Raws li lub koom haum Australian Bureau of Statistics (ABS) tau muaj ib co xov xwm tshiab los qhia ces pom tias muaj Australia tej hluas yog cov uas raug tshav ntuj kub ntau dua rau lub caij uas tej social media tau ua rau muaj teeb meem loj rau ntau phaum hluas twj cwj pwm cuam tshuam txog lub hnub.
Ces lub koom haum Cancer Council thiaj li tau los tsim cov hashtag li #killertain thiab #makingmelanomas coj los qhia rau tej ntxhais hluas thiab tub hluas uas pheej nyiam ziab tshav kom tawv nqaij txho.
Professor Georgina Long AO uas yog tus koom tswj lub koom haum Melanoma Institute Australia hais tias ''Social media muaj fwj chim heev rau tej hluas thiab pheej ua rau lawv xav tias cov kev tau tawv nqaij txho yog tej yam zoo thiab pab kom lub cev zoo nkauj. Ces peb thiaj yuav tau los daws tej kev xav no. Vim yuav ua rau mob cancer tawv nqaij thiab cancer melanoma uas kis thoob rau lawv lub cev txhua hnub. Ces thiaj tsim nyog peb siv tej social media no ua ib co twj los xa tej xo zoo rau tej hluas.''
Australia tej neeg kho mob yeej tau siv sob lus pov puag kom tej neeg hnav ris tsho ntev, pleev sunscreen thiab ntoo tsom iav txij xyoo 1980 los lawm. Tab sis tam sim no los yeej tseem siv tsuas kho ko ntoo koos mom thiab nrhiav chaw ntxoov ntxoo nkaum coj los ua cov kev pov puag yus kom tsis txhob raug tshav ntuj kub thiab thiaj tsis mob cancer tawv nqaij.
Raws li tau muaj ib cov kev teeb txheeb nrog Australia tej hluas tshaj 8,500 tus uas hnoob nyoog txij 15 xyoos rov sauv tsaib no lub 11 hlis ntuj txog lub 2 hlis ntuj 2024 ces Robert Long uas yog tus tswj cov hauj lwm Health Statistics ntawm ABS qhia tias:
''Txhua txhua ib tug neeg Australia ntawm 14 tug twg yeej raug tshav ntuj kub limtiam dhau los, thiab Australia tej hluas uas yog tej tub hluas ces yog cov yuav raug tshav ntuj kub ntau dua. 15 feem pua ntawm tej hlua hnoob nyoog 15 txog 24 xyoos ces yog cov raug tshav ntuj kub ntau dua, yog piv rau tej hlaus 65 xyoos los yog hnoob nyoog siab tshaj ntawd ces tsuas raug tshav ntuj kub 2 feem pua xwb. Hos tej hnoob nyoog 25 txog 34 xyoos ces txiv neej raug tshav kub 12 feem pua thiab tej poj niam ces tsuas raug kub ib nrab ntawd.''
Txawm li cas los cov kev raug tshav ntuj kub kuj sib txawv txuas nyob ntawm seb koj nyob qhov twg.
Mr Long tshab txhais tias ''Tej neeg Tasmania ces yog cov raug tshav ntuj kub ntau dua. Neeg Australia feem coob tsuas raug tshav kub 7 feem pua xwb, tab sis neeg Tasmania raug tshav kub txog 11 feem pua diam. Txhua txhua ob tug ntawm tsib tug neeg Ausralia yeej siv sunscreen lub hli dhau los thaum tseem ua cov kev teeb txheeb. Ces ACT thiaj yog tau cov feem puas siv txog 49, Queensland tau 35 feem pua. Ces thiaj pom tias ACT coj tej cwj pwm zoo los pov puag lawv kom tsis txhog raug tshav ntuj kub.''
Cov kev pheej raug cov Ultraviolet radiation kub ntau yuav ua rau mob rau cancer tawv nqaij thau ntxiv ntawm ib tug twg lub neej thiab yuav muaj teeb meem ntev tuaj ntxiv.
Professor Anne Cust thiaj hais tias Australia yeej yog lub teb chaws uas muaj neeg mob cancer tawv nqaij ntau tshaj plaws hauv ntiaj teb. Tab sis kuj pom tia smuaj ib co neeg hnoob nyoog twg mob tsawg zog lawm thiab.
Nws hais tias ''Peb paub hais tias txhua txhua ob tug ntawm peb tug neeg Australia twg yuav mob cancer tawv nqaij ib zaug twg ntawm lawv lub neej. Tab sis kuj pom tias tej zaum peb cov kev taw qhia ua rau muaj tej hluas mob cancer tawv nqaij ib nyuag tsawg zog lawm. Txawm li cas los kuj pom tias kuj muaj Australia tej neeg pawg tsawg uas muaj hnoob nyoog theem nrab thiab muaj hnoob nyoog zog lawm kum mob cancer tawv nqaij ntau tuaj ntxiv lawm thiab.''
Txawm li cas los Professor Long hais tias ''Tej neeg tsiv teb tsaws chaw uas tuaj thawj phaum rau Australia ces yeej kub siab pov puag lawv tej tawv nqaij, tab sis tej tuaj uas tseem yau los yog phaum neeg tshiab ces cia li yoog raws tej cwj pwm ua lub neej thiab pheej xav tias cov kev tau tawv nqaij txho yog zoo nkauj thiab fashion ces thiaj yuav ua rau lawv tsis tau txais kev noj qab nyob zoo.''
Tab sis peb ho yuav ziab tshav npaum li cas xwb es thiaj tau txais kev noj qab nyob zoo rau peb ntawm Australia no?
Professor Rachel Neale uas yog tus Group Leader uas tswj cov hauj lwm Cancer and Aetiology and Prevention Laboratory ntawm Queensland lub chaw teeb txheeb QIMR Berghofer hais ces cov kev ua tib zoo xyuas kom tau Vitamin D yog tej yam tseem ceeb pab kom yus tej tawv nqaij tau txais kev noj qab nyob zoo, pab yus tej immune system, pab tej nqaij thiab paj hlwb kom ua tau hauj lwm zoo. Tab sis tej neeg tawv nqaij txho zog los sis dub zog yuav tau ziab tshav ib nyuag ntev zog mam tau Vitamin D txaus rau lawv.
Professor Neale hais tias ''tsuas cia yus ib qho twg ntawm yus lub cev ziab tshav me ntsis xwb ces tau Vitamin D txaus lawm, yog ziab ntev ces yuav raug tshav ntuj kub. Thiaj xav kom tej neeg muaj tej tawv nqaij lwm yam dua ntawm cov tawv nqaij dub lawm yuav tau pleev sunscreen tas li thaum sawv ntxov.''
Ces lub koom haum Cancer Council thiaj hais tias txoj xub ke zoo tshaj plaws los pov puag yus tej tawv nqaij ces yog yuav tau ua ntau yam los tiv thaiv thaum muaj cov UV radiation ntau txog 3 los yog siab tshaj ntawd li: pleev cov sunscreen SPF50 los yog SPF50+, ntoo koos mom, hnav ris tsho npab ntev ceg ntev, coj tsom iav thiab nrhiav chaw ntxoov ntxoo nkaum.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
