ཨོ་སི་ཊོ་ལི་ཡའི་རྒྱལ་ས་ཁེམ་བྷེ་ར་བོད་རིགས་མཐུན་ཚོགས་ཀྱིས་འགན་འཁུར་གོ་སྒྲིག་འོག་ལ་ས་གནས་དེར་གནས་སྡོད་བྱས་ཡོད་པའི་བོད་མི་རྣམས་ལོ་ལྟར་རིག་གཞུང་སྣེ་མང་གི་དུས་སྟོན་ནང་མཉམ་ཞུགས་བྱེད་ཀྱི་ཡོད་པ་དང་། འདི་ལོའི་གཞུང་དུས་སྟོན་དེའི་ནང་བོད་མི་ཚོས་བོད་ཀྱི་གཞས་དང་ཞབས་བྲོ་འཁྲབ་པ་དང་། ཐོན་མི་བོད་ཡིག་སློབ་གྲྭའི་དགེ་སློབ་སོགས་ཀྱིས་གོམ་བགྲོད་ནང་གཡག་དང་བཀྲིས་ཞོལ་པ་འཁྲབ་པ་པ། མི་མང་སྟོང་ཕྲག་མང་པོའི་གོམ་བགྲོད་སྐབས་བོད་མི་ཚོས་བོད་ཀྱི་རྒྱལ་དར་དང་༧གོང་ས་མཆོག་གི་སྐུ་པར་གདན་འདྲེན་ཞུས་ནས་མཉམ་གནང་འདུག
མ་ཚད་རིག་གཞུང་དུས་སྟོན་དེའི་སྐབས་ཁྲོམ་རའི་ནང་བོད་ཀྱི་རྒྱལ་དར་དང་། རླུང་རྟ་གང་མང་བཏགས་པ་སོགས་བྱས་ནས་བོད་མིའི་རིག་གཞུང་གི་རྣམ་པ་ཤུགས་ཆེ་མངོན་ཐབས་དང་བོད་མིའི་ཅ་དངོས་གྱོན་གོས་སོགས་གཙོང་བ། བོད་ཟས་མི་འདྲ་བ་སྣ་ཚོགས་བཟོས་ནས་གཙོང་བས་སྐབས་དེར་རྒྱལ་ས་ཁེམ་བྷེ་རའི་སྤྱི་ཁྱབ་བློན་ཆེན་སྐུ་ཞབས་ཨན་ཌོར་བྷར་ Andrew Barr མཆོག་བོད་མིའི་ཟ་ཁང་ཞིག་གི་ནང་ཕེབས་ནས་མོག་མོག་མཆོད་པ་དང་། བོད་མིའི་རིག་གཞུང་ལ་བསྔགས་བརྗོད་དང་བོད་མི་རྣམས་ཀྱིས་ཐེངས་འདིའི་རྒྱལ་ཡོངས་རིག་གཞུང་དུས་སྟོན་ནང་མཉམ་ཞུགས་དང་ཆ་ཤས་གང་ལེགས་བླངས་གནང་བར་ཐུགས་རྗེ་ཆེ་ཞེས་གསུངས་གནང་འདུག
མ་ཚད་བོད་མིའི་ཟ་ཁང་ཞིག་གི་མདུན་དུ་མི་ཚོགས་མང་པོ་ཞིག་བང་སྒྲིག་ཞལ་ལག་ཉོར་རྒྱུར་སྒུག་ནས་བསྡུད་པ་དང་། ཐེངས་འདིའི་རིག་གཞུང་དུས་སྟོན་ནང་བོད་རིགས་མཐུན་ཚོགས་ཀྱིས་སྣེ་ཁྲིད་འོག་ས་གནས་བོད་མི་ཚོས་འབད་བརྩོན་གྱིས། བོད་ཀྱི་རྩ་དོན་འགྲེལ་བརྗོད་དང་རིག་གཞུང་ངོ་སྤྲོད་གང་ལེགས་བྱུང་ནས། ས་གནས་མི་མང་རྣམས་ཀྱིས་བོད་དང་བོད་ཀྱི་རིག་གཞུང་ལ་དམིགས་བསལ་དོ་སྣང་དང་ཡིད་དབང་འཕྲོག་ཐུབ་པ་བྱུང་ཡོད་འདུག
