Kuj tau kho tej cai tswj tej dej haus ntawm teb chaws Australia no lawm thiab kuj tau coj los sab laj nrog zej tsoom.
Tej cai tshiab no yuav tswj kom nruj tuaj ntxiv thiab tsuas teev tias pub muaj tej taug chemical uas muaj mus ib txhis hu ua PFAS no npaum li cas ntawm tej kais dej siv lawm xwb - raws li tau muaj ib cov xov xwm teeb txheeb tshiab thaib zejzog pej kum haiv tej cai uas siv coj los pov puag kom tib neeg tau txais kev noj qab nyob zoo.
Yeej tau siv tej PFAS txij lub caij xyoo 1950s los lawm, thiab raws li tej kev teeb txheeb thiab sim lawm ces pom tias muaj tej chemical no txog 14,000 hom uas paug tsuas rau tej ib puag ncig, thiab kuj muaj cov kev nkag siab zoo tshaj qub ntxiv tias tej taug chemical no ho yuav ua rau muaj teeb meem tsis tau txais kev noj qab nyob zoo rau tib neeg li cas.
Denis O'Carroll uas yog ib tug zeskais pab txog cov hauj lwm civil and environmental engineering ntawm tsev kawm qib siab New South Wales uas tau koom sau tsab ntawv cej luam ntawm cov kev teeb txheeb txog tej taug chemical uas muaj rau tej npoo dej, tej dej ntws, tej hav iav, tej tiaj nrab raug dej nyab los yog tej pas dej tauv khaws tej ntawm teb chaws Australia thiab thoob ntiaj teb no uas tau co los nthuav tawm ntawm phau ntawv xov xwm Nature Geoscience thaum ntxov xyoo no (2024) ces nws hais tias:
''Thaum peb txheeb pej kum haiv tej dej hauv av, saum npoo dej, tej dej ib txwm ntws uas muaj peev xwm siv, thiab tej dej uas coj mus lim kom huv kom muaj peev xwm haus tau ces pom tias muaj cov taug chemical PFAS no ntau heev thoob ntuj. Thiab muaj tej taug no ntau tshaj qhov zejzog pej kum haiv ntau lub teb chaws tau teev tseg.''
Professor Steve Wesselingh uas yog tus coj lub koom haum National Health and Medical Research Council thiaj hais tias yog txheeb txog pej kum haiv tej koom haum txawv teb chaws li US Environmental Protection Agency, Health Canada, the World Health Organization, thiab European Food Safety Authority lawm ces tam sim no thiaj yuav tau kho dua Australia tej cai tias tsuas tso cai pub muaj tej PFAS hauv tej dej haus npaum li cas xwb, thiab thiaj yuav tau kho dua Australia tej cai no tshiab.
Lub 12 hlis ntuj xyoo 2023 ces ntiaj teb lub koom haum tswj cov hauj lwm cancer yeej tau teev ib hom taug PFAS hu ua PFOA tias yog cov uas ''yuav ua rau mob tau cancer rau tib neeg.''
Professor Wesselingh thiaj hais tias ''Yog tias ib yam khoom twg yuav ua rau mob cancer, los yog tej zaum muaj pov thawj qhia tau tias yuav ua rau mob cancer, ces yuav tsum xyuas kom tsis txhob muaj yam taug/khoom ntawd hlo li lawm, los sis xyuas kom muaj tsawg npaum li tsawg tau. Yog tias peb pub muaj tej taug PFAS no kom tsawg tshaj qhov yuav tsim tau teeb meem lawm ces tej zaum kujyuav tsis muaj tej teeb meem thyroid, hlwb txha los yog cancer lawm thiab.''
Tom qab tau muaj xov xwm tshaj tawm tsis ntev no tias muaj tej taug chemical PFAS ntau ntawm qee lub pas dej ntawm xeev New South Wales ces thiaj ua rau Jon Dee uas yog tib tug neeg nyob ntawm Blue Mountain thiab yog ib tug neeg ua luam thiab povpuag tej ib puag ncig thiaj tau los teeb tsa lub koom haum Planet Ark thiab nws hais tias tej xo no ua rau tej neeg ntxhov siab heev.
''Thiaj ua rau peb poob rau tej xwm txheej uas muaj tej taug PFAS uas tsis paub yaj thiab nyob mus ib txhis hauv peb tej dej haus ntau tshaj qhov tau txais kev nyab xeeb lawm. Ua rau peb yuav taua siv nyiaj ntau pua mus txog ntau txheeb dollars los yuav tej twj lim dej siv. Ntxiv ntawd los peb tseem yuav tau them nqe siv dej lwm lwm tus thiab. Tab sis tej neeg ntawm Sydney uas uas haus tej dej ntawm lub pas dej Warragamba Dam tseem muaj tej PFAS tsawg tshaj tej dej peb haus ntawm Blue Mountain no txog li 300 npaug diam.''
Tej xwm txheej no thiaj ua rau nws tau tsim pawg neeg hu ua STOP PFASS, txawm tias nws zoo siab rau cov kev kho Australia tej water guidelines los nws hais tias 'yeej tseem ua tsis tau zoo txaus li txawv teb chaws ua li ua ntawm Canada thiab Meskas los yog Europe uas Canada tau teev tsis pub muaj cov taug 25 hom ntau hauv tej dej haus, thiab lub koom haum European Union los yeej xav teev tag nrho 14,000 cov taug PFAS no thiab.'
Tab sis zoo li Australia tsuas teev tias tsis pub muaj tej taug no 4 hom ntau rau hauv tej dej xwb. Txawm li cas los Professor O'Carroll yeej xav kom teev ntau yam PFAS ntxiv thiab.
Mr Dee thiaj hais tias ''Tsoom fwv xeev NSW tsis muaj peev xwm yuav ua tau ob yam li pheej hais tias tej dej haus tau txais kev nyab xeeb lawm, tab sis tseem muaj tej pov thawj qhia tias tej dej ntawm Blue Mountain muaj tej taug PFAS no ntau tshaj tej muaj ntawm Mesks tej dej txog 4 npaug diam. Ces thiaj pom tau tias tsoom fwv xeev NSW, lub koom haum Sydney Water thiab Water NSW dag tej neeg ntawm Blue Mountain tias tej dej lawv siv tau txais kev nyab xeeb, tab sis qhov tseeb tiag tsis yog li hais ntawd tiag.''
Tom qab uas Rose Jackson uas yog NSW tus nom tswj hauj lwm dej tau hais ib cov ncauj lug tias ''tag nrho tej dej uas lub koom haum Sydney Water thiab Hunter Water yeej ua raws li Australia tej cai Drinking Water Guidelines thiab yeej yog ib cov dej haus tau txais kev nyab xeeeb.''
Professor Tony Lawler uas yog tus tswj cov dej num noj qab haus huv ntawm lub tuam chav noj qab haus huv thiab tsom kwm tej laus (Australian Department of Health and Aged Care) thiaj hais tias tsoom fwv yeej tau tshwm nyiaj rau lub tsev kawm qib siab Australian National University mus teeb txheeb txog tej teeb meem yuav muaj tau los ntawm cov taug PFAS seb puas ua rau Australia tej zej zog tsis tau txais kev noj qab haus huv li cas lawm.
Ces kuj pom tau tias tau mus txheeb Australia 3 lub zos li 'Katherine ntawm Northern Territory, Oakey ntawm Queensland thiab William town ntawm New South Wales ces pom tau tias tej neeg ntawm tej zos uas tau mus ntsuam tej taug PFAS no yeej pom tau tias lawv yeej muaj kev nyuaj siab ntxhov plawv dua lwm cov zejzog.'
Ces thiaj tseem yuav pub lub sij hawm mus txog tim 22 lub 11 hli ntuj tom ntej no rau zej tsoom tawm tswv yim, thiab mam li coj cov kev taw qhia tshiab coj los qhia rau zej tsoom paub lub 4 hlis ntuj xyoo tom ntej (2025) no.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
