དེ་རིང་གོ་ངོ་རྒོལ་ལས་འགུལ་དེའི་ནང་། བོད་མི་ཚོས་བོད་ཀྱི་བདག་པོ་བོད་མི་ཡིན། བོད་ནང་གཏོར་བཤིག་གི་ལས་འཆར་འཕྲལ་དུ་མཚམས་འཇོག་དགོས་པ་དང་། ང་ཚོ་གཞིས་ལུས་མི་མང་གི་རྒྱབ་ལ་ཡོད་སོགས་དུས་ཡུན་ཆུ་ཚོད་འགའ་ཤས་རིང་ངོ་རྒོལ་སྐད་འབོད་བྱས།
སྐབས་དེར་སིཌ་ནིང་བོད་རིགས་མཐུན་ཚོགས་ཀྱི་ཚོགས་གཙོ་རྔ་པ་ཆོས་འཛིན་ལགས་ཀྱིས་བོད་ནང་ང་རང་ཚོའི་དགེ་འདུན་པ་དང་མི་མང་ཚོས་འཚེ་མེད་ཞི་བའི་ལམ་ནས་ཞུ་བ་འཐེན་ནས་ལས་འགུལ་སྤེལ་གྱི་ཡོད་པ་རེད། ཡིན་ན་ཡང་ད་དུང་རྒྱ་ནག་གཞུང་གིས་བོད་མི་དེ་ཚོར་བཙོན་འཇུག་དང་མནར་གཅོད་གཏོང་གི་ཡོད་དུས་ང་ཚོ་དེ་རིང་འདིར་མི་ཡོང་ཀ་མེད་ཆགས་ཡོད་པ་རེད།
དེ་རིང་ང་ཚོས་བོད་ནང་དུ་ཡང་དག་པ་མ་ཡིན་པ་དང་འགྲོ་བ་མིའི་ཐོབ་ཐང་དང་མ་མཐུན་པ། གནས་ལུགས་དང་མ་མཐུན་པ། དྲང་བདེན་དང་མ་མཐུན་པ། མཐའ་ན་མི་ཞིག་གི་འཚོ་གནས་དང་མ་མཐུན་པའི་ཐག་གཅོད་འདི་འདྲ་ཞིག་བཙན་འགེལ་བྱེད་ཡོང་དུས་ང་ཚོས་འཁུར་ཐུབ་ཀྱི་མི་འདུག
མཉམ་འབྲེལ་རྒྱལ་ཚོགས་གཙོ་བོར་གྱུར་པའི་ཁྱེད་རང་ཚོས་ཁ་སྙན་པོ་གཅིག་པུ་མ་ཡིན་པར་ཁྱེད་རང་ཚོས་དོན་དངོས་ཡོད་ཆ་ནས་བོད་ནང་དུ་ཞིབ་འཇུག་བྱེད་དགོས་ཀྱི་འདུག བོད་ནང་གི་རང་དབང་ཐོག་ལ་ལྟ་རྟོགས་བྱེད་དགོས་ཀྱི་འདུག་ཅེས་འབོད་སྐུལ་ཞུ་བཞིན་ཡོད།
གཉིས་ནི་རྒྱ་ནག་གཞུང་གིས་ང་ཚོ་བོད་མི་རིགས་ཀྱི་བདེན་མཐའ་མ་བསལ་བར་དུ་ཞི་བདེ་ལྷིང་འཇགས་ཤིག་ཡོང་ཐབས་ཡོད་མ་རེད། ཉེ་ཆར་རྒྱ་ནག་མི་མང་ཚོགས་ཆེན་ཐོག་ཞི་ཅིང་ཕིན་གྱིས་ང་ཚོ་རྒྱ་ནག་ལ་མི་རིགས་ ༥༦ ཡོད། ཚང་མ་འཆམ་མཐུན་ཡོད་ཅེས་བཤད་བཞིན་འདུག ཡིན་ན་ཡང་དེ་འདྲའི་འཆམ་མཐུན་ཞིག་ག་པར་འདུག་ཅེས་གསུངས་སོང་།
ཡང་ཁོང་གིས་མ་ཚད་ང་ཚོ་བོད་མི་རིགས་རྩ་མེད་གཏོང་བའི་ཆེད་དུ་ང་ཚོ་བོད་ནང་གི་ཕྲུ་གུ་དེ་ཚོར་རྒྱ་མིའི་སྐད་ཡིག་སློབ་པ་དང་། རྒྱ་མིའི་གོམས་གཤིས་སློབ་པ་སོགས་མི་རིགས་རྩ་མེད་གཏོང་ཐབས་ཀྱི་སྲིད་བྱུས་ལ་མོས་མཐུན་རྩ་བ་ནས་མེད།
དེ་བཞིན་ཉེ་ཆར་རྒྱ་ནག་གི་སྲིད་བྱུས་ལས་འཆར་དེ་བོད་མིའི་མངོན་འདོད་དང་མ་མཐུན་པ། འགྲོ་བ་མིའི་ཐོབ་ཐང་དང་མ་མཐུན་པ། རང་བྱུང་ཁོར་ཡུག་དང་མ་མཐུན་པའི་ཐག་གཅོད་ཅིག་ཡིན་དུས་དེ་རིང་ང་ཚོ་འདིར་ངོ་རྒོལ་བྱེད་པར་ཡོང་བ་ཡིན།
ཁྱེད་རང་ཚོ་ངོས་ནས་བྱ་སྤྱོད་དེ་མཚམས་འཇོག་བྱེད་རོགས། ང་ཚོ་དེ་ལ་མོས་མཐུན་རྩ་བ་ནས་མེད། དེ་ནི་ཁྱེད་རང་ཚོས་ཧམ་པ་དང་། བཙན་ཤེད་ཀྱི་བྱ་སྤྱོད་ཅིག་ཡིན་པས་དེ་ལ་རྩ་བ་ཉིད་ནས་མོས་མཐུན་མེད་ཅེས་གསུངས་སོང་།
