សេចក្តីព្រមាន៖ មាតិកានេះអាចប៉ះពាល់ដល់អារម្មណ៍របស់លោកអ្នក
នៅប្រទេសអូស្ត្រាលី ស្ត្រីជាងពាក់កណ្តាលដែលកាន់ទិដ្ឋាការបណ្តោះអាសន្នត្រូវបានគេបៀតបៀនផ្លូវភេទនៅកន្លែងធ្វើការ។
យោងតាមការស្រាវជ្រាវថ្មីៗនេះដោយសហជីពញូសៅវែល “Unions NSW” មានតែ 25 ភាគរយ ប៉ុណ្ណោះ នៃស្ត្រីទាំងនោះ ដែលបានរាយការណ៍ពីការរំលោភបំពាន។
វិស័យសំណង់ បដិសណ្ឋារកិច្ច ដំណាំសាកវប្បកម្ម បោសសម្អាត និងការលក់រាយ ត្រូវបានចុះបញ្ជីថាជាឧស្សាហកម្មដែលអសុវត្ថិភាពបំផុត ដោយចៅហ្វាយនាយ និងអ្នកគ្រប់គ្រងគឺជាជនល្មើសទូទៅបំផុត។
ស្រ្តីជាច្រើនដែលបានរាយការណ៍ពីការយាយី រំលោភបំពាន ត្រូវបានដាក់ទោសដោយការសម្លុត bully ការកាត់ប្រាក់ឈ្នួល ការគំរាមកំហែងនៃការនិរទេស ឬការបញ្ឈប់ការងារ។
សាស្ត្រាចារ្យ Marie Segrave មកពីសាកលវិទ្យាល័យម៉ែលប៊ន ដែលធ្វើការស្រាវជ្រាវលើការរំលោភបំពានផ្លូវភេទមកលើស្រ្តីអន្តោប្រវេសន៍និងជនភៀសខ្លួនក្នុងប្រទេសអូស្រ្តាលី បាននិយាយថា ស្ត្រីភាគច្រើនមានអារម្មណ៍ថា សុវត្ថិភាពរបស់ពួកគេ នឹងកាន់តែមានហានិភ័យ នៅពេលគ្មានការងារធ្វើ។
ការភ័យខ្លាចបាត់បង់សន្តិសុខផ្នែកហិរញ្ញវត្ថុ ឬសិទ្ធិរស់នៅ នាំឱ្យស្រ្តីជាច្រើន "គ្រប់គ្រង" ការរំលោភបំពានមកលើពួកគេ ជាជាងរាយការណ៍។
ខណៈដែលរដ្ឋាភិបាល រួមជាមួយគណៈកម្មាធិការសិទ្ធិមនុស្សអូស្ត្រាលី កំពុងអនុវត្តច្បាប់ដើម្បីរក្សាការពារស្រ្តីឱ្យកាន់តែមានសុវត្ថិភាពនៅកន្លែងធ្វើការនោះ សាស្រ្តាចារ្យ Segrave បាននិយាយថា កំណែទម្រង់គឺគ្រាន់តែជាផ្នែកមួយនៃដំណោះស្រាយប៉ុណ្ណោះ។
“យើងត្រូវមានការគិតក្នុងវិធីសាស្រ្តដ៏ស្មុគ្រស្មាញជាងនេះ អំពីបទពិសោធន៍សុវត្ថិភាពរបស់ស្ត្រី គិតពីវិធីផ្សេងគ្នាអំពីការគាំទ្រស្ត្រី និងការបង្កើតសុវត្ថិភាពជុំវិញបញ្ហានេះ។”
ប្រសិនបើលោកអ្នក ឬនរណាម្នាក់ដែលលោកអ្នកស្គាល់ រងឥទ្ធិពលពីការបៀតបៀន ឬរំលោភបំពានផ្លូវភេទនោះ សូមទូរសព្ទទៅ1800RESPECT ឬចូលទៅកាន់៖ 1800respect.org.au។ ក្នុងករណីមានគ្រោះអាសន្ន សូមទូរសព្ទទៅលេខ 000៕
