Xov xwm luv tshaj tawm hnub zwj Feej (Wednesday news 16.10.2024):
Australia pab Socceroos kuj tau sib tw ncaws pob nrog Japan pab Samurai Blue thiab tau zauv sib npaug 1 - 1 rau cov kev sib tw World cup qualify.
Kuj tau muaj ib tug txiv neej hnoob nyoog 54 xyoos raug liam tias tau ua phem rau ib tug me nyuam hnoob nyoog 8 xyoo ntawm Coffs Harbour ntawm NSW north coast txij xyoo 1998 tiab 2008 ces thiaj raug txhom thiab tsub 80 lub txim.
Nom tswv Randwick City Council tau qhia tias tom qab tau muaj tej neeg pab cawm neeg poob deg txheeb tau ib co pob dub raug dej tshoob rau tej ntug hiav txwv ntawm Coogee Beach ces thiaj tau muab thaj ntug hiav txwv no kaw mam qhia seb yuav qhib thaum twg, vim lawv xav tias tej zaum yuav yog tej xwm txheej roj paim rau tej dej.
Lwm pab nom teb chaws kuj tau tib Anthony Albanese cov kev txiav txim siab yuav ib lub tsev ntawm ntug hiav txwv raug nyiaj txog 4.3 million uas muaj 4 chav pw nrog nws tus poj niam uas qhaib ua ntej nkawv yuav ua nkawv rooj tshoob.
Tsoom fwv cov kev ua tib zoo xyuas kom kho tau tej cai uas muaj teeb meem rau tej neeg LGBTQI+ kuj raug qhuas tab sis tag nrho NSW pab nom koom tswj tsis pom zoo tsuas muaj ib tug nom thiaj pom zoo xwb. Ces Alex Greenwich uas yog ib tug nom ywj pheej thiaj hais tias muaj ntau cov cai tswj vaj huam sib luag yuav tau txais kev pom zoo ntawm tsev tsoom fwv xeev tsim siv tom qab kho qee nqe cai.
Tej hluas nyuam qhuav nto nkauj nto nraug tau tawm tswv yim txog tsoom fwv teb chaws cov kev xav thov los txwv tsis pub lawv siv social media tias yuav ua rau lawv raug cais thiab ua rau lawv tsis muaj feem koom. Vim 97 feem puas ntawm Australia tej hluas no yeej tau siv 4 co social media platforms los pab kom lawv tau sib cuag tau nrog lwm tus ntau tshaj plaws piv rau tej hluas hauv ntiaj teb no raws li tau muaj ib cov kev teeb txheeb qhia.
Nom tswv Meskas tau qhia tias yeej tsis muaj cov kev hawv dab tsi rau ib daim ntawv xa rau Israel uas hais kom Israel tso cai thiab xyuas kom xa tau khoom pab cuam rau tej neeg Palestinians ntawm Gaza rau lub sij hawm 30 hnub tsis li ces ntshe Mekas yuav cheem tsis pab sab tug rog rau Israel, tom qab tim 1 lub 10 hli ntuj uas Israel tau txwv tsis pub xa khoom pab cuam thiab tau muab txoj kev tseem ceeb mus rau sab qaum teb Gaza kaw uas ntshe tej neeg no haj yam yuav ntsib tej xwm txheej tuag tshaib tuag nqhis ntau ntxiv tuaj.
Kuj yuav muaj cov kev sib teev theev (Debate) ntawm hau xeev Steven Miles thiab David Crisafulli uas yog tus coj ntawm lwm pab nom hmo tim 16.10.2024 no ua ntej yuav muaj cov kev xaiv tsa tsoom fwv xeev tim 26.10.2024. Mr Miles los kuj tau siv lub caij los qhia txog nws tus tsoom fwv tej cai txo tej cua tsis huv thiab kom siv tau cov renewable energy thiab txo tej nqe public transport ua 50 cents nrog rau cov kev cog lus tshiab tias yuav npaj su rau tej me yes noj yog rov qab raug xaiv los ua nom tshiab.
Anglicare tsab ntawv cej luam tshiab uas tau coj los tshaj tawm tim 16.10.2024 no qhia tias tej neeg ua hauj lwm essential workers yeej tsis muaj peev xwm ntiav tau tsev nyob. Nws qhia tias tej nurses tsuas muaj peev xwm ntiav tau tsev nyob txog 1.4 feem pua, tej neeg ua hauj lwm ambulance tsuas ntiav tau tsev nyob txog 2.2 feem pua thiab tsuas muaj tsawg dua 1 feem pua ntawm tej neeg ua hauj lwm early childhood education thiab construction workers thiaj ntiav tau tsev nyob xwb.
Sai sai tom ntej no ces tej zaum tsoom fwv Albanese kuj yuav tsim kom tau ib co cai tshiab coj los tswj tej online retailers uas pheej ua nyuaj thiab ua rau tej customers uas xav cancel tej subscription tsis muaj peev xwm tso tseg cov kev siv lawv tej services, thiab yuav tawm tsam nrog tej tuam txhab uas pheej hais kom tej neeg qhib ib co accounts siv los yog pheej nug tej xov xwm tsis tsim nyog nug thiab pheej tsub tej nqe kim rau tej services.
Canada thiab India ib tog twg kuj tau muab ib lub teb chaws twg 6 tus nom xa rov qab rau lub caij ob lub teb chaws no tsis sib haum xeeb rau tej hauj lwm nom tswv, tom qab xyoo 2023 uas Canada tus thawj pwm tsav Justin Trudeau tau hais tias yeej muaj pov thawj qhia tias tej zaum India tej neeg soj xwm yog cov muaj feem tua Hardeep Singh Nijjar uas yog ib tug coj cov neeg India ntseeg kev cai Sikh thiab yog ib tug pej xeem neeg Canada ntawm teb chaws Canada.
rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm ,, , thiab los yog download thiab kom koj mloog tau SBS Hmong.
