མངའ་སྡེ་མང་པོ་ཞིག་གིས་བདེན་གཏམ་དང་ཆིངས་ཡིག་འཇོག་རྒྱུའི་ཐད་ལ་མདུན་སྐྱོད་བྱེད་བཞིན་ཡོད། མ་ཚད་མངའ་སྡེའི་གཞུང་མང་པོ་ཞིག་གིས་གདོད་མའི་མི་རིགས་ཀྱི་ཚོགས་སྡེ་དབར་ལ་གྲོས་མཐུན་བཞག་པ་དང་། ཁོང་ཚོ་དང་འབྲེལ་བ་ཡོད་པའི་གནད་དོན་ཐད་ལ་མཉམ་ལས་བྱེད་བཞིན་ཡོད།
ཕམ་ཉེས་བྱུང་བའི་གདོད་མའི་མི་རིགས་ཀྱི་འབོད་སྒྲ་སྐོར་འོས་བསྡུ་དེ་ནས་བཟུང་ཟླ་བ་བཅུ་གཉིས་སོང་རྗེས། ཨུ་ལུ་རུ་ཡི་སེམས་གཏམ་ནང་གི་བརྗོད་གཞི་གསུམ་སྟེ། འབོད་སྒྲ་དང་། ཆིངས་ཡིག བདེན་དོན་བཅས་ཀྱི་ཐད་ལ་མདུན་སྐྱོད་བྱ་རྒྱུ་ནི་ད་ལྟ་མངའ་སྡེ་དང་ས་ཁུལ་སོ་སོའི་སྲིད་གཞུང་གི་ལག་ནང་ལ་ཡོད་པ་རེད།
ཨོ་སི་ཁྲུ་ལི་ཡའི་སྲིད་བློན་ཨན་ཐོན་ནིང་ཨལ་བྷ་ནེ་སིས་ Anthony Albanese ཁོ་རང་ལམ་ཁ་དེའི་ཐོག་ལ་བསྐྱར་དུ་མདུན་བསྐྱོད་བྱ་རྒྱུ་ཡིན་སྐོར་བརྗོད་འདུག
ཁོང་གིས་གནད་དོན་དེ་ལ་ལྟ་ཚུལ་མི་འདྲ་བ་ཡོད་ཀྱང་། རྒྱལ་ཁབ་ནང་རིག་མཐུན་ཀྱི་ཚོགས་སྡེ་ཞིག་མེད་པས་ཐོབ་ཐང་དེ་འདྲ་ཞིག་སྤྲོད་རྒྱུ་ནི་འོས་ཤིང་འཚམ་པ་ཞིག་རེད་ཅེས་གསུངས་འདུག
ཨོ་སི་ཁྲུ་ལི་ཡའི་ནང་ཁྲིམས་ཁང་མི་འདྲ་བ་སོ་སོའི་ཁྲིམས་སྲོལ་ལྟར་ལས་དོན་སྒྲུབ་བཞིན་ཡོད་འགྲོ་བཞིན་ཡོད་པ་དང་། ཝི་ཊོ་རི་ཡ་མངའ་སྡེ་ནི་གནད་དོན་དེའི་ཐད་ལས་དོན་ཆེས་མགྱོག་ཤོས་སུ་ཆགས་ཡོད།
ཐེངས་དང་པོ་འོས་ཤོག་གི་ལམ་ནས་བསྐོ་བཞག་བྱས་པའི་གདོད་མའི་མི་རིགས་ཀྱི་ལྷན་ཚོགས་ནི་རང་དབང་ཅན་གྱི་ཚོགས་ཆུང་ཞིག་ཆགས་ཡོད། ཚོགས་ཆུང་དེས་མངའ་སྡེའི་གཞུང་སོ་སོར་གྲོས་མོལ་བྱ་རྒྱུ་ཐད་ལས་དོན་སྒྲུབ་བཞིན་ཡོད།
གྲོས་མོལ་གྱི་ལས་དོན་ཁག་ཟླ་བ་རྗེས་མའི་ནང་འགོ་འཛུགས་ཐུབ་རྒྱུའི་རེ་བ་བྱེད་བཞིན་འདུག
ཝི་ཊོ་རི་ཡས་ Yoorrook ཡོ་རོ་ཁེ་ཁྲིམས་ཞིབ་ལྷན་ཚོགས་ཤིག་གསར་འཛུགས་བྱས་ཡོད་པ་དང་། དེ་ནི་རྒྱལ་ཁབ་ཀྱི་གདོད་མའི་མི་རིགས་ཀྱིས་སྣེ་ཁྲིད་པའི་བདེན་དོན་འདྲི་ཞིབ་ཀྱི་གཞུང་འབྲེལ་ཚོགས་པ་ཐོག་མ་ཆགས་ཡོད།
ལྷན་ཚོགས་དེས་ཕྱི་ལོ་ ༢༠༢༢ ནས་བཟུང་དེ་གདོད་མའི་མི་རིགས་ཀྱིས་དགོས་འདུན་འབོད་སྒྲ་སྐོར་ཉན་ཞིབ་བྱས་ཡོད་པ་དང་། སྙན་ཐོ་ཁག་ལོ་རྗེས་མའི་ལོ་དཀྱིལ་དུ་འདོན་ཐུབ་པའི་རེ་བ་རྒྱག་བཞིན་ཡོད་འདུག
ཡོ་རོ་ཁེ་ཁྲིམས་ཞིབ་ལྷན་ཚོགས་ཀྱི་ཚོགས་གཙོ་གཞོན་པ་སུ་ཨན་ཧན་ཊར་ Sue-Anne Hunter ལགས་ཀྱིས་མ་འོངས་པར་གྲོས་འཆར་ཆེད་བདེ་དོན་ཀྱི་ལས་རིམ་གྲོས་གཞི་དེ་གཞུང་ལ་འབུལ་འཆར་ཡོད་སྐོར་བརྗོད་འདུག
ང་ཚོ་རྒྱལ་ཁབ་ཅིག་ཡིན་པའི་ཆ་ནས་མདུན་སྐྱོད་བྱེད་དགོས་ན། འདས་དོན་ཤེས་རྟོགས་བྱེད་པར་བདེན་པ་བརྗོད་པའི་བརྒྱུད་རིམ་དེ་དགོས་ཀྱི་ཡོད་པ་རེད། ང་ཚོ་ལྷན་ཅིག་ཏུ་མདུན་སྐྱོད་བྱེད་དགོས། ང་ཚོས་འདས་དོན་གྱི་ནང་དུ་མ་འཛུལ་བར། འདས་དོན་ནི་ཕན་ཚུན་ལ་དབྱེན་སྦྱོར་བྱེད་མཁན་ཞིག་ཏུ་གྱུར་ཡོད་པ་ཤེས་ཀྱི་ཡོད། འོན་ཀྱང་། ང་ཚོས་འདས་དོན་ལས་ཇི་ལྟར་ཤེས་རྟོགས་བྱུང་བ་ལྟར་ལྷན་ཅིག་ཏུ་མ་འོངས་པའི་ཆེད་མདུན་སྐྱོད་བྱེད་དགོས་ཀྱི་ཡོད་པ་རེད་ཅེས་གསུངས་འདུག
ཁུན་སི་ལན་ཌི་མངའ་སྡེའི་གཞུང་གིས་ཕྱི་ལོ ༢༠༢༣ ལོའི་ཟླ་བ་ལྔ་པའི་ནང་། ཆབ་སྲིད་ཚོགས་པ་ཕྱོགས་གཉིས་ཀྱི་རྒྱབ་སྐྱོར་ལ་བརྟེན་ནས་ཆིངས་ཡིག་གི་ལམ་བུ་ཞེས་པའི་ཁྲིམས་གཞི་ཞིག་གཏན་འབེབས་བྱས་ཡོད་པ་རེད། ན་ནིང་ཕྱི་ཟླ་ ༧ པའི་ནང་བདེ་དོན་སྨྲ་བ་དང་གསོ་བཅོས་འདྲི་ཞིབ་ཞེས་པའི་ལས་དོན་འགོ་འཛུགས་བྱས་ཡོད།
འདྲི་ཞིབ་དེ་ལོ་གསུམ་ནང་གཏན་འཁེལ་བྱས་ཀྱང་ཁུན་སི་ལན་ཌིའི་ནང་ཁ་གཏད་ཆབ་སྲིད་ཚོགས་པ་གུ་ཡངས་ཚོགས་པས་གལ་སྲིད་ཟླ་བ་འདིའི་ནང་མངའ་སྡེའི་འོས་བསྡུ་ལས་རྒྱལ་ཁ་ཐོབ་ཚེ་ཁྲིམས་ལུགས་དེ་ཕྱིར་བསྡུ་བྱ་རྒྱུ་ཡིན་སྐོར་བརྗོད་འདུག
ཁུན་སི་ལན་ཌིའི་ནང་བདེན་དོན་སྨྲ་བ་དང་གསོ་བཅོས་འདྲི་ཞིབ་ལྷན་ཁང་གི་ཚོགས་གཙོ་ཇོ་ཤུ་ཝ་ཁེ་རེ་མར་ Joshua Creamer ལགས་ཀྱིས་གོ་སྐབས་དེ་ཤོར་སྲིད་སྐོར་ཡང་བརྗོད་འདུག
ང་ཚོས་རང་ཉིད་ཀྱི་ལོ་རྒྱུས་གཞན་ལ་བཤད་འདོད་པའི་མི་རྣམས་ལ་དམིགས་བསལ་གྱིས་བློ་ཕམ་སྐྱེ་རུ་བཅུག་སྲིད། ང་ཚོས་སྔོན་ཚུད་ནས་ཁུན་སི་ལན་ཌིའི་མི་མང་པོ་ཞིག་ལ་ཞིབ་འཇུག་གི་ལས་ཀ་འདི་ལ་མཉམ་ཞུགས་བྱེད་དུ་བཅུག་ཡོད། ང་ཚོས་གོ་སྐབས་འདི་ཤོར་དུ་བཅུག་ན། ང་ཚོས་སླར་ཡང་གོ་སྐབས་འདི་འདྲ་ཞིག་འཐོབ་རྒྱུ་ཡིན་པ་བཤད་མི་ཐུབ། དམིགས་བསལ་གྱིས་ད་ལྟའི་མི་རྣམས་ཀྱི་མི་ཚེའི་ནང་དུ་གོ་སྐབས་འདི་འཐོབ་རྒྱུ་ཡིན་པ་བཤད་མི་ཐུབ་ཅེས་གསུངས་འདུག
ནིའུ་སའོ་ཐི་ཝལ་མངའ་སྡེས་ NSW གདོད་མའི་མི་རིགས་ཀྱི་བདེན་དོན་དང་ཆིངས་ཡིག་གི་བྱ་རིམ་གང་འདྲ་ཡིན་མིན་རྟོག་ཞིབ་བྱེད་མཁན་ཞིབ་དཔྱོད་ལྷན་ཚོགས་ཤིག་བཙུགས་ཡོད་ཀྱང་། མངའ་སྡེ་གཞན་དག་དང་བསྡུར་ན་ལས་དོན་དལ་མོ་ཆགས་ཀྱི་ཡོད་པ་རེད།
