Cov ntsiab lus tseem ceeb:
- Cov laus neeg so tsis ua hauj lwm, cov neeg puas cev nrog rau cov neeg tu lwm tus yog cov neeg yuav tau nyiaj welfare payment ntau ntxiv tuaj
- Cov neeg li hais no yuav tau $20 dollars rau 2 lub limtiam twg
- Yuav tau cov nyiaj welfare payment no txij hnub tim 20 lub 3 hlis ntuj no mus
Australia cov laus neeg uas so tsis ua hauj lwm lawm, cov nyiaj pab cuam rau cov neeg puas cev uas so tsis ua hauj lwm lawm thiab cov neeg uas tu tsom kwm lwm tus yog cov neeg uas yuav tau cov nyiaj welfare payment 2 lub limtiam twg txog li $20 ntau tuaj ntxiv pib txij li hnub tim 20 lub 3 hlis ntuj xyoo 2022 no mus lawm, kom thiaj tau nyiaj txaus coj los siv vim nyiaj poob nqe lawm.
Txhais tau tias cov nyiaj pab cuam $20.10 no ntau tuaj ntxiv rau 2 limtiam no no yuav ua rau ib tug neeg ntiag tug twg tau txog li $987.60 thiab tau $30.20 ntau tuaj ntxiv rau ib nkawm niam txiv ces yuav tau nyiaj ua ke txog li $1,488.80 rau lub sij hawm 2 limtiam.
Tej txij nkawm uas yuav tsev ua lawv tug yuav pom tias yog lawv lub tsev tau nqe zoo tuaj ntxiv txog li $10,000 ua rau lawv lub tsev muaj nqe txog li $901,500 lawm.
Ces thiaj ua rau muaj neeg Australia yuav laug txog li 5 million tus yuav tau cov nyiaj uas them 3 zaug no.
Anne Ruston uas yog tus nom lis dej num pab zej tsoom hais tias vim nyiaj poob nqe lawm, 'ces thiaj yuav pab cov nyiaj no rau tej neeg uas tau txais peb kev pab cuam."
Tsis tas li no los txij li lub limtiam tom ntej no mus kuj yuav tau nyiaj pab ntiav tsev nyob li $3 dollars rau 2 limtiam twg uas yuav ua rau tej neeg ntiag tug ib tug twg tau nyiaj txog li $145.80 thiab tau $3.50 rau cov cuab yig muaj txog li 2 tug me nyuam ces tau $171.50 rau lub sij hawm 2 limtiam. Thiab tau $3.92 rau 2 limtiam twg ntxiv los yog tau $193.62 rau tej cuab yig uas muaj 3 tug me nyuam los yog muaj coob tshaj ntawd.
Social Services Minister Anne Ruston - LUKAS COCH - AAP IMAGE Source: AAP Image
Yeej tau muaj cov kev nqua hu kom nce nyiaj pab cuam disability support pension (DSP) li $100 rau 2 limtiam twg kom thiaj pab tej neeg no ua tau lub neej zoo zog tuaj, uas sai sai no ces tsuas tau txog $987.60 uas tseem tau tsawg tshaj tej nyiaj uas khwv tau nrab ntawm haiv neeg no rau 2 limtiam uas yog $1,545.
Lub hli dhau los uas tau muaj nom tswv lub tsev kis xeev siab tau txheeb xyuas txog cov nyiaj coj los pab tej neeg uas tau cov kev pab cuam no - los yog yuav ua rau lawv txom nyem lawm.
Tsoom fwv Morrison tseem yuav txiav txim siab tias seb puas yuav siv lwm cov tswv yim li cas coj los pab tej lagluam tom qab ntxeem dhau tus kab mob COVID-19 thiab seb ho yuav ua li cas vim tej tsov rog ntawm Ukraine uas tau ua rau nyiaj poob nqe thiab nqe roj kim tuaj ntxiv li cas los pab kom neeg Australia tsis txhob ntsib teeb meem nyuaj rau tej nqe ua ua lub neej.
rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm ,, , thiab los yog download kom koj mloog tau SBS Hmong.
