Nchaiv Khwb Xyooj uas yog Hmoob Australia ib tug laus neeg tham txog thaum Hmoob noj tsiab peb caug ho ua dab tsi thiab vim li cas thiaj ua lub tsiab peb caug.
Leej twg hais kom Hmoob noj peb caug
''Tej laus yeej ib txwm piav tias xiv nraug Luj Tub thiab niam niam nkauj Ntxig Chiv tshwm sim los mus tsim noob neej rau ntiaj teb ces, Hmoob keeb kwm tsiab peb caug ces nkawv kom Hmoob ua tsiab peb caug rau lub 12 hlis ntuj hnub xaus.''
Noj peb caug thaum twg
''Thaum ub Hmoob los nyob rau Suav tuam tshoj ces Hmoob los Hmoob lub teb chaws qab tsuas ntaiv ntuj hla los mus rau tuam tshoj ces los nyog rau ntawd ces thiaj tsim lub tsiab peb caug lub 12 hlis hnub tim 30 ces thiaj Hmoob thiaj noj peb caug li ntawd los mus.
''Txij thaum Hmoob poob teb chaws tawg teb chaws tuaj rau mab dawb ntuj ces, nyob Meskas ces Hmoob thiaj muab tsiab peb caug ua koom txoos nrhiav nyiaj, ces thiaj muab tsiab peb caug ua tsis tseem ceeb.''
Npaj tsiab peb caug li cas
''Ib xyoos ces yuav tsum tu kom tau ib tug ob tug las npua tsiab noj tsiab. Ces yuav hu muam phauj dab laug, kev neej kev tsav sawv daws tuaj koom noj haus ua ke, hu ib lub zos rau lwm lub zos, hnub no noj tas tus no tas ces tag kis mus noj tus tod li. Hmoob yeej noj tsiab peb caug li ntawd los mus txog ntua thaum tog koom tsham txheeb tau teb chaws Nplog.''
Vim li cas thiaj lwm sub?
''Tej laus hais tias thaum ub Hmoob tus huab tais txiv yawg tus tub ntxawg tus nkauj nyab, lub caij ntawd mas tej nkauj nyab lub caij noj tsiab peb caug ces yeej mus tham hluas, hais kwv txhiaj thiab mus pov pob. Ces huab tais tus tub ntxawg tus nyab mus tham Hmoob ces muaj neeg qhia rau nws ces nws txawm nqa ntaj mus raws tua ces thiaj muab tus txiv neej tua tuag ntawm tus hauv paus pos ncag. Ces Hmoob thiaj muab tus pos ncag coj los lwm cov sub ntawd kom nrog lub xyoos laus mus kom tag es tsis txhob muaj txiab muaj nkeeg rau caj ces los yog tej neeg tom qab.
''Lub caij kuv hlob tiav neeg ces tseem cais cov kev lwm sub ntawm ib tsev neeg rau ib tsev neeg xwb. Tab sis txij dhau kuv yawg tiam los rau kuv txiv thiab txiv hlob phaum neeg ces peb txiv hlob Npuag neeg ua tus coj rau Hmoob ces nws thiaj hais kom tsis txhob ua li ntawd lawm vim cais neej cais tsav cais kwv cais tij ces tsis yog lawm. Ces txij peb txiv hlob los coj ces kev neej kev tsav thiaj lwm sub tau ua ke.''
''Vim dab ntshai nqeeb ces Hmoob thiaj muab nqeeb xuab ua hlua los mus siv lwm sub.''
Lub caij twg mam txwv tsis pub tej nyab mus pov pob tham hluas ntxiv lawm
Kuv hnov peb pog tham tias thaum peb txiv hlob Npuag neeg ua tus coj Hmoob ces thiaj txwv tsis pub cov poj niam nkauj nyab mus ua tham Hmoob tsis pub mus pov pob lawm. Cov nkauj nyab yuav tsum ntoo cov hauv phuam khi siv ceeb qhia tias yuav txiv lawm. Cov hluas nkaus uas ntoo phuam tsis muaj siv ceeb khi ces thiaj yog nkauj xwb tsis tau yuav txiv.Nchaiv Khwb Xyooj.
Vim li cas thiaj ua tsiab peb caug
''Raws li tej laus hais tseg ces thaum ib xyoos 12 lub hlis kawg ces neeg ntiaj teb luag yeej muaj keeb kwm teev hawm raws li luag ces Hmoob thiaj li muaj qhov ntawd los mus thiab tseem pheej ua los txog rau niaj hnub niam no.''
Ua dab tsi thaum noj tsiab peb caug
''Hnub xiab ib ces ua Hmoob tej kab lis kev cai, Hmoob keeb kwm kev dab kev qhua (txi xwm kab, tsa txhiaj meej, npws laig poj koob yawm ntxiv thiab tej laus). Hnoob xiab ob ces yog hnub noj tsiab. Muaj ib tug laus neeg tseem ceeb ces yuav los mus pe tsiab. Hnub xiab peb ces yog cov laus neeg tseem ceeb puv 120 xyoo lawm ces npaj nqaij npaj mov mus pe tsiab tom cov laus ntawd cov qua ntxa, uas yeej ua txhua lub xyoo.''
Lub ntsiab ntawm cov kev pe tsiab
''Ces tej tub nyab ntxhais vauv leej leeg vom ib khub qaib siav nqa tuaj mus hais lus zoo rau tej laus ces tej laus foom lus zoo rau tej tub kis xeeb leej xeeb ntxwv ntawd.''
Lus hais rau lub caij mab sua ua koom txoos Lunar New Year nab xyoo
''Xyoo no ces nab thiab npua sib pab.''
''Lub caij ntawd ces neej thiab dab tseem sib txuas lus tau ua ke. Neej thiab dab tsis haum xeeb thiab mus sib hais ces yawm saub thiaj muab 6 tus tsiaj nyeg sawv cev rau neej ntiag tug (Qaib, npua, dev, nyuj etc.,) thiab 6 tus tsiaj qus sawv cev rau dab ntiag tug (Nab, liab, zaj, luav et.,) kom sib haum xeeb.''
''Ces thiaj muaj 12 tug tsiaj kav xyoo, ib xyoos hloov rau ib tug tsiaj tshiab kav.''
Nab xyoo zoo li cas
''Dej lwg huab cua yeej muaj qhov kub qhov sov thiab tab sis tsis muaj qhov kub kub sov sov heev, qhov txias los yuav tsis muaj qhov txias txias heev, thiab tsuas nyog hauj sim xwb. Piv txwv li xyoo no teb chaws Meskas yeej tsis tshua muaj tes muaj daus.''
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab mloog tau caum los yog lwm cov podcast platforms (, , thiab ).
