ཕ་མ་དང་ལྟ་སྐྱོང་བྱེད་མཁན་ཚོས་ཐབས་བྱུས་ལྡན་པའི་རོགས་རམ་འོག་ཕྲུ་གུ་དེའི་སེམས་ལ་བདེ་འཇགས་ཀྱི་ཚོར་སྣང་ཡོང་བ་ཞིག་དང་འཚོ་བའི་བདེ་ཐང་སླར་གསོ་ཡོང་བ་བྱེད་དགོས།
ཐེངས་འདིའི་ཨོ་སི་ཊོ་ལི་ཡ་ངོ་སྤྲོད་ཀྱི་ལེ་ཚན་འདིའི་ནང་ཕ་མ་དང་ཕྲུ་གུ་ལྟ་སྐྱོང་བྱེད་མཁན་ཚོས་ཕྲུ་གུའི་སེམས་ཁམས་རྨས་སྐྱོན་ལས་སླར་གསོ་ཡོང་ཐབས་ཀྱི་ཐབས་བྱུས་སྐོར་ངོ་སྤྲོད་ཞུ་རྒྱུ་ཡིན།
ཨོ་སི་ཊོ་ལི་ཡའི་རྒྱལ་ཡོངས་གཙུག་ལག་སློབ་གཉེར་ཁང་ ANU ཡི་དགེ་རྒན་ཆེན་མོ་དང་སེམས་ཁམས་རིག་པ་བ་ཌོ་ཊར་ཌ་ཝེ་པཱ་སཱལ་ཁེ་ Dr Dave Pasalich ཡིས་ཕྲུ་གུའི་སེམས་ཁམས་རྨས་སྐྱོན་ནི་གནས་སྟངས་འདྲ་མིན་གྱི་ཐོག་ནས་ཡོང་སྲིད་སྐོར་བརྗོད་འདུག
ཁོང་གིས་ཕྲུ་གུ་རྣམས་ཧ་ཅང་འཇིགས་སྣང་དང་གནོད་འཚེ་འོག་ནས་ཁོང་ཚོ་སེམས་ཞུམ་པ་དང་། སེམས་སྡུག་གི་ཁེངས་པ། རེ་ཐག་ཆད་པ་སོགས་ལས་སེམས་ཁམས་ལ་རྨས་སྐྱོན་ Trauma ཕོག་གི་ཡོད། གནས་སྟངས་དེ་ཚོ་དཔེར་ན། རང་བྱུང་གི་གནོད་འཚེ་དང་། རླངས་འཁོར་རྡུང་ཁ་ཐེབས་པ། དམག་འཁྲུག དྲག་སྤྱོད་ཀྱི་གནས་ཚུལ། གཞན་གྱིས་མནར་གཅོད་གཏོང་བ། གཞན་ཡང་བལྟ་སྐྱོང་བྱེད་མཁན་ལས་ཁ་བྲལ་བ་སོགས་ཀྱི་སྐབས་སུ་ཡོང་གི་ཡོད་པ་རེད་ཅེས་གསུངས་འདུག
ནོར་མཱ་བྷུ་ལེ་སི་ Norma Boules ལགས་ནི་སིཌ་ནིང་གྲོང་ཁྱེར་ཁུལ་ Parramatta ཡོད་པའི་གནས་སྤོ་བ་ཐོན་ཁུངས་ལྟེ་གནས་ཚོགས་སྡེ་ CMRC ཞེས་པའི་ཚོགས་པ་དེའི་ལས་འཆར་འགན་འཛིན་ཞིག་རེད། མ་ཚད་ཁོ་མོས་མི་སྒེར་གྱི་གནས་སྟངས་དང་། ད་དུང་ཕ་མའི་ཤེས་ཡོན་སློབ་གསོ་སྐོར། ཕ་མ་ཚོས་ཕྲུ་གུའི་བདེ་འཇགས་དང་། ཕྲུ་གུའི་སེམས་ཁམས་འཇིག་རྟེན་ལ་ཤེས་རྟོགས་བྱེད་ཐབས་སྐོར་ལ་སྦྱོང་བརྡར་དང་རྒྱུན་དུ་སློབ་སྟོན་གནང་གི་ཡོད་པ་རེད།
ལྕམ་བྷུ་ལེ་སི་ལགས་ཀྱིས་ཁོ་མོས་ལོ་ངོ་ ༡༧ ཙམ་གྱི་རིང་ CMRC ཞེས་པའི་ཚོགས་པ་དེའི་ནང་ལས་ཀ་བྱས་པའི་རིང་ལ་གདོང་ལེན་བྱེད་དགོས་པའི་གནད་འགག་ཆེ་ཤོས་ཤིག་ནི་ཕ་མ་ཚོས་ཁོང་ཚོའི་ཕྲུ་གུར་དགོས་མཁོ་ག་རེ་ཡོད་མེད་ངོས་འཛིན་བྱེད་ཐབས་སྐོར་ལ་རོགས་རམ་བྱ་རྒྱུ་དེ་རེད་འདུག་ཅེས་གསུངས་འདུག
ངས་སྐྱབས་བཅོལ་བ་དང་། ཉེན་གཡོལ་ཞུ་མཁན། དེ་བཞིན་གཞིས་སྤོ་བ་སོགས་དང་ལྷན་དུ་ལས་ཀ་བྱེད་བཞིན་ཡོད། དུས་རྒྱུན་ལུང་པ་ཁག་གི་ནང་དཀྱིལ་ཤར་གྱི་ཡུལ་གྲུ་ཁག་ནས་ཡོང་མཁན་དེ་ཚོ་རེད། ལུང་པ་དེ་ཚོ་ནས་ཡོང་མཁན་ནང་སེམས་ཁམས་རྨས་སྐྱོང་ཕོག་ཡོད་པ་མང་པོ་ཞིག་རེད་འདུག ཐོག་མའི་ཆར་ནང་མི་དེ་ཚོས་སེམས་ཁམས་འཕྲོད་བསྟེན་རོགས་རམ་སྐོར་ལ་འདོད་པ་བྱེད་ཀྱི་མི་འདུག
རིམ་བཞིན་ངས་ཁོང་ཚོར་ཁྱེད་རང་ལུང་པ་འདི་ལ་དགའ་པོ་ཡོང་གི་རེད། ཁྱེད་རང་ལུང་པ་འདིར་སླེབས་པར་བསྐལ་བ་བཟང་པོ་རེད། ཞབས་ཞུའི་མཐུན་རྐྱེན་སྣ་ཚོགས་ཤིག་ཡོད་སྐོར་འགྲེལ་བརྗོད་བྱེད་ཀྱི་ཡོད། ཁོང་ཚོར་གནས་ཚུལ་ག་རེ་འབྱུང་ཡོད་པ་ངས་ཐོག་མ་ནས་ཤེས་ཀྱི་ཡོད། ལྷག་པར་དུ་ཕྲུ་གུ་ལོ་ན་ ༣ དང་ ༤ ཅན་དེ་ཚོ་རླུངས་ལང་ཆོག་ཆོག་དང་། རང་རྐྱ་མི་འཕེལ་བ། སྤྱོད་པ་གྱོང་པོ་དེ་འདྲ་འདུག ཡང་ཚང་མ་དེ་འདྲ་མ་རེད་ཅེས་གསུངས་འདུག
ཌོ་ཊར་པཱ་སཱལ་ཁེ་ལགས་ཀྱིས་སེམས་ཁམས་རྨས་སྐྱོན་དེ་གནད་འགག་གི་འཚར་ལོངས་ཤིག་གི་དུས་སྐབས་དེ་ནས་ཡོང་གི་ཡོད་པ་རེད། དེས་ཀླད་པའི་གྲུབ་ཚུལ་དང་ཀླད་པའི་ནུས་པ་ལ་ཤུགས་རྐྱེན་ཐེབས་ཀྱི་ཡོད་སྐོར་བརྗོད་འདུག
ཕྲུ་གུ་ཞིག་ལ་སེམས་ཁམས་རྨས་སྐྱོན་ཕོག་ཡོད་ཚེ་ཁོང་གི་འཛམ་གླིང་ཧྲིལ་པོ་གོ་ལྡོག་པ་ཞིག་ཏུ་སྣང་སྲིད། དེ་སྔོན་བདེ་འཇགས་ཡིན་པའི་གནས་སྟངས་ཤིག་ཀྱང་ད་ཆ་ཉེན་ཁ་ཅན་ཞིག་དང་དངངས་སྐྲག་སྐྱེས་ས་ཞིག་ཏུ་ཚོར་བཞིན་ཡོད་པས་མ་ཚད། སེམས་ཁམས་རྨས་སྐྱོན་དེས་ཕྲུ་གུའི་ཀླད་པ་འཚར་ལོངས་དང་སྤྱི་ཚོགས་ཀྱི་ཚོར་སྣང་འཚར་ལོངས་ལ་ཤུགས་རྐྱེན་ཐེབས་བཞིན་ཡོད། མ་ཚད་དེས་ཁོང་ཚོའི་དུས་ཡུན་རིང་པོའི་སེམས་ཀྱི་བདེ་སྡུག་ལའང་ཤུགས་རྐྱེན་ཐེབས་ཀྱི་ཡོད། དེས་རྐྱེན་པས་ཕྲུ་གུའི་སེམས་ཁམས་རྨས་སྐྱོན་དེས་ཕྲུ་གུའི་སྤྱོད་ལམ་དང་ ། ཕྲུ་གུའི་བསམ་བློ་གཏོང་སྟངས། ཕྲུ་གུའི་ཚོར་སྣང་། གཞན་ཡང་སྤྱི་ཚོགས་ཀྱི་འབྲེལ་འདྲིས་བཅས་ལ་ཤུགས་རྐྱེན་ཆེན་པོ་ཐེབས་བཞིན་ཡོད་པ་རེད།
ད་དུང་དེས་རྐྱེན་པས་ཕྲུ་གུ་དེ་སློབ་གྲྭ་དང་ཁྱིམ་ཚང་གཉིས་ཀའི་ནང་ཉིན་རེའི་འཚོ་བའི་ནུས་པ་ལ་ཚོད་འཛིན་ཐེབས་ཀྱི་ཡོད་པ་དང་་། ཕྲུ་གུར་སེམས་ཁམས་རྨས་སྐྱོན་ཕོག་ཡོད་ཚེ་དེས་འགོག་རྐྱེན་དང་ཚད་བཀག་མང་པོ་ཞིག་ཐེབས་ནས་ཉེ་འཁོར་ཚང་མ་འཇིགས་སྣང་གི་ཁེམས་པ་དང་སེམས་ལ་བདེ་འཇགས་མེད་པ། རྒྱུན་དུ་དངངས་སྐྲག་སྐྱེ་བཞིན་ཡོད་པ་རེད་ཅེས་གསུངས་འདུག
འོ་ན་ཕ་མ་དང་ལྟ་སྐྱོང་བྱེད་མཁན་ཚོས་ཕྲུ་གུར་རོགས་རམ་ག་རེ་བྱེད་དགོས་ཀྱི་ཡོད་དམ།
མེ་ལན་ནེ་ཌ་ཧྥོ་ Melanie Deef ལགས་ཀྱིས་ཨོ་སི་ཊོ་ལི་ཡའི་རྒྱལ་ཡོངས་སུ་ཕ་མ་དང་སློབ་གྲྭའི་དགེ་རྒན་རྣམས་ལ་འདས་པའི་ལོ་ ༡༤ ཙམ་གྱི་རིང་སེམས་ཁམས་སྐོར་རྒྱབ་སྐྱོར་དང་སློབ་སྟོན་གནང་མྱོངས་ཡོད་པ་རེད། ཁོང་གིས་ཕ་མ་དང་ཕྲུ་གུ་ལྟ་སྐྱོང་བྱེད་མཁན་ཚོས་རང་ཉིད་ཀྱི་སེམས་ཁམས་དང་བདེ་སྡུག་ལའང་ལྟ་རྟོགས་བྱ་རྒྱུ་གལ་ཆེན་པོ་རེད་ཅེས་གསུངས་འདུག
ཁོ་མོས་ངས་མི་རྣམས་ལ་གལ་སྲིད་ཁྱེད་རང་གི་སེམས་ཁམས་དེ་བདེ་ཐང་མེད་པའི་དུས་སྐབས་ཤིག་ལ། ཁྱེད་ཀྱིས་ཕྲུ་གུའི་སེམས་ཁམས་བདེ་ཐང་དོ་དམ་བྱེད་པའི་གནས་སྟངས་ཤིག་མེད་པ་ངོས་འཛིན་བྱེད་ཀྱི་ཡོད། གང་ཡིན་ཟེར་ན། སྐབས་དེར་ཁྱེད་ཀྱིས་ཁྱེད་རང་ཉིད་ཀྱི་སེམས་ཁམས་དེ་ཡང་དོ་དམ་བདག་གཅེས་བྱེད་ཐུབ་ཀྱི་མེད་ཅེས་གསུངས་འདུག
ཌོ་ཊར་པཱ་སཱལ་ཁེ་ Dr Pasalich ལགས་ཀྱིས་ཕ་མ་དང་ཕྲུ་གུ་ལྟ་སྐྱོང་བྱེད་མཁན་ཚོར་ཕྲུ་གུའི་དགོས་མཁོ་དང་ཚོར་སྣང་ལ་དོ་སྣང་བྱེད་པའི་གོམས་གཤིས་ཤིག་དགོས་རྒྱུ་ཧ་ཅང་གལ་ཆེན་ཡིན་སྐོར་གསུངས་འདུག
ཁོང་གིས་གལ་ཆེ་ཤོས་ཤིག་ལ་ཕ་མ་ཚོས་ཕྲུ་གུའི་སྤྱོད་ལམ་དང་ཁོང་ཚོར་ག་རེ་དགོས་ཀྱི་ཡོད་མེད་ལ་ངེས་པར་དུ་དོ་སྣང་ཆེན་པོ་བྱེད་དགོས་ཀྱི་ཡོད་པ་རེད། དཔེར་ན་ཕྲུ་གུ་དེས་སེམས་ནང་ལ་བདེ་འཇགས་མེད་པའི་ཚོར་སྣང་དང་། ཁོར་ཡུག་དེར་སྔོན་དཔག་མི་ཐུབ་པའི་སེམས་ཁྲལ་གྱི་རྣམ་འགྱུར་མངོན་ཚེ། དེ་ལ་ཡ་ལན་སྤྲད་རྒྱུའི་ཚབ་ལ་ང་ཚོས་ངེས་པར་དུ་ཐབས་ཤེས་དང་གོམ་པ་ཅིག་ཕྱི་བཤིག་རྒྱག་དགོས་པས་མ་ཚད། ཕྲུ་གུར་བདེ་འཇགས་སྲུང་སྐྱོབ་ཀྱི་དགོས་མཁོ་ག་རེ་ཡོད་མེད་དང་མཐུན་རྐྱེན་བསྐྲུན་ཐབས་བྱེད་དགོས་ཀྱི་ཡོད་པ་རེད་ཅེས་གསུངས་འདུག
ཌོ་ཊར་པཱ་སཱལ་ཁེ་ལགས་ཀྱིས་ཕྲུ་གུ་ཚོར་ཁྱིམ་ཚང་ནང་གི་ཁོར་ཡུག་དེ་བརྟན་པོ་དང་བདེ་འཇགས་ཤིག་བསྐྲུན་དགོས་རྒྱུ་དེ་ཡང་གལ་ཆེན་པོ་ཡིན་སྐོར་གསུངས་འདུག
ཕ་མ་ཚོའི་ངོས་ནས་བཤད་ན་ཁྱིམ་ཚང་ནང་གི་འབྲེལ་ལམ་དེ་ཡང་ཕྲུ་གུའི་མི་ཚེ་འཚོ་བ་དང་ཕྲུ་གུའི་སེམས་ཁམས་འཕྲོད་བསྟེན། ཕྲུ་གུའི་ཚོར་སྣང་བདེ་འཇགས་བཅས་ལ་འབྲེལ་བ་དམ་ཟབ་ཆགས་ཡོད། མ་ཚད་ཕ་མ་ཚོས་ཕྲུ་གུ་དང་ལྷན་དུ་དུས་ཚོད་གང་མང་གཏོང་ཐུབ་ཚེ། དེས་སེམས་ཁམས་རྨས་སྐྱོན་ཕོག་པའི་ཕྲུ་གུ་ཞིག་ལ་མཚོན་ན་ལུས་སེམས་བདེ་ཐང་དང་བདེ་འཇགས་ལ་ནུས་པ་གལ་ཆེན་འདོན་ཐུབ་ཀྱི་ཡོད། ཁྱེད་རང་གི་ཕྲུ་གུ་ལ་ཞི་དུལ་དང་བརྩེ་སེམས་འོག་ནས་ཁོང་ཚོའི་སེམས་ཁམས་རྨས་སྐྱོན་དྲག་སྐྱེད་ཡོང་ཐབས་བྱེད་དགོས་པ་ཡིན་ཞེས་གསུངས་འདུག
ཌོ་ཊར་པཱ་སཱལ་ཁེ་ Dr Pasalich ལགས་ཀྱིས་སེམས་ཁམས་རྨས་སྐྱོན་ཕོག་པའི་ཕྲུ་གུ་མང་པོ་ཞིག་དུས་ཚོད་ངེས་ཅན་ཞིག་གི་ནང་རང་བཞིན་གྱིས་དྲག་སྐྱེད་ཡོང་གི་ཡོད་ཀྱང་། དགོས་མཁོ་བྱུང་ཚེ་ཕྲུ་གུའི་སེམས་ཁམས་འཕྲོད་བསྟེན་ཆེད་ལས་སྨན་པ་དེ་འདྲར་བསྟེན་གཏུགས་བྱ་རྒྱུ་ཡང་གལ་ཆེན་ཡིན་སྐོར་གསུངས་འདུག
