Xov xwm luv tshaj tawm hnub zwj Quag (Tuesday news 17.09.2024):
Tau muaj 3 tug txiv neej ntawm xeev Queensland raug rau txim vim raug limtiam tias muaj feem nyiag coj tej tshuaj nees uas ntim rau tej fwj kua txiv ntawm Canada uas yuav coj los rau teb chaws Australia tshaj 1.2 tonnes tab sis nom tswv cheem tau ua ntej lawm.
Tau muaj ib tsab ntawv cej luam tshiab los ntawm lub koom haum Institute of Health and Welfare tau qhia tias muaj tej neeg Australia yuav laug txog li 500,000 tus tau tus mob dementia uas yog ib tug mob ua rau paj hlwb tsis ua hauj lwm zoo, cim xeeb tsis zoo thiab tham tau lus tsis tshuaj muaj laij thawj.
Pat Conroy uas yog Australia tus nom tiv thaiv teb chaws kuj tsis kam tawm tswv yim dab tsi txog Israel tej tsov rog ntawm Gaza rau lub caij koom cov program foob pob ntawm Canberra tab sis yeej tau muaj cov kev nqua hu kom xaus tsov rog ntawm Middle East.
Keir Starmer uas yog Askiv tus thawj pwm tsav tau cog lus tias yuav xyuas kom tsis txhob muaj tej neeg nyiag neeg hla txhaum cai mus rau nws lub teb chaws, rau lub caij nws tau ntsib Italy tus thawj pwm tsav Georgia Meloni thiab xav paub tias vim li cas thiaj muaj neeg tsiv teb tsaws chaw mus tsawg rau teb chaws Italy lawm. Ua ke no los Germany kuj tau muaj cov kev pom zoo nrog 9 lub teb chaws los tswj nws tej ciam teb thiab.
Tau muaj ib tsab ntawv cej luam tshiab ntawm tsev tsoom fwv tau nqua hu kom tsoom fwv Australia pab cuam sab tug rog thiab tej neeg txom nyem ntawm teb chaws Ukraine thiab kom rov qab teeb Australia lub Embassy hauv tuam ceeb Kyiv.
Lub chaw teeb txheeb Doherty Institute tau txheeb tau tias cov T-Cells uas cim tau cov kab mob COVID uas mob ntev ntawd kuj yuav yog tej yam uas siv coj los tsim tau ib cov kev kho mob tshiab kho kab mob coronavirus.
Tus txiv neej hu ua Ryan Wesley Routh uas tau nqa phom npaj tua Meskas tus qub President Donald Trump dhau los kuj raug txim muaj phom txhaum cai thiab yuav raug coj mus hais plaub, tom qab nws tau khiav nkaum ntawm Trump lub chaw ntau golf ntev txog 12 teev thiab raug tub ceev xwm muab txhom tau.
Raws li tej xov xwm tau los ntawm lub koom haum International Institute for Strategic Studies qhia ces Russia tus President Vladimir Putin xav sau kom tau 180,000 tus tub rog ntxiv kom nws muaj tub rog txog 1.5 million tus mus ua rog.
Bangkok Post tau qhia tias Thaib tus nom uas tswj cov hauj lwm ntoj ncig tseem yuav sab laj nrog tej nom tswv thiab koom haum cuam tshuam rau tej kev ntoj ncig seb puas yuav sau se ntoj ncig rau tej neeg caij dav hlau 300 Baht thiab hla ciam dej thiab ciam teb li 150 Baht.
Tuoi Tre news tau tshaj tawm tias New Zealand tau pab nyiaj tshaj li USD 600,000 rau Cob tsib pab daws tej xwm txheej kaub zeeg cua Yagi.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
