ການຫຼອກລວງເລື່ອງຍ້າຍຖິ່ນຖານ.
ຜູ້ອົບພະຍົບຫລາຍສິບຄົນ ອ້າງວ່າໄດ້ສູນເສັຍເງິນ ຫລາຍພັນໂດລາຫລັງຈາກໄດ້ວ່າຈ້າງທີ່ປຶກສາ ເລື່ອງການຍ້າຍຖິ່ນຖານ ທີ່ຖືກກ່າວຫາວ່າ ບໍ່ໄດ້ໃຫ້ການບໍຣິການຕາມສັນຍາ.
ຜູ້ທີ່ທໍາງານຢູ່ໃນອຸດສະຫະກັມກ່າວວ່າ ມັນເປັນເລື່ອງປົກກະຕິ, ເນື່ອງຈາກຄວາມຊັບຊ້ອນ ຂອງລະບົບການຍ້າຍຖິ່ນຖານຂອງ ແລະເຕືອນຜູ້ທີ່ຊອກຫາບໍຣິການຍ້າຍຖິ່ນຖານ ໃຫ້ລະວັງຕໍ່ສັນຍານເຕືອນ.
Sophie Bennett ລາຍງານ ດ້ວຍຄວາມຮ່ວມມືກັບ Abhas Parajuli ວິທຍຸ SBS ພາກ ພາສາ ເນປາລ.
ມັນເປັນຂໍ້ສເນີ ທີ່ເບິ່ງຄືວ່າກົງໄປກົງມາ.
ການໂຄສະນາແບບນີ້ ໄດ້ຖືກແບ່ງປັນຕາມສື່ສານມວນຊົນ, ສັນຍາກັບຜູ້ອົບພະຍົບວ່າ ບໍຣິສັດທີ່ຊື່ວ່າ My Ambition Consulting ຈະສາມາດຊ່ອຍໃຫ້ພວກເຂົາ ຢູ່ໃນອອສເຕຣເລັຍໄດ້.
ສໍາລັບ Nisha, ຜູ້ທີ່ອົບພະຍົບຈາກປະເທດເນປານ ມາອອສເຕຣເລັຍເມື່ອຫົກປີກ່ອນ, ມັນເປັນຂໍ້ສເນີ ທີ່ຫນ້າສົນໃຈ.
ນາງອາຍຸ 27 ປີ ແລະທໍາງານໃນອຸດສາຫະກັມ ການດູແລຜູ້ສູງອາຍຸ ໃນຂນະທີ່ສຶກສາ ດ້ວຍວີຊານັກຮຽນ, ແຕ່ຄວາມຝັນສູງສຸດຂອງນາງ ແມ່ນການ ເປັນນາງພະຍາບານ.
ນາງໃຊ້ວີຊາດຽວກັນ ກັບສາມີຂອງນາງ, Eshwar, ແລະທັງຄູ່ໄດ້ຕັດສິນໃຈພົບກັບ Abhinaya Bhandari, ກັມມະການຜູ້ຈັດການ ຂອງ My Ambition Consulting ໃນເດືອນມັງກອນ (2024).
"ລາວໄດ້ສັນຍາ ກັບພວກເຮົາວ່າ ລາວຈະຈັດຫານາຍຈ້າງ ທີ່ຈະປະກັນພວກເຮົາ. ແລະລາວໄດ້ຂໍໃຫ້ພວກເຮົາຈ່າຍ $11,000 ສໍາລັບຂັ້ນຕອນນັ້ນ."
Nisha ເວົ້າວ່າ ໄດ້ໃຊ້ເວລາຫລາຍປີ ໃນການທ້ອນເງິນຈໍານວນນັ້ນ.
"ພວກເຮົາ ຕ້ອງຈ່າຍທຸກຢ່າງຢູ່ທີ່ນີ້ ເຊັ່ນ ຄ່າຮຽນ, ຄ່າເຊົ່າເຮືອນ, ຄ່າອາຫານ ແລະລາຍຈ່າຍອື່ນໆທຸກຢ່າງ. ແລະເຮົາເກືອບ ຈະບໍ່ສາມາດທ້ອນເງິນນັ້ນ. ແມ່ນແຕ່ ຕອນທີ່ພວກເຮົາຈ່າຍເງິນໃຫ້ລາວ ເທື່ອທໍາອິດ, ຂ້ອຍໄດ້ເວົ້າວ່າ ມັນເປັນເງິນທ້ອນຂອງພວກເຮົາ ແລະພວກເຮົາໄດ້ເຮັດວຽກຫນັກສໍາລັບສິ່ງນີ້... ແຕ່ລາວໄດ້ເວົ້າວ່າ, ບໍ່ຕ້ອງເປັນຫ່ວງ,ຂ້ອຍຄືກັນກັບອ້າຍຂອງເຈົ້າ, ເຈົ້າຕ້ອງໄວ້ວາງໃຈພວກເຮົາ."
ລາວໄດ້ສັນຍາຕໍ່ທັງຄູ່ວ່າ ອີກບໍ່ດົນ ເຂົາເຈົ້າຈະໄດ້ຮັບໂທຣະສັບ ຈາກນາຍຈ້າງ, ແຕ່ກໍບໍ່ເຄີຍມີໂທຣະສັບຫຍັງມາເລີຍ.
ຫລັງຈາກແປດອາທິດ, ທັງຄູ່ ໄດ້ປະເຊີນຫນ້າກັບ Abhinaya Bhandariແລະໄດ້ຂໍເງິນຄືນ.
ລາວໄດ້ຕົກລົງ ທີ່ຈະຈ່າຍເງິນຄືນ 10,500 ໂດລາ ແລະໄດ້ສົ່ງຮູບໜ້າຈໍໂທຣະສັບ (Screenshot) ຂອງການໂອນເງິນຜ່ານທະນາຄານ ທີ່ອ້າງວ່າເປັນການຄືນເງິນໄປໃຫ້ທັງຄູ່-ແຕ່ເງິນນັ້ນ ບໍ່ເຄີຍປາກົດ ໃນບັນຊີຂອງເຂົາເຈົ້າ.
ເມື່ອ Nisha ແລະ Eshwar ໄດ້ຖາມວ່າ ເປັນຫຍັງເຂົາເຈົ້າຈຶ່ງຍັງບໍ່ໄດ້ຮັບເງິນ ໃນຫລາຍມື້ຕໍ່ມາ, Mr Bhandari ໄດ້ບອກເຂົາເຈົ້າວ່າ ລາວໄດ້ຍົກເລີກການສົ່ງເງິນຄືນ ເນື່ອງຈາກບໍ່ເປັນໄປຕາມເງື່ອນໄຂ ຂອງຂໍ້ຕົກລົງ ທີ່ເຂົາເຈົ້າໄດ້ລົງຊື່ ແລະໄດ້ແນະນໍາ ໃຫ້ມີການປະຊຸມແທນ.
Nisha ແລະ Eshwar ຕົກລົງທີ່ຈະພົບກັນຢ່າງບໍ່ເຕັມໃຈ ແຕ່ຜູ້ອໍານວຍການຂອງ My Ambition Consulting ບໍ່ໄດ້ໄປຮ່ວມ ແລະນັບແຕ່ນັ້ນມາ ລາວໄດ້ເຊົາຕອບ ຄູ່ສາມີພັນລະຍາທັງຫມົດ.
ພວກເຂົາ ພະຍາຍາມຫາວິທີ ທີ່ຈະຕິດຕໍ່ກັບລາວ, ເຂົາເຈົ້າ ໄດ້ພົບເຫັນໃນຫນ້າ Facebook ທີ່ເຕັມໄປດ້ວຍຄວາມຄິດເຫັນ ຈາກຜູ້ຄົນທີ່ອ້າງວ່າ ຖືກສໍ້ໂກງໂດຍ My Ambition Consulting.
"ຫລັງຈາກສາມເດືອນ, ພວກເຮົາໄດ້ເຫັນຫນ້າຫນຶ່ງ, ຫນ້າຂອງຜູ້ສໍ້ໂກງ(The Scammer's Page) ແລະລາຍລະອຽດທຸກຢ່າງ ໄດ້ຖືກສະແດງໃຫ້ເຫັນ ກ່ຽວກັບບໍຣິສັດນັ້ນ ແລະພວກເຮົາ ມີຄວາມຢ້ານກົວ ແລະພວກເຮົາຫາກໍຮູ້ວ່າ ພວກເຮົາຫາກໍຕົກຢູ່ໃນບ້ວງການສໍ້ໂກງ ແລະມັນໄດ້ເກີດຂຶ້ນກັບຫລາຍຄົນ."
Abhinaya Bhandari ກັມມະການຜູ້ຈັດການຂອງບໍຣິສັດ ບໍ່ໄດ້ຕອບກັບຕໍ່ SBS.
ຄໍາຖາມທີ່ສົ່ງຜ່ານທະນາຍຄວາມຂອງລາວ ກໍຖືກປະຕິເສດຄືກັນ.
ໃນເດືອນກໍລະກົດ, ຜົວເມັຍທັງສອງຄົນ ໄດ້ຕັດສິນໃຈ ທີ່ຈະນໍາເລື່ອງນີ້ໄປຫາ New South Wales Civil and Administrative Tribunal, ຊຶ່ງຕັດສິນວ່າ Mr Bhandari ຕ້ອງຈ່າຍເງິນຈໍານວນ 11,000 ໂດລາຄືນ ຕາມຂໍ້ຕົກລົງ ບໍຣິການ ທີ່ຍັງເຮັດບໍ່ສໍາເລັດ.
ແຕ່ຄູ່ຜົວເມັຍເວົ້າວ່າ ເຂົາເຈົ້າ ຍັງບໍ່ໄດ້ຮັບເງິນຈັກໂດລາເລີຍ.
"ພວກເຮົາ ໄດ້ມາເຖິງຂັ້ນຕ້ອງກິນຢາ. ແຕ່ໂຊກດີ ທີ່ພວກເຮົາຍັງບໍ່ທັນໄດ້ເຮັດ, ແຕ່ພວກເຮົາຍັງອຸກໃຈຢູ່. ຈົນຮອດຕອນນີ້ ພວກເຮົາກໍຍັງນອນບໍ່ຫລັບ"
SBS News ຮູ້ວ່າ ມີຫລາຍກວ່າ 70 ຄົນທີ່ອ້າງວ່າ ບໍຣິສັດເປັນຫນີ້ເຂົາເຈົ້າ.
ອົງການ ຄວບຄຸມການຄຸ້ມຄອງ ຜູ້ບໍຣິໂພກ (Consumer Protection Regulator) ຂອງ New South Wales ໄດ້ຢືນຢັນວ່າ ກໍາລັງສອບສວນ ບໍຣິສັດ ທີ່ຖືກກ່າວຫາວ່າ ໄດ້ຮັບເງິນ ແລະລົ້ມເຫຼວໃນການໃຫ້ບໍຣິການ ຫລືໃນເວລາທີ່ເໝາະສົມ.
ໃນຄໍາຖແລງຕໍ່ SBS, ໂຄສົກຄົນຫນຶ່ງກ່າວວ່າ, "New South Wales Fair Trading ໄດ້ຮັບຄໍາຮ້ອງຮຽນ 28 ເລື້ອງກ່ຽວກັບ My Ambition Consulting ຕັ້ງແຕ່ເດືອນທັນວາປີ 2023."
Tala, ຊຶ່ງປ່ຽນຊື່ ເພື່ອຄວາມເປັນສ່ວນຕົວ, ໄດ້ເຮັດສັນຍາກັບ My Ambition Consulting ເພື່ອຕິດຕໍ່ນາຍຈ້າງ ທີ່ຈະປະກັນ ບໍ່ແມ່ນພຽງແຕ່ສຳລັບນາງເທົ່ານັ້ນ, ແຕ່ສຳລັບສາມີ ແລະລູກສອງຄົນຂອງນາງນໍາອີກ.
ຫົກປີກ່ອນ ນາງໄດ້ຍ້າຍຈາກ Philippines ໄປ Melbourne, ປະລູກສາວກົກຂອງນາງໄວ້ເບື້ອງຫຼັງ.
"ຂ້ອຍບໍ່ໄດ້ເຫັນລູກສາວຂອງຂ້ອຍ ຕັ້ງແຕ່ໄລຍະ Covid ເພາະພວກເຮົາບໍ່ໄດ້ຮັບອະນຸຍາດ ໃຫ້ບິນອອກນອກປະເທດ. ພວກເຮົາ ໄດ້ຮັບອະນຸຍາດ ໃຫ້ອອກນອກປະເທດ, ແຕ່ພວກເຮົາບໍ່ສາມາດກັບຄືນມາໄດ້. ສະນັ້ນ, ທາງເລືອກດຽວຂອງຂ້ອຍ ແມ່ນການລໍຖ້າ. ສະນັ້ນ, ພວກເຮົາຈຶ່ງຊອກຫາທາງເລືອກ ຜ່ານຂັ້ນຕອນການຂໍວີຊາ ເພື່ອວ່າຢ່າງນ້ອຍ ນາງຈະສາມາດມາພັກຢູ່ກັບພວກເຮົາ. ເມື່ອພວກເຮົາ ເລີ້ມຂໍວີຊາ ໃນປີ 2022, ພວກເຮົາຕື່ນເຕັ້ນຫລາຍ ແລະພວກເຮົາກໍດີໃຈຫລາຍ ເພາະໃນທີ່ສຸດ ພວກເຮົາຈະໄດ້ຢູ່ນໍາກັນ."
ແຕ່ຫລັງຈາກ ໄດ້ລໍຖ້າເກືອບຫນຶ່ງປີ, ແລະໄດ້ຈ່າຍເງິນ $32,000, Tala ພົບວ່າ ໃບສເນີຊື່ຂອງນາຍຈ້າງ ທີ່ສົ່ງໂດຍ My Ambition Consulting ຖືກປະຕິເສດ ໂດຍກົມກວດຄົນເຂົ້າເມືອງ.
ເມື່ອນາງໄດ້ສອບຖາມຕື່ມອີກ, ທາງກົມກ່າວວ່າ ໃບສມັກນັ້ນມີຂໍ້ຜິດພາດທີ່ສຳຄັນຫລາຍຢ່າງ ຮວມທັງການບໍ່ມີຂໍ້ຕົກລົງ ເລື່ອງການຈ້າງງານ.
ໃນເດືອນສິງຫາປີ 2023, Mr Bhandari ໄດ້ສົ່ງຈົດຫມາຍໄປຫາ Tala, ຊຶ່ງ SBS News ກໍໄດ້ເຫັນ, ຊຶ່ງສັນຍາວ່າ ຈະສົ່ງເງິນຄືນໃຫ້ນາງ $32,000 ພາຍໃນ 30 ມື້-ແຕ່ Tala ຍັງບໍ່ໄດ້ຮັບເງິນຄືນ.
ຮວມທັງການຈ່າຍເງິນ ໃຫ້ກົມກວດຄົນເຂົ້າເມືອງ ແລະທະນາຍຄວາມ,ຜູ້ທີ່ Tala ໄດ້ຈ້າງເພື່ອຊ່ອຍທວງເງິນຄືນ ຈາກ My Ambition Consulting, ນາງໄດ້ໃຊ້ຈ່າຍເງິນ ຫລາຍກວ່າ 50,000 ໂດລາ.
Tala ເວົ້າວ່າ ສິ່ງທີ່ຮ້າຍແຮງທີ່ສຸດ ແມ່ນຜົນກະທົບ ຕໍ່ຄວາມສໍາພັນຂອງນາງກັບສາມີ ແລະຄອບຄົວຂອງນາງ.
ນາງເວົ້າວ່າ ນາງບໍ່ສາມາດບອກຄວາມຈິງ ກັບແມ່ ຫລືລູກສາວຂອງນາງ.
"ນາງບໍ່ຮູ້ວ່າມີຫຍັງເກີດຂຶ້ນ. ນາງໄດ້ຖາມຂ້ອຍເລື້ອຍໆວ່າ ເມື່ອໃດນາງຈະໄດ້ມາທີ່ນີ້? ມັນເກີດຫຍັງຂຶ້ນ? ເຈົ້າຍັງຈະຮັບຂ້ອຍຢູ່ບໍ?"
My Ambition Consulting ອ້າງວ່າ ມີຕົວແທນການຍ້າຍຖິ່ນຖານ ທີ່ຈົດທະບຽນ ເຮັດວຽກຢູ່ກັບບໍຣິສັດ ເພື່ອໃຫ້ຄໍາແນະນໍາແກ່ລູກຄ້າ.
Simon Sen Tao ກໍເປັນຄົນຫນຶ່ງໃນນັ້ນ.
"ໃນຕົ້ນປີ 2023, Mr Bhandari ໄດ້ມາຫາຂ້າພະເຈົ້າ ເພື່ອເບິ່ງວ່າຂ້າພະເຈົ້າ ຈະສາມາດເປັນຕົວແທນ ໃຫ້ແກ່ການຍ້າຍຖິ່ນຖານ ຂອງບໍຣິສັດຂອງລາວໄດ້ຫຼືບໍ່."
ລາວໄດ້ຕົກລົງ, ໂດຍກ່າວວ່າ ລາວປະສົບຄວາມສຳເລັດ ໃນການເປັນຫຸ້ນສ່ວນ ກັບບໍຣິສັດອື່ນໃນອະດີດ.
Mr Tao ກ່າວວ່າ ຕອນລາວເລີ່ມເຮັດວຽກ, ບໍຣິສັດ ກໍາລັງມີປັນຫາກັບການຍື່ນຂໍວີຊາ ຈຳນວນຫລາຍ ທີ່ຖືກປະຕິເສດ, ແລະລາວໄດ້ຖືກຂໍໃຫ້ຊ່ອຍຝຶກອົບຮົມ ຕົວແທນຄົນອື່ນໆ ເພື່ອໃຫ້ມີຜົນສຳເລັດຫຼາຍຂຶ້ນ.
ລາວເວົ້າວ່າ ລາວຕົກໃຈ ທີ່ໄດ້ຮັບໂທຣະສັບ ໃນທ້າຍປີ 2023 ຈາກທະນາຍຄວາມ ທີ່ເປັນຕົວແທນໃຫ້ແກ່ລູກຄ້າຄົນຫນຶ່ງ ທີ່ກໍາລັງດໍາເນີນການທາງກົດຫມາຍ ກັບບໍຣິສັດ.
ຕໍ່ມາ ລາວໄດ້ພົບວ່າ ຮູບຂອງລາວຖືກແບ່ງປັນໃນກຸ່ມ Facebook ທີ່ລະບຸວ່າ ລາວເປັນຜູ້ສໍ້ໂກງ.
"ມັນເຮັດໃຫ້ເຈັບຫົວ ແລະເຄັ່ງຕຶງຫຼາຍເກີນໄປ. ຂ້າພະເຈົ້າ ຕ້ອງອະທິບາຍໃຫ້ເພື່ອນ ຮ່ວມທຸຣະກິດຂອງຂ້າພະເຈົ້າ, ລູກຄ້າໃນປະຈຸບັນຂອງຂ້າພະເຈົ້າ, ແລະແມ່ນແຕ່ ສະມາຊິກໃນຄອບຄົວຂອງຂ້າພະເຈົ້າ ຜູ້ທີ່ໄດ້ເຫັນຮູບຂອງຂ້າພະເຈົ້າ ທາງອິນເຕີເນັດ. ຂ້າພະເຈົ້າ ຕ້ອງອະທິບາຍໃຫ້ເຂົາເຈົ້າຮູ້ວ່າ ເກີດຫຍັງຂຶ້ນ."
Mr Tao ກ່າວວ່າ ລາວໄດ້ຍຸດຕິ ຄວາມສໍາພັນຂອງລາວ ກັບ My Ambition Consulting ທັນທີ ແລະໄດ້ລາຍງານບໍຣິສັດ ຕໍ່ເຈົ້າຫນ້າທີ່ the Migration Agents Registration Authority (MARA).
"ມັນໄດ້ປ່ຽນຄວາມຄິດ ທາງອາຊີບຂອງຂ້າພະເຈົ້າ ແລະວິທີ ທີ່ຂ້າພະເຈົ້າ ປະກອບອາຊີບຂອງຂ້າພະເຈົ້າ. ຂ້າພະເຈົ້າ ໄດ້ລະມັດລະວັງຫລາຍທີ່ສຸດ ວ່າຊື່ ແລະເລກ MARA ຂອງຂ້າພະເຈົ້າ ອາດຖືກໃຊ້ ໃນທາງທີ່ຜິດອີກ. ດັ່ງນັ້ນ, ຂ້າພະເຈົ້າ ຈຶ່ງບໍ່ເຕັມໃຈ ທີ່ຈະເຂົ້າຮ່ວມກັບຫນ່ວຍງານການຍ້າຍຖິ່ນຖານ (Migration Agencies) ອື່ນໆ."
Christopher Levingston ທະນາຍຄວາມດ້ານການຍ້າຍຖິ່ນຖານ ໄດ້ທໍາງານ ໃນດ້ານນີ້ ເປັນເວລາ 35 ປີແລະລາວເວົ້າວ່າ ປະສົບການຂອງ Tala, Nisha ແລະ Eshwar ແມ່ນເລື່ອງປົກກະຕິ.
ລາວເວົ້າວ່າ ຄວາມຊັບຊ້ອນ ຂອງລະບົບກົດຫມາຍ ຂອງອອສເຕຣເລັຍ ໄດ້ຖືກສວຍໂອກາດ ເປັນເວລາດົນນານ ໂດຍຜູ້ຄົນເຊັ່ນ “ຜູ້ແກ້ໄຂປັນຫາຊຸມຊົນ” (Community Fixers) ທີ່ແນເປົ້າຫມາຍໃສ່ຜູ້ອົບພະຍົບ.
"ມັນເປັນການສໍ້ໂກງ. ນັ້ນຄືຄຳສລຸບ. ມັນເປັນພຽງການສໍ້ໂກງ ຂນານແທ້ ແລະງ່າຍໆ. ແຕ່ຣັຖບານ ບໍ່ໄດ້ໃຊ້ເວລາຫລາຍປານໃດ ໃນການພະຍາຍາມຊອກຫາ ຜູ້ກະທໍາສິ່ງທີ່ບໍ່ດີເຫລົ່ານັ້ນ."
ໃນຄໍາຖແລງຕໍ່ SBS, ໂຄສົກຂອງ Department of Home Affairs ກ່າວວ່າ, "Office of the Migration Agents Registration Authority ຕັ້ງໃຈທີ່ຈະປົກປ້ອງ ຄວາມຊື່ສັດ ຂອງວິຊາຊີບ ທີ່ປຶກສາດ້ານການຍ້າຍຖິ່ນຖານ ໂດຍດຳເນີນການ ກັບຕົວແທນການຍ້າຍຖິ່ນຖານ ທີ່ຈົດທະບຽນຊຶ່ງການກະທໍາຂອງເຂົາເຈົ້າ ທໍາລາຍມາດຕະຖານ ທີ່ຄາດຫວັງຈາກອຸດສະຫະກັມ."
ຄໍາແນະນໍາທາງການ ແມ່ນໃຫ້ກວດເບິ່ງສເມີວ່າ ຜູ້ທີ່ໃຫ້ຄໍາແນະນໍາກ່ຽວກັບການຍ້າຍຖິ່ນຖານ ເປັນຕົວແທນທີ່ຈົດທະບຽນຫຼືບໍ່.
ຢ່າງໃດກໍຕາມ, ແມ່ນແຕ່ສິ່ງນັ້ນ ກໍບໍ່ໄດ້ຮັບປະກັນວ່າ ຈະໄວ້ວາງໃຈໄດ້ແລະ Helen Duncan, CEO ຂອງສະຖາບັນການຍ້າຍຖິ່ນຖານ ຂອງອອສເຕຣເລັຍ (the Migration Institute of Australia), ກ່າວວ່າ ການສອບສວນ ຂອງ MARA ອາດຊັກຊ້າ.
ນາງເວົ້າວ່າ ສັນຍານເຕືອນທີ່ຕ້ອງລະວັງ ໄດ້ແກ່ຄ່າບໍຣິການຫລາຍເກີນໄປ ແລະສັນຍາວ່າ ຈະຊ່ອຍເຫລືອສິ່ງຕ່າງໆ ນອກເຫນືອໄປຈາກການຍ້າຍຖິ່ນຖານ.
"ທັນທີ ທີ່ບາງຄົນເວົ້າວ່າ ຖ້າເຈົ້າໃຫ້ເງິນຈໍານວນຫນຶ່ງແກ່ຂ້ອຍ, ແລ້ວຂ້ອຍຈະຊອກວຽກໃຫ້ເຈົ້າ, ແລ້ວລະຄັງສັນຍານ ຄວນຈະເລີ່ມດັງຂຶ້ນແທ້ໆ ເພາະນັ້ນບໍ່ແມ່ນວຽກ ຂອງຕົວແທນການຍ້າຍຖິ່ນຖານ ໃນການເຮັດສິ່ງນັ້ນ. ແລະມັນບໍ່ໄດ້ເປັນ ສິ່ງທີ່ຄວນເກີດຂຶ້ນ ໃນການຄັດເລືອກເອົາຄົນເຮັດວຽກ."
ມັນເປັນບົດຮຽນທີ່ Nisha ແລະ Eshwar ກ່າວວ່າ ເຂົາເຈົ້າໄດ້ຮຽນຮູ້ຢ່າງຍາກລໍາບາກ.
ບັດນີ້ ເຂົາເຈົ້າໄດ້ເຕືອນຄົນອື່ນ ໃຫ້ຫລີກເວັ້ນຈາກການຮີບຕັດສິນໃຈໃດໆ ທີ່ກ່ຽວຂ້ອງກັບຕົວແທນການຍ້າຍຖິ່ນຖານ.
"ໃຜກໍຕາມທີ່ເວົ້າວ່າ ເຂົາເຈົ້າຈະຊອກຫາຜູ້ຮັບປະກັນໃຫ້ທ່ານ,ຂ້າພະເຈົ້າຈະເວົ້າວ່າ ເຂົາແມ່ນຜູ້ສໍ້ໂກງ. ຖ້າຫາກທ່ານ ສາມາດຊອກຫາຜູ້ຮັບປະກັນໄດ້ດ້ວຍຕົວເອງ, ນັ້ນກໍເປັນສິ່ງດີ. ຖ້າຫາກຜູ້ປຶກສາ ຫລືຕົວແທນຂອງ MARA ບາງຄົນເວົ້າວ່າ ເຂົາເຈົ້າຈະຊອກຫາ ຜູ້ຮັບປະກັນໃຫ້ທ່ານ, ເຂົາເຈົ້າພຽງແຕ່ພະຍາຍາມ ຫຼອກເອົາເງິນຂອງທ່ານ."
ເນື້ອເລື່ອງໂດຍ Sophie Bennett ຂ່າວ SBS News ແລະ Abhas Parajuli ວິທຍຸ SBS ພາກ ພາສາ ເນປາລ.
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌ sbs.com.au/lao
ທ່ານຍັງສາມາດ ຕິດຕາມທາງ facebook ໄດ້ທີ່ facebook.com/sbslao
