Lub koom haum Climate Council hais tias muaj Australia tej tsev txog li 3.6 million lub yog tej tsev uas tau nruab tej phiaj ziab tshav rau saum qaum tsev tsim hluav taws xob siv. Thiab tau txais ntau yam txiaj ntsim los ntawm cov kev nruab no. Txawm li cas los yeej tseem ntsib teeb meem qee yam, tab sis yeej muaj qee cov kev pab ntawm tsoom fwv thiab.
Raws li tej xov xwm tau los ntawm Australian Bureau of Statistics (ABS) qhia ces xyoo 2021-22 yog thawj zaug uas tej hluav taws xob tsim tau los ntawm cov renewable energy li solar (duab tshav ntuj) thiab wind (zog cua - khaub lig cua) muaj peev xwm tsim tau hluav taws xob ntau tshaj tej hluav taws xob uas Australia tej cuab yig siv. Txawm li cas los lub koom haum Energy Australia yeej qhia tias yeej tseem siv roj zeb ntsuam txog li 60 feem puas coj los tsim hluav taws xob siv ntawm teb chaws Australia.
Lub koom haum Climate Councial tau qhia tias Australia tej tsev yeej tau nruab tej phiaj ziab tshav rau saum lawv tej nrob qaum tsev ib xyoos twg ntau tshaj 300,000 lub rau lub caij 10 dhau los no lawm. Nws hais tias tej tsev uas tau nruab tej phiaj ziab tshav tsim hluav taws xob siv muaj peev xwm tsim tau hluav taws xob txog li 23 gigawatts, thiab txuag tau nyiaj txog li 3 billion dollars kom tsis txhob tau them nqe hluav taws xob txhua xyoo, los sis yog xam tias muaj peev xwm pab tau ib lub tsev twg kom tsis txhob tau them tej nqe hluav taws xob yam tsawg li $1,500 rau ib lub xyoos twg.
LISTEN TO
Puas yog koj tseem xav tias xav nruab phiaj ziab tshav siv? Nod yog tej tsim nyog koj paub txog
SBS Hmong
24/09/202413:20
Mamoon Reza uas tau nruab tej phiaj no hais tias ''Vim peb yeej tsis paub tias xyov thaum twg yuav tau them tej nqe siv hluav taws xob ntau ua rau peb ceeb li vim qee zaus yuav tau them ntau heev. Ces cov kev nruab no thiaj pab kom peb tsis txhob txhawj txog cov kev them nqe siv hluav taws xob ntxiv lawm.''
Tom qab uas nws tau nruab batteries los khaws tej hluav taws xob uas tej phiaj no tsim tau ces nws hais tias ''xyoo no ces peb yeej tsis tau them nqe hluav taws xob li lawm, thiab tseem tau nyiaj me ntsis li ntawm 400 dollars rau peb thaum siv tej hluav taws xob tsis tas thiab xa rov qab rau cov national grid.''
Ces Amanda McKenzie uas yog tus coj lub koom haum Climate Council thiaj hais tias ''tseem cia siab tias Australia tej zos nplua nuj thiab tej neeg nyob ntawm lwm hom tsev li unit, apartment, townhouse etc.., kuj yuav xav nruab thiab tab sis kuj tseem tsis tau muaj cib fim nruab tau xwb.''
Dani Alexander uas yog tus coj lub chaw teeb txheeb Energy Institute ntawm tsev kawm qib siab University of New South Wales (UNSW) tau hais tias tseem muaj ib txoj xub ke ntxiv los pab tej kev nruab tej phiaj ziab tshav no thiab li siv tej batteries los khaws tej hluav taws xob uas tsim tau ntawv khaws cia tau siv.
Ms Alexander hais tias "Tej txiaj ntsim tau los ntawm cov kev siv lwm txoj xub ke tsim hluav taws xob siv ntawd ces yog yuav muaj peev xwm khaws tej hluav taws xob no siv rau lwm lub caij ntawm ib hnub twg. Txawm peb yeej ib txwm hnob sob lus 'yog tsis tshav ntuj thiab tsis muaj cua tshuab' ces ntshe yuav tsim tsis tau hluav taws xob siv, tab sis yog siv batterries khaws tau tej tsim tau ces kuj yuav muaj peev xwm siv rau lwm lub caij thiab.''
Txawm li cas los kuj tseem muaj qee yam teeb meem li qee yam ua rau tej neeg tsis tshua xav nruab tej phiaj ziab tshav no vim tseem yuav tau siv sij hawm li ob peb xyoos tom qab nruab tas mas thiaj yuav tau tej peev uas yus tau siv ntawv rov qab.
Tab sis raws li Australia explained zaj xov xwm tshaj txog cov solar energy tau qhia ces tsoom fwv Australia yeej muaj hom phiaj los txhawb nqa kom tej neeg nruab tej phiaj ziab tshav no kom ntau tuaj ntxiv los tsim hluav taws xob siv li muaj tej nyiaj pab (rebate) thiab tej paj tshab lwm yam pab. Piv txwv li xeev Victoria lub koom haum Solar Victoria hais ces muaj peev xwm thov tau cov rebate txog $1,400 rau cov kev nruab tej phiaj ziab tshav tsim hluav taws xob siv thiab qev tau nyiaj txog li $8,800 yam tsis tau them paj 4 xyoos coj los nruab batteries khaws hluav taws xob siv.
Stan Krpan uas yog tus coj lub koom haum Solar Victoria tau hais tias ''Tsoom fwv Australia yeej muaj hom phiaj xav siv cov renewable energy los tsim kom tau hluav taws xob siv txog li 82 feem pua xyoo 2035 raws li cov kev pom zoo Paris Agreement, uas yuav hais kom tsis txhob tso tej pa tsis huv rau tej ib puag ncig kom lub ntiaj teb no tsis txhob kub sov tuaj ntxiv.''
Yog koj xav paub tej xov xwm ntxaws txog cov kev nruab tej phiaj ziab tshav tsim hluav taws xob siv thiab tej batteries khaws tej hluav taws xob siv ces txheeb tau ntawm tsoom fwv teb chaws Australia lub vas sab los yog txheeb tau ntawm tej nom tswv xeev tej va sab tau.
Mloog tau hnub zwj Teeb (Thursday) 6 pm, hnub zwj Hnub (Sunday) 11am, los yog koom tau ntxiv ntawm , , thiab . Download
thiab caum
