གསར་དུ་འབྱོར་མཁན་སྐྱེས་པ་མང་པོ་ཞིག་གི་སེམས་ནང་ལ་ཨོ་སི་ཊོ་ལི་ཡའི་ནང་མི་ཚེའི་འཚོ་བ་ཡག་པོ་ཞིག་སྐྱེལ་ཐུབ་རྒྱུའི་རེ་བ་དང་རྨི་ལམ་ཡོད་ཀྱང་། རྨི་ལམ་དེ་མངོན་འགྱུར་ཡོང་བར་འགོག་རྐྱེན་སྣ་ཚོགས་ཤིག་འཕྲད་བཞིན་ཡོད་པས་མ་ཚད། ནང་མིའི་འབྲེལ་བ་ལའང་དཀའ་ངལ་སྣ་ཚོགས་ཤིག་འཕྲད་བཞིན་ཡོད་པ་རེད།
རྒྱལ་སྤྱིའི་གཞིས་ཆགས་ཞབས་ཞུ་དང་ཆགས་སྤྱོད་དང་ནང་མི་དྲག་སྤྱོད་སྐོར་ལྟ་རྟོགས་བྱེད་མཁན་གྱི་ཚོགས་པ་ SSI ཡི་ལག་བསྟར་འགན་འཛིན་ Jessica Harkins ཡི་ཁྱིམ་ཚང་སྲ་བརྟན་གཏོང་བ་ ཞེས་པའི་ལས་རིམ་དེ་ཨོ་སི་ཊོ་ལི་ཡའི་ནིའུ་སའོ་ཐི་ཝལ་མངའ་སྡེའི་འབྲེལ་ལམ་ ཞེས་པའི་ཚོགས་པ་དང་མཉམ་དུ་སྐྱེས་པ་ལོ་ན་ ༡༨ ཡན་སུ་ཞིག་གིས་ནང་མི་ཉེ་འབྲེལ་ལ་མནར་གཅོད་ཀྱི་སྤྱོད་ལམ་དང་དྲག་སྤྱོད་བྱེད་མྱོངས་མཁན་དེ་ཚོའི་ཆེད་དུ་ལས་དོན་སྤེལ་བཞིན་ཡོད་པ་རེད།
ཁོ་མོས་སྐྱེས་པ་ཚོའི་སྤྱོད་ལམ་སྒྱུར་བཅོས་ཀྱི་ལས་འཆར་ ཞེས་པ་ཞིག་འདས་པའི་ལོ་བཅུ་གྲངས་ཤིག་གི་རིང་ཨོ་སི་ཊོ་ལི་ཡའི་ནང་ལག་བསྟར་བྱས་ཡོད་པ་དང་། ད་དུང་ཡང་རིག་གཞུང་མ་འདྲ་བ་ཞིག་གིས་བཅིངས་པའི་མི་ཞིག་ལུང་པ་གསར་པ་ཞིག་གི་ནང་སླེབས་ནས་འཚོ་བ་སྐྱེལ་སྟངས་གང་འདྲ་བྱེད་དགོས་མིན་སྐོར་རོགས་རམ་དང་སུ་ཞིག་རྗེས་ལུས་མ་ཐེབས་པ་བྱེད་ཀྱི་ཡོད་སྐོར་བརྗོད་འདུག
ཨོ་སི་ཊོ་ལི་ཡའི་ནང་ལས་རིམ་མང་པོ་ཞིག་གཙོ་བོར་དབྱིན་སྐད་ཤོད་མཁན་ལ་དམིགས་པ་ལྟར་བུར་ཡོད་ཅིང་། དེས་སྤྱི་སྟངས་དབྱིན་ཇི་དང་ཨོ་སི་ཊོ་ལི་ཡའི་རིག་གཞུང་ཐོག་ནས་སྐད་ཡིག་དང་རིག་གཞུང་སྣ་ཚོགས་ཡིན་པའི་སྐྱེས་པ་རྣམས་ཀྱི་དགོས་མཁོ་ཤེས་རྟོགས་མི་ཐུབ་པ་ལྷག་འགྲོ་བཞིན་ཡོད། ཁོང་ཚོ་ཁ་ཤས་ལ་སྐད་སྒྱུར་གྱི་མཐུན་རྐྱེན་མ་རག་པའི་རྐྱེན་གྱིས་ཁོང་ཚོ་ལས་རིམ་དེ་དག་ལ་མཉམ་ཞུགས་བྱེད་ཐུབ་ཀྱི་མེད་ཅེས་གསུངས་འདུག
ཁྱིམ་ཚང་སྲ་བརྟན་གྱི་ལས་རིམ་དེ་མི་སྒེར་གྱི་གནད་དོན་ལས་རིམ་དང་ཡང་ཚོགས་ཆུང་མཉམ་རུབ་ཀྱི་ལས་དོན་སོགས་ལས་རིམ་མ་འདྲ་བ་ཡོད་པ་དང་། ཚོགས་ཆུང་མཉམ་རུབ་ཀྱི་ལས་རིམ་དེ་ཨ་རབ་སྐད་ནང་དུས་ཡུན་བདུན་ཕྲག་ ༡༨ རིང་ལས་རིམ་སྤེལ་ཡོད་པས་མ་ཚད། དེ་སྔོན་ཏཱ་མལ་གྱི་སྐད་ནང་ལ་ཡང་ལས་རིམ་དེ་འདྲ་ཞིག་སྤེལ་ཡོད་པ་རེད།
ང་ཚོས་ཚོགས་སྡེ་འདི་ཚོ་བདམས་པ་ཡིན་གང་ཡིན་ཟེར་ན་དུས་རྒྱུན་ང་ཚོ་ཚོགས་སྡེ་འདི་ཚོ་དང་མཉམ་དུ་ལས་ཀ་བྱེད་བཞིན་ཡོད། ང་ཚོ་ཚོགས་པ་འདི་ཚོ་དང་འབྲེལ་བ་ཡོད། ཚོགས་སྡེ་ཞིག་ཚོགས་སྡེ་གཞན་དག་ལས་དྲག་སྤྱོད་ཀྱི་གནས་ཚུལ་མང་བ་འབྱུང་གི་ཡོད་པའི་བདེན་དཔངས་དེ་འདྲ་གང་ཡང་མེད་པ་ང་ཚོས་ཤེས་ཀྱི་ཡོད། ང་ཚོས་ཤེས་གསལ་ལྟར་ན་གཞིས་སྤོ་ལ་ཡོང་མཁན་གྱི་བུད་མེད་དེ་ཚོར་དཔེར་ན། ལམ་ལུགས་ཀྱིི་འགོག་རྐྱེན་དང་། སྐད་ཡིག་གི་འགོག་རྐྱེན། རིག་གཞུང་གི་འགོག་རྐྱེན། གཞི་སྤོའི་འགོག་རྐྱེན་སོགས་ཁོང་ཚོ་ལའང་འགོག་རྐྱེན་མང་པོ་ཞིག་ཡོད་པ་རེད་ཅེས་གསུངས་འདུག
ལེ་བྷ་ནེ་སི་ལ་སྐྱེས་ཤིང་སྔོན་མ་ཁྱིམ་ཚང་སྲ་བརྟན་ལས་རིམ་གྱི་མཐུན་རྐྱེན་སྦྱོར་མཁན་གྷ་སན་ནུའོ་ཇེམ་ Ghassan Noujaim ལགས་ཀྱིས་རིག་གཞུང་ཁ་ཤས་ནང་སྐྱེས་པ་ཚོ་རྟགས་པར་ཁྱིམ་ཚང་གི་འགོ་ཁྲིད་ལྟར་བུ་བརྩི་མཁན་ཡོད་པ་རེད། ཁྱིམ་ཚང་དེའི་སྐྱེས་པ་ནི་འཚོ་བ་སྦྱར་མཁན་དང་། དེའི་ངག་ལ་ཉན་དགོས་པ། དེའི་རྗེས་སུ་འབྲངས་དགོས་པའི་ལྟ་ཚུལ་དེ་འདྲ་ཡོད་པ་རེད་ཅེས་གསུངས་འདུག
སྐྱེས་པ་ཚོས་ཁོང་ཚོ་ནི་ནང་གི་འཚོ་བ་སྦྱར་མཁན་ཞིག་ཡིན་པའི་བསམ་ཚུལ་དང་། ཁྱིམ་ཚང་གིས་ཁོང་གི་ངག་ལ་ཉན་དགོས་པ་སོགས་ཀྱི་ལྟ་བ་ཡོད་ཀྱང་དེ་དང་ཆབས་ཅིག་ལུང་པ་གསར་པ་ཞིག་གི་ནང་གཞིས་ཆགས་པའི་བརྒྱུད་རིམ་ནང་ཁོང་ཚོར་འཚོ་བའི་གནས་སྟངས་ལ་སེམས་ཁྲལ་སོགས་སེམས་ལ་དཀའ་ངལ་སྣ་ཚོགས་ཤིག་ཡོང་གི་ཡོད། ང་ཚོའི་ལས་རིམ་འདིའི་ནང་མཉམ་ཞུགས་བྱེད་མཁན་བརྒྱ་ཆ་ ༨༠ ཙམ་ཞིག་ཁོང་ཚོ་སོ་སོའི་ལུང་པའི་ནང་ལག་རྩལ་དང་ཆེད་ལས་ཀྱི་ལས་ཀ་བྱེད་མཁན་དེ་འདྲ་རེད་འདུག ཁོང་ཚོ་འདིར་སླེབས་ནས་རྒྱུ་མཚན་མང་པོ་ཞིག་གིས་ལས་ཀ་མི་རག་པའི་གནས་སྟངས་དེ་འདྲ་ཡོང་གི་ཡོད་པ་རེད། དེས་ཁོང་ཚོའི་སེམས་ལ་གནོན་ཤུགས་འཕར་མ་སླེབས་ཀྱི་ཡོད་པ་རེད་ཅེས་གསུངས་འདུག
སྐུ་ཞབས་ནོའོ་ཇེམ་ལགས་ཀྱིས་སྐྱེས་པ་ཚོ་རྒྱུན་དུ་རིག་གནས་ཀྱི་རིན་ཐང་ལྟ་བ་དང་། དད་མོས། ཡུལ་སྲོལ་གོམས་གཤིས། རེ་འདོད་སོགས་རྙོག་འཛིང་ཆེ་བའི་གནས་སྟངས་སྣ་ཚོགས་ཁྲོད་ནས་སེམས་ལ་དཀའ་ངལ་སྣ་ཚོགས་ཤིག་འཕྲད་བཞིན་ཡོད། ཡིན་ན་ཡང་མངོན་འགྱུར་མ་བྱུང་བའི་ཕུགས་འདུན་གྱི་ཚོར་སྣང་དེ་ལ་བརྟེན་ནས་དྲག་སྤྱོད་ཀྱི་ལམ་དུ་ཞུགས་ནས་མཇུག་སྒྲིལ་དགོས་དོན་མེད་ཅེས་གསུངས་འདུག
ཁོང་གིས་སྐྱེས་པ་ཚོའི་བསམ་བློའི་ནང་གལ་སྲིད་ང་ངུ་བ་ཡིན་ན་སྐྱེས་པ་ཕོ་མ་རེད་བསམས་པ་དང་། གལ་སྲིད་ངས་མི་གཞན་ལ་རོགས་པ་བྱེད་རོགས་ལབ་ན་ང་སྐྱོ་པོ་རེད་བསམས་པའི་བསམ་ཚུལ་དེ་འདྲ་ཡོང་གི་ཡོད་པ་རེད། ཁོང་ཚོས་སྐྱེས་པ་ཕོ་ཞིག་ཡིན་པའི་ང་རྒྱལ་གྱི་བསམ་ཚུལ་གང་འདྲ་ཞིག་འཛིན་ཡང་ད་དུང་ཡང་ཁོང་ཚོ་འགྲོ་བ་མི་ཞིག་ཡིན་པས་སེམས་ཚོར་གྱིས་ཁེམས་བསྡད་ཡོད་པ་རེད། གལ་སྲིད་ང་ཚོས་སེམས་ཚོར་འདི་ལ་བཟང་ཕྱོགས་ཀྱི་ལམ་ནས་ལྟ་སྐུལ་དང་ཚོད་འཛིན་མ་བྱས་ཚེ་ང་ཚོ་ལམ་ཁ་གཞན་པ་ཞིག་ལ་འགྲོ་སྲིད་པའི་ཉེན་ཁ་ཡོད་པ་རེད་ཅེས་གསུངས་འདུག
སྐྱེས་པ་ཚོའི་སེམས་ཚོར་བདེ་ཐང་དང་འབྲེལ་ལམ་སྐོར་དཀའ་ངལ་ཡོད་ཚེ་ཨོ་སི་ཊོ་ལི་ཡའི་ནང་སྐྱེས་པ་ཚོར་རོགས་རམ་ཞབས་ཞུ་ཁ་པར་ཨང་གྲངས་ 1300 78 99 78 ཐོག་ནས་ཆུ་ཚོད་ ༢༤ རིང་རིན་མེད་ཀྱིས་སློབ་གསོ་དང་ལམ་སྟོན་སོགས་ཀྱི་རྒྱབ་སྐྱོར་གནང་མཁན་ཡོད་པ་རེད།
