Harding Miller ཞེས་པའི་ཤེས་ཡོན་གྱི་ཐེབས་རྩ་ཁང་དེས་གཙོ་བོ་བུད་མེད་ཚོའི་ཤེས་ཡོན་དང་ནུས་སྟོབས་གོང་འཕེལ་གཏོང་ཆེད་དུ་སློབ་ཡོན་མཐུན་འགྱུར་སྦྱར་བཞིན་ཡོད་པ་དང་། ཤེས་ཡོན་ཐེབས་རྩ་ཁང་དེས་སློབ་ཡོན་གྱིས་ཁྱེད་ཀྱི་མི་ཚེ་འགྱུར་བ་གཏོང་ཐུབ་ལ། ཤེས་ཡོན་གྱིས་འཛམ་གླིང་འགྱུར་བ་གཏོང་ཐུབ་ཅེས་བརྗོད་འདུག
ཡང་བུ་མོ་བསྟན་འཛིན་འཆི་མེད་ལགས་ཀྱིས་ད་ཐེངས་ཀྱི་སློབ་ཡོན་འདིའི་ཐོག་ནས་ཆེད་སྦྱོང་དང་འཛིན་གྲྭ་ ༡༢ ཐོན་རྗེས་ཨ་རིར་ཆབ་སྲིད་ཚན་རིག་སློབ་སྦྱོང་བྱེད་ནས་མ་འོངས་པར་བོད་མི་རིགས་ལ་ཕན་ཐོགས་ཡོད་པའི་ལས་ཀ་ཞིག་བྱ་ཐུབ་རྒྱུའི་དམིགས་ཡུལ་ཡོད་སྐོར་འགྲེལ་བརྗོད་གནང་སོང་།
བུ་མོ་བསྟན་འཛིན་འཆི་མེད་ལགས་ནི་དུས་རྒྱུན་སློབ་གྲྭའི་ནང་ཀུན་སྤྱོད་དང་སྦྱང་འབྲས་ལེགས་པོ་ཡོད་པས་བྱ་དགའ་ཐེངས་མང་རག་མྱོངས་ཡོད་པས་མ་ཚད། སློབ་མའི་འགོ་ཁྲིད་ School Leader ཡང་ཐེངས་མང་གནང་མྱོངས་ཡོད་འདུག ལྷག་པར་དུ་ཁོ་མོ་ཁུན་སི་ལན་ཌི་མངའ་སྡེའི་ Volleyball རུ་ཁག་ནང་བདམས་ཐོན་བྱུང་ནས། འདི་ལོར་མངའ་སྡེ་གཞན་ཞིག་དང་མཉམ་དུ་རྩེད་འགྲན་ནང་མཉམ་ཞུགས་བྱས་ཡོད་འདུག
བུ་མོ་བསྟན་འཛིན་འཆི་མེད་ལགས་ནི་ཕྱི་ལོ་ ༢༠༡༤ ལོར་ཕ་མ་གཉིས་དང་ལྷན་དུ་རྒྱ་གར་ནས་ཨོ་སི་ཊོ་ལི་ཡར་འབྱོར་ཡོད་པ་དང་། ཁོ་མོ་དུས་རྒྱུན་སློབ་སྦྱོང་ལ་དོ་སྣང་འབད་བརྩོན་ཅན་ཞིག་ཡིན་སྐོར་ཁོ་མོའི་ཨ་མ་ཚོགས་གཉིས་ལྷ་མོ་ལགས་ཀྱིས་འགྲེལ་བརྗོད་གནང་སོང་།
ཡང་ཨ་མ་ཚོགས་གཉིས་ལྷ་མོ་ལགས་ཀྱིས་བུ་མོ་བསྟན་འཛིན་འཆི་མེད་ལ་སློབ་ཡོན་འདི་འདྲ་ཞིག་རག་པར་དགའ་ཚོར་ཆེན་པོ་བྱུང་བ་དང་། གནས་ཚུལ་འདི་གཞན་ལ་འགྲེལ་བརྗོད་བྱེད་དགོས་དོན་ནི་མ་འོངས་པར་བོད་པའི་ཕྲུ་གུ་མང་པོ་ཞིག་ལ་སློབ་ཡོན་དང་གོ་སྐབས་འདི་འདྲ་རག་ཐུབ་རྒྱུའི་རེ་བ་དང་། གོ་སྐབས་འདི་འདྲ་ཡོད་པ་ཤེས་རྟོགས་ཀྱི་ཆེད་དུ་ཡིན་སྐོར་འགྲེལ་བརྗོད་གནང་སོང་།
Harrding Miller ཞེས་པའི་ཤེས་ཡོན་ཐེབས་རྩ་ཁང་དེའི་དྲ་ཚིགས་ཁ་བྱང་ནི་
དང་། དྲ་ཚིགས་དེའི་ཐོག་ནས་ཐེབས་རྩ་ཁང་དེའི་སློབ་ཡོན་གནང་སྟངས་སོགས་ཀྱི་སྐོར་གནས་ཚུལ་མང་པོ་ཞིག་བཀོད་འདུག
