རྒྱ་མཚོའི་འགྲམ་དུ་འགྲོ་སྐབས་བདེ་འཇགས་སྲུང་སྐྱོབ་ཐད་རྒྱུས་ལོན་བྱ་རྒྱུ་གལ་ཆེན་ཡིན། ལྷག་པར་དུ་ཆ་རྒྱུས་མེད་པའི་ས་ཆ་དེ་འདྲར་འགྲོ་སྐབས་ངེས་པར་དུ་གཟབ་གཟབ་དང་། ཆུ་ནང་དང་འབྲེལ་བ་ཡོད་པའི་ཉ་ཆེན་ Shark སོགས་ཀྱི་ཉེན་ཁ་མི་འཕྲད་པ་བྱེད་དགོས།
དེ་ཡང་ཨོ་སི་ཊོ་ལི་ཡ་ནི་རྒྱ་མཚོའི་སྐྱེ་ཁམས་མ་ལག་ཕུན་སུམ་ཚོགས་པའི་ལུང་པ་ཞིག་ཡིན་པས། རྒྱ་མཚོའི་ནང་ཉ་ཆེན་རིགས་ཀྱང་དཔེར་ན། ཉ་ཆེན་དཀར་པོ་དང་། ཉ་ཆེན་སྔོན་པོ། ཉ་ཆེན་སྟག་རིས། ཉ་ཆེན་ཐོ་མགོ ཉ་ཆེན་གླང་སྣ་སོགས་ཉ་ཆེན་གྱི་རིགས་མང་པོ་ཞིག་ཡོད་པ་རེད། སྐྱེས་དངོས་སེམས་ཅན་འདི་དག་ནི་རྒྱ་མཚོའི་ཁོར་ཡུག་བཟང་པོ་རྒྱུན་གནས་དང་དོ་མཉམ་ཡོང་བར་མེད་དུ་མི་རུང་བ་ཡིན།
ཉ་ཆེན་སྐོར་གྱི་ཚན་རིག་པ་ཌོ་ཊར་ཕལ་བྷུ་ཊི་ཆར་ Dr. Paul Butcher ལགས་ཀྱིས་ཉ་ཆེན་དེ་རིགས་ནི་རྒྱ་མཚོའི་ནང་སྐྱེས་ཁམས་མ་ལག་དོ་མཉམ་ཡོང་བར་ཕན་ནུས་ཆེན་པོ་ཡོད་སྐོར་འགྲེལ་བརྗོད་བྱས་འདུག
ཁོང་གིས་རྒྱ་མཚོའི་ནང་ཉ་ཆེན་དེ་རིགས་ནི་རྒྱུན་དུ་རྒྱ་མཚོའི་ནང་ཟས་རིགས་བདག་དབང་མཐོ་ཤོས་འཛིན་མཁན་གྲས་རེད། ཁོང་ཚོས་རྒྱ་མཚོའི་ནང་སྐྱེ་དངོས་སེམས་ཅན་ཁག་ཅིག་ཚད་བརྒལ་གྱིས་སྐྱེས་འཕེལ་དང་གྲངས་འབོར་ལ་ཚོད་འཛིན་ཐུབ་ཀྱི་ཡོད། ཉེ་ཆེན་དེ་རིགས་ཀྱིས་ཐད་ཀར་མིན་པའི་ཐོག་ནས་རྒྱ་མཚོའི་ནང་གི་ཟས་རིགས་ལ་ཤུགས་རྐྱེན་ཆེན་པོ་ཐེབས་ཀྱི་ཡོད། མ་ཚད་ཉ་ཆེན་དེ་རིགས་ཀྱིས་རྒྱ་མཚོའི་སྐྱེ་ཁམས་ཁོར་ཡུག་དོ་མཉམ་གཏོར་བརླག་གཏོང་མཁན་གཙོ་བོར་གྱུར་པའི་སྐྱེ་དངོས་སེམས་ཅན་ཁག་ཅིག་ལ་ཚོད་འཛིན་ཐེབས་ཀྱི་ཡོད་སྐོར་བརྗོད་འདུག
མཚོ་འགྲམ་དུ་འགྲོ་སྐྱོད་བྱེད་སར་ཉ་ཆེན་དེ་དག་གི་བྱ་སྤྱོད་ཤེས་རྟོགས་དགོས་པས་མ་ཚད། མཚོ་འགྲམ་དེར་ཉ་ཆེན་སོགས་ཀྱི་ཉེན་ཁ་ཡོད་སྲིད་པས་སྔོན་ནས་དོག་ཟོན་བྱ་རྒྱུ་གལ་ཆེན་པོ་ཆགས་ཡོད།
ཌོ་ཊར་བྷུ་ཊི་ཆར་ Dr. Butcher ལགས་ནི་ནིའུ་སའོ་ཐི་ཝལ་ NSW མངའ་སྡེའི་གཞི་རིམ་ཐོན་སྐྱེད་ལྷན་ཁང་ནང་གི་ཞིབ་འཇུག་པ་གཙོ་གྲས་ཀྱི་ཚན་རིག་པ་ཞིག་རེད།
ཁོང་གི་ཞིབ་འཇུག་གཙོ་བོ་ནི། ནིའུ་སའོ་ཐི་ཝལ་མངའ་སྡེའི་ནང་རྒྱ་མཚོ་འགྲམ་དུ་ཆུ་རྐྱལ་རྒྱག་མཁན་སོགས་ལ་ཚན་རིག་དང་མཐུན་པའི་ཐོག་ནས་ཉ་ཆེན་ Shark ཡི་ཉེན་ཁ་ལས་སྲུང་སྐྱོབ་བྱེད་ཐབས་སྐོར་ཞིབ་འཇུག་བྱེད་བཞིན་ཡོད་པ་རེད།
ཁོང་གིས་ཉ་ཆེན་འདི་རིགས་ཀྱིས་ཕྱི་ཚུལ་དུ་འགྲོ་བ་མིའི་རིགས་ལ་འཇིགས་སྣང་སྐྱེ་རུ་འཇུག་གི་ཡོད་ཀྱང་། དོན་དངོས་སུ་ཁོང་ཚོས་རྒྱ་མཚོ་སྲུང་སྐྱོབ་དང་རྒྱ་མཚོའི་ཁོར་ཡུག་བདེ་ཐང་ལ་གལ་གནད་ཤིན་ཏུ་ཆེན་པོ་ཆགས་ཡོད། ཉ་ཆེན་འདི་རིགས་ནི་ངོ་མཚར་ཅན་གྱི་སྲོག་ཆགས་ཤིག་ཡིན་པས་ང་ཚོས་ངེས་པར་དུ་བརྩི་འཇོག་དང་སྲུང་སྐྱོབ་བྱེད་དགོས། མ་ཚད་ཟས་རིགས་བ་ཡི་ཆ་ནས་བཤད་ན་ཡང་རྒྱ་མཚོའི་ནང་སྐྱེ་ཁམས་ཁོར་ཡུག་དང་སེམས་ཅན་ཕན་ཚུན་དབར་དོ་མཉམ་ཡོང་བར་ནུས་པ་ཆེན་པོ་ཐོན་བཞིན་ཡོད། རྒྱ་མཚོའི་སྐྱེ་ཁམས་ཁོར་ཡུག་དོ་མཉམ་ནི་སའི་གོ་ལ་ཧྲིལ་པོའི་བདེ་ཐང་དང་འབྲེལ་བ་ཆེན་པོ་ཆགས་ཡོད་པ་རེད་ཅེས་གསུངས་འདུག
ཌོ་ཊར་བྷུ་ཊི་ཆར་ Dr. Butcher ལགས་ཀྱིས་ནིའུ་སའོ་ཐི་ཝལ་ NSW མངའ་སྡེའི་ནང་ཉ་ཆེན་དཀར་པོ་དེ་ཚོ་ལོ་རེར་ཕྱི་ཟླ་ ༥ པ་ནས་ ༡༡ བར་ལ་མཐོང་ཐུབ་པ་དང་། ཉ་ཆེན་གླང་སྣ་དེ་ཚོ་ཕྱི་ཟླ་ ༡༡ ནས་ ༥ པ་བར། ཉ་ཆེན་སྟག་རིས་དེ་ཚོ་ག་དུས་ཡིན་ཡང་མཐོང་རྒྱུ་ཡོད་སྐོར་བརྗོད་འདུག
ཁོང་གིས་ནིའུ་སའོ་ཐི་ཝལ་མངའ་སྡེའི་ནང་ཉ་ཆེན་དེ་ཚོའི་དུས་ཚིགས་རེད་ཟེར་བ་དེ་འདྲ་དམིགས་བསལ་མེད། ཉ་ཆེན་དེ་ཚོ་ལོ་ལྟར་ནིའུ་སའོ་ཐི་ཝལ་མངའ་སྡེའི་ཆུའི་ནང་བསྡད་ཀྱི་ཡོད་པ་རེད། ཉ་ཆེན་དཀར་པོ་དེ་ཚོ་རྒྱ་ཆེ་བའི་ཚ་དྲོད་ཡོད་སའི་མཚོ་ངོགས་སུ་སྡོད་ཀྱི་ཡོད་པ་དང་། ཉ་ཆེན་གླང་སྣ་དེ་ཚོ་ཆུའི་དྲོད་ཚད་ཏུའུ་ ༢༠ ཡན་ཡོད་ས་དེ་ཚོར་གནས་ཀྱི་ཡོད་པ་རེད། རྒྱུན་ལྡན་ཉ་ཆེན་དཀར་པོ་དེ་ཚོ་སྔ་དྲོ་ཆུ་ཚོད་ ༡༡ ཙམ་དེ་བར་ང་ཚོ་ཡོད་སའི་མཚོ་ཁ་ནས་བར་ཐག་སྤྱི་ལེ་གཅིག་ཙམ་གྱི་མཚམས་སུ་ཡོང་གི་ཡོད། དེ་དང་ཆབས་ཅིག་ཉ་ཆེན་གླང་སྣ་དེ་ཚོ་ཉིན་གུང་ནས་མཚན་མོ་བར་མཚོ་ཟུར་དུ་ཡོང་གི་ཡོད་སྐོར་འགྲེལ་བརྗོད་གནང་འདུག
ཉ་ཆེན་ནི་ང་ཚོའི་རྒྱ་མཚོའི་རང་བྱུང་གི་གྲུབ་ཆ་ཞིག་རེད། ཌོ་ཊར་བྷུ་ཊི་ཆར་ Dr Butcher ལགས་ཀྱིས་ཉ་ཆེན་དང་རྒྱ་མཚོ་འགྲམ་དུ་འགྲོ་སྐྱོད་བྱེད་མཁན་ཚོའི་དབར་ཕན་ཚུན་ཤུགས་རྐྱེན་དང་གནོད་འཚེ་གཏོང་རེས་བྱེད་ཀྱི་མ་རེད་ཅེས་བརྒྱ་ཆ་བརྒྱ་ཐམ་པ་སུ་གང་གིས་འགན་ལེན་བྱེད་མི་ཐུབ། ཡིན་ན་ཡང་མཚོ་འགྲམ་དུ་འགྲོ་སྐབས་མཚོ་ཁའི་བདེ་འཇགས་ལམ་སྟོན་གྱི་རྗེས་སུ་འབྲངས་ནས་ཉ་ཆེན་གྱི་གནོད་འཚེའི་ཉེན་ཁ་ཆུང་དུ་གཏོང་ཐབས་བྱ་རྒྱུ་དེ་གལ་ཆེན་པོ་རེད་ཅེས་གསུངས་འདུག
ཁོང་གིས་རྒྱ་མཚོའི་ཁར་བདེ་འཇགས་ལམ་སྟོན་ལྟར་བྱ་རྒྱུ་སྟབས་བདེ་ཤོས་ཤིག་ནི་མཚོ་ཁར་དར་ཆ་བསླངས་ཡོད་ས་དེ་རང་ལ་མ་གཏོགས་ཆུ་རྐྱལ་རྒྱག་མི་ཉན། ས་ཆ་དེ་བདེ་འཇགས་ཆེ་ཤོས་གྲས་རེད། གང་ཡིན་ཟེར་ན་ས་ཆ་དེར་ཚེ་སྲོག་སྐྱོབ་མཁན་དང་ལྟ་རྟོགས་བྱེད་མཁན་ཡོད་པས་ཁོང་ཚོས་མཚོ་འགྲམ་དང་ཆུའི་གནས་སྟངས་ལ་རྒྱུན་དུ་ནས་རྟོགས་ཞིབ་ཀྱིས་མཚོ་འགྲམ་དུ་འགྲོ་འོངས་བྱེད་མཁན་ཚོའི་བདེ་འཇགས་ཚད་མཐོའི་སྲུང་སྐྱོབ་བྱེད་ཀྱི་ཡོད། སྲོག་སྐྱོབ་མི་སྣའི་ལམ་སྟོན་དང་བདེ་འཇགས་ཀྱི་མཚོན་རྟགས་དེ་ཚོར་ངེས་པར་དུ་དོ་སྣང་བྱེད་དགོས། ཉ་ཆེན་ཡོང་གི་ཡོད་པའི་དུང་བརྡ་དེ་འདྲ་ཐོས་ཚེ་ངེས་པར་དུ་ཆུའི་ནང་ནས་གང་མགྱོག་ཐོན་ཐུབ་པ་བྱེད་དགོས་ཀྱི་ཡོད་པ་རེད་ཅེས་གསུངས་འདུག
