ཨོ་སི་ཊོ་ལི་ཡ་ནི་རིག་གཞུང་བག་ཕེབས་པོའི་ལུང་པ་ཞིག་དང་། འདུ་འཛོམས་མ་འདྲ་བ་རེར་སྒྲིག་གཞི་དང་འགྲོ་ལུགས་འགྲོ་སྟངས་དེ་ཚོ་ངག་ཐོག་ནས་ཆེད་དུ་ངོ་སྤྲོད་བྱེད་མི་དགོས་པར། སྤྱི་ཚོགས་ཁྲོད་རང་བཞིན་གྱི་རྒྱུན་གནས་སུ་ཡོད་པའི་འགྲོ་སྟངས་དེ་ཚོ་ཨོ་སི་ཊོ་ལི་ཡའི་མི་རྣམས་ཀྱིས་ཤེས་ཀྱི་ཡོད།
ཨོ་སི་ཊོ་ལི་ཡའི་དམིགས་བསལ་གྱི་ཐུགས་སྤྲོ་དང་འདུ་འཛོམས་དེ་འདྲར་མི་ཚང་ཞིག་གི་ནང་ལ་འགྲོ་བ་ནི་རྒྱུན་ལྡན་གྱི་འགྲོ་སྟངས་ཤིག་རེད།
ཨོ་སི་ཊོ་ལི་ཡའི་ནང་གུས་ལུགས་སྐོར་གྱི་སློབ་གྲྭའི་འགན་འཛིན་ཛ་རེ་ཧྥེ་ཧར་ཌེས་ Zarife Hardy ཡི་གསུངས་དོན། ངའི་བསམས་པར་འདུ་འཛོམས་སྟབས་བདེ་ཤོས་དེ་མི་ཚོས་ཁང་པའི་ཕྱི་རོལ་ཏུ་འགྲོ་ནས་ཤ་སོགས་བསྲེགས་ནས་ BBQ བཟའ་རྒྱུ་དེ་རེད། མི་ཚོ་ཁྱུག་ཙམ་ཡོང་ནས་ཤ་སོགས་བསྲེགས་ནས་བཟའ་བ་དང་ཏོག་ཙམ་ལྷོད་ལྷོད་འདྲ་བྱེད་ནས་སྡོད་ཀྱི་རེད། དེ་ནི་ཧ་ཅང་སྟབས་བདེ་དེ་འདྲ་རེད། དེང་སང་ང་ཚོས་ཨོ་སི་ཊོ་ལི་ཡའི་ནང་དགུང་ཟས་གྲ་རྒྱས་ཚད་ལྡན་དེ་འདྲ་གོ་སྒྲིག་བྱས་ཡོད་པ་མཐོང་རྒྱུ་མི་འདུག སྔོན་མ་ཕྱི་ལོ་ ༡༩༨༠ དང་ ༩༠ ནང་ང་ཚོས་དེ་འདྲ་བྱེད་ཀྱི་ཡོད་པ་དྲན་སོས་ཀྱི་འདུག་ཅེས་གསུངས་འདུག
སྒྲིལ་སྲོལ་དང་ལྡན་པའི་ཐོག་ནས་ཞལ་ལག་གོ་སྒྲིག་ཞུ་བ་ནི་ཞལ་ལག་གཏོང་སྐབས་ཀྱི་གལ་གནད་གཙོ་བོ་དེ་མིན་ཡང་། སྐུ་མགྲོན་ཡོད་སྐབས་སྒྲིག་སྲོལ་དང་ལྡན་པའི་ཐོག་ནས་ཞལ་ལག་བཀྱག་རྒྱུ་ནི་གལ་ཆེན་པོ་རེད།
མཚམས་རེར་ཁྱེད་རང་གིས་ཁང་པའི་ནང་དང་ཡང་ན་ཁང་པའི་ཕྱི་རོལ་དེར་ BBQ ཤ་སོགས་བསྲེགས་ཀྱི་ཡོད་ཀྱང་། ཁྱེད་རང་སྦྱིན་བདག་ཡག་པོ་ཞིག་ཆགས་པར་གྲ་སྒྲིག་གང་ལེགས་བྱེད་དགོས་ཀྱི་ཡོད་པ་རེད་ཅེས་ལྕམ་ཧར་ཌེ་ལགས་ཀྱིས་གསུངས་དོན།
སྐུ་མགྲོན་སླེབས་སྐབས་ཁྱེད་རང་གིས་ཞལ་ལག་ཚང་མ་གྲ་སྒྲིག་ཚར་བ་བྱེད་དགོས་པ་ལས། ད་དུང་ཡང་ཐབ་ཚང་ནང་སྐོར་ར་རྒྱག་ནས་ལྷག་བསྡད་ན་ཡག་པོ་མེད། སྐུ་མགྲོན་འབྱོར་བ་དང་སྡོད་ས་ཅོག་ཙེ་དང་རྐུབ་བཀྱག་གྲ་སྒྲིག་ཚར་བ་དགོས་པ་དང་། སྐུ་མགྲོན་ལ་གཏུང་བྱ་བཀྱག་ཞོར་སེམས་རྩ་འཁོད་པོས་འཚམས་འདྲི་དང་ཁ་བརྡ་བྱེད་དགོས། མ་ཚད་དེར་ཡོད་མི་ཕན་ཚུན་དབར་ངོ་སྤྲོད་ཀྱིས་ཁྱེད་རང་གིས་གདན་འདྲེན་ཞུས་པའི་སྐུ་མགྲོན་རྣམས་སེམས་བག་ལྷོད་ཡོང་བར་བྱེད་དགོས་པ་རེད་ཅེས་གསུངས་འདུག
ལྕམ་ཧར་ཌེས་ལགས་ཀྱིས་གལ་སྲིད་ཁྱེད་རང་ནང་མི་དེ་དང་ཐད་ཀར་གཉེན་ཉེ་ཡིན་ན་མ་གཏོགས་མི་ཚང་གཞན་ཞིག་གིས་ནང་ལ་དགོང་ཟས་བཟའ་བ་སོགས་མགྲོན་པོར་འགྲོ་སྐབས་ལག་པ་སྟོང་པར་འགྲོ་མི་ཉན་སྐོར་བརྗོད་འདུག
སམ་ཤར་མཱ་ Sam Sharma ལགས་ནི་ཨོ་སི་ཊོ་ལི་ཡའི་རྒྱལ་སྤྱིའི་སློབ་ཕྲུག་ཚོགས་པ་དེ་གསར་འཛུགས་བྱེད་མཁན་དང་ད་ལྟ་ཚོགས་པ་དེའི་སྤྱི་ཁྱབ་འགན་འཛིན་ཞིག་རེད།
ཁོང་གིས་ནང་མི་གཞན་ཞིག་གི་ཁྱིམ་ལ་འགྲོ་བསྐྱོད་བྱེད་སྐབས་དཔེར་ན་ཆང་ཤེལ་དམ་གང་དང་། ཡང་ན་ཁ་ཟས་རིགས་སོགས་རྔན་ལ་དེ་འདྲ་འཁྱེར་རྒྱུ་གལ་ཆེན་པོ་རེད། དེས་གུས་ཞབས་མཚོན་གྱི་ཡོད། མ་ཚད་གཞན་ཞིག་གི་ཞལ་ལག་གྲ་སྒྲིག་དང་དེ་ལ་སྐད་གཏོང་སྐབས་ཁོང་ཚོར་ཁྱེད་རང་གིས་ངོས་ནས་ཅ་ལག་ག་རེ་འཁྱེར་ཡོང་དགོས་མིན་སྐད་ཆ་འདྲི་རྒྱུ་དེ་ཡང་བྱེད་སྟངས་ཡག་པོ་ཞིག་རེད། དེས་ཁོང་ཚོའི་གྲ་སྒྲིག་སྟབས་བདེ་རུ་དང་ལས་ཀ་ཉུང་དུ་གཏོང་སྲིད་ཅེས་གསུངས་འདུག
གཞན་ཡང་ཞལ་ལག་སོགས་ཐུགས་སྤྲོད་དང་བྱེད་སྒོ་གང་འདྲ་ཞིག་གི་སྐབས་སུ་ཡང་ཕྱིར་འབྱོར་དང་རྗེས་ལུས་མ་ཐེབས་པ་བྱེད་རྒྱུ་ཤིན་ཏུ་གལ་ཆེན་པོ་ཡིན་པས་མ་ཚད། མཛད་སྒོ་དང་བྱེད་སྒོ་ལ་དཔག་པའི་གྱོན་གོས་གྱོན་རྒྱུ་དེ་ཡང་གལ་ཆེན་ཆགས་ཡོད།
ཡང་སམ་ཤར་མཱ་ལགས་ཀྱིས་ཨོ་སི་ཊོ་ལི་ཡའི་ཐུགས་སྤྲོ་དེ་འདྲར་དུས་ཐོག་ཏུ་འབྱོར་རྒྱུ་ཧ་ཅང་གལ་ཆེན་པོ་བརྩི་བཞིན་ཡོད། དུས་ཚོད་ཧ་ཅང་རྗེས་ལུས་ཐེབས་ཚེ་ཞལ་ལགས་རྫོགས་སྲིད། དེ་དང་ཆབས་ཅིག་ཁྱེད་རང་མཉམ་ཞུགས་བྱེད་སའི་ཐུགས་སྤྲོ་དང་བྱེད་སྒོ་དེ་ལ་དཔག་པའི་གྱོན་གོས་འཚམ་པ་ཞིག་གྱོན་དགོས། ཡང་མཚམས་རེར་ཤ་སྲེག་ BBQ ཟ་བ་དེ་འདྲར་མཉམ་ཞུགས་བྱེད་སྐབས་ཁྱེད་རང་གིས་གྱོན་གོས་ཧ་ཅང་ཚད་ལྡན་དེ་འདྲ་དམིགས་བསལ་གྱོན་དགོས་དོན་མེད། མཚམས་རེར་སྦྱིན་བདག་ལ་ཞལ་ལག་བཟོ་རོགས་སོགས་རོགས་པ་བྱེད་རྒྱུ་དེ་ཡང་གལ་ཆེན་པོ་རེད། མ་ཚད་གྲ་སྒྲིག་བྱེད་རོགས་དང་ཐུགས་སྤྲོ་ཚར་ནས་གཙང་མ་ཡང་བཟོ་རོགས་སོགས་བྱེད་དགོས། ཕྱིར་མ་ལོག་གོང་ལ་སྦྱིན་བདག་ལ་ཐུགས་རྗེ་ཆེ་ཞུ་རྒྱུ་དེ་ཡང་མ་བརྗེད་པ་བྱེད་དགོས་པ་རེད་ཅེས་གསུངས་འདུག
