ལེ་ཚན་འདིའི་ནང་ཨོ་སི་ཁྲུ་ལི་ཡའི་ནང་གཞི་རྩ་ཕྲུ་གུ་དང་མི་དར་མ་རྣམས་ལ་སོའི་སྨན་བཅོས་ལྟ་སྐྱོང་ག་རེ་ཡོད་མེད་དང་། གཙོ་བོར་ཞབས་ཞུ་ག་རེ་ག་རེ་ཡོད་མེད། འགྲོ་སོང་ཆེ་ཆུང་། ཁྱེད་དང་ཁྱེད་ཀྱི་ནང་མི་སོགས་དགོས་ངེས་ཅན་རྣམས་ལ་སོའི་འཕྲོད་བསྟེན་ལྟ་སྐྱོང་ག་རེ་རག་གི་ཡོད་མེད་སྐོར་ངོ་སྤྲོད་ཞུ་རྒྱུ་ཡིན།
སོའི་འཕྲོད་བསྟེན་ལྟ་སྐྱོང་ནི་རྒྱུན་ལྡན་སོ་བརྟག་དཔྱད་སྨན་བཅོས་དང་། ཀོང་དོང་རྒྱོང་བ། གཙང་བཟོ། གཞན་ཡང་ཁའི་ནང་སྨན་བཅོས་རིགས་ཚུད་ཀྱི་ཡོད།
སོའི་སྨན་པ་ལ་མཚོན་ན། སོའི་ནད་པ་རིགས་མང་ཤོས་སྤྱིར་ཡོངས་ཀྱི་སོའི་སྨན་པ་རྩར་འགྲོ་བཞིན་ཡོད། སྤྱིར་ཡོངས་ཀྱི་སོའི་སྨན་པ་ཚོས་ཁོང་ཚོའི་ལག་ལེན་ཁྱབ་ཁོངས་ནང་སོ་སྨན་བཅོས་བྱེད་ཐབས་རིགས་འདྲ་མིན་སྣ་ཚོགས་ཤིག་ལག་བསྟར་བྱེད་ཀྱི་ཡོད།
གྲོང་ཁྱེར་མེལ་བྷོན་ནང་བརྟེན་གཞི་བྱས་པའི་སོའི་སྨན་པ་ཝི་སམ་ཨ་ཏི་ཡ་ Dr Wessam Atteya ལགས་ནི་སོ་སྤྱི་ཡོངས་ཀྱི་སྨན་པ་ཞིག་ཡིན་པ་དང་། ཁོང་ནི་ཨོ་སི་ཁྲུ་ལི་ཡའི་ནང་སོའི་སྐོར་སྨན་བཅོས་བྱས་ནས་ལོ་ ༡༥ ཙམ་ཉམས་མྱོངས་ཡོད་པ་རེད།
ཁོང་གིས་སོ་སྤྱི་ཡོངས་ཀྱི་སྨན་པ་ཚོས་སོའི་སྨན་བཅོས་སྐོར་མང་པོ་ཞིག་ལག་བསྟར་ཐུབ་ཀྱི་ཡོད་ཀྱང་ཚད་བཀག་ཡོད་པ་རེད། མཚམས་རེར་སོར་སྨན་བཅོས་དམིགས་བསལ་དེ་འདྲ་དགོས་གལ་བྱུང་ཚེ་སོའི་སྨན་པ་ཆེད་ལས་པ་དེ་འདྲར་ངོས་སྦྱོར་བྱེད་ཀྱི་ཡོད་པ་རེད། ཨོ་སི་ཁྲུ་ལི་ཡའི་ནང་སོ་དམིགས་བསལ་སྨན་བཅོས་བྱེད་མཁན་ཆེད་མཁས་པ་དེ་འདྲ་ཡོད་པ་རེད་ཅེས་འགྲེལ་བརྗོད་གནང་འདུག
སྨན་པ་ཨ་ཐེ་ཡ་ Dr Atteya ཡིས་དེ་བཞིན་ཁའི་འཕྲོད་བསྟེན་གྱི་སྨན་པ་ཡང་ཡོད་པ་དང་། ཆེད་ལས་མི་སྣ་དེ་དག་གིས་སོ་སྔོན་འགོག་དང་སླར་གསོའི་བཅས་ཀྱི་ཆེད་སོ་གཙང་མ་བཟོ་བ་དང་སོ་བརྟག་དཔྱད་དང་གཞན་ཡང་ཁོང་ཚོར་སོ་གཅེས་སྤྲད་བྱེད་སྟངས་སྐོར་སྦྱོང་བརྡར་སྤྲད་ཡོད་པ་རེད་ཅེས་བརྗོད་འདུག
ཁོང་ཚོས་སོ་ནད་པ་རྣམས་ལ་ཁ་དང་སོའི་འཕྲོད་བསྟེན་བྱེད་སྟངས་དང་ན་ཚ་སྔོན་འགོག་བྱེད་སྟངས་སོགས་སློབ་སྦྱོང་སྤྲོད་ཀྱི་ཡོད།
ཨོ་སི་ཁྲུ་ལི་ཡའི་ནང་སྒེར་གྱི་སྨན་ཁང་དང་གཞུང་གི་མི་མང་སྨན་ཁང་སོགས་སོ་སྨན་བཅོས་བྱེད་ས་སྨན་ཁང་མང་པོ་ཞིག་ཡོད་པ་རེད། གཞུང་གི་མི་མང་སྨན་ཁང་ནང་མཛེས་བཟོ་མ་ཡིན་པའི་སོ་སྨན་བཅོས་རིགས་རིན་གོང་དམའ་མོ་ལས་སྤྲད་དགོས་ཀྱི་མེད་ཅེས་སྨན་པ་ཨ་ཐེ་ཡ་ Dr Atteya ལགས་ཀྱིས་འགྲེལ་བརྗོད་གནང་འདུག
ཡིན་ན་ཡང་ཁོང་གིས་སྒེར་གྱི་སྨན་ཁང་དེ་ཚོ་སོ་སོ་རང་ངོས་ནས་དུས་ཚོད་བཟོ་བ་དང་། སྨན་པ་སུ་ཞིག་དགོས་མིན་བདམ་ག་བྱེད་ཆོག་གི་ཡོད་སྐོར་བརྗོད་འདུག
གཞུང་གི་སྤྱི་དམངས་སྨན་ཁང་ཁག་ལ་སོ་སྨན་བཅོས་བྱེད་མཁན་མང་པོ་ཞིག་ཡོད་སྟབས། དེའི་རྐྱེན་པས་དུས་ཆད་བཟོས་ནས་ཀྱང་དུས་ཡུན་རིང་པོར་སྒུག་དགོས་ཀྱི་ཡོད་པ་རེད། དེས་མ་ཚད་ནད་པ་ཚོས་ཞབས་ཞུ་ཆེད་དངུལ་ཡང་ཏོག་ཙམ་སྤྲོད་དགོས་ཀྱི་ཡོད།
སྒེར་གྱི་སྨན་ཁང་ཁག་ལ་སོ་སྨན་བཅོས་བྱས་ཚེ་གླ་ཆ་ཆ་ཚང་སོ་སོ་རང་ངོས་ནས་སྤྲོད་རྒྱུ་དང་། ཡང་ན་གལ་སྲིད་ཁྱེད་རང་ལ་སྒེར་གྱི་སྨན་བཅོས་འགན་ལེན་བཟོས་ཡོད་ཚེ་དེ་ནས་སྤྲོད་དགོས་ཀྱི་ཡོད་པ་རེད།
སྨན་པ་ཨ་ཐེ་ཡ་ Dr Atteya ལགས་ཀྱིས་སོ་སྨན་བཅོས་ཞབས་ཞུ་དེ་ཨོ་སི་ཁྲུ་ལི་ཡའི་ནང་མི་སེར་དང་གཏན་སྡོད་བྱས་མཁན་རྣམས་ལ་ཡོད་པའི་སྨན་བཅོས་འགན་ལེན་ཞབས་ཞུ་ཐོབ་ཐང་ Medicare ནང་ཚུད་ཀྱི་ཡོད་མ་རེད་ཅེས་འགྲེལ་བརྗོད་བྱས་འདུག
ཁོང་གིས་ Medicare དེ་བྱིས་པ་དང་ཕྲུ་གུ་དེ་ཚོར་གཅིག་པུར་སོ་སྨན་བཅོས་ཐོབ་ཐང་རག་གི་ཡོད་སྐོར་བརྗོད་འདུག
ཡིན་ན་ཡང་རྒྱལ་ཁབ་ཀྱི་སྤྱི་ཚོགས་ཉེན་སྲུང་ངོ་ཚབ་ལས་ཁུངས་སོགས་ལས་མི་མང་གི་འཕྲོད་བསྟེན་འགན་ལེན་ཞབས་ཞུ་དེ་ཚོའི་ཐོབ་ཐང་ཡོད་མཁན་ཚོར་མཚམས་རེར་འགན་ལེན་ཞབས་ཞུ་དེ་རིགས་ནས་མི་མང་ལ་སོ་སྨན་བཅོས་སོགས་ཀྱི་ཐད་རོགས་རམ་གནང་གི་ཡོད་སྐོར་བརྗོད་འདུག
སྨན་པ་ཨ་ཐེ་ཡ་ Dr Atteya ལགས་ཀྱིས་ཆུང་དུས་ཁ་དང་སོའི་འཕྲོད་བསྟེན་བདེ་ཐང་མིན་པའི་མི་རྣམས་ཆེན་པོ་ཆགས་དུས་སུ་ཡང་ཁ་དང་འཕྲོད་བསྟེན་བདེ་ཐང་ལ་ཤུགས་ཆེ་གནོད་ཀྱི་ཡོད་པས། ཕྲུ་གུ་རྣམས་ཆུང་དུས་ནས་སོའི་འཕྲོད་བསྟེན་ལྟ་སྐྱོང་རག་རྒྱུ་གལ་ཆེན་པོ་རེད་ཅེས་གསུངས་འདུག
