Ntsiab lus tseem ceeb:
- Neeg Australia tsis them se peev txheej dab tsi.
- Thiab yuav teeb tsa ib tug neeg los ua tus tswj thiab faib tej peev txheej rau lwm tus.
- Tab sis kuj yog tej yam yooj yim tshaj plaws thiab yog tias npaj tau daim ntawv faib peev txheej tseg. Tsis li ntawd ces tej tsev hais plaub yuav tau raus tes.
Thaum uas muaj ib tug twg tas sim neej, ces txhua tsav yam uas tus neeg ntawd muaj yuav ras los ua cov peev txheej 'decieased estate' - 'uas yog tej vaj tse, bank account, tsheb, khoom cuab yeej cuab tam thiab khoom ntiag tug'. Thiab muaj peev xwm muab tej khoom no tso rau lawv tsev neeg, tej phooj ywg los yog tej koom haum tau', raws li Melissa Reynolds uas yog tus Executive General Manager of Trustee Services for State Trustees Victoria tshab txhais.
“Ib yam peev txheej twg kuj yuav yog ib cov khoom plig los kuj tau thiab - piv txwv li kuv pub kuv lub tsheb rau ib tus neeg A. Los sis yog tej yam li kuv muab nyiaj $10,000 rau yim neeg uas nyob ze kuv. Los yog ib co peev txheej uas tso rau sawv daws, piv txwv li kuv tso tag nrho kuv tej peev txheej no rau kuv tej me nyuam."
Executor yog dab tsi?
Daim ntawv faib peev txheej (Will) ces yog daim ntawv teev tseg tias yog thaum ib tug twg tas sim neej lawm yuav muab lawv tej peev txheej faib li cas rau lwm tus.
Nyob hauv daim Will ntawd, ces yeej muaj ib tug neeg raug teeb tsa hu ua executor los ua tus neeg tswj thiab faib tej peev txheej ntawm tus neeg tas sim neej rau lwm tus raws li tus neeg tas sim neej xav tau.
Tsis tas li ntawd los tus neeg executor no kuj yog ib tug neeg tau txais txiaj ntsim thiab.
Florante Abad, uas yog ib tug neeg uas yeej paub zoo txog tej cai cuam tshuam txog cov kev faib peev txheej ntawm teb chaws Philippines thiab Australia, hais tias yog tias ho tsis teeb tsa tus neeg faib peev txheej no, ces tej zaum tsev hais plaub yuav tau raus tes.
Mr Abad hais tias “peb hu tus neeg ntawd tias yog tus trustee los yog tus administrator.”
“Yog li ntawd tus neeg executor thiaj yog tus neeg uas daim ntawv Will ntawd yog tus teev tseg, thiab tus administrator ces yog ib tug trustee uas raug tsev hais plaub teeb tsam"
Yog tias koj ho raug teeb tsa los ua tus neeg tswj thiab faib peev txheej rau lwm tus (executor), tab sis koj ho tsis muaj peev xwm ua tau tej hauj lwm no, ces koj muaj peev xwm tso cai rau State Trustees tswj tej hauj lwm no sawv cev rau koj tau thiab. Tsoom fwv lub tuam chav no yeej pab tej xwm txheej ntau yam thaum ib tug twg tas sim neej lawm.
Yog li ntawd tus neeg executor los yog administrator yuav tsum tau nrog tej neeg uas yuav tau txais tej peev txheej no tham thiab yuav tsum thov daim ntawv 'probate' tso.
Melbourne lub tsev hais plaub Supreme Court yeej tau siv cov kev txwv tsis pub zej tsoom tham los yog qhia txog tej lus iab liam txog tej nom tswv raug xiab nyiaj uas raug 'Wikileaks' ua paim quav hnub no uas yog hnub tim 30 lub 7 hli ntuj xyoo 2014 ntawm nroog Melbourne teb chaws Australia. Credit: Nigel Killeen/Getty Images
Probate yog dab tsi?
Probate ces yog daim ntawv tau los ntawm ib lub tsev hais plaub uas tso cai thiab lees paub tias tus executor los yog tus administrator tias yog tus neeg muaj cai los ua tus faib tej peev txheej no rau lwm tus.
Thiab Supreme Court yeej teev tej ntaub ntawv uas tej neeg thov daim ntawv probate no cia. Koj yeej muaj peev xwm mus txheeb tau ntawm Supreme Court Probate Registry tau ntawm thaj chaw uas koj nyob ntawd.
Leej twg yog cov yuav tau tej peev txheej no yog tias tsis sau ntawv faib peev txheej (Will) tseg?
Melissa Reynalds tshab txhais tias “Thaum muaj ib tug neeg tas sim neej yam tsis muaj daim ntawv faib peev txheej (Will), ces peb yuav hu cov xwm txheej no tias yog dying ‘intestate’.”
Tej xeev nyias yeej tau tsim nyias tej cai teev tsi ntsees tseg tias leej twg yog tus muaj cai yuav tau tej peev txheej no thiab tsim nyog tau txog pes tsawg feem pua.Melissa Reynolds
“Tus neeg uas tsim nyog tau tej peev txheej no ntau tshaj plaws muaj peev xwm sau ntawv mus thov daim ntawv probate, los yog lawv muaj peev xwm tso cai rau ib tug Public Trustee los ua tus tswj thiab faib tej peev txheej no."
Yog li ntawd cov kev faib tej peev txheej ntawm tus neeg tas sim neej yam tsis sau ntawv faib peev txheej tseg no thiaj li hu ua Succession Act.
Txawm tias ib lub xeev twg yeej sib txawv, los tej peev txheej feem ntau yeej ib txwm muab faib rau tus niam los yog tus txiv uas tseem muaj sia nyob ntawd, hos tej seem ntawd ces mam li muab faib rau tej me nyuam.
Yog thaum muaj ib tug txij nkawm los yog tus txij nkawm uas sib yuav tab sis tsis tau ua ntaub ntawv sib yuav raug cai (de facto) thiab ho tsis muaj me nyuam, ces tej peev txheej ntawm tus neeg tas sim neej ntawd yuav poob rau tus txij nkawm tseem muaj txoj siab nyob ntawd. Tab sis yog tias tus neeg tas sim neej ntawd ho tsis muaj txij nkawm los yog ho tsis muaj me nyuam thiab, ces tej peev txheej ntawd yuav raug muab faib rau tej txheeb ze uas ze nws tshaj plaws raws li tej cai Inheritence Act tau teev tseg.
Thiab yog tias tus neeg tas sim neej ntawd hos tsis muaj ib tug txheeb ze twg uas tsim nyog faib nws tej peev txheej rau hlo li thiab, ces tej peev txheej ntawd yuav poob rau nom tswv tug lawm.
Daim duab yees ze ze uas pom ib nkawm niam txwv muaj hnoob nyoog lawm ntsib thiab sab laj nrog ib tug kws paub sab laj txog tej ntaub ntawv ntawm tsev. Credit: shapecharge/Getty Images
Kuv tej luag hauj lwm them se yog dab tsi?
Neeg Australia yeej tsis them se dab tsi rau tej peev txheej uas tau los ntawm lwm tus, tab sis kuj muaj lwm yam luag dej num cuam tshuam txog nyiaj txiaj thiab.
Australia lub koom haum sau se (Australian Tax Office - ATO) yeej siv tej cai sau se thiab yog thaum koj muag ib lub tsev uas tau los ntawm cov kev faib peev txheej.
Akram El-Fahkri ces yog ib tug Certified Public Accountant. Nws tshab txhais tias ''yuav tsis tau them se dab tsi rau lub tsev ntawd yog tias koj tsuas siv ua lub tsev uas koj nyob xwb."
Txawm li cas los yeej muaj cov se them rau tej nyiaj tsam uas khwv tau los (Capital Gains Tax - CGT) thiab tsuas yog tias ntshe ho muab lub tsev tau los ntawm cov kev faib peev txheej ntawd muag rau lub sij hawm li ntawm ob xyoo xwb, yog li qhov zoo tshaj ces xav kom nrog tej kws paub zoo txog tej hauj lwm no sab laj.
Tej shares uas tau muab pauv ua nyiaj ntsuab lawm yuav tau them cov se CGT, los yog tej paj uas tau ntawm tej nyiaj faib peev txheej ntawd los yuav tsum tau qhia rau nom tswv thaum yus ua tax return (thov se rov qab) thiab.
Tej vaj tse faib peev txheej uas nyob txawv teb chaws
Kuj muaj peev xwm muag tau lub tsev txawv teb chaws ntawd rau lub sij hawm thawj ob xyoos uas tau lub tsev ntawd yam tsis tau them se dab tsi thiab.
Tab sis Mr El-Fahkri hais tias “Yog tias muab lub tsev ntawd muag rau lub sij hawm thawj ob xyoos thiab ho nqa tej nyiaj ntawd los rau teb chaws Australia lawm, ces txawm qhia rau nom tswv paub los Australia tej cai yeej teev tias tsis tau them se dab tsi.""
“Tab sis qhov teeb meem yuav muaj ntawd ces tsuas yog tias tej zaum ntshe ho muaj ib co cai twg tsi ntsees siv ntawm lub teb chaws uas yus muag lub tsev ntawd xwb. Ces tej zaum yog yus muag ces kuj yuav tau them se rau ntawm lub teb chaws ntawd xwb.''
Tsis tas li ntawd los yog tias yus ho tsis yog cov neeg nyob ruaj thiab ces ntshe yuav tau them cov se Special CGT thiab, thiaj xav kom qhov zoo tshaj plaws ces sab laj nrog tej kws.
codicil to a last will and testament and irrevocable trust being signed by a 50 year old woman. Credit: JodiJacobson/Getty Images
Kuv puas muaj peev xwm hais seb puas tau tej peev txheej no thiab?
Yog koj ntseeg tias koj muaj cai yuav tau txais tej peev txheej no thiab tab sis daim tawv faib peev txheej ho tsis teev koj npe, los sis yog ho tsis sau daim ntawv faib peev txheej tseg, ces koj yeej muaj cai hais raws li tsab cai Succession Act thiab. Peb hu tej xwm txheej no hu ua 'Publich Family Provision Claim.'
Supreme Court los yeej muaj peev xwm hloov tau daim ntawv faib peev txheej no thiab.
Txawm li cas los Mr Abad hais tias yeej tsis muaj ib tug twg cia li yuav ras los ua tus muaj cai tau tej peev txheej ib yam dab tsi kiag. Yus yuav tsum tau qhia kom tau qhov tseeb tias vim li cas yus thiaj mus hais.
Yus yuav tsum qhia kom tau tias muaj kev cuam tshuam nyiaj txiaj li cas thiab ho yuav ua rau yus tsis tau nyiaj txiaj siv li cas vim tus neeg ntawd tau nruam sim lawm, thiab daim ntawv faib peev txheej ntawd yeej tsis faib ib yam dab tsi kom txaus rau yus li. Ces thiaj tsis muaj ib tsab cai phua tau lub ntsiab meej thiab sai sai kiag tias yog li cas kiag, tab sis Supreme Court mam li txheeb tej xwm txheej cuam tshuam uas yus hais ntawd xwb.Florante Abad
Txawm tias tej kev faib peev txheej no yog tej yam ib chab sib chaw heev, los yeej muaj kev pab cuam los ntawm tej koom haum li thiab lub koom haum thiab. Lawv yeej muaj tej npe kws lij choj ntawm thaj chaw koj nyog uas paub hais koj tej lus thiab yeej paub zoo txog cov kev faib tej peev txheej thaum muaj ib tug neeg tas sim neej rau koj siv thiab.
Tsis tas li ntawd los koj yeej muaj peev xwm thov tau cov kev taw qhia pub dawb kom koj sau tau ib daim ntawv faib peev txheej (Will) los yog kom koj paub ua tus neeg tswj thiab faib peev txheej (executor) ntawm State Trustees websites ntawm lub xeev koj nyob thiab.
