آسټرالیا د مساحت له پلوه له روسیې، کاناډا، چین، امریکا او برازیل وروسته د نړۍ شپږم لوی هېواد دی. په دغه هېواد کې شاوخوا ۲۷ میلیونه او ۳۱۴ زره کسان ژوند کوي او د نفوس له نظره د نړۍ ۵۶ام ډېر نفوس لرونکی هېواد دی.
په ۱۷۸۸م کال کې د اروپایانو له مېشتېدنې وړاندې، بومیان په آسټرالیا کې اوسېدل. په دې اړه دقیق معلومات نشته چې په هغه وخت کې د آسټرالیا نفوس څومره وه، مګر تخمین کېږي چې په هغه وخت کې د ۳۱۵ زرو او ۱ میلیونو ترمنځ بومیانو په دغه هېواد استوګنه درلوده.
د اروپایانو له مېشتېدنې وروسته، د آسټرالیا نفوس په تدریجې ډول سره زیات شوی.
د آسټرالیا د احصایې ادارې لخوا خپرې شوې شمېرې ښيي چې په ۱۹۰۱ م کال کې په آسټرالیا کې ۴ میلیونه کسان اوسېدل.
په ۱۹۶۰م کال کې شاوخوا ۱۰ میلیونه، په ۱۹۸۵ کال کې ۱۵ میلونه، په ۲۰۰۰م کال کې ۱۸ میلیونه، په ۲۰۱۶ کال کې ۲۴ میلیونه او اوسمهال څه باندې ۲۷ میلیونه کسان په آسټرالیا کې استوګنه لري.
شمېرې ښيي چې په تېرو ۵۰ کلونو کې د آسټرالیا نفوس دوه برابره شوی دی. په ۱۹۷۴م کال کې شاوخوا ۱۳.۷ میلیونه کسان په آسټرالیا کې اوسېدل مګر اوسمهال د آسټرالیا نفوس له ۲۷ میلیونو څخه زیات دی.
په نیو ساوت ایالت کې شاوخوا ۸.۵ میلیونه، ویکټوریا کې ۷ میلیونه، کوینزلنډ کې ۵.۶ میلیونه، لویدیځې آسټرالیا کې ۲.۹میلیونه، سویلي آسټرالیا کې ۱.۸ میلیونه، تزمانیا کې ۵۷۶ زره، مرکزي سیمې کې ۴۷۵ زره او په شمالي سیمې کې شاوخوا ۲۵۴ زره کسان ژوند کوي.
د آسټرالیا د ایالتونو نفوس ته په کتلو سره ویلی شو چې د آسټرالیا له ۵۰ سلنه څخه زیات اوسېدونکي د آسټرالیا په دوو لویو ایالتونو / نیو ساوت ویلز او وېکټوریا کې ژوند کوي.
د اس بي اس پښتو خپرونه دلتهیا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له یا څخه ترلاسه کړئ.
