Raws li tau muaj ib co kev teeb txheeb tshiab ntawm lub koom haum Association of Superannuation Funds of Australia (ASFA) ib co kev teeb txheeb tshiab tau qhia ces tsuas muaj tej neeg Australia txog li 30 feem pua (2.5 millions tus neeg Australia ua hauj lwm) uas yuav so rau lub caij 10 ntxiv no thiaj yog cov neeg muaj nyiaj super txaus siv kom ua tau lub neej xws teb xws chaw xwb. Thiab txog rau xyoo 2050 mas thiaj mam li muaj neeg Australia txog li 50 feem pua los yog tshaj ntawd thiaj muaj nyiaj txaus siv ua tau lub neej tig tau cev yooj yim xwb.
Lub koom haum no hais tias tej nkawm niam txiv yuav tsum muaj nyiaj super txog li $690,000 thiab ib tug neeg ntiag tug twg yuav tsum muaj nyiaj super txog li $595,000 siv thaum so tsis ua hauj lwm lawm mas thiaj muaj peev xwm ua tau lub neej xws teb xws chaw. Piv txwv li yog muaj tej nyiaj li hais no thiaj tau nyiaj siv them tej nqe siv ua lub neej txhua hnub, mus noj ib plua hno ntawm tej khw noj mov qee zaus, thiab mus ncig txawv teb chaws 7 lub xyoo twg ib zaug.
Tab sis kuj pom tias tseem muaj cov kev khwv tsis tau tej nyiaj super no sib npaug ntawm tej poj niam thiab txiv neej tshaj 25 feem puas thiab, xws li tej neeg hnoob nyoog 60 xog 65 xyoos uas yuav so tsis ua hauj lwm ntawd ces tej txiv neej tsuas muaj nyiaj super tshaj $200,000 thiab tej poj niam ces tshua muaj tshaj $150,000 xwb.
Txawm li cas los kuj pom tias lub 6 hli ntuj xyoo 2022 ces yeej muaj 160,000 tus neeg tau muab lawv tej super account kaw lawm, thiab yeej tau muaj tej neeg txog li 1 million tus tej super account ces tsuas tshuav nyiaj super tsawg dua li $1,000 xwb rau lub caij uas tseem muaj tus kab mob COVID-19 sib kis ntawd.
Txawm li cas los nom tswv yeej tau qhia tsis ntev los no thiab tej xov xwm tau teev tseg rau nom tsoom fwv teb chaws lub tuam chav sau se yeej tau teev tseg tias yuav tso cai rau tej neeg rho tau nyiaj super coj mus zoj yuav thawj lub tsev nyob, coj mus siv kho mob yog tau tus mob kho tsis zoo lawm, coj mus kho tsev los yog kho tsheb pab rau ib tug neeg puas cev, los yog rho coj mus kho mob rau tej laus neeg uas mob ntev thiab xav tau txais kev pab, los yog rho tau coj mus them tej nqe them yuav tsev kom tej txhab nyiaj tsis txhob muab yus lub tsev yuam muag yog yus tsis tshua muaj peev xwm them tau rov qab.
Yog li ntawd Mary Delahunty uas yog tus coj ntawm lub koom haum ASFA thiaj hais tias kom nom tswv yuav tau xyuas kom tej neeg tau nyiaj super ntau ntxiv tuaj li: ''Thawj yam ces xyuas kom them cov nyiaj paid parental leave rau tej niam txiv yug me nyuam tshiab, ob tuaj ntxiv ces yuav tau siv cov kev sau se uas tau txais kev ncaj ncees dua rau tej neeg khwv tau nyiaj tsawg. Thiab yuav tau ua tib zoo xyuas kom tej neeg tsis txhob muaj peev xwm rho tau lawv tej nyiaj super uas npaj siv rau thaum so tsis ua hauj lwm ntawd coj mus siv thaum ntxov lawm.''
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
