Xov xwm luv tshaj tawm hnub zwj Feej (Wednesday news 13.11.2024):
Tej nom teb chaws ntawm tus tsoom fwv Albanese tau sau ntawv rau tej niam txiv thiab tej teej kawm qhia txog lawv lub tswv yim xav thov los tsim cai txwv tsis pub tej me nyuam hnoob nyoog qes dua 16 siv social media kom tau txais txiaj ntsim li cov kev txwv tsis pub lawv siv xov tooj ntawm tej teej kawm. Yog tsim tau los ua cai siv ces tom qab ib lub xyoos uas tsim tau tsab cai no siv yuav txwv tsis pub tej me nyuam yaus siv ntau cov social media platforms li Facebook, TikTok, Instagram thiab YouTube tab sis tseem pub lawv nrhiav tau tej xov xwm pab lawv kawm ntawv thiab tej xov xwm cuam tshuam txog cov kev noj qab nyob zoo.
Tau muaj ib pawg neeg txiav txim plaub ntug tau phua txim rau lub koom haum CACI ntawm Virginia uas tau muab 3 tug neeg kaw ntawm Iraq lub tsev laj cuj Abu Ghraib uas raug tsim txom 20 xyoo dhau los kom them nyiaj paj tshab $63 million dollars rau tej neeg no vim lawv hais tias lawv raug ntaus, rau sexual abuse, raug yuam liab qab thiab ua phem lwm yam rau lawv.
Trump tau npaj ib co hom phiaj nws xav ua rau thawj hnub uas nws rov qab ua hauj lwm ntawm tsev dawb rau lub 1 hlis ntuj xyoo 2025. Ib co ntawm ntau cov ces yog tej tswv yim yuav muab tej neeg tsiv teb tsaws chaw xav rov qab coob heev thiab los thim tsis siv tsoom fwv Biden tej cai tswj hauj lwm kev kawm. Nws kuj cog lus tias yuav kho tsoom fwv Meskas cov kev tswj hawm thiab rho neeg coob heev tawm hauj lwm, thiab yuav zam txim rau tej neeg tsim kev kub ntxhov ntawm tsev dawb hnub tim 6 lub 1 hlis ntuj xyoo 2021.
Tsoom fwv Biden tau xaus lus tias Israel tsis tau txwv txiav cov kev pab Gaza dab tsi thiab tsis tau yuam Mesks tej cai dab tsi rau lub caij uas ntsib ntau yam teeb meem rau cov kev xa kev pab cuam rau tej neeg txom nyem ntawm thaj chaw no tom qab pub 30 hnub kom Israel nrog xyuas tsis li ces yuav txwv tsis pab qee yam riam phom rau Israel.
Tau muaj ib tug txiv neej hnoob nyoog 22 xyoos raug txhom ntawm Quakers Hill thiab raug txim yuav laug txog li 30 lub txim ntawm Sydney. Lub caij 6 hli dhau los ces tej laus neeg ntawm Sydney raug tej neeg phem dag tias yog tej neeg ua hauj lwm ntawm tej txhab nyiaj thiab ntxias kom lawv qhia lawv tej credit cards thiab nyiag lawv tej PINs hauv tej tub rau ntawv raug coj mus hais plaub ntawm Blacktown Local Court uas suav cov txim ntxias dag tej neeg kom tau txais txiaj ntsim nyiaj txiaj nrog.
Australia ntseeg tias nws yuav muaj peev xwm nrog daws tej kev tsis sib haum xeeb lagluam ntawm Meskas thiab Suav ntawm tus tsoom fwv Trump zum ob rau lub caij uas thawj pwm tsav Anthony Albanese tau qhia meej tias nws tau tham txog cov kev ua luam nrog tus president yeej cov kev xaiv tsa tshiab tsis ntev no. Vim Trump cov kev xaiv tsa no tau ua rau muaj kev txhawj xeeb rau nom tswv uas txhawj tias tsam nws tej cai pov puag Meskas thiab cov kev tsub se rau tej khoom xa muag rau nws lub teb chaws yuav ua rau Australia tej lagluam poob nyiaj ntau billion dollars. Ua ntej Mr Albanese yuav ncaim mus koom lub rooj sab laj APEC ntawm teb chaws Peru nws tau qhia rau ABC Radio tias Australia yeej txhawb nqa kom muaj kev sib raug zoo lagluam nrog ntiaj teb los txhawb nqa kom lagluam loj hlob. Nws hais tias ''Kuv yeej tau hais tias Meskas ua luam nrog Australia ces nws yeej tau nyiaj tsam. Thiab xav kom Meskas xyuas kom tau txais kev ncaj ncees rau Australia, tab sis Meskas yeej yog tus nqe peev ntau ntawm Australia, uas tsim lagluam thiab hauj lwm ua.''
Donald Trump uas yog Meskas tus President uas yeej cov kev xaiv tsa tshiab hais tias nws yuav xaiv Mike Huckabee uas yog tus hau xeev Arkansas los ua Meskas tus ambassador rau teb chaws Israel.
Israel tus thawj pwm tsav Benjamin Netanyahu tau tso ib daim video hais lus rau neeg Iran ceeb toom tias kom tsis txhob tawm tsam Israel ntxiv tsam nws tej lagluam puas tsuaj vim Iran cov kev tawm tsam Israel tsis ntev no twg ua rau Iran poob nyiaj txog AUD 3.5 billion lawm.
Muaj tej nurses thiab tej midwives tshaj 50,000 tus mus tawm tsam hnub no ib hnub kom tau nyiaj hauj lwm 15% ntxiv ntawm New South Wales zej tsoom tej tsev kho mob ces thiaj ua rau muaj teeb meem rau tej kev tu saib xyuas neeg mob thiab muaj tej kev phais mob txog li 600-700 cov raug ncua raws li New South Wales Health qhia.
Justin Welby uas yog tus txiv plig ntwm Canterbury tau tawm tsis ua txiv plig tom qab ob peb hnub tau muaj xov xwm qhia tias tau muaj ib tug txiv plig ntawm Church of England tau yuam deev me nyuam yaus.
Richard Marles uas yog Australia tus nom tswj dej num tiv thaiv teb chaws tau sab laj nrog Philippines tus nom tiv thaiv teb chaws Gilberto Teodoro ntawm Canberra rau lub caij ob lub teb chaws no koom tes los tawm tsam thaib tswj kom Suav tsis txhob muaj fwj chim rau cheeb tsam Indo-Pecific.
Tom qab uas Germany tus tsoom fwv koom tswj uas muaj 3 pab nom tau sib tawg tswj ces yuav muaj cov kev tawm suab seb puas muaj kev ntseeg siab rau nws tus coj Olaf Scholz lub hlis tom ntej no ua ntej yuav muaj cov kev xaiv tsa lub 2 hlis tim 23 xyoo 2025 no.
Raws li tau muaj cov kev teeb txheeb ntawm tsev kawm qib siab Maquarie University 6 xyoos ces txheeb tau tias cov kev nruab cov teeb LED rau sab hauv qab ntawm daim surfboard thiab nkoj kayak tej zaum kuj yuav muaj peev xwm tiv thaiv kom ntsev tom neeg White shark tsis txhob tom neeg tsawg dua thiab uas xav tsim cov prototype los sim siv.
Kuj tau muaj ib tug neeg hnoob nyoog 62 xyoos tau tsav tsheb mus nrau neeg tuag 35 leeg thiab raug mob 43 leeg ntawm Suav lub nroog Zhuhai sab qab teb uas tub ceev xwm tau muab txhom hnub zwj Quag (Tuesday tim 12.11.2024) rau lub caij tub rog Suav ua koom txoos ya dav hlau ib zaug ib xyoos twg ntawm lub nroog no.
Raws li tau muaj cov kev koom tes teeb txheeb ntawm lub koom haum Australian Unity nrog tsev kawm qib siab Deakin University nrog tej neeg Australia tshaj 2,000 tus uas muaj hnoob nyoog tshaj 18 xyoo ces pom tias zoo li tsis tshua muaj kev txaus siab rau kev ua neej ntawm Australia cuam tshuam txog ntau yam li tej lagluam, kev noj qab haus huv thiab kev sib cuag nrog tej zejzog.
The Laotian Times qhia tias xyoo 2025 tom ntej no nom tswv Nplog yuav kom txhua yam khoom noj khoom haus uas muag hauv Nplog teb yuav tsum teev zwm kom raug cai thiab muaj ntaub ntawv lo qhia rau tej khoom ntawd.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
