Pastor Paawuloos Ol'aanaa guyyaa Dhaloota Kirstoos(Christmas) fi bara haaraa ilaalchisee dubbifneen, ayyaanni sababa walitti qabama hawaasaa tahuu nuu ibsan. Sababa Ayyaana kanaan maatii fi hiryaan walitti dhufee waliin dabarsa. Ayyaanni Dhaloota Kirstoos guyyaa sani irratti maatiin walumaan yoo kabajate iyyuu sanbattoota isa duraa waldaa Kirstaanaa dhaquun waliin waaqeffatu jechuun dubbatan.
Ijoolleen waldaa keessatti hirmaatnaa guddaa qabu jedhan Pastor Paawuloos, nuti akka saba Waaqayyootti, Waaqayyoon waan inni nuu godhe galateeffachuu, waan gaarii hojjechuu fi dhaloota daandii gaarii irratti gargaaruun hawwii keenya jedhanis Paastor Paawuloos.
Paastor Paawuloos Waggan Haaraan bara moofaa yeroo itti gaddaa fi gammachuun dabarsine, barri haaraan ammoo jireenya keenya irratti barri haaraan tokko dabalamuu agarra jedhan.
Ummata Melbourne jiraatuu fi kaaniifis nagaa fi fayyaa hawwaa, saba keenyaaf bara itti wawwaannaa, boo'ichii fi gadadoon irraa itti dhaabbatu akka tahun hawwa jechuun haasawa isaanii xumuran.
