູນ ຫລືຄົນອື່ນໆ ສາມາດໃຊ້ປໂຍດ ຈາກການຄວບຄຸມ ຂອງລະບົບການຍ້າຍຖິ່ນຖານ ໃນການຂູ່ເຂັນ ເຂົາເຈົ້າດ້ວຍການເນຣະເທດ ,ແຈ້ງກະຊວງກວດຄົນເຂົ້າເມືອງ, ແຍກຜູ້ຄົນອອກຈາກລູກໆຂອງເຂົາເຈົ້າ."
ໂຄສົກ ຂອງກະຊວງ ບໍຣິການສັງຄົມ (the Department of Social Services) ກ່າວວ່າ ຣັຖບານມຸ່ງໝັ້ນ ທີ່ຈະກໍາຈັດຄວາມຮຸນແຮງ ທາງເພດ ແລະໄດ້ລົງທຶນ 4.4 ພັນລ້ານໂດລາ (ໃນເດືອນກັນຍາ) ເພື່ອບັນລຸແຜນແຫ່ງຊາດ.
Ms Baho ກ່າວວ່າ ຜູ້ຍິງອົບພະຍົບ ທີ່ໃຫ້ບໍຣິການທາງວິຊາຊີບ ມັກຈະຖືກເລືອກປະຕິບັດ.
"ຂ້າພະເຈົ້າ ກໍາລັງເວົ້າເຖິງທັກສະ ແລະຄຸນສົມບັດ, ເຊັ່ນໃນອອສເຕຣເລັຍ ແລະໂລກຕາເວັນຕົກ...ສ່ວນຕົວຂ້າພະເຈົ້າ ໄດ້ຍິນຫລາຍເທື່ອວ່າໂອ້, ເຈົ້າບໍ່ໄດ້ຮັບການຝຶກອົບຮົມ, ໂອ້..ເຈົ້າບໍ່ມີທັກສະ. ບໍ່ແມ່ນເພາະເຂົາເຈົ້າຖາມວ່າ ເຮົາມີທັກສະແນວໃດ ແລະມີການຝຶກອົບຮົມແນວໃດ, ແຕ່ເພາະວ່າ ເຮົາມີໜ້າຕາທີ່ແຕກຕ່າງ. ແມ່ນແລ້ວ, ພວກເຮົາເບິ່ງຄືວ່າເປັນຄົນຜິວດໍາ. ແມ່ນແລ້ວ, ພວກເຮົາບາງຄົນມີຜ້າຄຸມຫົວ...ເມື່ອເຂົາເຈົ້າເບິ່ງເຮົາແບບນີ້, ທ່ານຄິດແນວໃດ? ທ່ານຄິດວ່າ ເຂົາເຈົ້າຈະປະຕິບັດ ກັບພວກຜູ້ຍິງແນວໃດ?"
Ms Baho ກ່າວວ່າ ຕ້ອງເຮັດຫລາຍຂຶ້ນ ໃນລະດັບນະໂຍບາຍ, ຊຶ່ງຄວນໄດ້ຮັບຂໍ້ມູນ ຈາກຜູ້ທີ່ມີປະສົບການ.
"ເຂົາເຈົ້າ ຕ້ອງມາເບິ່ງແບບຢ່າງ ທີ່ມີປະສິດທິຜົນ ແລະພັດທະນາ. ຂ້າພະເຈົ້າຄິດວ່າ ຂ້າພະເຈົ້າສາມາດເວົ້າໄດ້ ດ້ວຍຄວາມຫມັ້ນໃຈ ຖ້າຫາກມັນບໍ່ແມ່ນພຽງຢ່າງດຽວ, ເຮົາເປັນຫນຶ່ງ ໃນຈໍານວນຫນ້ອຍ ທີ່ ສເນີເສັ້ນທາງ ໃຫ້ແກ່ຜູ້ຍິງ ຈາກການເປັນເຫຍື່ອ ໄປສູ່ຄວາມສໍາເລັດໃນດ້ານການຝຶກອົບຮົມ ແລະການຈ້າງງານ. ເຂົາເຈົ້າ ຕ້ອງຫລີກເວັ້ນຈາກການເຫັນເຮົາວ່າ ເປັນໜີ້ສິນ ພວກເຮົາເປັນຊັບສິນຂອງສັງຄົມ."
ປີກາຍນີ້ ສູນກາງໄດ້ເປີດສອນຫລັກສູດສັງຄົມສົງເຄາະ.
ໃນເດືອນພະຈິກ, ເຂົາເຈົ້າໄດ້ມີພິທີຮັບປະຣິນຍາ ຢູ່ທີ່ສະພາ Victoria.
ລູກສາວຂອງ Sanaa ແມ່ນນຶ່ງ ຂອງຜູ້ໄປຮ່ວມງານ.
"ໂອ້...ພຣະເຈົ້າ, ຂ້ອຍເປັນພຽງຄົນດຽວ ທີ່ເຕັ້ນລໍາຄືກັນກັບລີງເຕັ້ນລໍາ. ຂ້ອຍດີໃຈຫລາຍ... ແລະລູກຂອງຂ້ອຍ ກໍພູມໃຈຫລາຍ. ລູກສາວຂອງຂ້ອຍໄດ້ເວົ້າວ່າ ມື້ຫນຶ່ງລາວຈະຮຽນຈົບຄືກັນກັບແມ່. ນາງຢາກເປັນນັກຈິດຕະວິທຍາ ໃນອະນາຄົດ."
Ms Baho ກ່າວວ່າ ຫລັກສູດນີ້ ຢູ່ລະຫວ່າງການທົບທວນ, ແຕ່ເມື່ອໄດ້ຮັບເງິນທຶນແລ້ວ, ເຂົາເຈົ້າຫວັງວ່າ ຈະະສເນີຫລັກສູດຕື່ມອີກ ໃນເດືອນມັງກອນ ປີ 2025.
ນາງເວົ້າວ່າ ການບໍຣິຫານ ສູນສນັບສນູນຄວາມຮຸນແຮງໃນຄອບຄົວ ເປັນວຽກໃຫຍ່, ເພາະມີຄວາມທ້າທາຍ ທັງຈາກພາຍໃນຊຸມຊົນ ແລະລະບົບ, ແຕ່ການເຫັນຜູ້ຍິງ ຮັບຜິດຊອບຊີວິດຂອງຕົນເອງ ເຮັດໃຫ້ມັນກຸ້ມຄ່າ.
"ສໍາລັບພວກເຮົາ ທີ່ຈະຍົກເອົາຜູ້ຍິງ ທີ່ຂາດຄວາມຊ່ອຍເຫຼືອ, ແລະຊີວິດຂອງເຂົາເຈົ້າຖືກທໍາລາຍ, ແລະຍົກເອົາເຂົາເຈົ້າຂຶ້ນ ແລະສ້າງເຂົາເຈົ້າ. ນັ້ນຄືດົນຕີໃນຫູຂອງເຮົາ ເມື່ອເຂົາເຈົ້າເວົ້າວ່າ ເຂົາເຈົ້າບໍ່ເປັນຈຸດສົນໃຈ."
ໃນເດືອນພະຈິກ, ສູນກາງຈະເປີດຮ້ານອາຫານ ແລະຮ້ານເສີມສວຍຂອງອາຟຣິກາ, ບ່ອນທີ່ຜູ້ຍິງ ຈະມີໂອກາດຝຶກທັກສະ ແລະມີວຽກເຮັດໃນດ້ານອື່ນໆ.
ເວບໄຊ້ຕ໌ທໍາອິດ ຂອງເຂົາເຈົ້າ ຈະເປີດໃນອີກບໍ່ເທົ່າໃດອາທິດ ບ່ອນທີ່ມີຂໍ້ມູນ ສໍາລັບຜູ້ທີ່ຕ້ອງການເປັນ ອາສາສມັກກັບເຂົາເຈົ້າ.
ສໍາລັບຜູ້ທີ່ກໍາລັງຟັງ ຜູ້ທີ່ອາດປະສົບກັບຄວາມຮຸນແຮງໃນຄອບຄົວ, Sanaa ກ່າວວ່າ ຢ່າທໍ້ຖອຍໃຈ.
"ເຈົ້າຕ້ອງເວົ້າ. ແລະຂ້າພະເຈົ້າຮູ້ວ່າມັນເປັນເລື້ອງຫນ້າຢ້ານ. ຂ້າພະເຈົ້າຮູ້ວ່າ ມັນຍາກ ເພາະທ່ານບໍ່ເຄີຍລອງ, ແຕ່ການເວົ້າຫຍັງບາງຢ່າງ ຍັງດີກວ່າທີ່ຈະມິດງຽບຕລອດຊີວິດຂອງທ່ານ. ແລະມື້ຫນຶ່ງ ທ່ານສາມາດ ມາທີ່ສູນກາງຂອງພວກເຮົານີ້ໄດ້ ແລະພວກເຮົາສາມາດແບ່ງປັນເລື່ອງລາວຂອງພວກເຮົາ ກັບພວກທ່ານ...ມັນເປັນສິ່ງດີ ທີ່ຈະແບ່ງປັນເລື່ອງລາວຂອງທ່ານ ແລະຢ່າມິດງຽບຢູ່. ຂໍໃຫ້ເວົ້າ ເພື່ອຕົວທ່ານເອງ, ບໍ່ພຽງແຕ່ເພື່ອລູກໆຂອງທ່ານເທົ່ານັ້ນ, ເພາະທ່ານມີຄວາມສໍາຄັນ."
ເນື້ອເລື່ອງໂດຍ Sofia Jayne ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
