Ntsiab lus tseem ceeb:
- Yog tias koj tau ib daim ntawv yuav tshuaj ntawm ib tug kws kho mob lawm, ces koj yuav tsum tau coj daim ntawv yuav tshuaj mus yuav ntawm ib lub khw muag tshuaj mas thiaj yuav tau tej tshuaj ntawd los siv.
- Tej kws tshuaj los kuj muaj ib cov kev kho mob pab thiab li muaj cov kev txheeb ntshav siab, thiab tej thaum ces kuj hno tshuaj vaccines.
- Australia cov kev pab yuav tshuaj hu ua Pharmaceutical Benefit Scheme (PBS) ces yog ib co kev pab kom tej neeg yuav tau ntau yam tshuaj pheej yig siv, tab sis tus neeg mob muaj cai siv cov kev pab cuam no yuav tsum yog ib tug neeg Australia uas nyob ruaj los yog tus neeg uas muaj Medicare Card siv tam sim no.
Yog tias koj muaj mob thiab koj tus kws kho mob sau ntawv yuav tshuaj rau koj, ces kauj ruam txuas ntxiv ces yog mus ntsib lub khw muag tshuaj ntawm koj zos mas thiaj yuav tau tshuaj noj.
Tej kws tshuaj ntawm koj zos thiaj yob cov muaj tshuaj rau koj thiab kuj yog cov neeg uas muaj cov kev taw qhia pab rau cov kev kho mob los yog cov kev taw qhia txog lwm yam khoom siv kho mob thiab ntau cov kev pab cuam. Thiaj yog tej yam tseem ceeb uas yuav nkag siab txog tias seb Australia cov chaw muag tshuaj ho ua hauj lwm li cas, kom koj thiaj paub tias thaum mus siv lawm yuav ua li cas.
Lena Mansour ces yog ib tug kws tshuaj ntawm Melbourne uas yeej tau ua hauj lwm ntawm teb chaws Egypt thiab ntawm Australia no. Nws los yeej tau pom txog qhov sib txawv ntawm tej kev ua hauj lwm sib txawv ntawm tej chaw muag tshuaj ntawm teb chaws no piv rau txawv teb chaws tias zoo li cas.
Ms Mansour hais tias ''Tej neeg coj ntseeg ntau yam kab lis kev cai thiab hais ntau yam lus sib txawv yeej muaj cov kev nkag siab sib txawv tias tej chaw muag tshuaj ua hauj lwm li cas. Yeej muaj ib txhia tsis paub txog tej yam - piv txwv li daim ntawv yuav tshuaj muaj hnub tag sij hawm siv, uas tej zaum txij li hnub kws kho mob tau sau daim ntawv yuav tshuaj ces tsuas siv tau ntev txog li 6 hli los yog 1 lub xyoos xwb, thiaj tsuas nyob ntawm seb yog hom tshuaj twg xwb.''
Hos lwm yam xwm txheej uas pom muaj tas mus li ces tej neeg mob pheej nug txog tej tshuaj uas tau muaj ib tug kws kho mob txawv teb chaws tau sau rau lawv tau xub siv dhau los.
Lena tshab txhais tias “Yog poob rau tej xwm txheej li no ces kuv yuav tshab txhais rau lawv tias kws tshuaj muab tsis tau cov tshuaj no rau lawv siv, tsuas yog tau ib daim ntawv siv tshuaj ntawm ib tug kws kho mob ntawm Australia no xwb mas thiaj yuav tau tshuaj siv xwb.''
Cov tshuaj uas kws kho mob sau rau neeg mob yuav noj kho mob
Ntawm teb chaws Australia no ces tsuas yog tej kws kho mob uas teev zwm raug cai xwb mas thiaj li cai sau tshuaj rau tej neeg mob xwb, thiab thiaj muaj peev xwm coj mus yuav tau ntawm tej chaw muag tshuaj coj los siv xwb.
Tom Andrew uas yog tus tswv lub khw muag tshuaj Captain Stirling Pharmacy ntawm Perth hais tias ''Muaj ib txhia ntawv yuav tshuaj ces ib tug kws kho mob yuav xuas tes sau xwb, muaj ib txhia ces yuav siv computer ntaus thiab mam luam tawm, thiab ib txhia ces yog cov e-script - uas yog ib tug code uas tus kws kho mob muaj peev xwm xa rau ib lub xov tooj tes los yog email rau ib tug twg.''
Muaj peev xwm siv tau cov E-scripts ntawm xov tooj tes thiab. Credit: Yong Hwee Goh
Ces tej kws tshuaj thiaj yuav tau npaj ob yam tshuaj li cov brand-name uas sawv daws paub zoo thiab ib txwm siv los yog cov pheej yig dua hu ua generic brand tab sis yeej yog tib co tshuaj xwb thiab yeej raug coj mus sim thiab tau txais kev tso cai ntawm tsoom fwv tej neeg uas tso cai siv tej tshuaj no lawm.
Mr Andrew hais tias “Hauv lub khw muag tshuaj ces yeej muaj ib qho chaw uas tej kws tshuaj faib tshuaj. Thiab yeej ib qho chaw uas muaj phiaj lo qhia rau tias yog qhov chaw faib tshuaj.''
“Ces tus kws tshuaj los yog tus neeg ua hauj lwm hauv lub khw muag tshuaj thiaj yuav tau txheeb qee yam xov xwm ntawm tus neeg mob ua ntej yuav muab tshuaj. Qee yam xov xwm ces yog tej xov xwm yooj yooj yim li lawv (tej neeg mob) tej chaw nyob, hnoob nyoog, Medicare. Hos lwm yam ces kuj teev seb tus neeg ntawd muaj ceeb thawj li cas - hais tsi ntsees yog tus neeg ntawd yog me nyuam yaus, los seb puas yog ib co tshuaj tshiab, thiab seb tus neeg mob ntawd nyiam siv cov tshuaj brand twg.''
Ces tus kws tshuaj ntawd mam li npaj tej tshuaj ntawd, thiab ua tib zoo xyuas kom yog cov tshuaj ntawd thiab kom tus neeg mob ntawd paub tias yuav noj hom tshuaj ntawd li cas.
Mr Andrew hasi tias “Yeej muaj peev xwm yuav tau tej tshuaj feem ntau rau lub sij hawm li ntawm 5 txog 30 ntiag tiv. Thiab yog tias yog ib daim ntawv yuav tshuaj tshiab rau ib tug neeg mob tshiab thiab ces tej zaum yuav siv sij hawm ib nyuag ntev zog piv rau tej neeg mob uas yeej ib txwm yuav tib yam tshuaj twg siv tas mus li uas yeej tau siv yam tshuaj ntawd los ntev heev rau ib lub caij twg lawm.”
Cov kev cais ntau yam tshuaj sib txawv
Tag nrho tej tshuaj ntawm Australia yeej raug teev tias yog tej kuab taug, thiab ib yam tshuaj twg yeej raug teev raws li cov kev nyab xeeb rau tej neeg mob siv.
Tej thaum ces tej neeg kuj muaj peev xwm siv tau tej tshuaj sib txawv ntawm tej xeev thoob plaws Australia thiab.
Yong Hwee Goh uas yog ib tug kws tshuaj ntawm Perth tshab txhais tias “Tej tshuaj uas tsis raug teev ces yeej muaj muag sab nraum tej khw muag tshuaj li tej khw supermarkets, conveneince stores thiab tej chaw muag rog sam tsheb. Hos tej muag ntwm tej khw muag tshuaj ces yog cov peb paub hu ua Scheducle 2, uas tsuas pub muag hauv tej khw muag tshuaj xwb tab sis tsis tas siv ntawv sau tshuaj los yeej yuav tau siv. Tej xeev feem coob tsis xam xeev Western Australia nrog - nyias yeej muaj nyias ib cov tshuaj uas zej tsoom muaj peev xwm yuav tau tej tshuaj no siv tab sis yuav tsum tau txais kev taw qhia ntawm ib tug kws tshuaj.''
“Ntxiv ntawd ces yog cov tshuaj uas khws tshuaj thiaj muaj cai muab rau ib tug twg siv xwb (Pharmacist-Only Medicines - Schedule 3) uas tsis tas siv ntawv yuav tshuaj tab sis yuav tsum muaj kev taw qhia ntawm ib tug kws tshuaj los yog tau sab laj txog cov kev siv tej tshuaj no ntawm ib tug kws tshuaj, tos ho ua li ntawd los vim tej zaum tej tshuaj ntawd kuj yuav ua rau muaj lwm yam kev phom sij cuam tshuam ntau dua thiab tej zaum tej neeg kuj tsis siv raws li qhov tsim nyog siv. Muaj ntau cov piv txwv li ib co tshuaj thim fab (antihistamines) uas muaj zog heev tej zaum yuav ua rau ib tug twg noj lawm yuav tsaug zog thiab ncaws dab ntub, los yog cov tshuaj noj kom tsis txhob txhaws ntswg, tej tshuaj noj kom tsis txhob hawb pob thiab ntau yam ntxiv. Hos cov tshuaj Prescription Medicines - Schedule 4, ces yog cov uas yuav tsum yog ib tug kws kho mob sau ntawv yuav tshuaj mus yuav xwb mas thiaj yuav tau cov tshuaj no ntawm ib lub chaw muag tshuaj siv.''
Australia yeej yog lub teb chaws uas muaj cov kev pab tej neeg mob yuav tshuaj siv li cov Pharmaceutical Benefit Scheme (PBS) uas pab kom tej neeg yuav tau ntau yam tshuaj pheej yig siv, tab sis tus neeg mob ntawd yuav tsum yog ib tug neeg Australia uas nyob ruaj ntawm teb chaws Australia no thiab tam sim no yeej muaj ib daim Medicare Card siv.
3 tug kws tshuaj hu ua Lena Mansour, Tom Andrew, thiab Yong Hwee Goh - Image supplied.
“Ib tug neeg mob uas muaj ib daim concession card siv ces tsuas tau them nqe tshuaj ib yam twg $7.70 xwb. Thiab tej zaum tus neeg mob ntawd yuav muaj peev xwm yuav tau ib yam tshuaj twg noj kav ntev txog ib hlis los yog ob hlis. Hos yog tham txog tej neeg mob lwm tus ces yeej yuav tau them nqe tshuaj ib yam twg txog li $31.60. Ces thiaj yog tib tug nqe tshuaj xwb tsis hais koj yuav ntawm lub khws muag tshuaj hauv ntawm ib lub nroog los sis ntawm ib lub zos toj siab twg li.''
Australia los kuj muaj cov kev sib pom zoo nrog ntau lub teb chaws cov kev kho mob thiab, ces txawm tias ib tug neeg mob twg uas tsis muaj Australia daim Medicare Card siv, los lawv kuj yeej tseem yuav tau tej tshuaj raws li tus nqe uas PBS teev tseg thiab.
Tab sis tsis yog PBS yuav pab them txhua yam tshuaj ntawm Australia.
Mr Andrew hais tias “Tej tshuaj no ces yuav faib rau ib tug neeg mob twg raws ib daim private script, uas Medicare tsis pab them tus nqe tshuaj ces thiaj yuav ua rau tus nqe tshuaj sib txawv ntawm ib lub khw muag tshuaj rau lwm lub khw. Txawm tias Medicare tsis pab them kom yuav tau tej tshuaj no pheej yig los yog tej neeg uas muaj private health insurance siv ces yeej muaj peev xwm hais kom lawv tej tuam txhab insurance pab them thiab.''
Tej kws tshuaj los kuj yeej tseem muaj lwm cov kev pab kho mob thiab cov kev pab rau lwm yam khoom siv thiab. Credit: Yong Hwee Goh
Tej kws tshuaj ua hauj lwm lwm yam ntxiv thiab dua ntawm cov kev muab tshuaj
Tej kws tshuaj los kuj tseem los kuj yeej tseem muaj lwm cov kev pab cuam kho mob rau tej neeg siv thiab.
Yong Hwee tshab txhais tias ''Tej kws tshuaj los yeej yog thawj cov neeg kho mob uas tej neeg mob ntawm tej zejzog ntsib thiab yeej yog tej uas pab ntsuam thiab kho ntau yam mob li, khaub thuas, fab, mob taub hau, mob txhab txiag, mob ntawv nqaij khaus qhuav, thiab mob tej fungal infections - tej no tsuas yog qee yam tsawg tsawg ntawm ntau yam uas lawv ua xwb,''
“Ib tug kws tshuaj twg kuj muaj peev xwm txheeb cov hauj lwm Home Medicines Review ntawm ib tug neeg mob twg rau ib tug kws kho mob twg (General Practitioner - GP), cov txheej txheem no pab txheeb seb tej zaum ho puas muaj tej teeb meem dab tsi rau tej neeg mob cov kev noj tshuaj thiab ho taw qhia rau tej kws kho mob kom muaj peev xwm tswj tau cov kev siv tshuaj zoo tshaj qub ntxiv.''
Tej kws tshuaj los kuj muaj peev xwm pab ib co kev ntsuam mob nkeeg li, txheeb seb ib tug twg puas muaj ntshav qab zib, puas mob ntshav qab zib, puas muaj ntshav siab, thiab puas muaj cov mob daj ntseg.
Ntawm qee cov xeev ces tej kws tshuaj los kuj muaj peev xwm hno tshuaj vaccine rau tej neeg piv txwv li hno tshuaj COVID-19 los yog hno tshuaj tiv thaiv kab mob khaub thuas, thiab kuj yog tus muab cov tshuaj uas tej kws kho mob sau tso cai siv rau tej neeg mob siv - piv txwv li tej tshuaj rau poj niam noj kom tsis txhob muaj me nyuam, yam tus neeg mob ntawd tsis tas mus ntsib ib tug kws kho mob.
Yog tias koj ho muaj ib yam mob uas mob ntev los yog mob tag koj ib sim neej - piv txwv li mob ntshav siab, ces tej zaum koj tus kws kho mob kuj yuav sau ib daim ntawv yuav tshuaj rau koj siv uas muaj peev xwm coj mus siv yuav tau tshuaj ntau zaus ntawm tej chaw muag tshuaj thiab.
Yong Hwee hais tias “Ib daim ntawv yuav tshuaj twg tej zaum kuj yuav yog daim ntawv uas muaj peev xwm siv yuav tau ib yam tshuaj twg tsi ntsees thiab pab kom tus neeg mob ntawd yuav ntau yam tshuaj ntau zaus yam tsis tas thov dua daim ntawv yuav tshuaj tshiab siv. Ces tus khw tshuaj thiaj yuav siv daim ntawv muab tshuaj uas siv tau ntau zaus coj los lo rau daim ntawv yuav tshuaj qub uas tus kws kho mob sau thaum xub thawj ntawd. Ces thiaj yuav tau siv ob daig ntawv yuav tshuaj no ua ke mas thiaj muaj cai yuav tau tshuaj siv ib zaug twg.''
Thiab tej zaum ces yeej tsis muaj ib yam tshuaj twg uas yuav siv tsi ntsees rau ib yam twg coj los siv thiab ces tej khw muag tshuaj li Tom lub khw thiaj muaj peev xwm los npaj tej tshuaj no rau tej neeg mob siv.
Nyob sab hauv lub khw muag tshuaj uas npaj ib co tshuaj tswg tsi ntsees rau ib cov neeg mob siv. Credit: Tom Andrew
“Los sis yog yuav tau siv sib txawv li tej zaum yuav siv tshuaj ua kua rau ib tug me nyuam los sis yuav tau ua cov tshuaj uas zom kom mos mos muag muag pub aub. Thiab ib txhia tshuaj ces yuav tau tim ntau yam kom ua tau ib co tshuaj siv tsi ntsees rau ib tug neeg mob twg.''
Tej kws tshuaj yog ib cov neeg kho mob tseem ceeb
Tsis hais koj muaj kev txhawj xeeb txog koj tus me nyuam uas tsis xis nyob los yog koj ib yam mob uas mob ntev, kuj yog tej yam tseem ceeb thiab uas yus mus siv tib lub khw muag tshuaj xwb, thiab ua zoo xyuas kom yus paub thiab sib swm zoo nrog yus tus kws tshuaj kom lawv thiaj muaj peev xwm pab yus tswj tau cov kev kho mob rau yus thiab yus tsev neeg.
Li Lena tshab txhais ces cov kev ua hauj lwm tam li yog ib tug kws tshuaj zos ces kuj yog ib txoj hauj lwm uas tau txiaj ntsim ntau yam rau yus thiab vim yus yeej muaj peev xwm pab tej neeg txoj kev ua lub neej txhua hnub thiab.
Ms Mansour hais tias ''Yus yeej muaj peev xwm taw qhia ntau yam rau tej neeg mob cov kev txhawj xeeb txog kev noj qab nyob zoo, los yog nrhiav dua lwm cov hauv kev kho txawv rau lawv siv kom haum raws li qhov lawv xav tau, thiab txhawb nqa kom lawv coj tej cwj pwm ua lub neej uas tau txais kev noj qab nyob zoo.''
“Thiaj yog tej yam ua rau yus zoo siab tias yus tau pab tej laus npaj lawv tej tshuaj noj los sis pab ib tug leej niam tus me nyuam uas tsis xis neej kom nws tso siab me ntsis, los yog kom lawv ho tau pw tuaj dab ntub tsaug zog tom qab tau ua hauj lwm ntev rau ib hnub twg.''
Yog koj xav nrhiav lub khw muag tshuaj ntawm koj lub zos ces txheeb tau ntawm
Subscribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia kom koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm [email protected]
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab mloog tau los yog caum
