Ntsiab lus tseem ceeb:
- Neeg txum tim tej txuj cia huab cua thiab tej caij yeej raug piav qhia ntawm ib phaum neeg rau lwm phaum neeg, qhia raws tej dab neeg ua duab yeeb yaj kiab thiab tej kab lis kev cai ib txwm coj.
- Thiab neeg txum tim yeej muaj tej caij sib txawv thoob Australia tsuas nyob ntawm seb lawv nyob rau thaj chaw twg xwb.
- Neeg txum tim tej txuj huab cua ces yeej cuam tshuam txog tej tsiaj txhu tej cwj pwm thiab tej kev loj hlob ntawm tej nroj tsuag xyoob ntoo uas cuam tshuam nrog cov kev pauv hloov tej huab cua thiab tej caij.
Cov kev totaub txog tej huab cua thiab tej caij yog ib seem tob heev ntawm neeg txum tim Aboriginal and Torres Strait Islander tej txuj kab lis kev cai uas tau tsim los tau ntau caum txheeb xyoo lawm.
Tej huab cua thiaj muaj feem cuam tshuam nrog tej nroj tsuag xyoob ntoo thiab tej tsiaj txhu lub neej, thiab cov kev nkag siab txog cov kev sib cuam tshuam no yog tej tseem ceeb yuav pab kom tej neeg ciaj dim (ntxeem dhau) tej xwm txheej phom sij — hais tsi ntsees rau ntawm teb chaws Australia no uas muaj tej caij huab cua muaj ceem heev thiab yeej ib txwm muaj tej luaj pua uas phom sij heev.
Tag rho txhua tsav yam yeej sib cuam tshuam, thiab yog ib co kev kawm txog tej txuj ci, qhov tseeb thiab kev tshwm sim ntawm neeg txum tim tej kab lis kev cai, thiab nyob rau lub caij ntau txheeb xyoo, ces Australia tej neeg txum tim Aboriginal and Torres Strait Islander yeej tau tshuaj ntsuam lawv tej ib puag ncig thiab tau kawm txog cov kev sib cuag ntawm tej huab cua, tej caij, thiab cov kev pauv hloov ib puag ncig uas cuam tshuam txog tej tsiaj txhu thiab tej nroj tsuag.
Tej zaum ib hom noog twg cov kev quaj kuj yuav yog tej yam qhia tas ntuj yuav los nag, thiab ib yam ntoo twg tawg paj kuj yog tej yam qhia tias tej zaum kuj yuav hloov caij, thiab txog caij lawm uas yuav tau tsiv mus rau lwm thaj chaw txawv.
Aunty Joanne Selfe ces yog ib tug poj niam neeg txum tim caj ceg neeg ntawm sab hnub tuaj ntawm Australia uas thaum tau loj hlob lawm yeej tau kawm txog tej huab cua, tej caij thiab tej ib puag ncig uas yog ib co txuj uas nws tsev neeg thiab nws tej zejzog tau qhia rau nws.
Aunty Joanne tshab txhais tias ''Cov kev nkag siab ntxaws txog tej huab cua, tej caij thiab tej ib puag ncig yog tej yam tseem ceeb yuav pab kom tag nrho tej neeg ciaj dim. Peb tej neeg txum tim muaj cov kev sib cuag tob heev nrog tej txuj ci no thiab tau pab kom peb huaj vam rau tej ib puag ncig uas phom sij heev no.''
Moodjar, ces yog neeg txum tim tsob ntoo Christmas Credit: TerriAnneAllen/Pixabay
Aunty Joanne hais tias “Yeej muaj ntau yam xwm txheej huab cua uas tau ua rau muaj teeb teeb meem rau peb nrim av uas phom sij heev no, tsis hais nag xob nag cua los sis yog ntuj qhuav li, neeg txum tim yeej tau npaj txhij tos, thiab lawv yeej muaj tej txuj ci pab kom lawv ntxeem dhau tej khaub zeeg cua, los yog pab kom totaub txog cov kev nyab xeeb thaum muaj nag xob nag cua, thiab npaj tos lub caij ntuj qhuav nkig,”
“Thaum uas peb txheeb tias seb tej huab cua muaj peev xwm tsim tau teeb meem li cas rau txhua tus neeg, ces peb yeej ib txwm xav tswj - peb tej txuj ci yog tej pab kom peb tau txais kev nyab xeeb. Diarra-murrahmah-coing ces yog peb cov lus neeg txum tim uas txhais tias yog thaum hnub poob qho liab ploog ces tag kis huab cua yuav zoo.”
Hos nyob sab hnub poob ntawm teb chaws Australia ces Jordan Ah Chee uas yog ib tug neeg paub txog neeg txum tim tej txuj ci ntawm tsev kawm qib siab Murdoch University uas tau yug ntawm cheeb tsam Kimberley ces yeej muaj kev sib cuag nrog ntau yam neeg txum tim li Bindjareb, Wardandi, Palyku, Nyikina, thiab Yawuru.
“Yeej tseem muaj tej tswv yim uas pheej xav tias peb tej neeg tsuas yog ib co uas tsiv ntawm ib qho chaw rau lwm qhov chaw xwb, uas pheej tseem xav tias ntshe peb tsis muaj ib lub teb chaws nyob los yog tsis muaj ib thaj chaw nyob ruaj.''
Peb yeej ib txwm tsiv ntawm ib thaj chaw mus rau lwm qhov chaw raws caij kom thiaj ceev txuag tau tej ib puag ncig thiab siv tau ntev txuas ntxiv rau yav tom ntej.Jordan Ah Chee
“Neeg txum tim Aboriginal and Torres Strait Islander ces yeej muaj cov kev sib cuag ntxaws heev tau ntau txheeb xyoo nrog tej liaj ia teb chaws, tej dej thiab lub ntuj - thiab cov kev sib cuag no tau tsim tau ib co txuj ci ntxaws heev uas pab kom peb huaj vam ntawm lub teb chaws no - thiab tej no yog tej qhia tias txhua tsav yam yeej sib cuam tshuam.”
Neeg txum tim yeej muaj kev sib cuag zoo heev nrog lub teb chaws, lub ntuj thiab tej dej ces thiaj ua rau lawv nkag siab zoo heev tias yuav muaj kev hloov tej caij li cas rau tej luaj pua.
Ah Chee hais tias ''Yeej txawv tej kev xav ntawm tej neeg ntawm tej teb chaws vam meej uas muaj cov kev paub txog ib co caij twg tsi ntsees rau ib co hnub twg raws daim teej cim zwj (Calendar), teb sis peb tej txuj ci uas yuav qhia txog tej caij uas yuav hloov, los yog yuav muaj tej cai li cas thawm xyoo, ces yog muaj raws li cov kev pauv hloov ntawm tej luaj pua, cov kev pauv hloov tej tsiaj txhu tej cwj pwm thiab cov kev pauv hloov ntawm tej ib puag ncig.''
“Tej ntawd yog tej yuav qhia rau peb paub meej rau ib co caij twg ntawm lub xyoo, tias muaj zaub mov dab tsi, seb peb puas yuav tau mus rau ntawm tej chaw ze ntug hiav txwv los sis yuav tau mus rau nruab plawv teb, yog li cov kev nkag siab txog tej huab cua thiab tej caij thiaj yog tej yam tseem ceeb heev ntawm peb txoj kev ua lub neej.”
Cov kev hlawv tej hav nyom tswj kom tsis txhob muaj hav zoov kub hnyiab loj. Credit: Christian Bass/Unsplash
Aunty Joanne tshab txhais tias “Yog thaum peb xav txog tej no lawm ces thawm yam peb nco tau ces yeej yog cov kev hlawv hav nyom. Cov kev ua li no yuav pab kom muaj tej nroj uas yuav kub hnyiab tsawg hauv pem teb, yog tias xob tua los yog ho muaj lwm yam xwm txheej tshwm sim, ces yuav tsis ua rau kub hnyiab loj,”
“Ua ke no los tej no kuj pab kom peb muaj tej nyom tuaj tshiab rau tej tsiaj pub mis rau me nyuam noj tau noj uas yog tej yam lawv nyiam heev thiab.”
Txawm li cas los kuj muaj tej neeg txum tim nyias yeej muaj nyias cov caij sib txawv tsuas nyob rau ntawm seb lawv nyob rau thaj chaw twg thoob plaws rau ntawm teb chaws Australia xwb.
Ah Chee hais tias “Birak uas yog lub caij tshiab ces yeej cuam tshuam txog cov kev kub ntawm lub hnub thiab hluav taws, yog thaum kub sov zog tuaj lawm ces yeej ib txwm paub tias yog lub caij hluas, thiab yog lub caij ua kev zoo siab, thiab lub caij no ces yog lub caij uas tej tsiaj muaj pob txha nrob qaum, ntshav txias thiab yuav tau ziab tshav kom sov cev li tej nab tej nab qa yuav phlis tawv, tej me nyuam noog yuav pib ya tawm ntawm tej zes mus, tej me nyuam tsiaj tseem yau yuav ras los ua tej tsiaj muaj hnoob nyoog thiab yuav pib ua lawv lub neej hauv ntiaj teb,”
“Ib cov kev pauv hloov tseem ceeb ntawm tej luaj pua no ces yog tej paj tso kab ntxwv daj uas zoo nkauj heev hu ua moodjar, los yog ntoo Christmas, uas yog ib tsob ntoo ntsuj tseem ceeb heev rau cov neeg txum tim Noongar. Thiab lub caij no los tsuas nyob ntawm seb tej huab cua zoo li cas, ua cov txiav txim tias seb yuav hlawv tej nyom thaum twg.”
Tej khoom ntau yam saum nruab ntug li lub hli, thiab cov nws cov kev hloov, ces yeej raug neeg txum tim siv thiab lees paub tias yog tej qhia tias yuav muaj huab cua pauv hloov li cas.
Neeg txum tim tej txuj ci yeej teev tias thaum muaj ib lub voj voog ncig lub hnub thiab lub hli ces yog yuav pib los nag.Aunty Joanne Selfe
“Thiab yog peb xav txog tej no lawm - ces yeej muaj ib co ice crystals nyob rau txheej atmosphere saum toj, thiab yeej muaj lub hli tej duab ntxoo hla dhau los yog ntsa thim tawm mtawm cov ice crystals ces thiaj ua rau muaj voj vooj ncig lub hnub los yog ncig lub hli. Tam sim no kiag los tej txuj tshawb fawb yeej lees paub tias lub voj ncig lub hli yeej ib txwm muaj cov low-pressure, ces tom qab ntawd yuav los nag thiab ua rau tej huab cua txias zog los yog yuav muaj tej xwm txheej no rau hnub tom ntej los yog ob hnub ntxiv ntawd.”
Thiab cov kev pauv hloov ntxaws heev rau lub hli los kuj yuav muaj ib lub ntsiab lus tseem ceeb qhia txog ib yam dab tsi thiab.
Aunty Joanne hais tias “Tej thaum ces lub hli yeej tsis nyob nruab nrab hauv lub voj, thiab tej zaum kuj txav ze zog rau ib sab twg, ces tej zaum kuj qhia tias yuav muaj cua los thiab,”
Lub voj roos lub hli Credit: Geoffrey Wyatt
Aunty Joanne thiaj qhias tias “Peb yeej muaj ib co duab uas muab txaug thiab kos rau tej pob zeb ntawm Sydney, thiab yeej muaj tsawg tsawg xwb, tab sis ib qho uas sawv daws paub zoo yog qhov hu ua lub hli pob zeb (Moon Rock), uas yeej txaug thiab kos lub hli rau. Ces tej duab kos no thiaj tau qhia txog yim (8) theem kev hloov ntawm lub hli, thiab xub pib ntawm tus tswv tsim hu ua Biaime's boomerang,”
“Ces tam sim no thiaj tseem ceeb vim Gaddy ces yog tus tej ntses loj li sawv daws paub, thiab peb tej poj niam ces yeej ib txwm mus taws tsau mus rau ntawm Warrang (Sydney Harbor) mus nuv ntses (nowies) thiab ib txwm muaj me nyuam yaus nrog lawv mus, yog li ntawd thaum peb siv lub hli pab peb txhom ntses ces peb paub tias thaum lub hli pib xiab tshiab thiab thaum lub hli yuav nqig yog lub caij zoo nuv ntses tshaj plaws, thiab tej laj thawj tos ho zoo li ntawd los vim thaum pib lub hli tshiab thiab lub hli nra lawm ces pheej ua rau muaj tej khoom ntau heev hauv tej nthwv dej - thiab yuav ua rau tej nthwv dej muaj zog dua, thiab yuav ntsawj tej txo av mus rau hauv qab thu hiav txwv thiab yuav tsis tshua pom ntses yooj yim.”
Thiab Australia tej huab cua los yeej sib txawv heev, yeej muaj tej huab cua caij ntuj sov, muaj tej tiaj suab puam uas kub heev, thiab yeej muaj tej tiaj ntoo thuv uas txias heev — ib co chaw twg nyias yeej muaj nyias tej huab cua sib txawv ntawm tej chaw ntawd.
Ces yog tham txog tej no rau neeg txum tim tej zej zog lawm, ces thiaj tsis xam tej cai raws cov hnub tab sis yuav xam seb tej nroj tsuag xyoob ntoo thiab tej tsiaj txhu ho ua dab tsi ntawm tej ib puag ncig uas lawv nyob ntawd. Tej kev xav no thiaj muaj peev xwm pab kom muaj kev nkag siab tob dua txog Australia cov huab cua uas sawv daws swm raws tus qauv plaub (4) lub caij ntawd.
Thiaj yog tej yam muaj fwj chim heev qhia rau peb txog cov kev sib cuag tob heev ntawm neeg txum tim tej kab lis kev cai nrog lawv lub teb chaws thiab tsim nyog peb yuav tau kawm kom lees paub txog tej txiaj ntsim ntawm lawv tej txuj ci thiab lawv tej kab lis kev cai ib txwm coj.
Yog koj xav tau xov xwm kom ntxaws ntxiv txog neeg txum tim tej txuj huab cua, ces txheeb tau ntxiv ntawm:
Subscribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia kom koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab mloog tau los yog caum
